ಯಾಮಾಮನಂತಿ ಮುನಯಃ ಪ್ರಕೃತಿಂ ಪುರಾಣೀಂ
ವಿದ್ಯೇತಿ ಯಾಂ ಶ್ರುತಿರಹಸ್ಯವಿದೋ ವದಂತಿ ।
ತಾಮರ್ಧಪಲ್ಲವಿತಶಂಕರರೂಪಮುದ್ರಾಂ
ದೇವೀಮನನ್ಯಶರಣಃ ಶರಣಂ ಪ್ರಪದ್ಯೇ ॥ 1 ॥
ಅಂಬ ಸ್ತವೇಷು ತವ ತಾವದಕರ್ತೃಕಾಣಿ
ಕುಂಠೀಭವಂತಿ ವಚಸಾಮಪಿ ಗುಂಭನಾನಿ ।
ಡಿಂಭಸ್ಯ ಮೇ ಸ್ತುತಿರಸಾವಸಮಂಜಸಾಪಿ
ವಾತ್ಸಲ್ಯನಿಘ್ನಹೃದಯಾಂ ಭವತೀಂ ಧಿನೋತು ॥ 2 ॥
ವ್ಯೋಮೇತಿ ಬಿಂದುರಿತಿ ನಾದ ಇತೀಂದುಲೇಖಾ-
-ರೂಪೇತಿ ವಾಗ್ಭವತನೂರಿತಿ ಮಾತೃಕೇತಿ ।
ನಿಃಸ್ಯಂದಮಾನಸುಖಬೋಧಸುಧಾಸ್ವರೂಪಾ
ವಿದ್ಯೋತಸೇ ಮನಸಿ ಭಾಗ್ಯವತಾಂ ಜನಾನಾಮ್ ॥ 3 ॥
ಆವಿರ್ಭವತ್ಪುಲಕಸಂತತಿಭಿಃ ಶರೀರೈ-
-ರ್ನಿಃಸ್ಯಂದಮಾನಸಲಿಲೈರ್ನಯನೈಶ್ಚ ನಿತ್ಯಮ್ ।
ವಾಗ್ಭಿಶ್ಚ ಗದ್ಗದಪದಾಭಿರುಪಾಸತೇ ಯೇ
ಪಾದೌ ತವಾಂಬ ಭುವನೇಷು ತ ಏವ ಧನ್ಯಾಃ ॥ 4 ॥
ವಕ್ತ್ರಂ ಯದುದ್ಯತಮಭಿಷ್ಟುತಯೇ ಭವತ್ಯಾ-
-ಸ್ತುಭ್ಯಂ ನಮೋ ಯದಪಿ ದೇವಿ ಶಿರಃ ಕರೋತಿ ।
ಚೇತಶ್ಚ ಯತ್ತ್ವಯಿ ಪರಾಯಣಮಂಬ ತಾನಿ
ಕಸ್ಯಾಪಿ ಕೈರಪಿ ಭವಂತಿ ತಪೋವಿಶೇಷೈಃ ॥ 5 ॥
ಮೂಲಾಲವಾಲಕುಹರಾದುದಿತಾ ಭವಾನಿ
ನಿರ್ಭಿದ್ಯ ಷಟ್ಸರಸಿಜಾನಿ ತಟಿಲ್ಲತೇವ ।
ಭೂಯೋಽಪಿ ತತ್ರ ವಿಶಸಿ ಧ್ರುವಮಂಡಲೇಂದು-
-ನಿಃಸ್ಯಂದಮಾನಪರಮಾಮೃತತೋಯರೂಪಾ ॥ 6 ॥
ದಗ್ಧಂ ಯದಾ ಮದನಮೇಕಮನೇಕಧಾ ತೇ
ಮುಗ್ಧಃ ಕಟಾಕ್ಷವಿಧಿರಂಕುರಯಾಂಚಕಾರ ।
