𑌅𑌸𑍍𑌯 𑌶𑍍𑌰𑍀 𑌮𑌹𑌾𑌲𑌕𑍍𑌷𑍍𑌮𑍀𑌹𑍃𑌦𑌯𑌸𑍍𑌤𑍋𑌤𑍍𑌰 𑌮𑌹𑌾𑌮𑌂𑌤𑍍𑌰𑌸𑍍𑌯 𑌭𑌾𑌰𑍍𑌗𑌵 𑌋𑌷𑌿𑌃, 𑌅𑌨𑍁𑌷𑍍𑌟𑍁𑌪𑌾𑌦𑍀𑌨𑌿 𑌨𑌾𑌨𑌾𑌛𑌂𑌦𑌾𑌂𑌸𑌿, 𑌆𑌦𑍍𑌯𑌾𑌦𑌿 𑌶𑍍𑌰𑍀𑌮𑌹𑌾𑌲𑌕𑍍𑌷𑍍𑌮𑍀𑌰𑍍𑌦𑍇𑌵𑌤𑌾, 𑌶𑍍𑌰𑍀𑌂 𑌬𑍀𑌜𑌂, 𑌹𑍍𑌰𑍀𑌂 𑌶𑌕𑍍𑌤𑌿𑌃, 𑌐𑌂 𑌕𑍀𑌲𑌕𑌂, 𑌆𑌦𑍍𑌯𑌾𑌦𑌿𑌮𑌹𑌾𑌲𑌕𑍍𑌷𑍍𑌮𑍀 𑌪𑍍𑌰𑌸𑌾𑌦𑌸𑌿𑌦𑍍𑌧𑍍𑌯𑌰𑍍𑌥𑌂 𑌜𑌪𑍇 𑌵𑌿𑌨𑌿𑌯𑍋𑌗𑌃 ॥

𑌋𑌷𑍍𑌯𑌾𑌦𑌿𑌨𑍍𑌯𑌾𑌸𑌃 –
𑌓𑌂 𑌭𑌾𑌰𑍍𑌗𑌵𑍃𑌷𑌯𑍇 𑌨𑌮𑌃 𑌶𑌿𑌰𑌸𑌿 ।
𑌓𑌂 𑌅𑌨𑍁𑌷𑍍𑌟𑍁𑌪𑌾𑌦𑌿𑌨𑌾𑌨𑌾𑌛𑌂𑌦𑍋𑌭𑍍𑌯𑍋 𑌨𑌮𑍋 𑌮𑍁𑌖𑍇 ।
𑌓𑌂 𑌆𑌦𑍍𑌯𑌾𑌦𑌿𑌶𑍍𑌰𑍀𑌮𑌹𑌾𑌲𑌕𑍍𑌷𑍍𑌮𑍀 𑌦𑍇𑌵𑌤𑌾𑌯𑍈 𑌨𑌮𑍋 𑌹𑍃𑌦𑌯𑍇 ।
𑌓𑌂 𑌶𑍍𑌰𑍀𑌂 𑌬𑍀𑌜𑌾𑌯 𑌨𑌮𑍋 𑌗𑍁𑌹𑍍𑌯𑍇 ।
𑌓𑌂 𑌹𑍍𑌰𑍀𑌂 𑌶𑌕𑍍𑌤𑌯𑍇 𑌨𑌮𑌃 𑌪𑌾𑌦𑌯𑍋𑌃 ।
𑌓𑌂 𑌐𑌂 𑌕𑍀𑌲𑌕𑌾𑌯 𑌨𑌮𑍋 𑌨𑌾𑌭𑍌 ।
𑌓𑌂 𑌵𑌿𑌨𑌿𑌯𑍋𑌗𑌾𑌯 𑌨𑌮𑌃 𑌸𑌰𑍍𑌵𑌾𑌂𑌗𑍇 ।

𑌕𑌰𑌨𑍍𑌯𑌾𑌸𑌃 –
𑌓𑌂 𑌶𑍍𑌰𑍀𑌂 𑌅𑌂𑌗𑍁𑌷𑍍𑌠𑌾𑌭𑍍𑌯𑌾𑌂 𑌨𑌮𑌃 ।
𑌓𑌂 𑌹𑍍𑌰𑍀𑌂 𑌤𑌰𑍍𑌜𑌨𑍀𑌭𑍍𑌯𑌾𑌂 𑌨𑌮𑌃 ।
𑌓𑌂 𑌐𑌂 𑌮𑌧𑍍𑌯𑌮𑌾𑌭𑍍𑌯𑌾𑌂 𑌨𑌮𑌃 ।
𑌓𑌂 𑌶𑍍𑌰𑍀𑌂 𑌅𑌨𑌾𑌮𑌿𑌕𑌾𑌭𑍍𑌯𑌾𑌂 𑌨𑌮𑌃 ।
𑌓𑌂 𑌹𑍍𑌰𑍀𑌂 𑌕𑌨𑌿𑌷𑍍𑌠𑌿𑌕𑌾𑌭𑍍𑌯𑌾𑌂 𑌨𑌮𑌃 ।
𑌓𑌂 𑌐𑌂 𑌕𑌰𑌤𑌲 𑌕𑌰𑌪𑍃𑌷𑍍𑌠𑌾𑌭𑍍𑌯𑌾𑌂 𑌨𑌮𑌃 ।

𑌅𑌂𑌗𑌨𑍍𑌯𑌾𑌸𑌃 –
𑌓𑌂 𑌶𑍍𑌰𑍀𑌂 𑌹𑍃𑌦𑌯𑌾𑌯 𑌨𑌮𑌃 ।
𑌓𑌂 𑌹𑍍𑌰𑍀𑌂 𑌶𑌿𑌰𑌸𑍇 𑌸𑍍𑌵𑌾𑌹𑌾 ।
𑌓𑌂 𑌐𑌂 𑌶𑌿𑌖𑌾𑌯𑍈 𑌵𑌷𑌟𑍍 ।
𑌓𑌂 𑌶𑍍𑌰𑍀𑌂 𑌕𑌵𑌚𑌾𑌯 𑌹𑍁𑌮𑍍 ।
𑌓𑌂 𑌹𑍍𑌰𑍀𑌂 𑌨𑍇𑌤𑍍𑌰𑌤𑍍𑌰𑌯𑌾𑌯 𑌵𑍌𑌷𑌟𑍍 ।
𑌓𑌂 𑌐𑌂 𑌅𑌸𑍍𑌤𑍍𑌰𑌾𑌯 𑌫𑌟𑍍 ।
𑌓𑌂 𑌶𑍍𑌰𑍀𑌂 𑌹𑍍𑌰𑍀𑌂 𑌐𑌂 𑌇𑌤𑌿 𑌦𑌿𑌗𑍍𑌬𑌂𑌧𑌃 ।

𑌅𑌥 𑌧𑍍𑌯𑌾𑌨𑌮𑍍 ।
𑌹𑌸𑍍𑌤𑌦𑍍𑌵𑌯𑍇𑌨 𑌕𑌮𑌲𑍇 𑌧𑌾𑌰𑌯𑌂𑌤𑍀𑌂 𑌸𑍍𑌵𑌲𑍀𑌲𑌯𑌾 ।
𑌹𑌾𑌰𑌨𑍂𑌪𑍁𑌰𑌸𑌂𑌯𑍁𑌕𑍍𑌤𑌾𑌂 𑌲𑌕𑍍𑌷𑍍𑌮𑍀𑌂 𑌦𑍇𑌵𑍀𑌂 𑌵𑌿𑌚𑌿𑌂𑌤𑌯𑍇 ॥

𑌕𑍌𑌶𑍇𑌯𑌪𑍀𑌤𑌵𑌸𑌨𑌾𑌮𑌰𑌵𑌿𑌂𑌦𑌨𑍇𑌤𑍍𑌰𑌾𑌂
𑌪𑌦𑍍𑌮𑌦𑍍𑌵𑌯𑌾𑌭𑌯𑌵𑌰𑍋𑌦𑍍𑌯𑌤𑌪𑌦𑍍𑌮𑌹𑌸𑍍𑌤𑌾𑌮𑍍 ।
𑌉𑌦𑍍𑌯𑌚𑍍𑌛𑌤𑌾𑌰𑍍𑌕𑌸𑌦𑍃𑌶𑍀𑌂 𑌪𑌰𑌮𑌾𑌂𑌕𑌸𑌂𑌸𑍍𑌥𑌾𑌂
𑌧𑍍𑌯𑌾𑌯𑍇𑌦𑍍𑌵𑌿𑌧𑍀𑌶𑌨𑌤𑌪𑌾𑌦𑌯𑍁𑌗𑌾𑌂 𑌜𑌨𑌿𑌤𑍍𑌰𑍀𑌮𑍍 ॥

𑌪𑍀𑌤𑌵𑌸𑍍𑌤𑍍𑌰𑌾𑌂 𑌸𑍁𑌵𑌰𑍍𑌣𑌾𑌂𑌗𑍀𑌂 𑌪𑌦𑍍𑌮𑌹𑌸𑍍𑌤𑌦𑍍𑌵𑌾𑌯𑌾𑌨𑍍𑌵𑌿𑌤𑌾𑌮𑍍 ।
𑌲𑌕𑍍𑌷𑍍𑌮𑍀𑌂 𑌧𑍍𑌯𑌾𑌤𑍍𑌵𑍇𑌤𑌿 𑌮𑌂𑌤𑍍𑌰𑍇𑌣 𑌸 𑌭𑌵𑍇𑌤𑍍𑌪𑍃𑌥𑌿𑌵𑍀𑌪𑌤𑌿𑌃 ॥
𑌮𑌾𑌤𑍁𑌲𑍁𑌂𑌗𑌂 𑌗𑌦𑌾𑌂 𑌖𑍇𑌟𑌂 𑌪𑌾𑌣𑍌 𑌪𑌾𑌤𑍍𑌰𑌂 𑌚 𑌬𑌿𑌭𑍍𑌰𑌤𑍀 ।
𑌨𑌾𑌗𑌂 𑌲𑌿𑌂𑌗𑌂 𑌚 𑌯𑍋𑌨𑌿𑌂 𑌚 𑌬𑌿𑌭𑍍𑌰𑌤𑍀𑌂 𑌚𑍈𑌵 𑌮𑍂𑌰𑍍𑌧𑌨𑌿 ॥

[ 𑌇𑌤𑌿 𑌧𑍍𑌯𑌾𑌤𑍍𑌵𑌾 𑌮𑌾𑌨𑌸𑍋𑌪𑌚𑌾𑌰𑍈𑌃 𑌸𑌂𑌪𑍂𑌜𑍍𑌯 ।
𑌶𑌂𑌖𑌚𑌕𑍍𑌰𑌗𑌦𑌾𑌹𑌸𑍍𑌤𑍇 𑌶𑍁𑌭𑍍𑌰𑌵𑌰𑍍𑌣𑍇 𑌸𑍁𑌵𑌾𑌸𑌿𑌨𑍀 ।
𑌮𑌮 𑌦𑍇𑌹𑌿 𑌵𑌰𑌂 𑌲𑌕𑍍𑌷𑍍𑌮𑍀𑌃 𑌸𑌰𑍍𑌵𑌸𑌿𑌦𑍍𑌧𑌿𑌪𑍍𑌰𑌦𑌾𑌯𑌿𑌨𑍀 ।
𑌇𑌤𑌿 𑌸𑌂𑌪𑍍𑌰𑌾𑌰𑍍𑌥𑍍𑌯 𑌓𑌂 𑌶𑍍𑌰𑍀𑌂 𑌹𑍍𑌰𑍀𑌂 𑌐𑌂 𑌮𑌹𑌾𑌲𑌕𑍍𑌷𑍍𑌮𑍍𑌯𑍈 𑌕𑌮𑌲𑌧𑌾𑌰𑌿𑌣𑍍𑌯𑍈 𑌸𑌿𑌂𑌹𑌵𑌾𑌹𑌿𑌨𑍍𑌯𑍈 𑌸𑍍𑌵𑌾𑌹𑌾 𑌇𑌤𑌿 𑌮𑌂𑌤𑍍𑌰𑌂 𑌜𑌪𑍍𑌤𑍍𑌵𑌾 𑌪𑍁𑌨𑌃 𑌪𑍂𑌰𑍍𑌵𑌵𑌦𑍍𑌧𑍃𑌦𑌯𑌾𑌦𑌿 𑌷𑌡𑌂𑌗𑌨𑍍𑌯𑌾𑌸𑌂 𑌕𑍃𑌤𑍍𑌵𑌾 𑌸𑍍𑌤𑍋𑌤𑍍𑌰𑌂 𑌪𑌠𑍇𑌤𑍍 । ]

𑌸𑍍𑌤𑍋𑌤𑍍𑌰𑌮𑍍 ।
𑌵𑌂𑌦𑍇 𑌲𑌕𑍍𑌷𑍍𑌮𑍀𑌂 𑌪𑌰𑌮𑌶𑌿𑌵𑌮𑌯𑍀𑌂 𑌶𑍁𑌦𑍍𑌧𑌜𑌾𑌂𑌬𑍂𑌨𑌦𑌾𑌭𑌾𑌂
𑌤𑍇𑌜𑍋𑌰𑍂𑌪𑌾𑌂 𑌕𑌨𑌕𑌵𑌸𑌨𑌾𑌂 𑌸𑌰𑍍𑌵𑌭𑍂𑌷𑍋𑌜𑍍𑌜𑍍𑌵𑌲𑌾𑌂𑌗𑍀𑌮𑍍 ।
𑌬𑍀𑌜𑌾𑌪𑍂𑌰𑌂 𑌕𑌨𑌕𑌕𑌲𑌶𑌂 𑌹𑍇𑌮𑌪𑌦𑍍𑌮𑌂 𑌦𑌧𑌾𑌨𑌾-
-𑌮𑌾𑌦𑍍𑌯𑌾𑌂 𑌶𑌕𑍍𑌤𑌿𑌂 𑌸𑌕𑌲𑌜𑌨𑌨𑍀𑌂 𑌵𑌿𑌷𑍍𑌣𑍁𑌵𑌾𑌮𑌾𑌂𑌕𑌸𑌂𑌸𑍍𑌥𑌾𑌮𑍍 ॥ 1 ॥

