నమామీశ్వరం సచ్చిదానన్దరూపం
లసత్కుణ్డలం గోకులే భ్రాజమానమ్ ।
యశోదాభియోలూఖలాద్ధావమానం
పరామృష్టమత్యన్తతో ద్రుత్య గోప్యా ॥ 1 ॥
రుదన్తం ముహుర్నేత్రయుగ్మం మృజన్తం
కరామ్భోజయుగ్మేన సాతఙ్కనేత్రమ్ ।
ముహుః శ్వాసకమ్పత్రిరేఖాఙ్కకణ్ఠ-
స్థితగ్రైవ-దామోదరం భక్తిబద్ధమ్ ॥ 2 ॥
ఇతీదృక్ స్వలీలాభిరానన్దకుణ్డే
స్వఘోషం నిమజ్జన్తమాఖ్యాపయన్తమ్ ।
తదీయేషితాజ్ఞేషు భక్తైర్జితత్వం
పునః ప్రేమతస్తం శతావృత్తి వన్దే ॥ 3 ॥
వరం దేవ మోక్షం న మోక్షావధిం వా
న చాన్యం వృణేఽహం వరేషాదపీహ ।
ఇదం తే వపుర్నాథ గోపాలబాలం
సదా మే మనస్యావిరాస్తాం కిమన్యైః ॥ 4 ॥
ఇదం తే ముఖామ్భోజమత్యన్తనీలైర్-
వృతం కున్తలైః స్నిగ్ధ-రక్తైశ్చ గోప్యా ।
ముహుశ్చుమ్బితం బిమ్బరక్తధరం మే
మనస్యావిరాస్తాం అలం లక్షలాభైః ॥ 5 ॥
నమో దేవ దామోదరానన్త విష్ణో
ప్రసీద ప్రభో దుఃఖజాలాబ్ధిమగ్నమ్ ।
కృపాదృష్టివృష్ట్యాతిదీనం బతాను
గృహాణేశ మాం అజ్ఞమేధ్యక్షిదృశ్యః ॥ 6 ॥
కువేరాత్మజౌ బద్ధమూర్త్యైవ యద్వత్
త్వయా మోచితౌ భక్తిభాజౌ కృతౌ చ ।
తథా ప్రేమభక్తిం స్వకం మే ప్రయచ్ఛ
న మోక్షే గ్రహో మేఽస్తి దామోదరేహ ॥ 7 ॥
నమస్తేఽస్తు దామ్నే స్ఫురద్దీప్తిధామ్నే
త్వదీయోదరాయాథ విశ్వస్య ధామ్నే ।
నమో రాధికాయై త్వదీయప్రియాయై
నమోఽనన్తలీలాయ దేవాయ తుభ్యమ్ ॥ 8 ॥
ఇతి శ్రీమద్పద్మపురాణే శ్రీ దామోదరాష్టాకం సమ్పూర్ణమ్ ॥
