বীজাপূরগদেক্ষুকার্মুকরুজা চক্রাব্জপাশোত্পল-
-ব্রীহ্যগ্রস্ববিষাণরত্নকলশপ্রোদ্যত্করাংভোরুহঃ ।
ধ্যেযো বল্লভযা সপদ্মকরযাশ্লিষ্টোজ্জ্বলদ্ভূষযা
বিশ্বোত্পত্তিবিপত্তিসংস্থিতিকরো বিঘ্নেশ ইষ্টার্থদঃ ॥ 1 ॥

নমস্তে সিদ্ধিলক্ষ্মীশ গণাধিপ মহাপ্রভো ।
বিঘ্নেশ্বর জগন্নাথ গৌরীপুত্র জগত্প্রভো ॥ 2 ॥

জয বিঘ্নেশ্বর বিভো বিনাযক মহেশ্বর ।
লংবোদর মহাবাহো সর্বদা ত্বং প্রসীদ মে ॥ 3 ॥

মহাদেব জগত্স্বামিন্ মূষিকারূঢ শংকর ।
বিশালাক্ষ মহাকায মাং ত্রাহি পরমেশ্বর ॥ 4 ॥

কুংজরাস্য সুরাধীশ মহেশ করুণানিধে ।
মাতুলুংগধর স্বামিন্ গদাচক্রসমন্বিত ॥ 5 ॥

দশবাহো মহারাজ গজবক্ত্র চতুর্ভুজ ।
শূর্পকর্ণ মহাকর্ণ গণনাথ প্রসীদ মে ॥ 6 ॥

শংখশূলসমাযুক্ত বীজাপূরসমন্বিত ।
ইক্ষুকার্মুকসংযুক্ত পদ্মহস্ত প্রসীদ মে ॥ 7 ॥

নানাভরণসংযুক্ত রত্নকুংভকর প্রভো ।
সর্গস্থিতিলযাধীশ পরমাত্মন্ জয প্রভো ॥ 8 ॥

অনাথনাথ বিশ্বেশ বিঘ্নসংঘবিনাশন ।
ত্রযীমূর্তে সুরপতে ব্রহ্মবিষ্ণুশিবাত্মক ॥ 9 ॥

ত্রযীগুণ মহাদেব পাহি মাং সর্বপালক ।
অণিমাদিগুণাধার লক্ষ্মীশ্রীবিষ্ণুপূজিত ॥ 10 ॥

গৌরীশংকরসংপূজ্য জয ত্বং গণনাযক ।
রতিমন্মথসংসেব্য মহীভূদারসংস্তুত ॥ 11 ॥

ঋদ্ধ্যামোদাদিসংসেব্য মহাগণপতে জয ।
শংখপদ্মাদিসংসেব্য নিরালংব নিরীশ্বর ॥ 12 ॥

নিষ্কলংক নিরাধার পাহি মাং নিত্যমব্যয ।
অনাদ্য জগতামাদ্য পিতামহসুপূজিত ॥ 13 ॥

ধূমকেতো গণাধ্যক্ষ মহামূষকবাহন ।
অনংতপরমানংদ জয বিঘ্নেশ্বরেশ্বর ॥ 14 ॥

রত্নসিংহাসনাসীন কিরীটেন সুশোভিত ।
পরাত্পর পরেশান পরপূরুষ পাহি মাম্ ॥ 15 ॥

নির্দ্বংদ্ব নির্গুণাভাস জপাপুষ্পসমপ্রভ ।
সর্বপ্রমথসংস্তুত্য ত্রাহি মাং বিঘ্ননাযক ॥ 16 ॥

কুমারস্য গুরো দেব সর্বৈশ্বর্যপ্রদাযক ।
সর্বাভীষ্টপ্রদ স্বামিন্ সর্বপ্রত্যূহনাশক ॥ 17 ॥

শরণ্য সর্বলোকানাং শরণাগতবত্সল ।
মহাগণপতে নিত্যং মাং পালয কৃপানিধে ॥ 18 ॥

এবং শ্রীগণনাথস্য স্তবরাজমনুত্তমম্ ।
যঃ পঠেচ্ছৃণুযান্নিত্যং প্রত্যূহৈঃ স বিমুচ্যতে ॥ 19 ॥

অশ্বমেধসমং পুণ্যফলং প্রাপ্নোত্যনুত্তমম্ ।
বশীকরোতি ত্রৈলোক্যং প্রাপ্য সৌভাগ্যমুত্তমম্ ॥ 20 ॥

সর্বাভীষ্টমবাপ্নোতি শীঘ্রমেব সুদুর্লভম্ ।
মহাগণেশসান্নিধ্যং প্রাপ্নোত্যেব ন সংশযঃ ॥ 21 ॥

ইতি শ্রীরুদ্রযামলে শ্রীবিনাযকস্তবরাজঃ সংপূর্ণম্ ।