𑌪𑍍𑌰𑌸𑌨𑍍𑌨𑌾𑌂𑌗𑌰𑌾𑌗𑌂 𑌪𑍍𑌰𑌭𑌾𑌕𑌾𑌂𑌚𑌨𑌾𑌂𑌗𑌂
𑌜𑌗𑌦𑍍𑌭𑍀𑌤𑌶𑍌𑌰𑍍𑌯𑌂 𑌤𑍁𑌷𑌾𑌰𑌾𑌦𑍍𑌰𑌿𑌧𑍈𑌰𑍍𑌯𑌮𑍍 ।
𑌤𑍃𑌣𑍀𑌭𑍂𑌤𑌹𑍇𑌤𑌿𑌂 𑌰𑌣𑍋𑌦𑍍𑌯𑌦𑍍𑌵𑌿𑌭𑍂𑌤𑌿𑌂
𑌭𑌜𑍇 𑌵𑌾𑌯𑍁𑌪𑍁𑌤𑍍𑌰𑌂 𑌪𑌵𑌿𑌤𑍍𑌰𑌾𑌪𑍍𑌤𑌮𑌿𑌤𑍍𑌰𑌮𑍍 ॥ 1 ॥

𑌭𑌜𑍇 𑌪𑌾𑌵𑌨𑌂 𑌭𑌾𑌵𑌨𑌾 𑌨𑌿𑌤𑍍𑌯𑌵𑌾𑌸𑌂
𑌭𑌜𑍇 𑌬𑌾𑌲𑌭𑌾𑌨𑍁 𑌪𑍍𑌰𑌭𑌾 𑌚𑌾𑌰𑍁𑌭𑌾𑌸𑌮𑍍 ।
𑌭𑌜𑍇 𑌚𑌂𑌦𑍍𑌰𑌿𑌕𑌾 𑌕𑍁𑌂𑌦 𑌮𑌂𑌦𑌾𑌰 𑌹𑌾𑌸𑌂
𑌭𑌜𑍇 𑌸𑌂𑌤𑌤𑌂 𑌰𑌾𑌮𑌭𑍂𑌪𑌾𑌲 𑌦𑌾𑌸𑌮𑍍 ॥ 2 ॥

𑌭𑌜𑍇 𑌲𑌕𑍍𑌷𑍍𑌮𑌣𑌪𑍍𑌰𑌾𑌣𑌰𑌕𑍍𑌷𑌾𑌤𑌿𑌦𑌕𑍍𑌷𑌂
𑌭𑌜𑍇 𑌤𑍋𑌷𑌿𑌤𑌾𑌨𑍇𑌕 𑌗𑍀𑌰𑍍𑌵𑌾𑌣𑌪𑌕𑍍𑌷𑌮𑍍 ।
𑌭𑌜𑍇 𑌘𑍋𑌰 𑌸𑌂𑌗𑍍𑌰𑌾𑌮 𑌸𑍀𑌮𑌾𑌹𑌤𑌾𑌕𑍍𑌷𑌂
𑌭𑌜𑍇 𑌰𑌾𑌮𑌨𑌾𑌮𑌾𑌤𑌿 𑌸𑌂𑌪𑍍𑌰𑌾𑌪𑍍𑌤𑌰𑌕𑍍𑌷𑌮𑍍 ॥ 3 ॥

𑌕𑍃𑌤𑌾𑌭𑍀𑌲𑌨𑌾𑌧𑌕𑍍𑌷𑌿𑌤𑌕𑍍𑌷𑌿𑌪𑍍𑌤𑌪𑌾𑌦𑌂
𑌘𑌨𑌕𑍍𑌰𑌾𑌂𑌤 𑌭𑍃𑌂𑌗𑌂 𑌕𑌟𑌿𑌸𑍍𑌥𑍋𑌰𑍁 𑌜𑌂𑌘𑌮𑍍 ।
𑌵𑌿𑌯𑌦𑍍𑌵𑍍𑌯𑌾𑌪𑍍𑌤𑌕𑍇𑌶𑌂 𑌭𑍁𑌜𑌾𑌶𑍍𑌲𑍇𑌷𑌿𑌤𑌾𑌶𑍍𑌮𑌂
𑌜𑌯𑌶𑍍𑌰𑍀 𑌸𑌮𑍇𑌤𑌂 𑌭𑌜𑍇 𑌰𑌾𑌮𑌦𑍂𑌤𑌮𑍍 ॥ 4 ॥