𑌶𑍍𑌰𑍀𑌮𑌤𑍍𑌸𑍌𑌭𑌾𑌗𑍍𑌯𑌜𑌨𑌨𑍀𑌂 𑌸𑍍𑌤𑍌𑌮𑌿 𑌲𑌕𑍍𑌷𑍍𑌮𑍀𑌂 𑌸𑌨𑌾𑌤𑌨𑍀𑌮𑍍 ।
𑌸𑌰𑍍𑌵𑌕𑌾𑌮𑌫𑌲𑌾𑌵𑌾𑌪𑍍𑌤𑌿𑌸𑌾𑌧𑌨𑍈𑌕𑌸𑍁𑌖𑌾𑌵𑌹𑌾𑌮𑍍 ॥ 2 ॥

𑌸𑍍𑌮𑌰𑌾𑌮𑌿 𑌨𑌿𑌤𑍍𑌯𑌂 𑌦𑍇𑌵𑍇𑌶𑌿 𑌤𑍍𑌵𑌯𑌾 𑌪𑍍𑌰𑍇𑌰𑌿𑌤𑌮𑌾𑌨𑌸𑌃 ।
𑌤𑍍𑌵𑌦𑌾𑌜𑍍𑌞𑌾𑌂 𑌶𑌿𑌰𑌸𑌾 𑌧𑍃𑌤𑍍𑌵𑌾 𑌭𑌜𑌾𑌮𑌿 𑌪𑌰𑌮𑍇𑌶𑍍𑌵𑌰𑍀𑌮𑍍 ॥ 3 ॥

𑌸𑌮𑌸𑍍𑌤𑌸𑌂𑌪𑌤𑍍𑌸𑍁𑌖𑌦𑌾𑌂 𑌮𑌹𑌾𑌶𑍍𑌰𑌿𑌯𑌂
𑌸𑌮𑌸𑍍𑌤𑌸𑍌𑌭𑌾𑌗𑍍𑌯𑌕𑌰𑍀𑌂 𑌮𑌹𑌾𑌶𑍍𑌰𑌿𑌯𑌮𑍍 ।
𑌸𑌮𑌸𑍍𑌤𑌕𑌳𑍍𑌯𑌾𑌣𑌕𑌰𑍀𑌂 𑌮𑌹𑌾𑌶𑍍𑌰𑌿𑌯𑌂
𑌭𑌜𑌾𑌮𑍍𑌯𑌹𑌂 𑌜𑍍𑌞𑌾𑌨𑌕𑌰𑍀𑌂 𑌮𑌹𑌾𑌶𑍍𑌰𑌿𑌯𑌮𑍍 ॥ 4 ॥

𑌵𑌿𑌜𑍍𑌞𑌾𑌨𑌸𑌂𑌪𑌤𑍍𑌸𑍁𑌖𑌦𑌾𑌂 𑌸𑌨𑌾𑌤𑌨𑍀𑌂
𑌵𑌿𑌚𑌿𑌤𑍍𑌰𑌵𑌾𑌗𑍍𑌭𑍂𑌤𑌿𑌕𑌰𑍀𑌂 𑌮𑌨𑍋𑌹𑌰𑌾𑌮𑍍 ।
𑌅𑌨𑌂𑌤𑌸𑌂𑌮𑍋𑌦𑌸𑍁𑌖𑌪𑍍𑌰𑌦𑌾𑌯𑌿𑌨𑍀𑌂
𑌨𑌮𑌾𑌮𑍍𑌯𑌹𑌂 𑌭𑍂𑌤𑌿𑌕𑌰𑍀𑌂 𑌹𑌰𑌿𑌪𑍍𑌰𑌿𑌯𑌾𑌮𑍍 ॥ 5 ॥

𑌸𑌮𑌸𑍍𑌤𑌭𑍂𑌤𑌾𑌂𑌤𑌰𑌸𑌂𑌸𑍍𑌥𑌿𑌤𑌾 𑌤𑍍𑌵𑌂
𑌸𑌮𑌸𑍍𑌤𑌭𑍋𑌕𑍍𑌤𑍍𑌰𑍀𑌶𑍍𑌵𑌰𑌿 𑌵𑌿𑌶𑍍𑌵𑌰𑍂𑌪𑍇 ।
𑌤𑌨𑍍𑌨𑌾𑌸𑍍𑌤𑌿 𑌯𑌤𑍍𑌤𑍍𑌵𑌦𑍍𑌵𑍍𑌯𑌤𑌿𑌰𑌿𑌕𑍍𑌤𑌵𑌸𑍍𑌤𑍁
𑌤𑍍𑌵𑌤𑍍𑌪𑌾𑌦𑌪𑌦𑍍𑌮𑌂 𑌪𑍍𑌰𑌣𑌮𑌾𑌮𑍍𑌯𑌹𑌂 𑌶𑍍𑌰𑍀𑌃 ॥ 6 ॥

𑌦𑌾𑌰𑌿𑌦𑍍𑌰𑍍𑌯 𑌦𑍁𑌃𑌖𑍌𑌘𑌤𑌮𑍋𑌪𑌹𑌂𑌤𑍍𑌰𑍀
𑌤𑍍𑌵𑌤𑍍𑌪𑌾𑌦𑌪𑌦𑍍𑌮𑌂 𑌮𑌯𑌿 𑌸𑌨𑍍𑌨𑌿𑌧𑌤𑍍𑌸𑍍𑌵 ।
𑌦𑍀𑌨𑌾𑌰𑍍𑌤𑌿𑌵𑌿𑌚𑍍𑌛𑍇𑌦𑌨𑌹𑍇𑌤𑍁𑌭𑍂𑌤𑍈𑌃
𑌕𑍃𑌪𑌾𑌕𑌟𑌾𑌕𑍍𑌷𑍈𑌰𑌭𑌿𑌷𑌿𑌂𑌚 𑌮𑌾𑌂 𑌶𑍍𑌰𑍀𑌃 ॥ 𑍭 ॥

𑌅𑌂𑌬 𑌪𑍍𑌰𑌸𑍀𑌦 𑌕𑌰𑍁𑌣𑌾𑌸𑍁𑌧𑌯𑌾𑌰𑍍𑌦𑍍𑌰𑌦𑍃𑌷𑍍𑌟𑍍𑌯𑌾
𑌮𑌾𑌂 𑌤𑍍𑌵𑌤𑍍𑌕𑍃𑌪𑌾𑌦𑍍𑌰𑌵𑌿𑌣𑌗𑍇𑌹𑌮𑌿𑌮𑌂 𑌕𑍁𑌰𑍁𑌷𑍍𑌵 ।
𑌆𑌲𑍋𑌕𑌯 𑌪𑍍𑌰𑌣𑌤𑌹𑍃𑌦𑍍𑌗𑌤𑌶𑍋𑌕𑌹𑌂𑌤𑍍𑌰𑍀
𑌤𑍍𑌵𑌤𑍍𑌪𑌾𑌦𑌪𑌦𑍍𑌮𑌯𑍁𑌗𑌳𑌂 𑌪𑍍𑌰𑌣𑌮𑌾𑌮𑍍𑌯𑌹𑌂 𑌶𑍍𑌰𑍀𑌃 ॥ 𑍮 ॥

𑌶𑌾𑌂𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌶𑌰𑌣𑌾𑌗𑌤𑌰𑌕𑍍𑌷𑌣𑌾𑌯𑍈
𑌕𑌾𑌂𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌕𑌮𑌨𑍀𑌯𑌗𑍁𑌣𑌾𑌶𑍍𑌰𑌯𑌾𑌯𑍈 ।
𑌕𑍍𑌷𑌾𑌂𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌦𑍁𑌰𑌿𑌤𑌕𑍍𑌷𑌯𑌕𑌾𑌰𑌣𑌾𑌯𑍈
𑌦𑌾𑌤𑍍𑌰𑍍𑌯𑍈 𑌨𑌮𑍋𑌽𑌸𑍍𑌤𑍁 𑌧𑌨𑌧𑌾𑌨𑍍𑌯𑌸𑌮𑍃𑌦𑍍𑌧𑌿𑌦𑌾𑌯𑍈 ॥ 𑍯 ॥

𑌶𑌕𑍍𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌶𑌶𑌿𑌶𑍇𑌖𑌰𑌸𑌂𑌸𑍍𑌤𑍁𑌤𑌾𑌯𑍈
𑌰𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌰𑌜𑌨𑍀𑌕𑌰𑌸𑍋𑌦𑌰𑌾𑌯𑍈 ।
𑌭𑌕𑍍𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌭𑌵𑌸𑌾𑌗𑌰𑌤𑌾𑌰𑌕𑌾𑌯𑍈
𑌮𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌮𑌧𑍁𑌸𑍂𑌦𑌨𑌵𑌲𑍍𑌲𑌭𑌾𑌯𑍈 ॥ 10 ॥

𑌲𑌕𑍍𑌷𑍍𑌮𑍍𑌯𑍈 𑌨𑌮𑍋𑌽𑌸𑍍𑌤𑍁 𑌶𑍁𑌭𑌲𑌕𑍍𑌷𑌣𑌲𑌕𑍍𑌷𑌿𑌤𑌾𑌯𑍈
𑌸𑌿𑌦𑍍𑌧𑍍𑌯𑍈 𑌨𑌮𑍋𑌽𑌸𑍍𑌤𑍁 𑌶𑌿𑌵𑌸𑌿𑌦𑍍𑌧𑌸𑍁𑌪𑍂𑌜𑌿𑌤𑌾𑌯𑍈 ।
𑌧𑍃𑌤𑍍𑌯𑍈 𑌨𑌮𑍋𑌽𑌸𑍍𑌤𑍍𑌵𑌮𑌿𑌤𑌦𑍁𑌰𑍍𑌗𑌤𑌿𑌭𑌂𑌜𑌨𑌾𑌯𑍈
𑌗𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌵𑌰𑌸𑌦𑍍𑌗𑌤𑌿𑌦𑌾𑌯𑌿𑌕𑌾𑌯𑍈 ॥ 11 ॥

𑌦𑍇𑌵𑍍𑌯𑍈 𑌨𑌮𑍋𑌽𑌸𑍍𑌤𑍁 𑌦𑌿𑌵𑌿 𑌦𑍇𑌵𑌗𑌣𑌾𑌰𑍍𑌚𑌿𑌤𑌾𑌯𑍈
𑌭𑍂𑌤𑍍𑌯𑍈 𑌨𑌮𑍋𑌽𑌸𑍍𑌤𑍁 𑌭𑍁𑌵𑌨𑌾𑌰𑍍𑌤𑌿𑌵𑌿𑌨𑌾𑌶𑌨𑌾𑌯𑍈 ।
𑌧𑌾𑌤𑍍𑌰𑍍𑌯𑍈 𑌨𑌮𑍋𑌽𑌸𑍍𑌤𑍁 𑌧𑌰𑌣𑍀𑌧𑌰𑌵𑌲𑍍𑌲𑌭𑌾𑌯𑍈
𑌪𑍁𑌷𑍍𑌟𑍍𑌯𑍈 𑌨𑌮𑍋𑌽𑌸𑍍𑌤𑍁 𑌪𑍁𑌰𑍁𑌷𑍋𑌤𑍍𑌤𑌮𑌵𑌲𑍍𑌲𑌭𑌾𑌯𑍈 ॥ 12 ॥

𑌸𑍁𑌤𑍀𑌵𑍍𑌰𑌦𑌾𑌰𑌿𑌦𑍍𑌰𑍍𑌯𑌵𑌿𑌦𑍁𑌃𑌖𑌹𑌂𑌤𑍍𑌰𑍍𑌯𑍈
𑌨𑌮𑍋𑌽𑌸𑍍𑌤𑍁 𑌤𑍇 𑌸𑌰𑍍𑌵𑌭𑌯𑌾𑌪𑌹𑌂𑌤𑍍𑌰𑍍𑌯𑍈 ।
𑌶𑍍𑌰𑍀𑌵𑌿𑌷𑍍𑌣𑍁𑌵𑌕𑍍𑌷𑌃𑌸𑍍𑌥𑌲𑌸𑌂𑌸𑍍𑌥𑌿𑌤𑌾𑌯𑍈
𑌨𑌮𑍋 𑌨𑌮𑌃 𑌸𑌰𑍍𑌵𑌵𑌿𑌭𑍂𑌤𑌿𑌦𑌾𑌯𑍈 ॥ 13 ॥

𑌜𑌯𑌤𑍁 𑌜𑌯𑌤𑍁 𑌲𑌕𑍍𑌷𑍍𑌮𑍀𑌰𑍍𑌲𑌕𑍍𑌷𑌣𑌾𑌲𑌂𑌕𑍃𑌤𑌾𑌂𑌗𑍀
𑌜𑌯𑌤𑍁 𑌜𑌯𑌤𑍁 𑌪𑌦𑍍𑌮𑌾 𑌪𑌦𑍍𑌮𑌸𑌦𑍍𑌮𑌾𑌭𑌿𑌵𑌂𑌦𑍍𑌯𑌾 ।
𑌜𑌯𑌤𑍁 𑌜𑌯𑌤𑍁 𑌵𑌿𑌦𑍍𑌯𑌾 𑌵𑌿𑌷𑍍𑌣𑍁𑌵𑌾𑌮𑌾𑌂𑌕𑌸𑌂𑌸𑍍𑌥𑌾
𑌜𑌯𑌤𑍁 𑌜𑌯𑌤𑍁 𑌸𑌮𑍍𑌯𑌕𑍍𑌸𑌰𑍍𑌵𑌸𑌂𑌪𑌤𑍍𑌕𑌰𑍀 𑌶𑍍𑌰𑍀𑌃 ॥ 14 ॥