ಧತ್ತೇ ತದಾಪ್ರಭೃತಿ ದೇವಿ ಲಲಾಟನೇತ್ರಂ
ಸತ್ಯಂ ಹ್ರಿಯೈವ ಮುಕುಲೀಕೃತಮಿಂದುಮೌಲೇಃ ॥ 7 ॥
ಅಜ್ಞಾತಸಂಭವಮನಾಕಲಿತಾನ್ವವಾಯಂ
ಭಿಕ್ಷುಂ ಕಪಾಲಿನಮವಾಸಸಮದ್ವಿತೀಯಮ್ ।
ಪೂರ್ವಂ ಕರಗ್ರಹಣಮಂಗಲತೋ ಭವತ್ಯಾಃ
ಶಂಭುಂ ಕ ಏವ ಬುಬುಧೇ ಗಿರಿರಾಜಕನ್ಯೇ ॥ 8 ॥
ಚರ್ಮಾಂಬರಂ ಚ ಶವಭಸ್ಮವಿಲೇಪನಂ ಚ
ಭಿಕ್ಷಾಟನಂ ಚ ನಟನಂ ಚ ಪರೇತಭೂಮೌ ।
ವೇತಾಲಸಂಹತಿಪರಿಗ್ರಹತಾ ಚ ಶಂಭೋಃ
ಶೋಭಾಂ ಬಿಭರ್ತಿ ಗಿರಿಜೇ ತವ ಸಾಹಚರ್ಯಾತ್ ॥ 9 ॥
ಕಲ್ಪೋಪಸಂಹರಣಕೇಲಿಷು ಪಂಡಿತಾನಿ
ಚಂಡಾನಿ ಖಂಡಪರಶೋರಪಿ ತಾಂಡವಾನಿ ।
ಆಲೋಕನೇನ ತವ ಕೋಮಲಿತಾನಿ ಮಾತ-
-ರ್ಲಾಸ್ಯಾತ್ಮನಾ ಪರಿಣಮಂತಿ ಜಗದ್ವಿಭೂತ್ಯೈ ॥ 10 ॥
ಜಂತೋರಪಶ್ಚಿಮತನೋಃ ಸತಿ ಕರ್ಮಸಾಮ್ಯೇ
ನಿಃಶೇಷಪಾಶಪಟಲಚ್ಛಿದುರಾ ನಿಮೇಷಾತ್ ।
ಕಲ್ಯಾಣಿ ದೇಶಿಕಕಟಾಕ್ಷಸಮಾಶ್ರಯೇಣ
ಕಾರುಣ್ಯತೋ ಭವತಿ ಶಾಂಭವವೇದದೀಕ್ಷಾ ॥ 11 ॥
ಮುಕ್ತಾವಿಭೂಷಣವತೀ ನವವಿದ್ರುಮಾಭಾ
ಯಚ್ಚೇತಸಿ ಸ್ಫುರಸಿ ತಾರಕಿತೇವ ಸಂಧ್ಯಾ ।
ಏಕಃ ಸ ಏವ ಭುವನತ್ರಯಸುಂದರೀಣಾಂ
ಕಂದರ್ಪತಾಂ ವ್ರಜತಿ ಪಂಚಶರೀಂ ವಿನಾಪಿ ॥ 12 ॥
ಯೇ ಭಾವಯಂತ್ಯಮೃತವಾಹಿಭಿರಂಶುಜಾಲೈ-
-ರಾಪ್ಯಾಯಮಾನಭುವನಾಮಮೃತೇಶ್ವರೀಂ ತ್ವಾಮ್ ।
ತೇ ಲಂಘಯಂತಿ ನನು ಮಾತರಲಂಘನೀಯಾಂ
ಬ್ರಹ್ಮಾದಿಭಿಃ ಸುರವರೈರಪಿ ಕಾಲಕಕ್ಷಾಮ್ ॥ 13 ॥
ಯಃ ಸ್ಫಾಟಿಕಾಕ್ಷಗುಣಪುಸ್ತಕಕುಂಡಿಕಾಢ್ಯಾಂ
