bījāpūragadēkṣukārmukarujā chakrābjapāśōtpala-
-vrīhyagrasvaviṣāṇaratnakalaśaprōdyatkarāmbhōruhaḥ ।
dhyēyō vallabhayā sapadmakarayāśliṣṭōjjvaladbhūṣayā
viśvōtpattivipattisaṃsthitikarō vighnēśa iṣṭārthadaḥ ॥ 1 ॥
namastē siddhilakṣmīśa gaṇādhipa mahāprabhō ।
vighnēśvara jagannātha gaurīputra jagatprabhō ॥ 2 ॥
jaya vighnēśvara vibhō vināyaka mahēśvara ।
lambōdara mahābāhō sarvadā tvaṃ prasīda mē ॥ 3 ॥
mahādēva jagatsvāmin mūṣikārūḍha śaṅkara ।
viśālākṣa mahākāya māṃ trāhi paramēśvara ॥ 4 ॥
kuñjarāsya surādhīśa mahēśa karuṇānidhē ।
mātuluṅgadhara svāmin gadāchakrasamanvita ॥ 5 ॥
daśabāhō mahārāja gajavaktra chaturbhuja ।
śūrpakarṇa mahākarṇa gaṇanātha prasīda mē ॥ 6 ॥
śaṅkhaśūlasamāyukta bījāpūrasamanvita ।
ikṣukārmukasaṃyukta padmahasta prasīda mē ॥ 7 ॥
nānābharaṇasaṃyukta ratnakumbhakara prabhō ।
sargasthitilayādhīśa paramātman jaya prabhō ॥ 8 ॥
anāthanātha viśvēśa vighnasaṅghavināśana ।
trayīmūrtē surapatē brahmaviṣṇuśivātmaka ॥ 9 ॥
trayīguṇa mahādēva pāhi māṃ sarvapālaka ।
aṇimādiguṇādhāra lakṣmīśrīviṣṇupūjita ॥ 10 ॥
gaurīśaṅkarasampūjya jaya tvaṃ gaṇanāyaka ।
ratimanmathasaṃsēvya mahībhūdārasaṃstuta ॥ 11 ॥
ṛddhyāmōdādisaṃsēvya mahāgaṇapatē jaya ।
śaṅkhapadmādisaṃsēvya nirālamba nirīśvara ॥ 12 ॥
niṣkalaṅka nirādhāra pāhi māṃ nityamavyaya ।
anādya jagatāmādya pitāmahasupūjita ॥ 13 ॥
dhūmakētō gaṇādhyakṣa mahāmūṣakavāhana ।
anantaparamānanda jaya vighnēśvarēśvara ॥ 14 ॥
ratnasiṃhāsanāsīna kirīṭēna suśōbhita ।
parātpara parēśāna parapūruṣa pāhi mām ॥ 15 ॥
nirdvandva nirguṇābhāsa japāpuṣpasamaprabha ।
sarvapramathasaṃstutya trāhi māṃ vighnanāyaka ॥ 16 ॥
kumārasya gurō dēva sarvaiśvaryapradāyaka ।
sarvābhīṣṭaprada svāmin sarvapratyūhanāśaka ॥ 17 ॥
śaraṇya sarvalōkānāṃ śaraṇāgatavatsala ।
mahāgaṇapatē nityaṃ māṃ pālaya kṛpānidhē ॥ 18 ॥
ēvaṃ śrīgaṇanāthasya stavarājamanuttamam ।
yaḥ paṭhēchChṛṇuyānnityaṃ pratyūhaiḥ sa vimuchyatē ॥ 19 ॥
aśvamēdhasamaṃ puṇyaphalaṃ prāpnōtyanuttamam ।
vaśīkarōti trailōkyaṃ prāpya saubhāgyamuttamam ॥ 20 ॥
sarvābhīṣṭamavāpnōti śīghramēva sudurlabham ।
mahāgaṇēśasānnidhyaṃ prāpnōtyēva na saṃśayaḥ ॥ 21 ॥
iti śrīrudrayāmalē śrīvināyakastavarājaḥ sampūrṇam ।
