ଶ୍ରୀମଦ୍ରାମପାଦାରଵିଂଦମଧୁପଃ ଶ୍ରୀମଧ୍ଵଵଂଶାଧିପଃ
ସଚ୍ଚିଷ୍ୟୋଡୁଗଣୋଡୁପଃ ଶ୍ରିତଜଗଦ୍ଗୀର୍ଵାଣସତ୍ପାଦପଃ ।
ଅତ୍ୟର୍ଥଂ ମନସା କୃତାଚ୍ୟୁତଜପଃ ପାପାଂଧକାରାତପଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 1 ॥

କର୍ମଂଦୀଂଦ୍ରସୁଧୀଂଦ୍ରସଦ୍ଗୁରୁକରାଂଭୋଜୋଦ୍ଭଵଃ ସଂତତଂ
ପ୍ରାଜ୍ୟଧ୍ୟାନଵଶୀକୃତାଖିଲଜଗଦ୍ଵାସ୍ତଵ୍ୟଲକ୍ଷ୍ମୀଧଵଃ ।
ସଚ୍ଛାସ୍ତ୍ରାଦି ଵିଦୂଷକାଖିଲମୃଷାଵାଦୀଭକଂଠୀରଵଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 2 ॥

ସାଲଂକାରକକାଵ୍ୟନାଟକକଲାକାଣାଦପାତଂଜଲ-
ତ୍ରୟ୍ୟର୍ଥସ୍ମୃତିଜୈମିନୀୟକଵିତାସଂକୀତପାରଂଗତଃ ।
ଵିପ୍ରକ୍ଷତ୍ରଵିଡଂଘ୍ରିଜାତମୁଖରାନେକପ୍ରଜାସେଵିତଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 3 ॥

ରଂଗୋତ୍ତୁଂଗତରଂଗମଂଗଲକର ଶ୍ରୀତୁଂଗଭଦ୍ରାତଟ-
ପ୍ରତ୍ୟକ୍ସ୍ଥଦ୍ଵିଜପୁଂଗଵାଲୟ ଲସନ୍ମଂତ୍ରାଲୟାଖ୍ୟେ ପୁରେ ।
ନଵ୍ୟେଂଦ୍ରୋପଲନୀଲଭଵ୍ୟକରସଦ୍ଵୃଂଦାଵନାଂତର୍ଗତଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 4 ॥

ଵିଦ୍ଵଦ୍ରାଜଶିରଃକିରୀଟଖଚିତାନର୍ଘ୍ୟୋରୁରତ୍ନପ୍ରଭା
ରାଗାଘୌଘହପାଦୁକାଦ୍ଵୟଚରଃ ପଦ୍ମାକ୍ଷମାଲାଧରଃ ।
ଭାସ୍ଵଦ୍ଦଂଟକମଂଡଲୂଜ୍ଜ୍ଵଲକରୋ ରକ୍ତାଂବରାଡଂବରଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 5 ॥

ୟଦ୍ଵୃଂଦାଵନସତ୍ପ୍ରଦକ୍ଷିଣନମସ୍କାରାଭିଷେକସ୍ତୁତି-
ଧ୍ୟାନାରାଧନମୃଦ୍ଵିଲେପନମୁଖାନେକୋପଚାରାନ୍ ସଦା ।
କାରଂ କାରମଭିପ୍ରୟାଂତି ଚତୁରୋ ଲୋକାଃ ପୁମର୍ଥାନ୍ ସଦା
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 6 ॥

ଵେଦଵ୍ୟାସମୁନୀଶମଧ୍ଵୟତିରାଟ୍ ଟୀକାର୍ୟଵାକ୍ୟାମୃତଂ
ଜ୍ଞାତ୍ଵାଽଦ୍ଵୈତମତଂ ହଲାହଲସମଂ ତ୍ୟକ୍ତ୍ଵା ସମାଖ୍ୟାପ୍ତୟେ ।
ସଂଖ୍ୟାଵତ୍ସୁଖଦାଂ ଦଶୋପନିଷଦାଂ ଵ୍ୟାଖ୍ୟାଂ ସମାଖ୍ୟନ୍ମୁଦା
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 7 ॥

ଶ୍ରୀମଦ୍ଵୈଷ୍ଣଵଲୋକଜାଲକଗୁରୁଃ ଶ୍ରୀମତ୍ପରିଵ୍ରାଡ୍ଗୁରୁଃ
ଶାସ୍ତ୍ରେ ଦେଵଗୁରୁଃ ଶ୍ରିତାମରତରୁଃ ପ୍ରତ୍ୟୂହଗୋତ୍ରସ୍ଵରୁଃ ।
ଚେତୋଽତୀତଶିରୁସ୍ତଥା ଜିତଵରୁସ୍ସତ୍ସୌଖ୍ୟସଂପତ୍କରୁଃ
ଶ୍ରୀମତ୍ସଦ୍ଗୁରୁରାଘଵେଂଦ୍ରୟତିରାଟ୍ କୁର୍ୟାଦ୍ଧ୍ରୁଵଂ ମଂଗଳମ୍ ॥ 8 ॥

ୟସ୍ସଂଧ୍ୟାସ୍ଵନିଶଂ ଗୁରୋର୍ୟତିପତେଃ ସନ୍ମଂଗଲସ୍ୟାଷ୍ଟକଂ
ସଦ୍ୟଃ ପାପହରଂ ସ୍ଵସେଵି ଵିଦୁଷାଂ ଭକ୍ତ୍ୟୈତଦାଭାଷିତମ୍ ।
ଭକ୍ତ୍ୟା ଵକ୍ତି ସୁସଂପଦଂ ଶୁଭପଦଂ ଦୀର୍ଘାୟୁରାରୋଗ୍ୟକଂ
କୀର୍ତିଂ ପୁତ୍ରକଲତ୍ରବାଂଧଵସୁହୃନ୍ମୂର୍ତିଃ ପ୍ରୟାତି ଧ୍ରୁଵମ୍ ॥

ଇତି ଶ୍ରୀମଦପ୍ପଣାଚାର୍ୟକୃତଂ ରାଘଵେଂଦ୍ରମଂଗଳାଷ୍ଟକଂ ସଂପୂର୍ଣମ୍ ।