ಧ್ಯಾನಂ
ಉಮಾಕಾಂತೇ ರಮಾಕಾಂತೇ ಏಷಾಮಾಸೀ-ನ್ಮತಿಸ್ಸಮಾ ।
ನಮಾಮಿ ದೀಕ್ಷಿತೇಂದ್ರಾಂ ಸ್ತಾನ್ ನಯಷಟ್ಕ-ವಿಶಾರದಾಮ್ ॥
ವೇಧೋಹರೀಶ್ವರಸ್ತುತ್ಯಾಂ ವಿಹರ್ತ್ರೀಂ ವಿಂಧ್ಯಭೂಧರೇ ।
ಹರಪ್ರಾಣೇಶ್ವರೀಂ ವಂದೇ ಹಂತ್ರೀಂ ವಿಬುಧವಿದ್ವಿಷಾಮ್ ॥ 1 ॥
ಅಭ್ಯರ್ಥನೇನ ಸರಸೀರುಹಸಂಭವಸ್ಯ
ತ್ಯಕ್ತ್ವೋದಿತಾ ಭಗವದಕ್ಷಿಪಿಧಾನಲೀಲಾಮ್ ।
ವಿಶ್ವೇಶ್ವರೀ ವಿಪದಪಾಕರಣೇ ಪುರಸ್ತಾತ್
ಮಾತಾ ಮಮಾಸ್ತು ಮಧುಕೈಟಭಯೋರ್ನಿಹಂತ್ರೀ ॥ 2 ॥
ಪ್ರಾಙ್ನಿರ್ಜರೇಷು ನಿಹತೈರ್ನಿಜಶಕ್ತಿಲೇಶೈಃ
ಏಕೀಭವದ್ಭಿರುದಿತಾಽಖಿಲಲೋಕಗುಪ್ತ್ಯೈ ।
ಸಂಪನ್ನಶಸ್ತ್ರನಿಕರಾ ಚ ತದಾಯುಧಸ್ಥೈಃ
ಮಾತಾ ಮಮಾಸ್ತು ಮಹಿಷಾಂತಕರೀ ಪುರಸ್ತಾತ್ ॥ 3 ॥
ಪ್ರಾಲೇಯಶೈಲತನಯಾ ತನುಕಾಂತಿಸಂಪತ್
ಕೋಶೋದಿತಾ ಕುವಲಯಚ್ಛವಿಚಾರುದೇಹಾ ।
ನಾರಾಯಣೀ ನಮದಭೀಪ್ಸಿತಕಲ್ಪವಲ್ಲೀ
ಸುಪ್ರೀತಿಮಾವಹತು ಶುಂಭನಿಶುಂಭಹಂತ್ರೀ ॥ 4 ॥
ವಿಶ್ವೇಶ್ವರೀತಿ ಮಹಿಷಾಂತಕರೀತಿ ಯಸ್ಯಾಃ
ನಾರಾಯಣೀತ್ಯಪಿ ಚ ನಾಮಭಿರಂಕಿತಾನಿ ।
ಸೂಕ್ತಾನಿ ಪಂಕಜಭುವಾ ಚ ಸುರರ್ಷಿಭಿಶ್ಚ
ದೃಷ್ಟಾನಿ ಪಾವಕಮುಖೈಶ್ಚ ಶಿವಾಂ ಭಜೇ ತಾಮ್ ॥ 5 ॥
ಉತ್ಪತ್ತಿದೈತ್ಯಹನನಸ್ತವನಾತ್ಮಕಾನಿ
ಸಂರಕ್ಷಕಾಣ್ಯಖಿಲಭೂತಹಿತಾಯ ಯಸ್ಯಾಃ ।
ಸೂಕ್ತಾನ್ಯಶೇಷನಿಗಮಾಂತವಿದಃ ಪಠಂತಿ
ತಾಂ ವಿಶ್ವಮಾತರಮಜಸ್ರಮಭಿಷ್ಟವೀಮಿ ॥ 6 ॥
ಯೇ ವೈಪ್ರಚಿತ್ತಪುನರುತ್ಥಿತಶುಂಭಮುಖ್ಯೈಃ
ದುರ್ಭಿಕ್ಷಘೋರಸಮಯೇನ ಚ ಕಾರಿತಾಸು ।
ಆವಿಷ್ಕೃತಾಸ್ತ್ರಿಜಗದಾರ್ತಿಷು ರೂಪಭೇದಾಃ
ತೈರಂಬಿಕಾ ಸಮಭಿರಕ್ಷತು ಮಾಂ ವಿಪದ್ಭ್ಯಃ ॥ 7 ॥
ಸೂಕ್ತಂ ಯದೀಯಮರವಿಂದಭವಾದಿ ದೃಷ್ಟಂ
ಆವರ್ತ್ಯ ದೇವ್ಯನುಪದಂ ಸುರಥಃ ಸಮಾಧಿಃ ।
ದ್ವಾವಪ್ಯವಾಪತುರಭೀಷ್ಟಮನನ್ಯಲಭ್ಯಂ
ತಾಮಾದಿದೇವತರುಣೀಂ ಪ್ರಣಮಾಮಿ ಮೂರ್ಧ್ನಾ ॥ 8 ॥
ಮಾಹಿಷ್ಮತೀತನುಭವಂ ಚ ರುರುಂ ಚ ಹಂತುಂ
ಆವಿಷ್ಕೃತೈರ್ನಿಜರಸಾದವತಾರಭೇದೈಃ ।
ಅಷ್ಟಾದಶಾಹತನವಾಹತಕೋಟಿಸಂಖ್ಯೈಃ
ಅಂಬಾ ಸದಾ ಸಮಭಿರಕ್ಷತು ಮಾಂ ವಿಪದ್ಭ್ಯಃ ॥ 9 ॥