𑌚𑌲𑌦𑍍𑌵𑌾𑌲𑌘𑌾𑌤𑌂 𑌭𑍍𑌰𑌮𑌚𑍍𑌚𑌕𑍍𑌰𑌵𑌾𑌳𑌂
𑌕𑌠𑍋𑌰𑌾𑌟𑍍𑌟𑌹𑌾𑌸𑌂 𑌪𑍍𑌰𑌭𑌿𑌨𑍍𑌨𑌾𑌬𑍍𑌜𑌜𑌾𑌂𑌡𑌮𑍍 ।
𑌮𑌹𑌾𑌸𑌿𑌂𑌹𑌨𑌾𑌦𑌾 𑌦𑍍𑌵𑌿𑌶𑍀𑌰𑍍𑌣𑌤𑍍𑌰𑌿𑌲𑍋𑌕𑌂
𑌭𑌜𑍇 𑌚𑌾𑌂𑌜𑌨𑍇𑌯𑌂 𑌪𑍍𑌰𑌭𑍁𑌂 𑌵𑌜𑍍𑌰𑌕𑌾𑌯𑌮𑍍 ॥ 5 ॥

𑌰𑌣𑍇 𑌭𑍀𑌷𑌣𑍇 𑌮𑍇𑌘𑌨𑌾𑌦𑍇 𑌸𑌨𑌾𑌦𑍇
𑌸𑌰𑍋𑌷𑍇 𑌸𑌮𑌾𑌰𑍋𑌪𑌣𑌾𑌮𑌿𑌤𑍍𑌰 𑌮𑍁𑌖𑍍𑌯𑍇 ।
𑌖𑌗𑌾𑌨𑌾𑌂 𑌘𑌨𑌾𑌨𑌾𑌂 𑌸𑍁𑌰𑌾𑌣𑌾𑌂 𑌚 𑌮𑌾𑌰𑍍𑌗𑍇
𑌨𑌟𑌂𑌤𑌂 𑌸𑌮𑌂𑌤𑌂 𑌹𑌨𑍂𑌮𑌂𑌤𑌮𑍀𑌡𑍇 ॥ 6 ॥

𑌘𑌨𑌦𑍍𑌰𑌤𑍍𑌨 𑌜𑌂𑌭𑌾𑌰𑌿 𑌦𑌂𑌭𑍋𑌳𑌿 𑌭𑌾𑌰𑌂
𑌘𑌨𑌦𑍍𑌦𑌂𑌤 𑌨𑌿𑌰𑍍𑌧𑍂𑌤 𑌕𑌾𑌲𑍋𑌗𑍍𑌰𑌦𑌂𑌤𑌮𑍍 ।
𑌪𑌦𑌾𑌘𑌾𑌤 𑌭𑍀𑌤𑌾𑌬𑍍𑌧𑌿 𑌭𑍂𑌤𑌾𑌦𑌿𑌵𑌾𑌸𑌂
𑌰𑌣𑌕𑍍𑌷𑍋𑌣𑌿𑌦𑌕𑍍𑌷𑌂 𑌭𑌜𑍇 𑌪𑌿𑌂𑌗𑌳𑌾𑌕𑍍𑌷𑌮𑍍 ॥ 𑍭 ॥

𑌮𑌹𑌾𑌗𑍍𑌰𑌾𑌹𑌪𑍀𑌡𑌾𑌂 𑌮𑌹𑍋𑌤𑍍𑌪𑌾𑌤𑌪𑍀𑌡𑌾𑌂
𑌮𑌹𑌾𑌰𑍋𑌗𑌪𑍀𑌡𑌾𑌂 𑌮𑌹𑌾𑌤𑍀𑌵𑍍𑌰𑌪𑍀𑌡𑌾𑌮𑍍 ।
𑌹𑌰𑌤𑍍𑌯𑌸𑍍𑌤𑍁 𑌤𑍇 𑌪𑌾𑌦𑌪𑌦𑍍𑌮𑌾𑌨𑍁𑌰𑌕𑍍𑌤𑍋
𑌨𑌮𑌸𑍍𑌤𑍇 𑌕𑌪𑌿𑌶𑍍𑌰𑍇𑌷𑍍𑌠 𑌰𑌾𑌮𑌪𑍍𑌰𑌿𑌯𑌾𑌯 ॥ 𑍮 ॥