𑌜𑌯𑌤𑍁 𑌜𑌯𑌤𑍁 𑌦𑍇𑌵𑍀 𑌦𑍇𑌵𑌸𑌂𑌘𑌾𑌭𑌿𑌪𑍂𑌜𑍍𑌯𑌾
𑌜𑌯𑌤𑍁 𑌜𑌯𑌤𑍁 𑌭𑌦𑍍𑌰𑌾 𑌭𑌾𑌰𑍍𑌗𑌵𑍀 𑌭𑌾𑌗𑍍𑌯𑌰𑍂𑌪𑌾 ।
𑌜𑌯𑌤𑍁 𑌜𑌯𑌤𑍁 𑌨𑌿𑌤𑍍𑌯𑌾 𑌨𑌿𑌰𑍍𑌮𑌲𑌜𑍍𑌞𑌾𑌨𑌵𑍇𑌦𑍍𑌯𑌾
𑌜𑌯𑌤𑍁 𑌜𑌯𑌤𑍁 𑌸𑌤𑍍𑌯𑌾 𑌸𑌰𑍍𑌵𑌭𑍂𑌤𑌾𑌂𑌤𑌰𑌸𑍍𑌥𑌾 ॥ 15 ॥

𑌜𑌯𑌤𑍁 𑌜𑌯𑌤𑍁 𑌰𑌮𑍍𑌯𑌾 𑌰𑌤𑍍𑌨𑌗𑌰𑍍𑌭𑌾𑌂𑌤𑌰𑌸𑍍𑌥𑌾
𑌜𑌯𑌤𑍁 𑌜𑌯𑌤𑍁 𑌶𑍁𑌦𑍍𑌧𑌾 𑌶𑍁𑌦𑍍𑌧𑌜𑌾𑌂𑌬𑍂𑌨𑌦𑌾𑌭𑌾 ।
𑌜𑌯𑌤𑍁 𑌜𑌯𑌤𑍁 𑌕𑌾𑌂𑌤𑌾 𑌕𑌾𑌂𑌤𑌿𑌮𑌦𑍍𑌭𑌾𑌸𑌿𑌤𑌾𑌂𑌗𑍀
𑌜𑌯𑌤𑍁 𑌜𑌯𑌤𑍁 𑌶𑌾𑌂𑌤𑌾 𑌶𑍀𑌘𑍍𑌰𑌮𑌾𑌗𑌚𑍍𑌛 𑌸𑍌𑌮𑍍𑌯𑍇 ॥ 16 ॥

𑌯𑌸𑍍𑌯𑌾𑌃 𑌕𑌲𑌾𑌯𑌾𑌃 𑌕𑌮𑌲𑍋𑌦𑍍𑌭𑌵𑌾𑌦𑍍𑌯𑌾
𑌰𑍁𑌦𑍍𑌰𑌾𑌶𑍍𑌚 𑌶𑌕𑍍𑌰 𑌪𑍍𑌰𑌮𑍁𑌖𑌾𑌶𑍍𑌚 𑌦𑍇𑌵𑌾𑌃 ।
𑌜𑍀𑌵𑌂𑌤𑌿 𑌸𑌰𑍍𑌵𑍇𑌽𑌪𑌿 𑌸𑌶𑌕𑍍𑌤𑌯𑌸𑍍𑌤𑍇
𑌪𑍍𑌰𑌭𑍁𑌤𑍍𑌵𑌮𑌾𑌪𑍍𑌤𑌾𑌃 𑌪𑌰𑌮𑌾𑌯𑍁𑌷𑌸𑍍𑌤𑍇 ॥ 1𑍭 ॥

𑌲𑌿𑌲𑍇𑌖 𑌨𑌿𑌟𑌿𑌲𑍇 𑌵𑌿𑌧𑌿𑌰𑍍𑌮𑌮 𑌲𑌿𑌪𑌿𑌂 𑌵𑌿𑌸𑍃𑌜𑍍𑌯𑌾𑌂𑌤𑌰𑌂
𑌤𑍍𑌵𑌯𑌾 𑌵𑌿𑌲𑌿𑌖𑌿𑌤𑌵𑍍𑌯𑌮𑍇𑌤𑌦𑌿𑌤𑌿 𑌤𑌤𑍍𑌫𑌲𑌪𑍍𑌰𑌾𑌪𑍍𑌤𑌯𑍇 ।
𑌤𑌦𑌂𑌤𑌰𑌫𑌲𑍇𑌸𑍍𑌫𑍁𑌟𑌂 𑌕𑌮𑌲𑌵𑌾𑌸𑌿𑌨𑍀 𑌶𑍍𑌰𑍀𑌰𑌿𑌮𑌾𑌂
𑌸𑌮𑌰𑍍𑌪𑌯 𑌸𑌮𑍁𑌦𑍍𑌰𑌿𑌕𑌾𑌂 𑌸𑌕𑌲𑌭𑌾𑌗𑍍𑌯𑌸𑌂𑌸𑍂𑌚𑌿𑌕𑌾𑌮𑍍 ॥ 1𑍮 ॥

𑌕𑌲𑌯𑌾 𑌤𑍇 𑌯𑌥𑌾 𑌦𑍇𑌵𑌿 𑌜𑍀𑌵𑌂𑌤𑌿 𑌸𑌚𑌰𑌾𑌚𑌰𑌾𑌃 ।
𑌤𑌥𑌾 𑌸𑌂𑌪𑌤𑍍𑌕𑌰𑍇 𑌲𑌕𑍍𑌷𑍍𑌮𑌿 𑌸𑌰𑍍𑌵𑌦𑌾 𑌸𑌂𑌪𑍍𑌰𑌸𑍀𑌦 𑌮𑍇 ॥ 1𑍯 ॥

𑌯𑌥𑌾 𑌵𑌿𑌷𑍍𑌣𑍁𑌰𑍍𑌧𑍍𑌰𑍁𑌵𑍇 𑌨𑌿𑌤𑍍𑌯𑌂 𑌸𑍍𑌵𑌕𑌲𑌾𑌂 𑌸𑌂𑌨𑍍𑌯𑌵𑍇𑌶𑌯𑌤𑍍 ।
𑌤𑌥𑍈𑌵 𑌸𑍍𑌵𑌕𑌲𑌾𑌂 𑌲𑌕𑍍𑌷𑍍𑌮𑌿 𑌮𑌯𑌿 𑌸𑌮𑍍𑌯𑌕𑍍 𑌸𑌮𑌰𑍍𑌪𑌯 ॥ 20 ॥

𑌸𑌰𑍍𑌵𑌸𑍌𑌖𑍍𑌯𑌪𑍍𑌰𑌦𑍇 𑌦𑍇𑌵𑌿 𑌭𑌕𑍍𑌤𑌾𑌨𑌾𑌮𑌭𑌯𑌪𑍍𑌰𑌦𑍇 ।
𑌅𑌚𑌲𑌾𑌂 𑌕𑍁𑌰𑍁 𑌯𑌤𑍍𑌨𑍇𑌨 𑌕𑌲𑌾𑌂 𑌮𑌯𑌿 𑌨𑌿𑌵𑍇𑌶𑌿𑌤𑌾𑌮𑍍 ॥ 21 ॥

𑌮𑍁𑌦𑌾𑌸𑍍𑌤𑌾𑌂 𑌮𑌤𑍍𑌫𑌾𑌲𑍇 𑌪𑌰𑌮𑌪𑌦𑌲𑌕𑍍𑌷𑍍𑌮𑍀𑌃 𑌸𑍍𑌫𑍁𑌟𑌕𑌲𑌾
𑌸𑌦𑌾 𑌵𑍈𑌕𑍁𑌂𑌠𑌶𑍍𑌰𑍀𑌰𑍍𑌨𑌿𑌵𑌸𑌤𑍁 𑌕𑌲𑌾 𑌮𑍇 𑌨𑌯𑌨𑌯𑍋𑌃 ।
𑌵𑌸𑍇𑌤𑍍𑌸𑌤𑍍𑌯𑍇 𑌲𑍋𑌕𑍇 𑌮𑌮 𑌵𑌚𑌸𑌿 𑌲𑌕𑍍𑌷𑍍𑌮𑍀𑌰𑍍𑌵𑌰𑌕𑌲𑌾
𑌶𑍍𑌰𑌿𑌯𑌃 𑌶𑍍𑌵𑍇𑌤𑌦𑍍𑌵𑍀𑌪𑍇 𑌨𑌿𑌵𑌸𑌤𑍁 𑌕𑌲𑌾 𑌮𑍇 𑌸𑍍𑌵𑌕𑌰𑌯𑍋𑌃 ॥ 22 ॥

𑌤𑌾𑌵𑌨𑍍𑌨𑌿𑌤𑍍𑌯𑌂 𑌮𑌮𑌾𑌂𑌗𑍇𑌷𑍁 𑌕𑍍𑌷𑍀𑌰𑌾𑌬𑍍𑌧𑍌 𑌶𑍍𑌰𑍀𑌕𑌲𑌾 𑌵𑌸𑍇𑌤𑍍 ।
𑌸𑍂𑌰𑍍𑌯𑌾𑌚𑌂𑌦𑍍𑌰𑌮𑌸𑍌 𑌯𑌾𑌵𑌦𑍍𑌯𑌾𑌵𑌲𑍍𑌲𑌕𑍍𑌷𑍍𑌮𑍀𑌪𑌤𑌿𑌃 𑌶𑍍𑌰𑌿𑌯𑌾𑌃 ॥ 23 ॥

𑌸𑌰𑍍𑌵𑌮𑌂𑌗𑌳𑌸𑌂𑌪𑍂𑌰𑍍𑌣𑌾 𑌸𑌰𑍍𑌵𑍈𑌶𑍍𑌵𑌰𑍍𑌯𑌸𑌮𑌨𑍍𑌵𑌿𑌤𑌾 ।
𑌆𑌦𑍍𑌯𑌾𑌦𑌿 𑌶𑍍𑌰𑍀𑌰𑍍𑌮𑌹𑌾𑌲𑌕𑍍𑌷𑍍𑌮𑍀 𑌤𑍍𑌵𑌤𑍍𑌕𑌲𑌾 𑌮𑌯𑌿 𑌤𑌿𑌷𑍍𑌠𑌤𑍁 ॥ 24 ॥

𑌅𑌜𑍍𑌞𑌾𑌨𑌤𑌿𑌮𑌿𑌰𑌂 𑌹𑌂𑌤𑍁𑌂 𑌶𑍁𑌦𑍍𑌧𑌜𑍍𑌞𑌾𑌨𑌪𑍍𑌰𑌕𑌾𑌶𑌿𑌕𑌾 ।
𑌸𑌰𑍍𑌵𑍈𑌶𑍍𑌵𑌰𑍍𑌯𑌪𑍍𑌰𑌦𑌾 𑌮𑍇𑌽𑌸𑍍𑌤𑍁 𑌤𑍍𑌵𑌤𑍍𑌕𑌲𑌾 𑌮𑌯𑌿 𑌸𑌂𑌸𑍍𑌥𑌿𑌤𑌾 ॥ 25 ॥

𑌅𑌲𑌕𑍍𑌷𑍍𑌮𑍀𑌂 𑌹𑌰𑌤𑍁 𑌕𑍍𑌷𑌿𑌪𑍍𑌰𑌂 𑌤𑌮𑌃 𑌸𑍂𑌰𑍍𑌯𑌪𑍍𑌰𑌭𑌾 𑌯𑌥𑌾 ।
𑌵𑌿𑌤𑌨𑍋𑌤𑍁 𑌮𑌮 𑌶𑍍𑌰𑍇𑌯𑌸𑍍𑌤𑍍𑌵𑌤𑍍𑌕𑌳𑌾 𑌮𑌯𑌿 𑌸𑌂𑌸𑍍𑌥𑌿𑌤𑌾 ॥ 26 ॥

𑌐𑌶𑍍𑌵𑌰𑍍𑌯𑌮𑌂𑌗𑌳𑍋𑌤𑍍𑌪𑌤𑍍𑌤𑌿𑌸𑍍𑌤𑍍𑌵𑌤𑍍𑌕𑌲𑌾𑌯𑌾𑌂 𑌨𑌿𑌧𑍀𑌯𑌤𑍇 ।
𑌮𑌯𑌿 𑌤𑌸𑍍𑌮𑌾𑌤𑍍𑌕𑍃𑌤𑌾𑌰𑍍𑌥𑍋𑌽𑌸𑍍𑌮𑌿 𑌪𑌾𑌤𑍍𑌰𑌮𑌸𑍍𑌮𑌿 𑌸𑍍𑌥𑌿𑌤𑍇𑌸𑍍𑌤𑌵 ॥ 2𑍭 ॥

𑌭𑌵𑌦𑌾𑌵𑍇𑌶𑌭𑌾𑌗𑍍𑌯𑌾𑌰𑍍𑌹𑍋 𑌭𑌾𑌗𑍍𑌯𑌵𑌾𑌨𑌸𑍍𑌮𑌿 𑌭𑌾𑌰𑍍𑌗𑌵𑌿 ।
𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌤𑍍𑌪𑌵𑌿𑌤𑍍𑌰𑍋𑌽𑌹𑌂 𑌲𑍋𑌕𑌮𑌾𑌤𑌰𑍍𑌨𑌮𑍋𑌽𑌸𑍍𑌤𑍁 𑌤𑍇 ॥ 2𑍮 ॥

