1. শ্রী বাল গণপতিঃ
করস্থ কদলীচূতপনসেক্ষুকমোদকম্ ।
বালসূর্যনিভং বংদে দেবং বালগণাধিপম্ ॥ 1 ॥
2. শ্রী তরুণ গণপতিঃ
পাশাংকুশাপূপকপিত্থজংবূ-
-স্বদংতশালীক্ষুমপি স্বহস্তৈঃ ।
ধত্তে সদা যস্তরুণারুণাভঃ
পাযাত্ স যুষ্মাংস্তরুণো গণেশঃ ॥ 2 ॥
3. শ্রী ভক্ত গণপতিঃ
নারিকেলাম্রকদলীগুডপাযসধারিণম্ ।
শরচ্চংদ্রাভবপুষং ভজে ভক্তগণাধিপম্ ॥ 3 ॥
4. শ্রী বীর গণপতিঃ
বেতালশক্তিশরকার্মুকচক্রখড্গ-
-খট্বাংগমুদ্গরগদাংকুশনাগপাশান্ ।
শূলং চ কুংতপরশুং ধ্বজমুদ্বহংতং
বীরং গণেশমরুণং সততং স্মরামি ॥ 4 ॥
5. শ্রী শক্তি গণপতিঃ
আলিংগ্য দেবীং হরিতাংগযষ্টিং
পরস্পরাশ্লিষ্টকটিপ্রদেশম্ ।
সংধ্যারুণং পাশসৃণী বহংতং
ভযাপহং শক্তিগণেশমীডে ॥ 5 ॥
6. শ্রী দ্বিজ গণপতিঃ
যং পুস্তকাক্ষ গুণদংডকমংডলু শ্রী-
-বিদ্যোতমানকরভূষণমিংদুবর্ণম্ ।
স্তংবেরমাননচতুষ্টযশোভমানং
ত্বাং যঃ স্মরেত্ দ্বিজগণাধিপতে স ধন্যঃ ॥ 6 ॥
7. শ্রী সিদ্ধ গণপতিঃ
পক্বচূতফলপুষ্পমংজরী-
-রিক্ষুদংডতিলমোদকৈঃ সহ ।
উদ্বহন্ পরশুমস্তু তে নমঃ
শ্রীসমৃদ্ধিযুত হেমপিংগল ॥ 7 ॥
8. শ্রী উচ্ছিষ্ট গণপতিঃ
নীলাব্জদাডিমীবীণাশালীগুংজাক্ষসূত্রকম্ ।
দধদুচ্ছিষ্টনামাযং গণেশঃ পাতু মেচকঃ ॥ 8 ॥
9. শ্রী বিঘ্ন গণপতিঃ
শংখেক্ষুচাপকুসুমেষুকুঠারপাশ-
-চক্রস্বদংতসৃণিমংজরিকাশরাদ্যৈঃ ।
পাণিশ্রিতৈঃ পরিসমীহিতভূষণশ্রী-
-বিঘ্নেশ্বরো বিজযতে তপনীযগৌরঃ ॥ 9 ॥
10. শ্রী ক্ষিপ্র গণপতিঃ
দংতকল্পলতাপাশরত্নকুংভাংকুশোজ্জ্বলম্ ।
বংধূককমনীযাভং ধ্যাযেত্ ক্ষিপ্রগণাধিপম্ ॥ 10 ॥
11. শ্রী হেরংব গণপতিঃ
অভযবরদহস্তঃ পাশদংতাক্ষমালা-
-সৃণিপরশু দধানো মুদ্গরং মোদকং চ ।
ফলমধিগতসিংহঃ পংচমাতংগবক্ত্রো
গণপতিরতিগৌরঃ পাতু হেরংবনামা ॥ 11 ॥
12. শ্রী লক্ষ্মী গণপতিঃ
বিভ্রাণঃ শুকবীজপূরকমিলন্মাণিক্যকুংভাকুশান্
পাশং কল্পলতাং চ খড্গবিলসজ্জ্যোতিঃ সুধানির্ঝরঃ ।
শ্যামেনাত্তসরোরুহেণ সহিতং দেবীদ্বযং চাংতিকে
গৌরাংগো বরদানহস্তসহিতো লক্ষ্মীগণেশোঽবতাত্ ॥ 12 ॥
13. শ্রী মহা গণপতিঃ
হস্তীংদ্রাননমিংদুচূডমরুণচ্ছাযং ত্রিনেত্রং রসা-
-দাশ্লিষ্টং প্রিযযা সপদ্মকরযা স্বাংকস্থযা সংততম্ ।
বীজাপূরগদেক্ষুকার্মুকলসচ্চক্রাব্জপাশোত্পল-
-ব্রীহ্যগ্রস্ববিষাণরত্নকলশান্ হস্তৈর্বহংতং ভজে ॥ 13 ॥
14. শ্রী বিজয গণপতিঃ
পাশাংকুশস্বদংতাম্রফলবানাখুবাহনঃ ।