ಏತಚ್ಚರಿತ್ರಮಖಿಲಂ ಲಿಖಿತಂ ಹಿ ಯಸ್ಯಾಃ
ಸಂಪೂಜಿತಂ ಸದನ ಏವ ನಿವೇಶಿತಂ ವಾ ।
ದುರ್ಗಂ ಚ ತಾರಯತಿ ದುಸ್ತರಮಪ್ಯಶೇಷಂ
ಶ್ರೇಯಃ ಪ್ರಯಚ್ಛತಿ ಚ ಸರ್ವಮುಮಾಂ ಭಜೇ ತಾಮ್ ॥ 10 ॥
ಯತ್ಪೂಜನಸ್ತುತಿನಮಸ್ಕೃತಿಭಿರ್ಭವಂತಿ
ಪ್ರೀತಾಃ ಪಿತಾಮಹರಮೇಶಹರಾಸ್ತ್ರಯೋಽಪಿ ।
ತೇಷಾಮಪಿ ಸ್ವಕಗುಣೈರ್ದದತೀ ವಪೂಂಷಿ
ತಾಮೀಶ್ವರಸ್ಯ ತರುಣೀಂ ಶರಣಂ ಪ್ರಪದ್ಯೇ ॥ 11 ॥
ಕಾಂತಾರಮಧ್ಯದೃಢಲಗ್ನತಯಾಽವಸನ್ನಾಃ
ಮಗ್ನಾಶ್ಚ ವಾರಿಧಿಜಲೇ ರಿಪುಭಿಶ್ಚ ರುದ್ಧಾಃ ।
ಯಸ್ಯಾಃ ಪ್ರಪದ್ಯ ಚರಣೌ ವಿಪದಸ್ತರಂತಿ
ಸಾ ಮೇ ಸದಾಽಸ್ತು ಹೃದಿ ಸರ್ವಜಗತ್ಸವಿತ್ರೀ ॥ 12 ॥
ಬಂಧೇ ವಧೇ ಮಹತಿ ಮೃತ್ಯುಭಯೇ ಪ್ರಸಕ್ತೇ
ವಿತ್ತಕ್ಷಯೇ ಚ ವಿವಿಧೇ ಯ ಮಹೋಪತಾಪೇ ।
ಯತ್ಪಾದಪೂಜನಮಿಹ ಪ್ರತಿಕಾರಮಾಹುಃ
ಸಾ ಮೇ ಸಮಸ್ತಜನನೀ ಶರಣಂ ಭವಾನೀ ॥ 13 ॥
ಬಾಣಾಸುರಪ್ರಹಿತಪನ್ನಗಬಂಧಮೋಕ್ಷಃ
ತದ್ಬಾಹುದರ್ಪದಲನಾದುಷಯಾ ಚ ಯೋಗಃ ।
ಪ್ರಾದ್ಯುಮ್ನಿನಾ ದ್ರುತಮಲಭ್ಯತ ಯತ್ಪ್ರಸಾದಾತ್
ಸಾ ಮೇ ಶಿವಾ ಸಕಲಮಪ್ಯಶುಭಂ ಕ್ಷಿಣೋತು ॥ 14 ॥
ಪಾಪಃ ಪುಲಸ್ತ್ಯತನಯಃ ಪುನರುತ್ಥಿತೋ ಮಾಂ
ಅದ್ಯಾಪಿ ಹರ್ತುಮಯಮಾಗತ ಇತ್ಯುದೀತಮ್ ।
ಯತ್ಸೇವನೇನ ಭಯಮಿಂದಿರಯಾಽವಧೂತಂ
ತಾಮಾದಿದೇವತರುಣೀಂ ಶರಣಂ ಗತೋಽಸ್ಮಿ ॥ 15 ॥
ಯದ್ಧ್ಯಾನಜಂ ಸುಖಮವಾಪ್ಯಮನಂತಪುಣ್ಯೈಃ
ಸಾಕ್ಷಾತ್ತಮಚ್ಯುತ ಪರಿಗ್ರಹಮಾಶ್ವವಾಪುಃ ।
ಗೋಪಾಂಗನಾಃ ಕಿಲ ಯದರ್ಚನಪುಣ್ಯಮಾತ್ರಾಃ
ಸಾ ಮೇ ಸದಾ ಭಗವತೀ ಭವತು ಪ್ರಸನ್ನಾ ॥ 16 ॥
ರಾತ್ರಿಂ ಪ್ರಪದ್ಯ ಇತಿ ಮಂತ್ರವಿದಃ ಪ್ರಪನ್ನಾನ್
ಉದ್ಬೋಧ್ಯ ಮೃತ್ಯುವಧಿಮನ್ಯಫಲೈಃ ಪ್ರಲೋಭ್ಯ ।
ಬುದ್ಧ್ವಾ ಚ ತದ್ವಿಮುಖತಾಂ ಪ್ರತನಂ ನಯಂತೀಂ
ಆಕಾಶಮಾದಿಜನನೀಂ ಜಗತಾಂ ಭಜೇ ತಾಮ್ ॥ 17 ॥
ದೇಶಕಾಲೇಷು ದುಷ್ಟೇಷು ದುರ್ಗಾಚಂದ್ರಕಲಾಸ್ತುತಿಃ ।
ಸಂಧ್ಯಯೋರನುಸಂಧೇಯಾ ಸರ್ವಾಪದ್ವಿನಿವೃತ್ತಯೇ ॥ 18 ॥
ಇತಿ ಶ್ರೀಮದಪಯ್ಯದೀಕ್ಷಿತವಿರಚಿತಾ ದುರ್ಗಾಚಂದ್ರಕಳಾಸ್ತುತಿಃ ॥