𑌪𑍁𑌨𑌾𑌸𑌿 𑌮𑌾𑌂 𑌤𑍍𑌵𑌤𑍍𑌕𑌲𑌯𑍈𑌵 𑌯𑌸𑍍𑌮𑌾-
-𑌦𑌤𑌃 𑌸𑌮𑌾𑌗𑌚𑍍𑌛 𑌮𑌮𑌾𑌗𑍍𑌰𑌤𑌸𑍍𑌤𑍍𑌵𑌮𑍍 ।
𑌪𑌰𑌂 𑌪𑌦𑌂 𑌶𑍍𑌰𑍀𑌰𑍍𑌭𑌵 𑌸𑍁𑌪𑍍𑌰𑌸𑌨𑍍𑌨𑌾
𑌮𑌯𑍍𑌯𑌚𑍍𑌯𑍁𑌤𑍇𑌨 𑌪𑍍𑌰𑌵𑌿𑌶𑌾𑌦𑌿𑌲𑌕𑍍𑌷𑍍𑌮𑍀𑌃 ॥ 2𑍯 ॥

𑌶𑍍𑌰𑍀𑌵𑍈𑌕𑍁𑌂𑌠𑌸𑍍𑌥𑌿𑌤𑍇 𑌲𑌕𑍍𑌷𑍍𑌮𑌿 𑌸𑌮𑌾𑌗𑌚𑍍𑌛 𑌮𑌮𑌾𑌗𑍍𑌰𑌤𑌃 ।
𑌨𑌾𑌰𑌾𑌯𑌣𑍇𑌨 𑌸𑌹 𑌮𑌾𑌂 𑌕𑍃𑌪𑌾𑌦𑍃𑌷𑍍𑌟𑍍𑌯𑌾𑌽𑌵𑌲𑍋𑌕𑌯 ॥ 30 ॥

𑌸𑌤𑍍𑌯𑌲𑍋𑌕𑌸𑍍𑌥𑌿𑌤𑍇 𑌲𑌕𑍍𑌷𑍍𑌮𑌿 𑌤𑍍𑌵𑌂 𑌮𑌮𑌾𑌗𑌚𑍍𑌛 𑌸𑌨𑍍𑌨𑌿𑌧𑌿𑌮𑍍 ।
𑌵𑌾𑌸𑍁𑌦𑍇𑌵𑍇𑌨 𑌸𑌹𑌿𑌤𑌾 𑌪𑍍𑌰𑌸𑍀𑌦 𑌵𑌰𑌦𑌾 𑌭𑌵 ॥ 31 ॥

𑌶𑍍𑌵𑍇𑌤𑌦𑍍𑌵𑍀𑌪𑌸𑍍𑌥𑌿𑌤𑍇 𑌲𑌕𑍍𑌷𑍍𑌮𑌿 𑌶𑍀𑌘𑍍𑌰𑌮𑌾𑌗𑌚𑍍𑌛 𑌸𑍁𑌵𑍍𑌰𑌤𑍇 ।
𑌵𑌿𑌷𑍍𑌣𑍁𑌨𑌾 𑌸𑌹𑌿𑌤𑍇 𑌦𑍇𑌵𑌿 𑌜𑌗𑌨𑍍𑌮𑌾𑌤𑌃 𑌪𑍍𑌰𑌸𑍀𑌦 𑌮𑍇 ॥ 32 ॥

𑌕𑍍𑌷𑍀𑌰𑌾𑌂𑌬𑍁𑌧𑌿𑌸𑍍𑌥𑌿𑌤𑍇 𑌲𑌕𑍍𑌷𑍍𑌮𑌿 𑌸𑌮𑌾𑌗𑌚𑍍𑌛 𑌸𑌮𑌾𑌧𑌵𑌾 ।
𑌤𑍍𑌵𑌤𑍍𑌕𑍃𑌪𑌾𑌦𑍃𑌷𑍍𑌟𑌿𑌸𑍁𑌧𑌯𑌾 𑌸𑌤𑌤𑌂 𑌮𑌾𑌂 𑌵𑌿𑌲𑍋𑌕𑌯 ॥ 33 ॥

𑌰𑌤𑍍𑌨𑌗𑌰𑍍𑌭𑌸𑍍𑌥𑌿𑌤𑍇 𑌲𑌕𑍍𑌷𑍍𑌮𑌿 𑌪𑌰𑌿𑌪𑍂𑌰𑍍𑌣𑍇 𑌹𑌿𑌰𑌣𑍍𑌮𑌯𑍇 ।
𑌸𑌮𑌾𑌗𑌚𑍍𑌛 𑌸𑌮𑌾𑌗𑌚𑍍𑌛 𑌸𑍍𑌥𑌿𑌤𑍍𑌵𑌾𑌽𑌽𑌶𑍁 𑌪𑍁𑌰𑌤𑍋 𑌮𑌮 ॥ 34 ॥

𑌸𑍍𑌥𑌿𑌰𑌾 𑌭𑌵 𑌮𑌹𑌾𑌲𑌕𑍍𑌷𑍍𑌮𑌿 𑌨𑌿𑌶𑍍𑌚𑌲𑌾 𑌭𑌵 𑌨𑌿𑌰𑍍𑌮𑌲𑍇 ।
𑌪𑍍𑌰𑌸𑌨𑍍𑌨𑍇 𑌕𑌮𑌲𑍇 𑌦𑍇𑌵𑌿 𑌪𑍍𑌰𑌸𑌨𑍍𑌨𑌹𑍃𑌦𑌯𑌾 𑌭𑌵 ॥ 35 ॥

𑌶𑍍𑌰𑍀𑌧𑌰𑍇 𑌶𑍍𑌰𑍀𑌮𑌹𑌾𑌭𑍂𑌤𑍇 𑌤𑍍𑌵𑌦𑌂𑌤𑌃𑌸𑍍𑌥𑌂 𑌮𑌹𑌾𑌨𑌿𑌧𑌿𑌮𑍍 ।
𑌶𑍀𑌘𑍍𑌰𑌮𑍁𑌦𑍍𑌧𑍃𑌤𑍍𑌯 𑌪𑍁𑌰𑌤𑌃 𑌪𑍍𑌰𑌦𑌰𑍍𑌶𑌯 𑌸𑌮𑌰𑍍𑌪𑌯 ॥ 36 ॥

𑌵𑌸𑍁𑌂𑌧𑌰𑍇 𑌶𑍍𑌰𑍀𑌵𑌸𑍁𑌧𑍇 𑌵𑌸𑍁𑌦𑍋𑌗𑍍𑌧𑍍𑌰𑌿 𑌕𑍃𑌪𑌾𑌮𑌯𑍇 ।
𑌤𑍍𑌵𑌤𑍍𑌕𑍁𑌕𑍍𑌷𑌿𑌗𑌤𑌸𑌰𑍍𑌵𑌸𑍍𑌵𑌂 𑌶𑍀𑌘𑍍𑌰𑌂 𑌮𑍇 𑌸𑌂𑌪𑍍𑌰𑌦𑌰𑍍𑌶𑌯 ॥ 3𑍭 ॥

𑌵𑌿𑌷𑍍𑌣𑍁𑌪𑍍𑌰𑌿𑌯𑍇 𑌰𑌤𑍍𑌨𑌗𑌰𑍍𑌭𑍇 𑌸𑌮𑌸𑍍𑌤𑌫𑌲𑌦𑍇 𑌶𑌿𑌵𑍇 ।
𑌤𑍍𑌵𑌦𑍍𑌗𑌰𑍍𑌭𑌗𑌤𑌹𑍇𑌮𑌾𑌦𑍀𑌨𑍍 𑌸𑌂𑌪𑍍𑌰𑌦𑌰𑍍𑌶𑌯 𑌦𑌰𑍍𑌶𑌯 ॥ 3𑍮 ॥

𑌰𑌸𑌾𑌤𑌲𑌗𑌤𑍇 𑌲𑌕𑍍𑌷𑍍𑌮𑌿 𑌶𑍀𑌘𑍍𑌰𑌮𑌾𑌗𑌚𑍍𑌛 𑌮𑍇 𑌪𑍁𑌰𑌃 ।
𑌨 𑌜𑌾𑌨𑍇 𑌪𑌰𑌮𑌂 𑌰𑍂𑌪𑌂 𑌮𑌾𑌤𑌰𑍍𑌮𑍇 𑌸𑌂𑌪𑍍𑌰𑌦𑌰𑍍𑌶𑌯 ॥ 3𑍯 ॥

𑌆𑌵𑌿𑌰𑍍𑌭𑌵 𑌮𑌨𑍋𑌵𑍇𑌗𑌾𑌚𑍍𑌛𑍀𑌘𑍍𑌰𑌮𑌾𑌗𑌚𑍍𑌛 𑌮𑍇 𑌪𑍁𑌰𑌃 ।
𑌮𑌾 𑌵𑌤𑍍𑌸 𑌭𑍈𑌰𑌿𑌹𑍇𑌤𑍍𑌯𑍁𑌕𑍍𑌤𑍍𑌵𑌾 𑌕𑌾𑌮𑌂 𑌗𑍌𑌰𑌿𑌵 𑌰𑌕𑍍𑌷 𑌮𑌾𑌮𑍍 ॥ 40 ॥

𑌦𑍇𑌵𑌿 𑌶𑍀𑌘𑍍𑌰𑌂 𑌸𑌮𑌾𑌗𑌚𑍍𑌛 𑌧𑌰𑌣𑍀𑌗𑌰𑍍𑌭𑌸𑌂𑌸𑍍𑌥𑌿𑌤𑍇 ।
𑌮𑌾𑌤𑌸𑍍𑌤𑍍𑌵𑌦𑍍𑌭𑍃𑌤𑍍𑌯𑌭𑍃𑌤𑍍𑌯𑍋𑌽𑌹𑌂 𑌮𑍃𑌗𑌯𑍇 𑌤𑍍𑌵𑌾𑌂 𑌕𑍁𑌤𑍂𑌹𑌲𑌾𑌤𑍍 ॥ 41 ॥

𑌉𑌤𑍍𑌤𑌿𑌷𑍍𑌠 𑌜𑌾𑌗𑍃𑌹𑌿 𑌤𑍍𑌵𑌂 𑌮𑍇 𑌸𑌮𑍁𑌤𑍍𑌤𑌿𑌷𑍍𑌠 𑌸𑍁𑌜𑌾𑌗𑍃𑌹𑌿 ।
𑌅𑌕𑍍𑌷𑌯𑌾𑌨𑍍 𑌹𑍇𑌮𑌕𑌲𑌶𑌾𑌨𑍍 𑌸𑍁𑌵𑌰𑍍𑌣𑍇𑌨 𑌸𑍁𑌪𑍂𑌰𑌿𑌤𑌾𑌨𑍍 ॥ 42 ॥

𑌨𑌿𑌕𑍍𑌷𑍇𑌪𑌾𑌨𑍍𑌮𑍇 𑌸𑌮𑌾𑌕𑍃𑌷𑍍𑌯 𑌸𑌮𑍁𑌦𑍍𑌧𑍃𑌤𑍍𑌯 𑌮𑌮𑌾𑌗𑍍𑌰𑌤𑌃 ।
𑌸𑌮𑍁𑌨𑍍𑌨𑌤𑌾𑌨𑌨𑌾 𑌭𑍂𑌤𑍍𑌵𑌾 𑌸𑌮𑌾𑌧𑍇𑌹𑌿 𑌧𑌰𑌾𑌂𑌤𑌰𑌾𑌤𑍍 ॥ 43 ॥

𑌮𑌤𑍍𑌸𑌨𑍍𑌨𑌿𑌧𑌿𑌂 𑌸𑌮𑌾𑌗𑌚𑍍𑌛 𑌮𑌦𑌾𑌹𑌿𑌤𑌕𑍃𑌪𑌾𑌰𑌸𑌾𑌤𑍍 ।
𑌪𑍍𑌰𑌸𑍀𑌦 𑌶𑍍𑌰𑍇𑌯𑌸𑌾𑌂 𑌦𑍋𑌗𑍍𑌧𑍍𑌰𑍀 𑌲𑌕𑍍𑌷𑍍𑌮𑍀𑌰𑍍𑌮𑍇 𑌨𑌯𑌨𑌾𑌗𑍍𑌰𑌤𑌃 ॥ 44 ॥

𑌅𑌤𑍍𑌰𑍋𑌪𑌵𑌿𑌶 𑌲𑌕𑍍𑌷𑍍𑌮𑌿 𑌤𑍍𑌵𑌂 𑌸𑍍𑌥𑌿𑌰𑌾 𑌭𑌵 𑌹𑌿𑌰𑌣𑍍𑌮𑌯𑍇 ।
𑌸𑍁𑌸𑍍𑌥𑌿𑌰𑌾 𑌭𑌵 𑌸𑌂𑌪𑍍𑌰𑍀𑌤𑍍𑌯𑌾 𑌪𑍍𑌰𑌸𑍀𑌦 𑌵𑌰𑌦𑌾 𑌭𑌵 ॥ 45 ॥

𑌆𑌨𑍀𑌤𑌾𑌂𑌸𑍍𑌤𑍁 𑌤𑌥𑌾 𑌦𑍇𑌵𑌿 𑌨𑌿𑌧𑍀𑌨𑍍𑌮𑍇 𑌸𑌂𑌪𑍍𑌰𑌦𑌰𑍍𑌶𑌯 ।
𑌅𑌦𑍍𑌯 𑌕𑍍𑌷𑌣𑍇𑌨 𑌸𑌹𑌸𑌾 𑌦𑌤𑍍𑌤𑍍𑌵𑌾 𑌸𑌂𑌰𑌕𑍍𑌷 𑌮𑌾𑌂 𑌸𑌦𑌾 ॥ 46 ॥

𑌮𑌯𑌿 𑌤𑌿𑌷𑍍𑌠 𑌤𑌥𑌾 𑌨𑌿𑌤𑍍𑌯𑌂 𑌯𑌥𑍇𑌂𑌦𑍍𑌰𑌾𑌦𑌿𑌷𑍁 𑌤𑌿𑌷𑍍𑌠𑌸𑌿 ।
𑌅𑌭𑌯𑌂 𑌕𑍁𑌰𑍁 𑌮𑍇 𑌦𑍇𑌵𑌿 𑌮𑌹𑌾𑌲𑌕𑍍𑌷𑍍𑌮𑍀𑌰𑍍𑌨𑌮𑍋𑌽𑌸𑍍𑌤𑍁 𑌤𑍇 ॥ 4𑍭 ॥