ವ್ಯಾಖ್ಯಾಸಮುದ್ಯತಕರಾಂ ಶರದಿಂದುಶುಭ್ರಾಮ್ ।
ಪದ್ಮಾಸನಾಂ ಚ ಹೃದಯೇ ಭವತೀಮುಪಾಸ್ತೇ
ಮಾತಃ ಸ ವಿಶ್ವಕವಿತಾರ್ಕಿಕಚಕ್ರವರ್ತೀ ॥ 14 ॥
ಬರ್ಹಾವತಂಸಯುತಬರ್ಬರಕೇಶಪಾಶಾಂ
ಗುಂಜಾವಲೀಕೃತಘನಸ್ತನಹಾರಶೋಭಾಮ್ ।
ಶ್ಯಾಮಾಂ ಪ್ರವಾಲವದನಾಂ ಸುಕುಮಾರಹಸ್ತಾಂ
ತ್ವಾಮೇವ ನೌಮಿ ಶಬರೀಂ ಶಬರಸ್ಯ ಜಾಯಾಮ್ ॥ 15 ॥
ಅರ್ಧೇನ ಕಿಂ ನವಲತಾಲಲಿತೇನ ಮುಗ್ಧೇ
ಕ್ರೀತಂ ವಿಭೋಃ ಪರುಷಮರ್ಧಮಿದಂ ತ್ವಯೇತಿ ।
ಆಲೀಜನಸ್ಯ ಪರಿಹಾಸವಚಾಂಸಿ ಮನ್ಯೇ
ಮಂದಸ್ಮಿತೇನ ತವ ದೇವಿ ಜಡೀ ಭವಂತಿ ॥ 16 ॥
ಬ್ರಹ್ಮಾಂಡ ಬುದ್ಬುದಕದಂಬಕಸಂಕುಲೋಽಯಂ
ಮಾಯೋದಧಿರ್ವಿವಿಧದುಃಖತರಂಗಮಾಲಃ ।
ಆಶ್ಚರ್ಯಮಂಬ ಝಟಿತಿ ಪ್ರಲಯಂ ಪ್ರಯಾತಿ
ತ್ವದ್ಧ್ಯಾನಸಂತತಿಮಹಾಬಡಬಾಮುಖಾಗ್ನೌ ॥ 17 ॥
ದಾಕ್ಷಾಯಣೀತಿ ಕುಟಿಲೇತಿ ಕುಹಾರಿಣೀತಿ
ಕಾತ್ಯಾಯನೀತಿ ಕಮಲೇತಿ ಕಲಾವತೀತಿ ।
ಏಕಾ ಸತೀ ಭಗವತೀ ಪರಮಾರ್ಥತೋಽಪಿ
ಸಂದೃಶ್ಯಸೇ ಬಹುವಿಧಾ ನನು ನರ್ತಕೀವ ॥ 18 ॥
ಆನಂದಲಕ್ಷಣಮನಾಹತನಾಮ್ನಿ ದೇಶೇ
ನಾದಾತ್ಮನಾ ಪರಿಣತಂ ತವ ರೂಪಮೀಶೇ ।
ಪ್ರತ್ಯಙ್ಮುಖೇನ ಮನಸಾ ಪರಿಚೀಯಮಾನಂ
ಶಂಸಂತಿ ನೇತ್ರಸಲಿಲೈಃ ಪುಲಕೈಶ್ಚ ಧನ್ಯಾಃ ॥ 19 ॥
ತ್ವಂ ಚಂದ್ರಿಕಾ ಶಶಿನಿ ತಿಗ್ಮರುಚೌ ರುಚಿಸ್ತ್ವಂ
ತ್ವಂ ಚೇತನಾಸಿ ಪುರುಷೇ ಪವನೇ ಬಲಂ ತ್ವಮ್ ।
ತ್ವಂ ಸ್ವಾದುತಾಸಿ ಸಲಿಲೇ ಶಿಖಿನಿ ತ್ವಮೂಷ್ಮಾ
