তৈত্তিরীযারণ্যকম্ - 4, প্রপাঠকঃ - 10, অনুবাকঃ - 41-44
ওং-যঁশ্ছংদ॑সামৃষ॒ভো বি॒শ্বরূ॑পঃ ।
ছংদো॒ভ্যোঽধ্য॒মৃতা᳚থ্সংব॒ভূব॑ ।
স মেংদ্রো॑ মে॒ধযা᳚ স্পৃণোতু ।
অ॒মৃত॑স্য দেব॒ধার॑ণো ভূযাসম্ ।
শরী॑রং মে॒ বিচ॑র্ষণম্ ।
জি॒হ্বা মে॒ মধু॑মত্তমা ।
কর্ণা᳚ভ্যাং॒ ভূরি॒বিশ্রু॑বম্ ।
ব্রহ্ম॑ণঃ কো॒শো॑ঽসি মে॒ধযা পি॑হিতঃ ।
শ্রু॒তং মে॑ গোপায ॥
ওং শাংতিঃ॒ শাংতিঃ॒ শাংতিঃ॑ ॥
ওং মে॒ধাদে॒বী জু॒ষমা॑ণা ন॒ আগা᳚-দ্বি॒শ্বাচী॑ ভ॒দ্রা সু॑মন॒স্য মা॑না ।
ত্বযা॒ জুষ্টা॑ নু॒দমা॑না দু॒রুক্তা᳚ন্ বৃ॒হদ্ব॑দেম বি॒দথে॑ সু॒বীরাঃ᳚ ।
ত্বযা॒ জুষ্ট॑ ঋ॒ষির্ভ॑বতি দেবি॒ ত্বযা॒ ব্রহ্মা॑ঽঽগ॒তশ্রী॑রু॒ত ত্বযা᳚ ।
ত্বযা॒ জুষ্ট॑শ্চি॒ত্রং-বিঁং॑দতে বসু॒ সা নো॑ জুষস্ব॒ দ্রবি॑ণো ন মেধে ॥
মে॒ধাং ম॒ ইংদ্রো॑ দদাতু মে॒ধাং দে॒বী সর॑স্বতী ।
মে॒ধাং মে॑ অ॒শ্বিনা॑বু॒ভা-বাধ॑ত্তাং॒ পুষ্ক॑রস্রজা ।
অ॒প্স॒রাসু॑ চ॒ যা মে॒ধা গং॑ধ॒র্বেষু॑ চ॒ যন্মনঃ॑ ।
দৈবীং᳚ মে॒ধা সর॑স্বতী॒ সা মাং᳚ মে॒ধা সু॒রভি॑-র্জুষতা॒গ্॒ স্বাহা᳚ ॥
আমাং᳚ মে॒ধা সু॒রভি॑-র্বি॒শ্বরূ॑পা॒ হির॑ণ্যবর্ণা॒ জগ॑তী জগ॒ম্যা ।
ঊর্জ॑স্বতী॒ পয॑সা॒ পিন্ব॑মানা॒ সা মাং᳚ মে॒ধা সু॒প্রতী॑কা জুষংতাম্ ॥
মযি॑ মে॒ধাং মযি॑ প্র॒জাং ময্য॒গ্নি-স্তেজো॑ দধাতু॒,
মযি॑ মে॒ধাং মযি॑ প্র॒জাং মযীংদ্র॑ ইংদ্রি॒যং দ॑ধাতু॒,
মযি॑ মে॒ধাং মযি॑ প্র॒জাং মযি॒ সূর্যো॒ ভ্রাজো॑ দধাতু ॥
[ওং হং॒স॒ হং॒সায॑ বি॒দ্মহে॑ পরমহং॒সায॑ ধীমহি ।
তন্নো॑ হংসঃ প্রচো॒দযা᳚ত্ ॥ (হংসগাযত্রী)]
ওং শাংতিঃ॒ শাংতিঃ॒ শাংতিঃ॑ ॥