𑌸𑌮𑌾𑌗𑌚𑍍𑌛 𑌮𑌹𑌾𑌲𑌕𑍍𑌷𑍍𑌮𑌿 𑌶𑍁𑌦𑍍𑌧𑌜𑌾𑌂𑌬𑍂𑌨𑌦𑌪𑍍𑌰𑌭𑍇 ।
𑌪𑍍𑌰𑌸𑍀𑌦 𑌪𑍁𑌰𑌤𑌃 𑌸𑍍𑌥𑌿𑌤𑍍𑌵𑌾 𑌪𑍍𑌰𑌣𑌤𑌂 𑌮𑌾𑌂 𑌵𑌿𑌲𑍋𑌕𑌯 ॥ 4𑍮 ॥

𑌲𑌕𑍍𑌷𑍍𑌮𑍀𑌰𑍍𑌭𑍁𑌵𑌂 𑌗𑌤𑌾 𑌭𑌾𑌸𑌿 𑌯𑌤𑍍𑌰 𑌯𑌤𑍍𑌰 𑌹𑌿𑌰𑌣𑍍𑌮𑌯𑍀 ।
𑌤𑌤𑍍𑌰 𑌤𑌤𑍍𑌰 𑌸𑍍𑌥𑌿𑌤𑌾 𑌤𑍍𑌵𑌂 𑌮𑍇 𑌤𑌵 𑌰𑍂𑌪𑌂 𑌪𑍍𑌰𑌦𑌰𑍍𑌶𑌯 ॥ 4𑍯 ॥

𑌕𑍍𑌰𑍀𑌡𑌂𑌤𑍀 𑌬𑌹𑍁𑌧𑌾 𑌭𑍂𑌮𑍌 𑌪𑌰𑌿𑌪𑍂𑌰𑍍𑌣𑌕𑍃𑌪𑌾𑌮𑌯𑌿 ।
𑌮𑌮 𑌮𑍂𑌰𑍍𑌧𑌨𑌿 𑌤𑍇 𑌹𑌸𑍍𑌤𑌮𑌵𑌿𑌲𑌂𑌬𑌿𑌤𑌮𑌰𑍍𑌪𑌯 ॥ 50 ॥

𑌫𑌲𑌦𑍍𑌭𑌾𑌗𑍍𑌯𑍋𑌦𑌯𑍇 𑌲𑌕𑍍𑌷𑍍𑌮𑌿 𑌸𑌮𑌸𑍍𑌤𑌪𑍁𑌰𑌵𑌾𑌸𑌿𑌨𑍀 ।
𑌪𑍍𑌰𑌸𑍀𑌦 𑌮𑍇 𑌮𑌹𑌾𑌲𑌕𑍍𑌷𑍍𑌮𑌿 𑌪𑌰𑌿𑌪𑍂𑌰𑍍𑌣𑌮𑌨𑍋𑌰𑌥𑍇 ॥ 51 ॥

𑌅𑌯𑍋𑌧𑍍𑌯𑌾𑌦𑌿𑌷𑍁 𑌸𑌰𑍍𑌵𑍇𑌷𑍁 𑌨𑌗𑌰𑍇𑌷𑍁 𑌸𑌮𑌾𑌸𑍍𑌥𑌿𑌤𑍇 ।
𑌵𑍈𑌭𑌵𑍈𑌰𑍍𑌵𑌿𑌵𑌿𑌧𑍈𑌰𑍍𑌯𑍁𑌕𑍍𑌤𑍈𑌃 𑌸𑌮𑌾𑌗𑌚𑍍𑌛 𑌮𑍁𑌦𑌾𑌨𑍍𑌵𑌿𑌤𑍇 ॥ 52 ॥

𑌸𑌮𑌾𑌗𑌚𑍍𑌛 𑌸𑌮𑌾𑌗𑌚𑍍𑌛 𑌮𑌮𑌾𑌗𑍍𑌰𑍇 𑌭𑌵 𑌸𑍁𑌸𑍍𑌥𑌿𑌰𑌾 ।
𑌕𑌰𑍁𑌣𑌾𑌰𑌸𑌨𑌿𑌷𑍍𑌯𑌂𑌦𑌨𑍇𑌤𑍍𑌰𑌦𑍍𑌵𑌯 𑌵𑌿𑌲𑌾𑌸𑌿𑌨𑍀 ॥ 53 ॥ [𑌨𑌿𑌷𑍍𑌪𑌨𑍍𑌨]

𑌸𑌨𑍍𑌨𑌿𑌧𑌤𑍍𑌸𑍍𑌵 𑌮𑌹𑌾𑌲𑌕𑍍𑌷𑍍𑌮𑌿 𑌤𑍍𑌵𑌤𑍍𑌪𑌾𑌣𑌿𑌂 𑌮𑌮 𑌮𑌸𑍍𑌤𑌕𑍇 ।
𑌕𑌰𑍁𑌣𑌾𑌸𑍁𑌧𑌯𑌾 𑌮𑌾𑌂 𑌤𑍍𑌵𑌮𑌭𑌿𑌷𑌿𑌂𑌚𑍍𑌯 𑌸𑍍𑌥𑌿𑌰𑌂 𑌕𑍁𑌰𑍁 ॥ 54 ॥

𑌸𑌰𑍍𑌵𑌰𑌾𑌜𑌗𑍃𑌹𑍇 𑌲𑌕𑍍𑌷𑍍𑌮𑌿 𑌸𑌮𑌾𑌗𑌚𑍍𑌛 𑌬𑌲𑌾𑌨𑍍𑌵𑌿𑌤𑍇 । [𑌮𑍁𑌦𑌾𑌨𑍍𑌵𑌿𑌤𑍇]
𑌸𑍍𑌥𑌿𑌤𑍍𑌵𑌾𑌽𑌽𑌶𑍁 𑌪𑍁𑌰𑌤𑍋 𑌮𑍇𑌽𑌦𑍍𑌯 𑌪𑍍𑌰𑌸𑌾𑌦𑍇𑌨𑌾𑌽𑌭𑌯𑌂 𑌕𑍁𑌰𑍁 ॥ 55 ॥

𑌸𑌾𑌦𑌰𑌂 𑌮𑌸𑍍𑌤𑌕𑍇 𑌹𑌸𑍍𑌤𑌂 𑌮𑌮 𑌤𑍍𑌵𑌂 𑌕𑍃𑌪𑌯𑌾𑌰𑍍𑌪𑌯 ।
𑌸𑌰𑍍𑌵𑌰𑌾𑌜𑌗𑍃𑌹𑍇 𑌲𑌕𑍍𑌷𑍍𑌮𑌿 𑌤𑍍𑌵𑌤𑍍𑌕𑌲𑌾 𑌮𑌯𑌿 𑌤𑌿𑌷𑍍𑌠𑌤𑍁 ॥ 56 ॥

𑌆𑌦𑍍𑌯𑌾𑌦𑌿 𑌶𑍍𑌰𑍀𑌮𑌹𑌾𑌲𑌕𑍍𑌷𑍍𑌮𑌿 𑌵𑌿𑌷𑍍𑌣𑍁𑌵𑌾𑌮𑌾𑌂𑌕𑌸𑌂𑌸𑍍𑌥𑌿𑌤𑍇 ।
𑌪𑍍𑌰𑌤𑍍𑌯𑌕𑍍𑌷𑌂 𑌕𑍁𑌰𑍁 𑌮𑍇 𑌰𑍂𑌪𑌂 𑌰𑌕𑍍𑌷 𑌮𑌾𑌂 𑌶𑌰𑌣𑌾𑌗𑌤𑌮𑍍 ॥ 5𑍭 ॥

𑌪𑍍𑌰𑌸𑍀𑌦 𑌮𑍇 𑌮𑌹𑌾𑌲𑌕𑍍𑌷𑍍𑌮𑌿 𑌸𑍁𑌪𑍍𑌰𑌸𑍀𑌦 𑌮𑌹𑌾𑌶𑌿𑌵𑍇 ।
𑌅𑌚𑌲𑌾 𑌭𑌵 𑌸𑌂𑌪𑍍𑌰𑍀𑌤𑍍𑌯𑌾 𑌸𑍁𑌸𑍍𑌥𑌿𑌰𑌾 𑌭𑌵 𑌮𑌦𑍍𑌗𑍃𑌹𑍇 ॥ 5𑍮 ॥

𑌯𑌾𑌵𑌤𑍍𑌤𑌿𑌷𑍍𑌠𑌂𑌤𑌿 𑌵𑍇𑌦𑌾𑌶𑍍𑌚 𑌯𑌾𑌵𑌚𑍍𑌚𑌂𑌦𑍍𑌰𑌦𑌿𑌵𑌾𑌕𑌰𑍌 ।
𑌯𑌾𑌵𑌦𑍍𑌵𑌿𑌷𑍍𑌣𑍁𑌶𑍍𑌚 𑌯𑌾𑌵𑌤𑍍𑌤𑍍𑌵𑌂 𑌤𑌾𑌵𑌤𑍍𑌕𑍁𑌰𑍁 𑌕𑍃𑌪𑌾𑌂 𑌮𑌯𑌿 ॥ 5𑍯 ॥

𑌚𑌾𑌂𑌦𑍍𑌰𑍀𑌕𑌲𑌾 𑌯𑌥𑌾 𑌶𑍁𑌕𑍍𑌲𑍇 𑌵𑌰𑍍𑌧𑌤𑍇 𑌸𑌾 𑌦𑌿𑌨𑍇 𑌦𑌿𑌨𑍇 ।
𑌤𑌥𑌾 𑌦𑌯𑌾 𑌤𑍇 𑌮𑌯𑍍𑌯𑍇𑌵 𑌵𑌰𑍍𑌧𑌤𑌾𑌮𑌭𑌿𑌵𑌰𑍍𑌧𑌤𑌾𑌮𑍍 ॥ 60 ॥

𑌯𑌥𑌾 𑌵𑍈𑌕𑍁𑌂𑌠𑌨𑌗𑌰𑍇 𑌯𑌥𑌾 𑌵𑍈 𑌕𑍍𑌷𑍀𑌰𑌸𑌾𑌗𑌰𑍇 ।
𑌤𑌥𑌾 𑌮𑌦𑍍𑌭𑌵𑌨𑍇 𑌤𑌿𑌷𑍍𑌠 𑌸𑍍𑌥𑌿𑌰𑌂 𑌶𑍍𑌰𑍀𑌵𑌿𑌷𑍍𑌣𑍁𑌨𑌾 𑌸𑌹 ॥ 61 ॥

𑌯𑍋𑌗𑌿𑌨𑌾𑌂 𑌹𑍃𑌦𑌯𑍇 𑌨𑌿𑌤𑍍𑌯𑌂 𑌯𑌥𑌾 𑌤𑌿𑌷𑍍𑌠𑌸𑌿 𑌵𑌿𑌷𑍍𑌣𑍁𑌨𑌾 ।
𑌤𑌥𑌾 𑌮𑌦𑍍𑌭𑌵𑌨𑍇 𑌤𑌿𑌷𑍍𑌠 𑌸𑍍𑌥𑌿𑌰𑌂 𑌶𑍍𑌰𑍀𑌵𑌿𑌷𑍍𑌣𑍁𑌨𑌾 𑌸𑌹 ॥ 62 ॥

𑌨𑌾𑌰𑌾𑌯𑌣𑌸𑍍𑌯 𑌹𑍃𑌦𑌯𑍇 𑌭𑌵𑌤𑍀 𑌯𑌥𑌾𑌸𑍍𑌤𑍇
𑌨𑌾𑌰𑌾𑌯𑌣𑍋𑌽𑌪𑌿 𑌤𑌵 𑌹𑍃𑌤𑍍𑌕𑌮𑌲𑍇 𑌯𑌥𑌾𑌸𑍍𑌤𑍇 ।
𑌨𑌾𑌰𑌾𑌯𑌣𑌸𑍍𑌤𑍍𑌵𑌮𑌪𑌿 𑌨𑌿𑌤𑍍𑌯𑌮𑍁𑌭𑍌 𑌤𑌥𑍈𑌵
𑌤𑍌 𑌤𑌿𑌷𑍍𑌠𑌤𑌾𑌂 𑌹𑍃𑌦𑌿 𑌮𑌮𑌾𑌪𑌿 𑌦𑌯𑌾𑌨𑍍𑌵𑌿𑌤𑍌 𑌶𑍍𑌰𑍀𑌃 ॥ 63 ॥

𑌵𑌿𑌜𑍍𑌞𑌾𑌨𑌵𑍃𑌦𑍍𑌧𑌿𑌂 𑌹𑍃𑌦𑌯𑍇 𑌕𑍁𑌰𑍁 𑌶𑍍𑌰𑍀𑌃
𑌸𑍌𑌭𑌾𑌗𑍍𑌯𑌵𑍃𑌦𑍍𑌧𑌿𑌂 𑌕𑍁𑌰𑍁 𑌮𑍇 𑌗𑍃𑌹𑍇 𑌶𑍍𑌰𑍀𑌃 ।
𑌦𑌯𑌾𑌸𑍁𑌵𑍃𑌦𑍍𑌧𑌿𑌂 𑌕𑍁𑌰𑍁𑌤𑌾𑌂 𑌮𑌯𑌿 𑌶𑍍𑌰𑍀𑌃
𑌸𑍁𑌵𑌰𑍍𑌣𑌵𑍃𑌦𑍍𑌧𑌿𑌂 𑌕𑍁𑌰𑍁 𑌮𑍇 𑌗𑍃𑌹𑍇 𑌶𑍍𑌰𑍀𑌃 ॥ 64 ॥

