ಹೇ ಸ್ವಾಮಿನಾಥ ಕರುಣಾಕರ ದೀನಬನ್ಧೋ,
ಶ್ರೀಪಾರ್ವತೀಶಮುಖಪಙ್ಕಜ ಪದ್ಮಬನ್ಧೋ ।
ಶ್ರೀಶಾದಿದೇವಗಣಪೂಜಿತಪಾದಪದ್ಮ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 1 ॥

ದೇವಾದಿದೇವನುತ ದೇವಗಣಾಧಿನಾಥ,
ದೇವೇನ್ದ್ರವನ್ದ್ಯ ಮೃದುಪಙ್ಕಜಮಞ್ಜುಪಾದ ।
ದೇವರ್ಷಿನಾರದಮುನೀನ್ದ್ರಸುಗೀತಕೀರ್ತೇ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 2 ॥

ನಿತ್ಯಾನ್ನದಾನ ನಿರತಾಖಿಲ ರೋಗಹಾರಿನ್,
ತಸ್ಮಾತ್ಪ್ರದಾನ ಪರಿಪೂರಿತಭಕ್ತಕಾಮ ।
ಶೃತ್ಯಾಗಮಪ್ರಣವವಾಚ್ಯನಿಜಸ್ವರೂಪ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 3 ॥

ಕ್ರೌಞ್ಚಾಸುರೇನ್ದ್ರ ಪರಿಖಣ್ಡನ ಶಕ್ತಿಶೂಲ,
ಪಾಶಾದಿಶಸ್ತ್ರಪರಿಮಣ್ಡಿತದಿವ್ಯಪಾಣೇ ।
ಶ್ರೀಕುಣ್ಡಲೀಶ ಧೃತತುಣ್ಡ ಶಿಖೀನ್ದ್ರವಾಹ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 4 ॥

ದೇವಾದಿದೇವ ರಥಮಣ್ಡಲ ಮಧ್ಯ ವೇದ್ಯ,
ದೇವೇನ್ದ್ರ ಪೀಠನಗರಂ ದೃಢಚಾಪಹಸ್ತಮ್ ।
ಶೂರಂ ನಿಹತ್ಯ ಸುರಕೋಟಿಭಿರೀಡ್ಯಮಾನ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 5 ॥

ಹಾರಾದಿರತ್ನಮಣಿಯುಕ್ತಕಿರೀಟಹಾರ,
ಕೇಯೂರಕುಣ್ಡಲಲಸತ್ಕವಚಾಭಿರಾಮ ।
ಹೇ ವೀರ ತಾರಕ ಜಯಾಽಮರಬೃನ್ದವನ್ದ್ಯ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 6 ॥

ಪಞ್ಚಾಕ್ಷರಾದಿಮನುಮನ್ತ್ರಿತ ಗಾಙ್ಗತೋಯೈಃ,
ಪಞ್ಚಾಮೃತೈಃ ಪ್ರಮುದಿತೇನ್ದ್ರಮುಖೈರ್ಮುನೀನ್ದ್ರೈಃ ।
ಪಟ್ಟಾಭಿಷಿಕ್ತ ಹರಿಯುಕ್ತ ಪರಾಸನಾಥ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 7 ॥

ಶ್ರೀಕಾರ್ತಿಕೇಯ ಕರುಣಾಮೃತಪೂರ್ಣದೃಷ್ಟ್ಯಾ,
ಕಾಮಾದಿರೋಗಕಲುಷೀಕೃತದುಷ್ಟಚಿತ್ತಮ್ ।
ಭಕ್ತ್ವಾ ತು ಮಾಮವಕಳಾಧರ ಕಾನ್ತಿಕಾನ್ತ್ಯಾ,
ವಲ್ಲೀಸನಾಥ ಮಮ ದೇಹಿ ಕರಾವಲಮ್ಬಮ್ ॥ 8 ॥

ಸುಬ್ರಹ್ಮಣ್ಯ ಕರಾವಲಮ್ಬಂ ಪುಣ್ಯಂ ಯೇ ಪಠನ್ತಿ ದ್ವಿಜೋತ್ತಮಾಃ ।
ತೇ ಸರ್ವೇ ಮುಕ್ತಿ ಮಾಯಾನ್ತಿ ಸುಬ್ರಹ್ಮಣ್ಯ ಪ್ರಸಾದತಃ ।
ಸುಬ್ರಹ್ಮಣ್ಯ ಕರಾವಲಮ್ಬಮಿದಂ ಪ್ರಾತರುತ್ಥಾಯ ಯಃ ಪಠೇತ್ ।
ಕೋಟಿಜನ್ಮಕೃತಂ ಪಾಪಂ ತತ್​ಕ್ಷಣಾದೇವ ನಶ್ಯತಿ ॥