దేశమును ప్రేమిఞ్చుమన్నా
మఞ్చి అన్నది పెఞ్చుమన్నా
వట్టి మాటలు కట్టిపెట్టోయ్
గట్టి మేల్ తలపెట్టవోయ్ !
పాడిపణ్టలుపొఙ్గి పొర్లే
దారిలో నువు పాటు పడవోయ్
తిణ్డి కలిగితె కణ్డ కలదోయ్
కణ్డ కలవాడేను మనిషోయ్ !
ఈసురోమని మనుషులుణ్టే
దేశ మేగతి బాగుపడునోయ్
జల్డుకొని కళలెల్ల నేర్చుకు
దేశి సరుకులు నిఞ్చవోయ్ !
అన్ని దేశాల్ క్రమ్మవలె నోయ్
దేశి సరుకులు నమ్మవెలె నోయ్
డబ్బు తేలేనట్టి నరులకు
కీర్తి సమ్పద లబ్బవోయ్ !
వెనుక చూసిన కార్యమేమోయ్
మఞ్చిగతమున కొఞ్చమేనోయ్
మన్దగిఞ్చక మున్దు అడుగేయ్
వెనుక పడితే వెనుకేనోయ్ !
పూను స్పర్దను విద్యలన్దే
వైరములు వాణిజ్య మన్దే
వ్యర్ధ కలహం పెఞ్చబోకోయ్
కత్తి వైరం కాల్చవోయ్ !
దేశాభిమానము నాకు కద్దని
వట్టి గొప్పలు చెప్పకోకోయ్
పూని యేదైనాను, వొక మేల్
కూర్చి జనులకు చూపవోయ్ !
ఓర్వలేమి పిశాచి దేశం
మూలుగులు పీల్చేసె నోయ్
ఒరుల మేలుకు సన్తసిస్తూ
ఐకమత్యం నేర్చవోయ్
పరుల కలిమికి పొర్లి యేడ్చే
పాపి కెక్కడ సుఖం కద్దోయ్
ఒకరి మేల్ తన మేలనెఞ్చే
నేర్పరికి మేల్ కొల్ల లోయి !
సొన్త లాభం కొన్త మానుకు
పొరుగువాడికి తోడు పడవోయ్
దేశమణ్టే మట్టికాదోయి
దేశమణ్టే మనుషులోయ్ !
చెట్ట పట్టాల్ పట్టుకుని
దేశస్తు లన్తా నడవవలె నోయ్
అన్నదమ్ముల వలెను జాతులు
మతములన్నీ మెలగవలె నోయి !
మతం వేరైతేను యేమోయి
మనసు వొకటై మనుషులుణ్టే
జాతియన్నది లేచి పెరిగీ
లోకమున రాణిఞ్చు నోయి !
దేశ మనియెడి దొడ్డ వృక్షం
ప్రేమలను పూలెత్తవలె నోయ్
నరుల చెమటను తడిసి మూలం
ధనం పణ్టలు పణ్డవలె నోయి !
ఆకులన్దున అణగి మణగీ
కవిత పలకవలె నోయ్
పలుకులను విని దేశమన్దభి
మానములు మొలకెత్త వలెనోయి !