𑌨 𑌮𑌾𑌂 𑌤𑍍𑌯𑌜𑍇𑌥𑌾𑌃 𑌶𑍍𑌰𑌿𑌤𑌕𑌲𑍍𑌪𑌵𑌲𑍍𑌲𑌿
𑌸𑌦𑍍𑌭𑌕𑍍𑌤𑌚𑌿𑌂𑌤𑌾𑌮𑌣𑌿𑌕𑌾𑌮𑌧𑍇𑌨𑍋 ।
𑌵𑌿𑌶𑍍𑌵𑌸𑍍𑌯 𑌮𑌾𑌤𑌰𑍍𑌭𑌵 𑌸𑍁𑌪𑍍𑌰𑌸𑌨𑍍𑌨𑌾
𑌗𑍃𑌹𑍇 𑌕𑌲𑌤𑍍𑌰𑍇𑌷𑍁 𑌚 𑌪𑍁𑌤𑍍𑌰𑌵𑌰𑍍𑌗𑍇 ॥ 65 ॥

𑌆𑌦𑍍𑌯𑌾𑌦𑌿𑌮𑌾𑌯𑍇 𑌤𑍍𑌵𑌮𑌜𑌾𑌂𑌡𑌬𑍀𑌜𑌂
𑌤𑍍𑌵𑌮𑍇𑌵 𑌸𑌾𑌕𑌾𑌰𑌨𑌿𑌰𑌾𑌕𑍃𑌤𑌿𑌸𑍍𑌤𑍍𑌵𑌮𑍍 ।
𑌤𑍍𑌵𑌯𑌾 𑌧𑍃𑌤𑌾𑌶𑍍𑌚𑌾𑌬𑍍𑌜𑌭𑌵𑌾𑌂𑌡𑌸𑌂𑌘𑌾-
-𑌶𑍍𑌚𑌿𑌤𑍍𑌰𑌂 𑌚𑌰𑌿𑌤𑍍𑌰𑌂 𑌤𑌵 𑌦𑍇𑌵𑌿 𑌵𑌿𑌷𑍍𑌣𑍋𑌃 ॥ 66 ॥

𑌬𑍍𑌰𑌹𑍍𑌮𑌰𑍁𑌦𑍍𑌰𑌾𑌦𑌯𑍋 𑌦𑍇𑌵𑌾 𑌵𑍇𑌦𑌾𑌶𑍍𑌚𑌾𑌪𑌿 𑌨 𑌶𑌕𑍍𑌨𑍁𑌯𑍁𑌃 ।
𑌮𑌹𑌿𑌮𑌾𑌨𑌂 𑌤𑌵 𑌸𑍍𑌤𑍋𑌤𑍁𑌂 𑌮𑌂𑌦𑍋𑌽𑌹𑌂 𑌶𑌕𑍍𑌨𑍁𑌯𑌾𑌂 𑌕𑌥𑌮𑍍 ॥ 6𑍭 ॥

𑌅𑌂𑌬 𑌤𑍍𑌵𑌦𑍍𑌵𑌤𑍍𑌸𑌵𑌾𑌕𑍍𑌯𑌾𑌨𑌿 𑌸𑍂𑌕𑍍𑌤𑌾𑌸𑍂𑌕𑍍𑌤𑌾𑌨𑌿 𑌯𑌾𑌨𑌿 𑌚 ।
𑌤𑌾𑌨𑌿 𑌸𑍍𑌵𑍀𑌕𑍁𑌰𑍁 𑌸𑌰𑍍𑌵𑌜𑍍𑌞𑍇 𑌦𑌯𑌾𑌲𑍁𑌤𑍍𑌵𑍇𑌨 𑌸𑌾𑌦𑌰𑌮𑍍 ॥ 6𑍮 ॥

𑌭𑌵𑌤𑍀𑌂 𑌶𑌰𑌣𑌂 𑌗𑌤𑍍𑌵𑌾 𑌕𑍃𑌤𑌾𑌰𑍍𑌥𑌾𑌃 𑌸𑍍𑌯𑍁𑌃 𑌪𑍁𑌰𑌾𑌤𑌨𑌾𑌃 ।
𑌇𑌤𑌿 𑌸𑌂𑌚𑌿𑌂𑌤𑍍𑌯 𑌮𑌨𑌸𑌾 𑌤𑍍𑌵𑌾𑌮𑌹𑌂 𑌶𑌰𑌣𑌂 𑌵𑍍𑌰𑌜𑍇 ॥ 6𑍯 ॥

𑌅𑌨𑌂𑌤𑌾 𑌨𑌿𑌤𑍍𑌯𑌸𑍁𑌖𑌿𑌨𑌸𑍍𑌤𑍍𑌵𑌦𑍍𑌭𑌕𑍍𑌤𑌾𑌸𑍍𑌤𑍍𑌵𑌤𑍍𑌪𑌰𑌾𑌯𑌣𑌾𑌃 ।
𑌇𑌤𑌿 𑌵𑍇𑌦𑌪𑍍𑌰𑌮𑌾𑌣𑌾𑌦𑍍𑌧𑌿 𑌦𑍇𑌵𑌿 𑌤𑍍𑌵𑌾𑌂 𑌶𑌰𑌣𑌂 𑌵𑍍𑌰𑌜𑍇 ॥ 𑍭0 ॥

𑌤𑌵 𑌪𑍍𑌰𑌤𑌿𑌜𑍍𑌞𑌾 𑌮𑌦𑍍𑌭𑌕𑍍𑌤𑌾 𑌨 𑌨𑌶𑍍𑌯𑌂𑌤𑍀𑌤𑍍𑌯𑌪𑌿 𑌕𑍍𑌵𑌚𑌿𑌤𑍍 ।
𑌇𑌤𑌿 𑌸𑌂𑌚𑌿𑌂𑌤𑍍𑌯 𑌸𑌂𑌚𑌿𑌂𑌤𑍍𑌯 𑌪𑍍𑌰𑌾𑌣𑌾𑌨𑍍 𑌸𑌂𑌧𑌾𑌰𑌯𑌾𑌮𑍍𑌯𑌹𑌮𑍍 ॥ 𑍭1 ॥

𑌤𑍍𑌵𑌦𑌧𑍀𑌨𑌸𑍍𑌤𑍍𑌵𑌹𑌂 𑌮𑌾𑌤𑌸𑍍𑌤𑍍𑌵𑌤𑍍𑌕𑍃𑌪𑌾 𑌮𑌯𑌿 𑌵𑌿𑌦𑍍𑌯𑌤𑍇 ।
𑌯𑌾𑌵𑌤𑍍𑌸𑌂𑌪𑍂𑌰𑍍𑌣𑌕𑌾𑌮𑌃 𑌸𑍍𑌯𑌾𑌤𑍍𑌤𑌾𑌵𑌦𑍍𑌦𑍇𑌹𑌿 𑌦𑌯𑌾𑌨𑌿𑌧𑍇 ॥ 𑍭2 ॥

𑌕𑍍𑌷𑌣𑌮𑌾𑌤𑍍𑌰𑌂 𑌨 𑌶𑌕𑍍𑌨𑍋𑌮𑌿 𑌜𑍀𑌵𑌿𑌤𑍁𑌂 𑌤𑍍𑌵𑌤𑍍𑌕𑍃𑌪𑌾𑌂 𑌵𑌿𑌨𑌾 ।
𑌨 𑌜𑍀𑌵𑌂𑌤𑍀𑌹 𑌜𑌲𑌜𑌾 𑌜𑌲𑌂 𑌤𑍍𑌯𑌕𑍍𑌤𑍍𑌵𑌾 𑌜𑌲𑌗𑍍𑌰𑌹𑌾𑌃 ॥ 𑍭3 ॥

𑌯𑌥𑌾 𑌹𑌿 𑌪𑍁𑌤𑍍𑌰𑌵𑌾𑌤𑍍𑌸𑌲𑍍𑌯𑌾𑌜𑍍𑌜𑌨𑌨𑍀 𑌪𑍍𑌰𑌸𑍍𑌨𑍁𑌤𑌸𑍍𑌤𑌨𑍀 ।
𑌵𑌤𑍍𑌸𑌂 𑌤𑍍𑌵𑌰𑌿𑌤𑌮𑌾𑌗𑌤𑍍𑌯 𑌸𑌂𑌪𑍍𑌰𑍀𑌣𑌯𑌤𑌿 𑌵𑌤𑍍𑌸𑌲𑌾 ॥ 𑍭4 ॥

𑌯𑌦𑌿 𑌸𑍍𑌯𑌾𑌂 𑌤𑌵 𑌪𑍁𑌤𑍍𑌰𑍋𑌽𑌹𑌂 𑌮𑌾𑌤𑌾 𑌤𑍍𑌵𑌂 𑌯𑌦𑌿 𑌮𑌾𑌮𑌕𑍀 ।
𑌦𑌯𑌾𑌪𑌯𑍋𑌧𑌰𑌸𑍍𑌤𑌨𑍍𑌯𑌸𑍁𑌧𑌾𑌭𑌿𑌰𑌭𑌿𑌷𑌿𑌂𑌚 𑌮𑌾𑌮𑍍 ॥ 𑍭5 ॥

𑌮𑍃𑌗𑍍𑌯𑍋 𑌨 𑌗𑍁𑌣𑌲𑍇𑌶𑍋𑌽𑌪𑌿 𑌮𑌯𑌿 𑌦𑍋𑌷𑍈𑌕𑌮𑌂𑌦𑌿𑌰𑍇 ।
𑌪𑌾𑌂𑌸𑍂𑌨𑌾𑌂 𑌵𑍃𑌷𑍍𑌟𑌿𑌬𑌿𑌂𑌦𑍂𑌨𑌾𑌂 𑌦𑍋𑌷𑌾𑌣𑌾𑌂 𑌚 𑌨 𑌮𑍇 𑌮𑌤𑌿𑌃 ॥ 𑍭6 ॥

𑌪𑌾𑌪𑌿𑌨𑌾𑌮𑌹𑌮𑍇𑌵𑌾𑌗𑍍𑌰𑍍𑌯𑍋 𑌦𑌯𑌾𑌲𑍂𑌨𑌾𑌂 𑌤𑍍𑌵𑌮𑌗𑍍𑌰𑌣𑍀𑌃 ।
𑌦𑌯𑌨𑍀𑌯𑍋 𑌮𑌦𑌨𑍍𑌯𑍋𑌽𑌸𑍍𑌤𑌿 𑌤𑌵 𑌕𑍋𑌽𑌤𑍍𑌰 𑌜𑌗𑌤𑍍𑌤𑍍𑌰𑌯𑍇 ॥ 𑍭𑍭 ॥

𑌵𑌿𑌧𑌿𑌨𑌾𑌹𑌂 𑌨 𑌸𑍃𑌷𑍍𑌟𑌶𑍍𑌚𑍇𑌨𑍍𑌨 𑌸𑍍𑌯𑌾𑌤𑍍𑌤𑌵 𑌦𑌯𑌾𑌲𑍁𑌤𑌾 ।
𑌆𑌮𑌯𑍋 𑌵𑌾 𑌨 𑌸𑍃𑌷𑍍𑌟𑌶𑍍𑌚𑍇𑌦𑍌𑌷𑌧𑌸𑍍𑌯 𑌵𑍃𑌥𑍋𑌦𑌯𑌃 ॥ 𑍭𑍮 ॥

𑌕𑍃𑌪𑌾 𑌮𑌦𑌗𑍍𑌰𑌜𑌾 𑌕𑌿𑌂 𑌤𑍇 𑌅𑌹𑌂 𑌕𑌿𑌂 𑌵𑌾 𑌤𑌦𑌗𑍍𑌰𑌜𑌃 ।
𑌵𑌿𑌚𑌾𑌰𑍍𑌯 𑌦𑍇𑌹𑌿 𑌮𑍇 𑌵𑌿𑌤𑍍𑌤𑌂 𑌤𑌵 𑌦𑍇𑌵𑌿 𑌦𑌯𑌾𑌨𑌿𑌧𑍇 ॥ 𑍭𑍯 ॥

𑌮𑌾𑌤𑌾 𑌪𑌿𑌤𑌾 𑌤𑍍𑌵𑌂 𑌗𑍁𑌰𑍁𑌸𑌦𑍍𑌗𑌤𑌿𑌃 𑌶𑍍𑌰𑍀-
-𑌸𑍍𑌤𑍍𑌵𑌮𑍇𑌵 𑌸𑌂𑌜𑍀𑌵𑌨𑌹𑍇𑌤𑍁𑌭𑍂𑌤𑌾 ।
𑌅𑌨𑍍𑌯𑌂 𑌨 𑌮𑌨𑍍𑌯𑍇 𑌜𑌗𑌦𑍇𑌕𑌨𑌾𑌥𑍇
𑌤𑍍𑌵𑌮𑍇𑌵 𑌸𑌰𑍍𑌵𑌂 𑌮𑌮 𑌦𑍇𑌵𑌿 𑌸𑌤𑍍𑌯𑍇 ॥ 𑍮0 ॥

𑌆𑌦𑍍𑌯𑌾𑌦𑌿𑌲𑌕𑍍𑌷𑍍𑌮𑍀𑌰𑍍𑌭𑌵 𑌸𑍁𑌪𑍍𑌰𑌸𑌨𑍍𑌨𑌾
𑌵𑌿𑌶𑍁𑌦𑍍𑌧𑌵𑌿𑌜𑍍𑌞𑌾𑌨𑌸𑍁𑌖𑍈𑌕𑌦𑍋𑌗𑍍𑌧𑍍𑌰𑍀 ।
𑌅𑌜𑍍𑌞𑌾𑌨𑌹𑌂𑌤𑍍𑌰𑍀 𑌤𑍍𑌰𑌿𑌗𑍁𑌣𑌾𑌤𑌿𑌰𑌿𑌕𑍍𑌤𑌾
𑌪𑍍𑌰𑌜𑍍𑌞𑌾𑌨𑌨𑍇𑌤𑍍𑌰𑍀 𑌭𑌵 𑌸𑍁𑌪𑍍𑌰𑌸𑌨𑍍𑌨𑌾 ॥ 𑍮1 ॥

