ಪ್ರಸನ್ನಾಙ್ಗರಾಗಂ ಪ್ರಭಾಕಾಞ್ಚನಾಙ್ಗಂ
ಜಗದ್ಭೀತಶೌರ್ಯಂ ತುಷಾರಾದ್ರಿಧೈರ್ಯಮ್ ।
ತೃಣೀಭೂತಹೇತಿಂ ರಣೋದ್ಯದ್ವಿಭೂತಿಂ
ಭಜೇ ವಾಯುಪುತ್ರಂ ಪವಿತ್ರಾಪ್ತಮಿತ್ರಮ್ ॥ 1 ॥

ಭಜೇ ಪಾವನಂ ಭಾವನಾ ನಿತ್ಯವಾಸಂ
ಭಜೇ ಬಾಲಭಾನು ಪ್ರಭಾ ಚಾರುಭಾಸಮ್ ।
ಭಜೇ ಚನ್ದ್ರಿಕಾ ಕುನ್ದ ಮನ್ದಾರ ಹಾಸಂ
ಭಜೇ ಸನ್ತತಂ ರಾಮಭೂಪಾಲ ದಾಸಮ್ ॥ 2 ॥

ಭಜೇ ಲಕ್ಷ್ಮಣಪ್ರಾಣರಕ್ಷಾತಿದಕ್ಷಂ
ಭಜೇ ತೋಷಿತಾನೇಕ ಗೀರ್ವಾಣಪಕ್ಷಮ್ ।
ಭಜೇ ಘೋರ ಸಙ್ಗ್ರಾಮ ಸೀಮಾಹತಾಕ್ಷಂ
ಭಜೇ ರಾಮನಾಮಾತಿ ಸಮ್ಪ್ರಾಪ್ತರಕ್ಷಮ್ ॥ 3 ॥

ಕೃತಾಭೀಲನಾಧಕ್ಷಿತಕ್ಷಿಪ್ತಪಾದಂ
ಘನಕ್ರಾನ್ತ ಭೃಙ್ಗಂ ಕಟಿಸ್ಥೋರು ಜಙ್ಘಮ್ ।
ವಿಯದ್ವ್ಯಾಪ್ತಕೇಶಂ ಭುಜಾಶ್ಲೇಷಿತಾಶ್ಮಂ
ಜಯಶ್ರೀ ಸಮೇತಂ ಭಜೇ ರಾಮದೂತಮ್ ॥ 4 ॥

ಚಲದ್ವಾಲಘಾತಂ ಭ್ರಮಚ್ಚಕ್ರವಾಳಂ
ಕಠೋರಾಟ್ಟಹಾಸಂ ಪ್ರಭಿನ್ನಾಬ್ಜಜಾಣ್ಡಮ್ ।
ಮಹಾಸಿಂಹನಾದಾ ದ್ವಿಶೀರ್ಣತ್ರಿಲೋಕಂ
ಭಜೇ ಚಾಞ್ಜನೇಯಂ ಪ್ರಭುಂ ವಜ್ರಕಾಯಮ್ ॥ 5 ॥

ರಣೇ ಭೀಷಣೇ ಮೇಘನಾದೇ ಸನಾದೇ
ಸರೋಷೇ ಸಮಾರೋಪಣಾಮಿತ್ರ ಮುಖ್ಯೇ ।
ಖಗಾನಾಂ ಘನಾನಾಂ ಸುರಾಣಾಂ ಚ ಮಾರ್ಗೇ
ನಟನ್ತಂ ಸಮನ್ತಂ ಹನೂಮನ್ತಮೀಡೇ ॥ 6 ॥

ಘನದ್ರತ್ನ ಜಮ್ಭಾರಿ ದಮ್ಭೋಳಿ ಭಾರಂ
ಘನದ್ದನ್ತ ನಿರ್ಧೂತ ಕಾಲೋಗ್ರದನ್ತಮ್ ।
ಪದಾಘಾತ ಭೀತಾಬ್ಧಿ ಭೂತಾದಿವಾಸಂ
ರಣಕ್ಷೋಣಿದಕ್ಷಂ ಭಜೇ ಪಿಙ್ಗಳಾಕ್ಷಮ್ ॥ 7 ॥