ನಿಃಸಾರಮೇವ ನಿಖಿಲಂ ತ್ವದೃತೇ ಯದಿ ಸ್ಯಾತ್ ॥ 20 ॥
ಜ್ಯೋತೀಂಷಿ ಯದ್ದಿವಿ ಚರಂತಿ ಯದಂತರಿಕ್ಷಂ
ಸೂತೇ ಪಯಾಂಸಿ ಯದಹಿರ್ಧರಣೀಂ ಚ ಧತ್ತೇ ।
ಯದ್ವಾತಿ ವಾಯುರನಲೋ ಯದುದರ್ಚಿರಾಸ್ತೇ
ತತ್ಸರ್ವಮಂಬ ತವ ಕೇವಲಮಾಜ್ಞಯೈವ ॥ 21 ॥
ಸಂಕೋಚಮಿಚ್ಛಸಿ ಯದಾ ಗಿರಿಜೇ ತದಾನೀಂ
ವಾಕ್ತರ್ಕಯೋಸ್ತ್ವಮಸಿ ಭೂಮಿರನಾಮರೂಪಾ ।
ಯದ್ವಾ ವಿಕಾಸಮುಪಯಾಸಿ ಯದಾ ತದಾನೀಂ
ತ್ವನ್ನಾಮರೂಪಗಣನಾಃ ಸುಕರಾ ಭವಂತಿ ॥ 22 ॥
ಭೋಗಾಯ ದೇವಿ ಭವತೀಂ ಕೃತಿನಃ ಪ್ರಣಮ್ಯ
ಭ್ರೂಕಿಂಕರೀಕೃತಸರೋಜಗೃಹಾಃ ಸಹಸ್ರಮ್ ।
ಚಿಂತಾಮಣಿಪ್ರಚಯಕಲ್ಪಿತಕೇಲಿಶೈಲೇ
ಕಲ್ಪದ್ರುಮೋಪವನ ಏವ ಚಿರಂ ರಮಂತೇ ॥ 23 ॥
ಹರ್ತುಂ ತ್ವಮೇವ ಭವಸಿ ತ್ವದಧೀನಮೀಶೇ
ಸಂಸಾರತಾಪಮಖಿಲಂ ದಯಯಾ ಪಶೂನಾಮ್ ।
ವೈಕರ್ತನೀ ಕಿರಣಸಂಹತಿರೇವ ಶಕ್ತಾ
ಧರ್ಮಂ ನಿಜಂ ಶಮಯಿತುಂ ನಿಜಯೈವ ವೃಷ್ಟ್ಯಾ ॥ 24 ॥
ಶಕ್ತಿಃ ಶರೀರಮಧಿದೈವತಮಂತರಾತ್ಮಾ
ಜ್ಞಾನಂ ಕ್ರಿಯಾ ಕರಣಮಾಸನಜಾಲಮಿಚ್ಛಾ ।
ಐಶ್ವರ್ಯಮಾಯತನಮಾವರಣಾನಿ ಚ ತ್ವಂ
ಕಿಂ ತನ್ನ ಯದ್ಭವಸಿ ದೇವಿ ಶಶಾಂಕಮೌಲೇಃ ॥ 25 ॥
ಭೂಮೌ ನಿವೃತ್ತಿರುದಿತಾ ಪಯಸಿ ಪ್ರತಿಷ್ಠಾ
ವಿದ್ಯಾಽನಲೇ ಮರುತಿ ಶಾಂತಿರತೀವಕಾಂತಿಃ ।
ವ್ಯೋಮ್ನೀತಿ ಯಾಃ ಕಿಲ ಕಲಾಃ ಕಲಯಂತಿ ವಿಶ್ವಂ
ತಾಸಾಂ ಹಿ ದೂರತರಮಂಬ ಪದಂ ತ್ವದೀಯಮ್ ॥ 26 ॥