𑌅𑌶𑍇𑌷𑌵𑌾𑌗𑍍𑌜𑌾𑌡𑍍𑌯𑌮𑌲𑌾𑌪𑌹𑌂𑌤𑍍𑌰𑍀
𑌨𑌵𑌂 𑌨𑌵𑌂 𑌸𑍍𑌪𑌷𑍍𑌟𑌸𑍁𑌵𑌾𑌕𑍍𑌪𑍍𑌰𑌦𑌾𑌯𑌿𑌨𑍀 ।
𑌮𑌮𑍇𑌹 𑌜𑌿𑌹𑍍𑌵𑌾𑌗𑍍𑌰 𑌸𑍁𑌰𑌂𑌗𑌨𑌰𑍍𑌤𑌕𑍀 [𑌨𑌰𑍍𑌤𑌿𑌨𑍀]
𑌭𑌵 𑌪𑍍𑌰𑌸𑌨𑍍𑌨𑌾 𑌵𑌦𑌨𑍇 𑌚 𑌮𑍇 𑌶𑍍𑌰𑍀𑌃 ॥ 𑍮2 ॥

𑌸𑌮𑌸𑍍𑌤𑌸𑌂𑌪𑌤𑍍𑌸𑍁𑌵𑌿𑌰𑌾𑌜𑌮𑌾𑌨𑌾
𑌸𑌮𑌸𑍍𑌤𑌤𑍇𑌜𑌶𑍍𑌚𑌯𑌭𑌾𑌸𑌮𑌾𑌨𑌾 ।
𑌵𑌿𑌷𑍍𑌣𑍁𑌪𑍍𑌰𑌿𑌯𑍇 𑌤𑍍𑌵𑌂 𑌭𑌵 𑌦𑍀𑌪𑍍𑌯𑌮𑌾𑌨𑌾
𑌵𑌾𑌗𑍍𑌦𑍇𑌵𑌤𑌾 𑌮𑍇 𑌨𑌯𑌨𑍇 𑌪𑍍𑌰𑌸𑌨𑍍𑌨𑌾 ॥ 𑍮3 ॥

𑌸𑌰𑍍𑌵𑌪𑍍𑌰𑌦𑌰𑍍𑌶𑍇 𑌸𑌕𑌲𑌾𑌰𑍍𑌥𑌦𑍇 𑌤𑍍𑌵𑌂
𑌪𑍍𑌰𑌭𑌾𑌸𑍁𑌲𑌾𑌵𑌣𑍍𑌯𑌦𑌯𑌾𑌪𑍍𑌰𑌦𑍋𑌗𑍍𑌧𑍍𑌰𑍀 ।
𑌸𑍁𑌵𑌰𑍍𑌣𑌦𑍇 𑌤𑍍𑌵𑌂 𑌸𑍁𑌮𑍁𑌖𑍀 𑌭𑌵 𑌶𑍍𑌰𑍀-
-𑌰𑍍𑌹𑌿𑌰𑌣𑍍𑌮𑌯𑍀 𑌮𑍇 𑌨𑌯𑌨𑍇 𑌪𑍍𑌰𑌸𑌨𑍍𑌨𑌾 ॥ 𑍮4 ॥

𑌸𑌰𑍍𑌵𑌾𑌰𑍍𑌥𑌦𑌾 𑌸𑌰𑍍𑌵𑌜𑌗𑌤𑍍𑌪𑍍𑌰𑌸𑍂𑌤𑌿𑌃
𑌸𑌰𑍍𑌵𑍇𑌶𑍍𑌵𑌰𑍀 𑌸𑌰𑍍𑌵𑌭𑌯𑌾𑌪𑌹𑌂𑌤𑍍𑌰𑍀 ।
𑌸𑌰𑍍𑌵𑍋𑌨𑍍𑌨𑌤𑌾 𑌤𑍍𑌵𑌂 𑌸𑍁𑌮𑍁𑌖𑍀 𑌭𑌵 𑌶𑍍𑌰𑍀-
-𑌰𑍍𑌹𑌿𑌰𑌣𑍍𑌮𑌯𑍀 𑌮𑍇 𑌨𑌯𑌨𑍇 𑌪𑍍𑌰𑌸𑌨𑍍𑌨𑌾 ॥ 𑍮5 ॥

𑌸𑌮𑌸𑍍𑌤𑌵𑌿𑌘𑍍𑌨𑍌𑌘𑌵𑌿𑌨𑌾𑌶𑌕𑌾𑌰𑌿𑌣𑍀
𑌸𑌮𑌸𑍍𑌤𑌭𑌕𑍍𑌤𑍋𑌦𑍍𑌧𑌰𑌣𑍇 𑌵𑌿𑌚𑌕𑍍𑌷𑌣𑌾 ।
𑌅𑌨𑌂𑌤𑌸𑍌𑌭𑌾𑌗𑍍𑌯𑌸𑍁𑌖𑌪𑍍𑌰𑌦𑌾𑌯𑌿𑌨𑍀
𑌹𑌿𑌰𑌣𑍍𑌮𑌯𑍀 𑌮𑍇 𑌨𑌯𑌨𑍇 𑌪𑍍𑌰𑌸𑌨𑍍𑌨𑌾 ॥ 𑍮6 ॥

𑌦𑍇𑌵𑌿 𑌪𑍍𑌰𑌸𑍀𑌦 𑌦𑌯𑌨𑍀𑌯𑌤𑌮𑌾𑌯 𑌮𑌹𑍍𑌯𑌂
𑌦𑍇𑌵𑌾𑌧𑌿𑌨𑌾𑌥𑌭𑌵𑌦𑍇𑌵𑌗𑌣𑌾𑌭𑌿𑌵𑌂𑌦𑍍𑌯𑍇 ।
𑌮𑌾𑌤𑌸𑍍𑌤𑌥𑍈𑌵 𑌭𑌵 𑌸𑌨𑍍𑌨𑌿𑌹𑌿𑌤𑌾 𑌦𑍃𑌶𑍋𑌰𑍍𑌮𑍇
𑌪𑌤𑍍𑌯𑌾 𑌸𑌮𑌂 𑌮𑌮 𑌮𑍁𑌖𑍇 𑌭𑌵 𑌸𑍁𑌪𑍍𑌰𑌸𑌨𑍍𑌨𑌾 ॥ 𑍮𑍭 ॥

𑌮𑌾 𑌵𑌤𑍍𑌸 𑌭𑍈𑌰𑌭𑌯𑌦𑌾𑌨𑌕𑌰𑍋𑌽𑌰𑍍𑌪𑌿𑌤𑌸𑍍𑌤𑍇
𑌮𑍌𑌲𑍌 𑌮𑌮𑍇𑌤𑌿 𑌮𑌯𑌿 𑌦𑍀𑌨𑌦𑌯𑌾𑌨𑍁𑌕𑌂𑌪𑍇 ।
𑌮𑌾𑌤𑌃 𑌸𑌮𑌰𑍍𑌪𑌯 𑌮𑍁𑌦𑌾 𑌕𑌰𑍁𑌣𑌾𑌕𑌟𑌾𑌕𑍍𑌷𑌂
𑌮𑌾𑌂𑌗𑌳𑍍𑌯𑌬𑍀𑌜𑌮𑌿𑌹 𑌨𑌃 𑌸𑍃𑌜 𑌜𑌨𑍍𑌮 𑌮𑌾𑌤𑌃 ॥ 𑍮𑍮 ॥

𑌕𑌟𑌾𑌕𑍍𑌷 𑌇𑌹 𑌕𑌾𑌮𑌧𑍁𑌕𑍍𑌤𑌵 𑌮𑌨𑌸𑍍𑌤𑍁 𑌚𑌿𑌂𑌤𑌾𑌮𑌣𑌿𑌃
𑌕𑌰𑌃 𑌸𑍁𑌰𑌤𑌰𑍁𑌃 𑌸𑌦𑌾 𑌨𑌵𑌨𑌿𑌧𑌿𑌸𑍍𑌤𑍍𑌵𑌮𑍇𑌵𑍇𑌂𑌦𑌿𑌰𑍇 ।
𑌭𑌵𑍇 𑌤𑌵 𑌦𑌯𑌾𑌰𑌸𑍋 𑌮𑌮 𑌰𑌸𑌾𑌯𑌨𑌂 𑌚𑌾𑌨𑍍𑌵𑌹𑌂
𑌮𑍁𑌖𑌂 𑌤𑌵 𑌕𑌲𑌾𑌨𑌿𑌧𑌿𑌰𑍍𑌵𑌿𑌵𑌿𑌧𑌵𑌾𑌂𑌛𑌿𑌤𑌾𑌰𑍍𑌥𑌪𑍍𑌰𑌦𑌮𑍍 ॥ 𑍮𑍯 ॥

𑌯𑌥𑌾 𑌰𑌸𑌸𑍍𑌪𑌰𑍍𑌶𑌨𑌤𑍋𑌽𑌯𑌸𑍋𑌽𑌪𑌿
𑌸𑍁𑌵𑌰𑍍𑌣𑌤𑌾 𑌸𑍍𑌯𑌾𑌤𑍍𑌕𑌮𑌲𑍇 𑌤𑌥𑌾 𑌤𑍇 ।
𑌕𑌟𑌾𑌕𑍍𑌷𑌸𑌂𑌸𑍍𑌪𑌰𑍍𑌶𑌨𑌤𑍋 𑌜𑌨𑌾𑌨𑌾-
-𑌮𑌮𑌂𑌗𑌳𑌾𑌨𑌾𑌮𑌪𑌿 𑌮𑌂𑌗𑌳𑌤𑍍𑌵𑌮𑍍 ॥ 𑍯0 ॥

𑌦𑍇𑌹𑍀𑌤𑌿 𑌨𑌾𑌸𑍍𑌤𑍀𑌤𑌿 𑌵𑌚𑌃 𑌪𑍍𑌰𑌵𑍇𑌶𑌾-
-𑌦𑍍𑌭𑍀𑌤𑍋 𑌰𑌮𑍇 𑌤𑍍𑌵𑌾𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ।
𑌅𑌤𑌃 𑌸𑌦𑌾𑌽𑌸𑍍𑌮𑌿𑌨𑍍𑌨𑌭𑌯𑌪𑍍𑌰𑌦𑌾 𑌤𑍍𑌵𑌂
𑌸𑌹𑍈𑌵 𑌪𑌤𑍍𑌯𑌾 𑌮𑌯𑌿 𑌸𑌨𑍍𑌨𑌿𑌧𑍇𑌹𑌿 ॥ 𑍯1 ॥

𑌕𑌲𑍍𑌪𑌦𑍍𑌰𑍁𑌮𑍇𑌣 𑌮𑌣𑌿𑌨𑌾 𑌸𑌹𑌿𑌤𑌾 𑌸𑍁𑌰𑌮𑍍𑌯𑌾
𑌶𑍍𑌰𑍀𑌸𑍍𑌤𑍇 𑌕𑌲𑌾 𑌮𑌯𑌿 𑌰𑌸𑍇𑌨 𑌰𑌸𑌾𑌯𑌨𑍇𑌨 ।
𑌆𑌸𑍍𑌤𑌾𑌂 𑌯𑌤𑍋 𑌮𑌮 𑌶𑌿𑌰𑌃𑌕𑌰𑌦𑍃𑌷𑍍𑌟𑌿𑌪𑌾𑌦-
-𑌸𑍍𑌪𑍃𑌷𑍍𑌟𑌾𑌃 𑌸𑍁𑌵𑌰𑍍𑌣𑌵𑌪𑍁𑌷𑌃 𑌸𑍍𑌥𑌿𑌰𑌜𑌂𑌗𑌮𑌾𑌃 𑌸𑍍𑌯𑍁𑌃 ॥ 𑍯2 ॥

𑌆𑌦𑍍𑌯𑌾𑌦𑌿𑌵𑌿𑌷𑍍𑌣𑍋𑌃 𑌸𑍍𑌥𑌿𑌰𑌧𑌰𑍍𑌮𑌪𑌤𑍍𑌨𑍀
𑌤𑍍𑌵𑌮𑍇𑌵 𑌪𑌤𑍍𑌯𑌾 𑌮𑌯𑌿 𑌸𑌨𑍍𑌨𑌿𑌧𑍇𑌹𑌿 ।
𑌆𑌦𑍍𑌯𑌾𑌦𑌿𑌲𑌕𑍍𑌷𑍍𑌮𑌿 𑌤𑍍𑌵𑌦𑌨𑍁𑌗𑍍𑌰𑌹𑍇𑌣
𑌪𑌦𑍇 𑌪𑌦𑍇 𑌮𑍇 𑌨𑌿𑌧𑌿𑌦𑌰𑍍𑌶𑌨𑌂 𑌸𑍍𑌯𑌾𑌤𑍍 ॥ 𑍯3 ॥

𑌆𑌦𑍍𑌯𑌾𑌦𑌿𑌲𑌕𑍍𑌷𑍍𑌮𑍀𑌹𑍃𑌦𑌯𑌂 𑌪𑌠𑍇𑌦𑍍𑌯𑌃
𑌸 𑌰𑌾𑌜𑍍𑌯𑌲𑌕𑍍𑌷𑍍𑌮𑍀𑌮𑌚𑌲𑌾𑌂 𑌤𑌨𑍋𑌤𑌿 ।
𑌮𑌹𑌾𑌦𑌰𑌿𑌦𑍍𑌰𑍋𑌽𑌪𑌿 𑌭𑌵𑍇𑌦𑍍𑌧𑌨𑌾𑌢𑍍𑌯-
-𑌸𑍍𑌤𑌦𑌨𑍍𑌵𑌯𑍇 𑌶𑍍𑌰𑍀𑌃 𑌸𑍍𑌥𑌿𑌰𑌤𑌾𑌂 𑌪𑍍𑌰𑌯𑌾𑌤𑌿 ॥ 𑍯4 ॥

