వైశాఖే మాసి కృష్ణాయాం దశమ్యాం మన్దవాసరే ।
పూర్వాభాద్రా ప్రభూతాయ మఙ్గళం శ్రీహనూమతే ॥ 1 ॥

కరుణారసపూర్ణాయ ఫలాపూపప్రియాయ చ ।
మాణిక్యహారకణ్ఠాయ మఙ్గళం శ్రీహనూమతే ॥ 2 ॥

సువర్చలాకళత్రాయ చతుర్భుజధరాయ చ ।
ఉష్ట్రారూఢాయ వీరాయ మఙ్గళం శ్రీహనూమతే ॥ 3 ॥

దివ్యమఙ్గళదేహాయ పీతామ్బరధరాయ చ ।
తప్తకాఞ్చనవర్ణాయ మఙ్గళం శ్రీహనూమతే ॥ 4 ॥

భక్తరక్షణశీలాయ జానకీశోకహారిణే ।
సృష్టికారణభూతాయ మఙ్గళం శ్రీహనూమతే ॥ 5 ॥

రమ్భావనవిహారాయ గన్ధమాదనవాసినే ।
సర్వలోకైకనాథాయ మఙ్గళం శ్రీహనూమతే ॥ 6 ॥

పఞ్చాననాయ భీమాయ కాలనేమిహరాయ చ ।
కౌణ్డిన్యగోత్రజాతాయ మఙ్గళం శ్రీహనూమతే ॥ 7 ॥

కేసరీపుత్ర దివ్యాయ సీతాన్వేషపరాయ చ ।
వానరాణాం వరిష్ఠాయ మఙ్గళం శ్రీహనూమతే ॥ 8 ॥

ఇతి శ్రీ హనుమాన్ మఙ్గళాష్టకమ్ ।