ఓం అస్య శ్రీ ఆపదుద్ధారక హనుమత్ స్తోత్ర మహామన్త్ర కవచస్య, విభీషణ ఋషిః, హనుమాన్ దేవతా, సర్వాపదుద్ధారక శ్రీహనుమత్ప్రసాదేన మమ సర్వాపన్నివృత్త్యర్థే, సర్వకార్యానుకూల్య సిద్ధ్యర్థే జపే వినియోగః ।

ధ్యానమ్ ।
వామే కరే వైరిభిదం వహన్తం
శైలం పరే శృఙ్ఖలహారిటఙ్కమ్ ।
దధానమచ్ఛచ్ఛవియజ్ఞసూత్రం
భజే జ్వలత్కుణ్డలమాఞ్జనేయమ్ ॥ 1 ॥

సంవీతకౌపీన ముదఞ్చితాఙ్గుళిం
సముజ్జ్వలన్మౌఞ్జిమథోపవీతినమ్ ।
సకుణ్డలం లమ్బిశిఖాసమావృతం
తమాఞ్జనేయం శరణం ప్రపద్యే ॥ 2 ॥

ఆపన్నాఖిలలోకార్తిహారిణే శ్రీహనూమతే ।
అకస్మాదాగతోత్పాత నాశనాయ నమో నమః ॥ 3 ॥

సీతావియుక్తశ్రీరామశోకదుఃఖభయాపహ ।
తాపత్రితయసంహారిన్ ఆఞ్జనేయ నమోఽస్తు తే ॥ 4 ॥

ఆధివ్యాధి మహామారీ గ్రహపీడాపహారిణే ।
ప్రాణాపహర్త్రేదైత్యానాం రామప్రాణాత్మనే నమః ॥ 5 ॥

సంసారసాగరావర్త కర్తవ్యభ్రాన్తచేతసామ్ ।
శరణాగతమర్త్యానాం శరణ్యాయ నమోఽస్తు తే ॥ 6 ॥

వజ్రదేహాయ కాలాగ్నిరుద్రాయాఽమితతేజసే ।
బ్రహ్మాస్త్రస్తమ్భనాయాస్మై నమః శ్రీరుద్రమూర్తయే ॥ 7 ॥

రామేష్టం కరుణాపూర్ణం హనూమన్తం భయాపహమ్ ।
శత్రునాశకరం భీమం సర్వాభీష్టప్రదాయకమ్ ॥ 8 ॥

కారాగృహే ప్రయాణే వా సఙ్గ్రామే శత్రుసఙ్కటే ।
జలే స్థలే తథాఽఽకాశే వాహనేషు చతుష్పథే ॥ 9 ॥

గజసింహ మహావ్యాఘ్ర చోర భీషణ కాననే ।
యే స్మరన్తి హనూమన్తం తేషాం నాస్తి విపత్ క్వచిత్ ॥ 10 ॥

సర్వవానరముఖ్యానాం ప్రాణభూతాత్మనే నమః ।
శరణ్యాయ వరేణ్యాయ వాయుపుత్రాయ తే నమః ॥ 11 ॥

ప్రదోషే వా ప్రభాతే వా యే స్మరన్త్యఞ్జనాసుతమ్ ।
అర్థసిద్ధిం జయం కీర్తిం ప్రాప్నువన్తి న సంశయః ॥ 12 ॥

జప్త్వా స్తోత్రమిదం మన్త్రం ప్రతివారం పఠేన్నరః ।
రాజస్థానే సభాస్థానే ప్రాప్తే వాదే లభేజ్జయమ్ ॥ 13 ॥

విభీషణకృతం స్తోత్రం యః పఠేత్ ప్రయతో నరః ।
సర్వాపద్భ్యో విముచ్యేత నాఽత్ర కార్యా విచారణా ॥ 14 ॥

మన్త్రః ।
మర్కటేశ మహోత్సాహ సర్వశోకనివారక ।
శత్రూన్ సంహర మాం రక్ష శ్రియం దాపయ భో హరే ॥ 15

ఇతి విభీషణకృతం సర్వాపదుద్ధారక శ్రీహనుమత్ స్తోత్రమ్ ॥