𑌯𑌸𑍍𑌯 𑌸𑍍𑌮𑌰𑌣𑌮𑌾𑌤𑍍𑌰𑍇𑌣 𑌤𑍁𑌷𑍍𑌟𑌾 𑌸𑍍𑌯𑌾𑌦𑍍𑌵𑌿𑌷𑍍𑌣𑍁𑌵𑌲𑍍𑌲𑌭𑌾 ।
𑌤𑌸𑍍𑌯𑌾𑌭𑍀𑌷𑍍𑌟𑌂 𑌦𑌦𑌤𑍍𑌯𑌾𑌶𑍁 𑌤𑌂 𑌪𑌾𑌲𑌯𑌤𑌿 𑌪𑍁𑌤𑍍𑌰𑌵𑌤𑍍 ॥ 𑍯5 ॥

𑌇𑌦𑌂 𑌰𑌹𑌸𑍍𑌯𑌂 𑌹𑍃𑌦𑌯𑌂 𑌸𑌰𑍍𑌵𑌕𑌾𑌮𑌫𑌲𑌪𑍍𑌰𑌦𑌮𑍍 ।
𑌜𑌪𑌃 𑌪𑌂𑌚𑌸𑌹𑌸𑍍𑌰𑌂 𑌤𑍁 𑌪𑍁𑌰𑌶𑍍𑌚𑌰𑌣𑌮𑍁𑌚𑍍𑌯𑌤𑍇 ॥ 𑍯6 ॥

𑌤𑍍𑌰𑌿𑌕𑌾𑌲𑌮𑍇𑌕𑌕𑌾𑌲𑌂 𑌵𑌾 𑌨𑌰𑍋 𑌭𑌕𑍍𑌤𑌿𑌸𑌮𑌨𑍍𑌵𑌿𑌤𑌃 ।
𑌯𑌃 𑌪𑌠𑍇𑌚𑍍𑌛𑍃𑌣𑍁𑌯𑌾𑌦𑍍𑌵𑌾𑌪𑌿 𑌸 𑌯𑌾𑌤𑌿 𑌪𑌰𑌮𑌾𑌂 𑌶𑍍𑌰𑌿𑌯𑌮𑍍 ॥ 𑍯𑍭 ॥

𑌮𑌹𑌾𑌲𑌕𑍍𑌷𑍍𑌮𑍀𑌂 𑌸𑌮𑍁𑌦𑍍𑌦𑌿𑌶𑍍𑌯 𑌨𑌿𑌶𑌿 𑌭𑌾𑌰𑍍𑌗𑌵𑌵𑌾𑌸𑌰𑍇 ।
𑌇𑌦𑌂 𑌶𑍍𑌰𑍀𑌹𑍃𑌦𑌯𑌂 𑌜𑌪𑍍𑌤𑍍𑌵𑌾 𑌪𑌂𑌚𑌵𑌾𑌰𑌂 𑌧𑌨𑍀 𑌭𑌵𑍇𑌤𑍍 ॥ 𑍯𑍮 ॥

𑌅𑌨𑍇𑌨 𑌹𑍃𑌦𑌯𑍇𑌨𑌾𑌨𑍍𑌨𑌂 𑌗𑌰𑍍𑌭𑌿𑌣𑍍𑌯𑌾 𑌅𑌭𑌿𑌮𑌂𑌤𑍍𑌰𑌿𑌤𑌮𑍍 ।
𑌦𑌦𑌾𑌤𑌿 𑌤𑌤𑍍𑌕𑍁𑌲𑍇 𑌪𑍁𑌤𑍍𑌰𑍋 𑌜𑌾𑌯𑌤𑍇 𑌶𑍍𑌰𑍀𑌪𑌤𑌿𑌃 𑌸𑍍𑌵𑌯𑌮𑍍 ॥ 𑍯𑍯 ॥

𑌨𑌰𑍇𑌣 𑌵𑌾𑌽𑌥𑌵𑌾 𑌨𑌾𑌰𑍍𑌯𑌾 𑌲𑌕𑍍𑌷𑍍𑌮𑍀𑌹𑍃𑌦𑌯𑌮𑌂𑌤𑍍𑌰𑌿𑌤𑍇 ।
𑌜𑌲𑍇 𑌪𑍀𑌤𑍇 𑌚 𑌤𑌦𑍍𑌵𑌂𑌶𑍇 𑌮𑌂𑌦𑌭𑌾𑌗𑍍𑌯𑍋 𑌨 𑌜𑌾𑌯𑌤𑍇 ॥ 100 ॥

𑌯 𑌆𑌶𑍍𑌵𑌿𑌨𑍇 𑌮𑌾𑌸𑌿 𑌚 𑌶𑍁𑌕𑍍𑌲𑌪𑌕𑍍𑌷𑍇
𑌰𑌮𑍋𑌤𑍍𑌸𑌵𑍇 𑌸𑌨𑍍𑌨𑌿𑌹𑌿𑌤𑍇 𑌸𑍁𑌭𑌕𑍍𑌤𑍍𑌯𑌾 ।
𑌪𑌠𑍇𑌤𑍍𑌤𑌥𑍈𑌕𑍋𑌤𑍍𑌤𑌰𑌵𑌾𑌰𑌵𑍃𑌦𑍍𑌧𑍍𑌯𑌾
𑌲𑌭𑍇𑌤𑍍𑌸 𑌸𑍌𑌵𑌰𑍍𑌣𑌮𑌯𑍀𑌂 𑌸𑍁𑌵𑍃𑌷𑍍𑌟𑌿𑌮𑍍 ॥ 101 ॥

𑌯 𑌏𑌕𑌭𑌕𑍍𑌤𑍋𑌽𑌨𑍍𑌵𑌹𑌮𑍇𑌕𑌵𑌰𑍍𑌷𑌂
𑌵𑌿𑌶𑍁𑌦𑍍𑌧𑌧𑍀𑌃 𑌸𑌪𑍍𑌤𑌤𑌿𑌵𑌾𑌰𑌜𑌾𑌪𑍀 ।
𑌸 𑌮𑌂𑌦𑌭𑌾𑌗𑍍𑌯𑍋𑌽𑌪𑌿 𑌰𑌮𑌾𑌕𑌟𑌾𑌕𑍍𑌷𑌾-
-𑌦𑍍𑌭𑌵𑍇𑌤𑍍𑌸𑌹𑌸𑍍𑌰𑌾𑌕𑍍𑌷𑌶𑌤𑌾𑌧𑌿𑌕𑌶𑍍𑌰𑍀𑌃 ॥ 102 ॥

𑌶𑍍𑌰𑍀𑌶𑌾𑌂𑌘𑍍𑌰𑌿𑌭𑌕𑍍𑌤𑌿𑌂 𑌹𑌰𑌿𑌦𑌾𑌸𑌦𑌾𑌸𑍍𑌯𑌂
𑌪𑍍𑌰𑌸𑌨𑍍𑌨𑌮𑌂𑌤𑍍𑌰𑌾𑌰𑍍𑌥𑌦𑍃𑌢𑍈𑌕𑌨𑌿𑌷𑍍𑌠𑌾𑌮𑍍 ।
𑌗𑍁𑌰𑍋𑌃 𑌸𑍍𑌮𑍃𑌤𑌿𑌂 𑌨𑌿𑌰𑍍𑌮𑌲𑌬𑍋𑌧𑌬𑍁𑌦𑍍𑌧𑌿𑌂
𑌪𑍍𑌰𑌦𑍇𑌹𑌿 𑌮𑌾𑌤𑌃 𑌪𑌰𑌮𑌂 𑌪𑌦𑌂 𑌶𑍍𑌰𑍀𑌃 ॥ 103 ॥

𑌪𑍃𑌥𑍍𑌵𑍀𑌪𑌤𑌿𑌤𑍍𑌵𑌂 𑌪𑍁𑌰𑍁𑌷𑍋𑌤𑍍𑌤𑌮𑌤𑍍𑌵𑌂
𑌵𑌿𑌭𑍂𑌤𑌿𑌵𑌾𑌸𑌂 𑌵𑌿𑌵𑌿𑌧𑌾𑌰𑍍𑌥𑌸𑌿𑌦𑍍𑌧𑌿𑌮𑍍 ।
𑌸𑌂𑌪𑍂𑌰𑍍𑌣𑌕𑍀𑌰𑍍𑌤𑌿𑌂 𑌬𑌹𑍁𑌵𑌰𑍍𑌷𑌭𑍋𑌗𑌂
𑌪𑍍𑌰𑌦𑍇𑌹𑌿 𑌮𑍇 𑌲𑌕𑍍𑌷𑍍𑌮𑌿 𑌪𑍁𑌨𑌃 𑌪𑍁𑌨𑌸𑍍𑌤𑍍𑌵𑌮𑍍 ॥ 104 ॥

𑌵𑌾𑌦𑌾𑌰𑍍𑌥𑌸𑌿𑌦𑍍𑌧𑌿𑌂 𑌬𑌹𑍁𑌲𑍋𑌕𑌵𑌶𑍍𑌯𑌂
𑌵𑌯𑌃 𑌸𑍍𑌥𑌿𑌰𑌤𑍍𑌵𑌂 𑌲𑌲𑌨𑌾𑌸𑍁𑌭𑍋𑌗𑌮𑍍 ।
𑌪𑍌𑌤𑍍𑌰𑌾𑌦𑌿𑌲𑌬𑍍𑌧𑌿𑌂 𑌸𑌕𑌲𑌾𑌰𑍍𑌥𑌸𑌿𑌦𑍍𑌧𑌿𑌂
𑌪𑍍𑌰𑌦𑍇𑌹𑌿 𑌮𑍇 𑌭𑌾𑌰𑍍𑌗𑌵𑌿 𑌜𑌨𑍍𑌮𑌜𑌨𑍍𑌮𑌨𑌿 ॥ 105 ॥

𑌸𑍁𑌵𑌰𑍍𑌣𑌵𑍃𑌦𑍍𑌧𑌿𑌂 𑌕𑍁𑌰𑍁 𑌮𑍇 𑌗𑍃𑌹𑍇 𑌶𑍍𑌰𑍀𑌃
𑌸𑍁𑌧𑌾𑌨𑍍𑌯𑌵𑍃𑌦𑍍𑌧𑌿𑌂 𑌕𑍁𑌰𑍂 𑌮𑍇 𑌗𑍃𑌹𑍇 𑌶𑍍𑌰𑍀𑌃 ।
𑌕𑌲𑍍𑌯𑌾𑌣𑌵𑍃𑌦𑍍𑌧𑌿𑌂 𑌕𑍁𑌰𑍁 𑌮𑍇 𑌗𑍃𑌹𑍇 𑌶𑍍𑌰𑍀𑌃
𑌵𑌿𑌭𑍂𑌤𑌿𑌵𑍃𑌦𑍍𑌧𑌿𑌂 𑌕𑍁𑌰𑍁 𑌮𑍇 𑌗𑍃𑌹𑍇 𑌶𑍍𑌰𑍀𑌃 ॥ 106 ॥

𑌧𑍍𑌯𑌾𑌯𑍇𑌲𑍍𑌲𑌕𑍍𑌷𑍍𑌮𑍀𑌂 𑌪𑍍𑌰𑌹𑌸𑌿𑌤𑌮𑍁𑌖𑍀𑌂 𑌕𑍋𑌟𑌿𑌬𑌾𑌲𑌾𑌰𑍍𑌕𑌭𑌾𑌸𑌾𑌂
𑌵𑌿𑌦𑍍𑌯𑍁𑌦𑍍𑌵𑌰𑍍𑌣𑌾𑌂𑌬𑌰𑌵𑌰𑌧𑌰𑌾𑌂 𑌭𑍂𑌷𑌣𑌾𑌢𑍍𑌯𑌾𑌂 𑌸𑍁𑌶𑍋𑌭𑌾𑌮𑍍 ।
𑌬𑍀𑌜𑌾𑌪𑍂𑌰𑌂 𑌸𑌰𑌸𑌿𑌜𑌯𑍁𑌗𑌂 𑌬𑌿𑌭𑍍𑌰𑌤𑍀𑌂 𑌸𑍍𑌵𑌰𑍍𑌣𑌪𑌾𑌤𑍍𑌰𑌂
𑌭𑌰𑍍𑌤𑍍𑌰𑌾𑌯𑍁𑌕𑍍𑌤𑌾𑌂 𑌮𑍁𑌹𑍁𑌰𑌭𑌯𑌦𑌾𑌂 𑌮𑌹𑍍𑌯𑌮𑌪𑍍𑌯𑌚𑍍𑌯𑍁𑌤𑌶𑍍𑌰𑍀𑌃 ॥ 10𑍭 ॥

𑌗𑍁𑌹𑍍𑌯𑌾𑌤𑌿𑌗𑍁𑌹𑍍𑌯𑌗𑍋𑌪𑍍𑌤𑍍𑌰𑍀 𑌤𑍍𑌵𑌂 𑌗𑍃𑌹𑌾𑌣𑌾𑌸𑍍𑌮𑌤𑍍𑌕𑍃𑌤𑌂 𑌜𑌪𑌮𑍍 ।
𑌸𑌿𑌦𑍍𑌧𑌿𑌰𑍍𑌭𑌵𑌤𑍁 𑌮𑍇 𑌦𑍇𑌵𑌿 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌨𑍍𑌮𑌯𑌿 𑌸𑍍𑌥𑌿𑌤𑌾 ॥ 10𑍮 ॥

𑌇𑌤𑌿 𑌶𑍍𑌰𑍀𑌅𑌥𑌰𑍍𑌵𑌣𑌰𑌹𑌸𑍍𑌯𑍇 𑌶𑍍𑌰𑍀𑌲𑌕𑍍𑌷𑍍𑌮𑍀𑌹𑍃𑌦𑌯𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ॥