ಯಾವತ್ಪದಂ ಪದಸರೋಜಯುಗಂ ತ್ವದೀಯಂ
ನಾಂಗೀಕರೋತಿ ಹೃದಯೇಷು ಜಗಚ್ಛರಣ್ಯೇ ।
ತಾವದ್ವಿಕಲ್ಪಜಟಿಲಾಃ ಕುಟಿಲಪ್ರಕಾರಾ-
-ಸ್ತರ್ಕಗ್ರಹಾಃ ಸಮಯಿನಾಂ ಪ್ರಲಯಂ ನ ಯಾಂತಿ ॥ 27 ॥
ನಿರ್ದೇವಯಾನಪಿತೃಯಾನವಿಹಾರಮೇಕೇ
ಕೃತ್ವಾ ಮನಃ ಕರಣಮಂಡಲಸಾರ್ವಭೌಮಮ್ ।
ಧ್ಯಾನೇ ನಿವೇಶ್ಯ ತವ ಕಾರಣಪಂಚಕಸ್ಯ
ಪರ್ವಾಣಿ ಪಾರ್ವತಿ ನಯಂತಿ ನಿಜಾಸನತ್ವಮ್ ॥ 28 ॥
ಸ್ಥೂಲಾಸು ಮೂರ್ತಿಷು ಮಹೀಪ್ರಮುಖಾಸು ಮೂರ್ತೇಃ
ಕಸ್ಯಾಶ್ಚನಾಪಿ ತವ ವೈಭವಮಂಬ ಯಸ್ಯಾಃ ।
ಪತ್ಯಾ ಗಿರಾಮಪಿ ನ ಶಕ್ಯತ ಏವ ವಕ್ತುಂ
ಸಾಪಿ ಸ್ತುತಾ ಕಿಲ ಮಯೇತಿ ತಿತಿಕ್ಷಿತವ್ಯಮ್ ॥ 29 ॥
ಕಾಲಾಗ್ನಿಕೋಟಿರುಚಿಮಂಬ ಷಡಧ್ವಶುದ್ಧೌ
ಆಪ್ಲಾವನೇಷು ಭವತೀಮಮೃತೌಘವೃಷ್ಟಿಮ್ ।
ಶ್ಯಾಮಾಂ ಘನಸ್ತನತಟಾಂ ಶಕಲೀಕೃತಾಘಾಂ
ಧ್ಯಾಯಂತ ಏವ ಜಗತಾಂ ಗುರವೋ ಭವಂತಿ ॥ 30 ॥
ವಿದ್ಯಾಂ ಪರಾಂ ಕತಿಚಿದಂಬರಮಂಬ ಕೇಚಿ-
-ದಾನಂದಮೇವ ಕತಿಚಿತ್ಕತಿಚಿಚ್ಚ ಮಾಯಾಮ್ ।
ತ್ವಾಂ ವಿಶ್ವಮಾಹುರಪರೇ ವಯಮಾಮನಾಮಃ
ಸಾಕ್ಷಾದಪಾರಕರುಣಾಂ ಗುರುಮೂರ್ತಿಮೇವ ॥ 31 ॥
ಕುವಲಯದಲನೀಲಂ ಬರ್ಬರಸ್ನಿಗ್ಧಕೇಶಂ
ಪೃಥುತರಕುಚಭಾರಾಕ್ರಾಂತಕಾಂತಾವಲಗ್ನಮ್ ।
ಕಿಮಿಹ ಬಹುಭಿರುಕ್ತೈಸ್ತ್ವತ್ಸ್ವರೂಪಂ ಪರಂ ನಃ
ಸಕಲಜನನಿ ಮಾತಃ ಸಂತತಂ ಸನ್ನಿಧತ್ತಾಮ್ ॥ 32 ॥
ಇತಿ ಶ್ರೀಕಾಳಿದಾಸ ವಿರಚಿತ ಪಂಚಸ್ತವ್ಯಾಂ ಚತುರ್ಥಃ ಅಂಬಾಸ್ತವಃ ।