বিঘ্নং নিহংতু নঃ সর্বং রক্তবর্ণো বিনাযকঃ ॥ 14 ॥
15. শ্রী নৃত্ত গণপতিঃ
পাশাংকুশাপূপকুঠারদংত-
-চংচত্করাক্লুপ্তবরাংগুলীকম্ ।
পীতপ্রভং কল্পতরোরধস্থং
ভজামি নৃত্তোপপদং গণেশম্ ॥ 15 ॥
16. শ্রী ঊর্ধ্ব গণপতিঃ
কল্হারশালিকমলেক্ষুকচাপবাণ-
-দংতপ্ররোহকগদী কনকোজ্জ্বলাংগঃ ।
আলিংগনোদ্যতকরো হরিতাংগযষ্ট্যা
দেব্যা করোতু শুভমূর্ধ্বগণাধিপো মে ॥ 16 ॥
17. শ্রী একাক্ষর গণপতিঃ
রক্তো রক্তাংগরাগাংকুশকুসুমযুতস্তুংদিলশ্চংদ্রমৌলিঃ
নেত্রৈর্যুক্তস্ত্রিভির্বামনকরচরণো বীজপূরং দধানঃ ।
হস্তাগ্রাক্লুপ্ত পাশাংকুশরদবরদো নাগবক্ত্রোঽহিভূষো
দেবঃ পদ্মাসনস্থো ভবতু সুখকরো ভূতযে বিঘ্নরাজঃ ॥ 17 ॥
18. শ্রী বর গণপতিঃ
সিংদূরাভমিভাননং ত্রিনযনং হস্তে চ পাশাংকুশৌ
বিভ্রাণং মধুমত্কপালমনিশং সাধ্বিংদুমৌলিং ভজে ।
পুষ্ট্যাশ্লিষ্টতনুং ধ্বজাগ্রকরযা পদ্মোল্লসদ্ধস্তযা
তদ্যোন্যাহিত পাণিমাত্তবসুমত্পাত্রোল্লসত্পুষ্করম্ ॥ 18 ॥
19. শ্রী ত্র্যক্ষর গণপতিঃ
গজেংদ্রবদনং সাক্ষাচ্চলত্কর্ণসুচামরং
হেমবর্ণং চতুর্বাহুং পাশাংকুশধরং বরম্ ।
স্বদংতং দক্ষিণে হস্তে সব্যে ত্বাম্রপলং তথা
পুষ্করৈর্মোদকং চৈব ধারযংতমনুস্মরেত্ ॥ 19 ॥
20. শ্রী ক্ষিপ্রপ্রসাদ গণপতিঃ
ধৃতপাশাংকুশকল্পলতা স্বরদশ্চ বীজপূরযুতঃ
শশিশকলকলিতমৌলিস্ত্রিলোচনোঽরুণশ্চ গজবদনঃ ।
ভাসুরভূষণদীপ্তো বৃহদুদরঃ পদ্মবিষ্টরোল্লসিতঃ
বিঘ্নপযোধরপবনঃ করধৃতকমলঃ সদাস্তু মে ভূত্যৈ ॥ 20 ॥
21. শ্রী হরিদ্রা গণপতিঃ
হরিদ্রাভং চতুর্বাহুং করীংদ্রবদনং প্রভুম্ ।
পাশাংকুশধরং দেবং মোদকং দংতমেব চ ।
ভক্তাভযপ্রদাতারং বংদে বিঘ্নবিনাশনম্ ॥ 21 ॥
22. শ্রী একদংত গণপতিঃ
লংবোদরং শ্যামতনুং গণেশং
কুঠারমক্ষস্রজমূর্ধ্বগাত্রম্ ।
সলড্ডুকং দংতমধঃ করাভ্যাং
বামেতরাভ্যাং চ দধানমীডে ॥ 22 ॥
23. শ্রী সৃষ্টি গণপতিঃ
পাশাংকুশস্বদংতাম্রফলবানাখুবাহনঃ ।
বিঘ্নং নিহংতু নঃ শোণঃ সৃষ্টিদক্ষো বিনাযকঃ ॥ 23 ॥
24. শ্রী উদ্দংড গণপতিঃ
কল্হারাংবুজবীজপূরকগদাদংতেক্ষুচাপং সুমং
বিভ্রাণো মণিকুংভশালিকলশৌ পাশং সৃণিং চাব্জকম্ ।
গৌরাংগ্যা রুচিরারবিংদকরযা দেব্যা সমালিংগতঃ
শোণাংগঃ শুভমাতনোতু ভজতামুদ্দংডবিঘ্নেশ্বরঃ ॥ 24 ॥
25. শ্রী ঋণমোচক গণপতিঃ
পাশাংকুশৌ দংতজংবু দধানঃ স্ফাটিকপ্রভঃ ।
রক্তাংশুকো গণপতির্মুদে স্যাদৃণমোচকঃ ॥ 25 ॥
26. শ্রী ঢুংঢি গণপতিঃ
অক্ষমালাং কুঠারং চ রত্নপাত্রং স্বদংতকম্ ।