ಮಹಾಗ್ರಾಹಪೀಡಾಂ ಮಹೋತ್ಪಾತಪೀಡಾಂ
ಮಹಾರೋಗಪೀಡಾಂ ಮಹಾತೀವ್ರಪೀಡಾಮ್ ।
ಹರತ್ಯಸ್ತು ತೇ ಪಾದಪದ್ಮಾನುರಕ್ತೋ
ನಮಸ್ತೇ ಕಪಿಶ್ರೇಷ್ಠ ರಾಮಪ್ರಿಯಾಯ ॥ 8 ॥

ಜರಾಭಾರತೋ ಭೂರಿ ಪೀಡಾಂ ಶರೀರೇ
ನಿರಾಧಾರಣಾರೂಢ ಗಾಢ ಪ್ರತಾಪೀ ।
ಭವತ್ಪಾದಭಕ್ತಿಂ ಭವದ್ಭಕ್ತಿರಕ್ತಿಂ
ಕುರು ಶ್ರೀಹನೂಮತ್ಪ್ರಭೋ ಮೇ ದಯಾಳೋ ॥ 9 ॥

ಮಹಾಯೋಗಿನೋ ಬ್ರಹ್ಮರುದ್ರಾದಯೋ ವಾ
ನ ಜಾನನ್ತಿ ತತ್ತ್ವಂ ನಿಜಂ ರಾಘವಸ್ಯ ।
ಕಥಂ ಜ್ಞಾಯತೇ ಮಾದೃಶೇ ನಿತ್ಯಮೇವ
ಪ್ರಸೀದ ಪ್ರಭೋ ವಾನರೇನ್ದ್ರೋ ನಮಸ್ತೇ ॥ 10 ॥

ನಮಸ್ತೇ ಮಹಾಸತ್ತ್ವವಾಹಾಯ ತುಭ್ಯಂ
ನಮಸ್ತೇ ಮಹಾವಜ್ರದೇಹಾಯ ತುಭ್ಯಮ್ ।
ನಮಸ್ತೇ ಪರೀಭೂತ ಸೂರ್ಯಾಯ ತುಭ್ಯಂ
ನಮಸ್ತೇ ಕೃತಾಮರ್ತ್ಯ ಕಾರ್ಯಾಯ ತುಭ್ಯಮ್ ॥ 11 ॥

ನಮಸ್ತೇ ಸದಾ ಬ್ರಹ್ಮಚರ್ಯಾಯ ತುಭ್ಯಂ
ನಮಸ್ತೇ ಸದಾ ವಾಯುಪುತ್ರಾಯ ತುಭ್ಯಮ್ ।
ನಮಸ್ತೇ ಸದಾ ಪಿಙ್ಗಳಾಕ್ಷಾಯ ತುಭ್ಯಂ
ನಮಸ್ತೇ ಸದಾ ರಾಮಭಕ್ತಾಯ ತುಭ್ಯಮ್ ॥ 12 ॥

ಹನೂಮದ್ಭುಜಙ್ಗಪ್ರಯಾತಂ ಪ್ರಭಾತೇ
ಪ್ರದೋಷೇಽಪಿ ವಾ ಚಾರ್ಧರಾತ್ರೇಽಪಿ ಮರ್ತ್ಯಃ ।
ಪಠನ್ನಶ್ನತೋಽಪಿ ಪ್ರಮುಕ್ತೋಘಜಾಲೋ
ಸದಾ ಸರ್ವದಾ ರಾಮಭಕ್ತಿಂ ಪ್ರಯಾತಿ ॥ 13 ॥

ಇತಿ ಶ್ರೀಮದಾಞ್ಜನೇಯ ಭುಜಙ್ಗಪ್ರಯಾತ ಸ್ತೋತ್ರಮ್ ।