శ్రీ గణేశాయ నమః శ్రీ సరస్వత్యై నమః
శ్రీపాదవల్లభ నరసింహసరస్వతి
శ్రీగురు దత్తాత్రేయాయ నమః

దత్తాత్రేయం మహాత్మానం వరదం భక్తవత్సలమ్ ।
ప్రపన్నార్తిహరం వన్దే స్మర్తృగామి సనోవతు ॥ 1 ॥

దీనబన్ధుం కృపాసిన్ధుం సర్వకారణకారణమ్ ।
సర్వరక్షాకరం వన్దే స్మర్తృగామి సనోవతు ॥ 2 ॥

శరణాగతదీనార్త పరిత్రాణపరాయణమ్ ।
నారాయణం విభుం వన్దే స్మర్తృగామి సనోవతు ॥ 3 ॥

సర్వానర్థహరం దేవం సర్వమఙ్గళ మఙ్గళమ్ ।
సర్వక్లేశహరం వన్దే స్మర్తృగామి సనోవతు ॥ 4 ॥

బ్రహ్మణ్యం ధర్మతత్త్వజ్ఞం భక్తకీర్తివివర్ధనమ్ ।
భక్తాఽభీష్టప్రదం వన్దే స్మర్తృగామి సనోవతు ॥ 5 ॥

శోషణం పాపపఙ్కస్య దీపనం జ్ఞానతేజసః ।
తాపప్రశమనం వన్దే స్మర్తృగామి సనోవతు ॥ 6 ॥

సర్వరోగప్రశమనం సర్వపీడానివారణమ్ ।
విపదుద్ధరణం వన్దే స్మర్తృగామి సనోవతు ॥ 7 ॥

జన్మసంసారబన్ధఘ్నం స్వరూపానన్దదాయకమ్ ।
నిశ్శ్రేయసపదం వన్దే స్మర్తృగామి సనోవతు ॥ 8 ॥

జయ లాభ యశః కామ దాతుర్దత్తస్య యః స్తవమ్ ।
భోగమోక్షప్రదస్యేమం ప్రపఠేత్ సుకృతీ భవేత్ ॥9 ॥

ఇతి శ్రీ దత్తస్తవమ్ ।