ধত্তে করৈর্বিঘ্নরাজো ঢুংঢিনামা মুদেঽস্তু নঃ ॥ 26 ॥
27. শ্রী দ্বিমুখ গণপতিঃ
স্বদংতপাশাংকুশরত্নপাত্রং
করৈর্দধানো হরিনীলগাত্রঃ ।
রক্তাংশুকো রত্নকিরীটমালী
ভূত্যৈ সদা মে দ্বিমুখো গণেশঃ ॥ 27 ॥
28. শ্রী ত্রিমুখ গণপতিঃ
শ্রীমত্তীক্ষ্ণশিখাংকুশাক্ষবরদান্ দক্ষে দধানঃ করৈঃ
পাশং চামৃতপূর্ণকুংভমভযং বামে দধানো মুদা ।
পীঠে স্বর্ণমযারবিংদবিলসত্সত্কর্ণিকাভাসুরে
স্বাসীনস্ত্রিমুখঃ পলাশরুচিরো নাগাননঃ পাতু নঃ ॥ 28 ॥
29. শ্রী সিংহ গণপতিঃ
বীণাং কল্পলতামরিং চ বরদং দক্ষে বিদত্তে করৈ-
-র্বামে তামরসং চ রত্নকলশং সন্মংজরীং চাভযম্ ।
শুংডাদংডলসন্মৃগেংদ্রবদনঃ শংখেংদুগৌরঃ শুভো
দীব্যদ্রত্ননিভাংশুকো গণপতিঃ পাযাদপাযত্ স নঃ ॥ 29 ॥
30. শ্রী যোগ গণপতিঃ
যোগারূঢো যোগপট্টাভিরামো
বালার্কাভশ্চেংদ্রনীলাংশুকাঢ্যঃ ।
পাশেক্ষ্বক্ষান্ যোগদংডং দধানো
পাযান্নিত্যং যোগবিঘ্নেশ্বরো নঃ ॥ 30 ॥
31. শ্রী দুর্গা গণপতিঃ
তপ্তকাংচনসংকাশশ্চাষ্টহস্তো মহত্তনুঃ
দীপ্তাংকুশং শরং চাক্ষং দংতু দক্ষে বহন্ করৈঃ ।
বামে পাশং কার্মুকং চ লতাং জংবু দধত্করৈঃ
রক্তাংশুকঃ সদা ভূযাদ্দুর্গাগণপতির্মুদে ॥ 31 ॥
32. শ্রী সংকষ্টহর গণপতিঃ
বালার্কারুণকাংতির্বামে বালাং বহন্নংকে
লসদিংদীবরহস্তাং গৌরাংগীং রত্নশোভাঢ্যাম্ ।
দক্ষেঽংকুশবরদানং বামে পাশং চ পাযসং পাত্রং
নীলাংশুকলসমানঃ পীঠে পদ্মারুণে তিষ্ঠন্ ॥ 32 ॥
সংকটহরণঃ পাযাত্ সংকটপূগাদ্গজাননো নিত্যম্ ।
শ্রী বল্লভ গণপতি
বীজাপূর গদেক্ষুকার্মুকভুজাচক্রাব্জ পাশোত্পল
ব্রীহ্যগ্রস্ববিষাণ রত্নকলশ প্রোদ্যত্করাংভোরুহঃ ।
ধ্যেযো বল্লভযা চ পদ্মকরযাশ্লিষ্টো জ্বলদ্ভূষযা
বিশ্বোত্পত্তিবিনাশসংস্থিতিকরো বিঘ্নো বিশিষ্টার্থদঃ ॥
শ্রী সিদ্ধিদেবী
পীতবর্ণাং দ্বিনেত্রাং তামেকবক্ত্রাংবুজদ্বযাং
নবরত্নকিরীটাং চ পীতাংবরসুধারিণীম্ ।
বামহস্তে মহাপদ্মং দক্ষে লংবকরান্বিতাং
জাজীচংপকমালাং চ ত্রিভংগীং ললিতাংগিকাম্ ॥
গণেশদক্ষিণে ভাগে গুরুঃ সিদ্ধিং তু ভাবযেত্ ॥
শ্রী বুদ্ধিদেবী
দ্বিহস্তাং চ দ্বিনেত্রাং তামেকবক্ত্রাং ত্রিভংগিকাং
মুক্তামণিকিরীটাং চ দক্ষে হস্তে মহোত্পলম্ ।
বামে প্রলংবহস্তাং চ দিব্যাংবরসুধারিণীং
শ্যামবর্ণনিভাং ভাস্বত্সর্বাভরণভূষিতাম্ ॥
পারিজাতোত্পলামাল্যাং গণেশো বামপার্শ্বকে
ধ্যাত্বা বুদ্ধিং সুরূপাং সমর্চযেদ্দেশিকোত্তমঃ ॥