𑌜𑌰𑌾𑌭𑌾𑌰𑌤𑍋 𑌭𑍂𑌰𑌿 𑌪𑍀𑌡𑌾𑌂 𑌶𑌰𑍀𑌰𑍇
𑌨𑌿𑌰𑌾𑌧𑌾𑌰𑌣𑌾𑌰𑍂𑌢 𑌗𑌾𑌢 𑌪𑍍𑌰𑌤𑌾𑌪𑍀 ।
𑌭𑌵𑌤𑍍𑌪𑌾𑌦𑌭𑌕𑍍𑌤𑌿𑌂 𑌭𑌵𑌦𑍍𑌭𑌕𑍍𑌤𑌿𑌰𑌕𑍍𑌤𑌿𑌂
𑌕𑍁𑌰𑍁 𑌶𑍍𑌰𑍀𑌹𑌨𑍂𑌮𑌤𑍍𑌪𑍍𑌰𑌭𑍋 𑌮𑍇 𑌦𑌯𑌾𑌳𑍋 ॥ 𑍯 ॥

𑌮𑌹𑌾𑌯𑍋𑌗𑌿𑌨𑍋 𑌬𑍍𑌰𑌹𑍍𑌮𑌰𑍁𑌦𑍍𑌰𑌾𑌦𑌯𑍋 𑌵𑌾
𑌨 𑌜𑌾𑌨𑌂𑌤𑌿 𑌤𑌤𑍍𑌤𑍍𑌵𑌂 𑌨𑌿𑌜𑌂 𑌰𑌾𑌘𑌵𑌸𑍍𑌯 ।
𑌕𑌥𑌂 𑌜𑍍𑌞𑌾𑌯𑌤𑍇 𑌮𑌾𑌦𑍃𑌶𑍇 𑌨𑌿𑌤𑍍𑌯𑌮𑍇𑌵
𑌪𑍍𑌰𑌸𑍀𑌦 𑌪𑍍𑌰𑌭𑍋 𑌵𑌾𑌨𑌰𑍇𑌂𑌦𑍍𑌰𑍋 𑌨𑌮𑌸𑍍𑌤𑍇 ॥ 10 ॥

𑌨𑌮𑌸𑍍𑌤𑍇 𑌮𑌹𑌾𑌸𑌤𑍍𑌤𑍍𑌵𑌵𑌾𑌹𑌾𑌯 𑌤𑍁𑌭𑍍𑌯𑌂
𑌨𑌮𑌸𑍍𑌤𑍇 𑌮𑌹𑌾𑌵𑌜𑍍𑌰𑌦𑍇𑌹𑌾𑌯 𑌤𑍁𑌭𑍍𑌯𑌮𑍍 ।
𑌨𑌮𑌸𑍍𑌤𑍇 𑌪𑌰𑍀𑌭𑍂𑌤 𑌸𑍂𑌰𑍍𑌯𑌾𑌯 𑌤𑍁𑌭𑍍𑌯𑌂
𑌨𑌮𑌸𑍍𑌤𑍇 𑌕𑍃𑌤𑌾𑌮𑌰𑍍𑌤𑍍𑌯 𑌕𑌾𑌰𑍍𑌯𑌾𑌯 𑌤𑍁𑌭𑍍𑌯𑌮𑍍 ॥ 11 ॥

𑌨𑌮𑌸𑍍𑌤𑍇 𑌸𑌦𑌾 𑌬𑍍𑌰𑌹𑍍𑌮𑌚𑌰𑍍𑌯𑌾𑌯 𑌤𑍁𑌭𑍍𑌯𑌂
𑌨𑌮𑌸𑍍𑌤𑍇 𑌸𑌦𑌾 𑌵𑌾𑌯𑍁𑌪𑍁𑌤𑍍𑌰𑌾𑌯 𑌤𑍁𑌭𑍍𑌯𑌮𑍍 ।
𑌨𑌮𑌸𑍍𑌤𑍇 𑌸𑌦𑌾 𑌪𑌿𑌂𑌗𑌳𑌾𑌕𑍍𑌷𑌾𑌯 𑌤𑍁𑌭𑍍𑌯𑌂
𑌨𑌮𑌸𑍍𑌤𑍇 𑌸𑌦𑌾 𑌰𑌾𑌮𑌭𑌕𑍍𑌤𑌾𑌯 𑌤𑍁𑌭𑍍𑌯𑌮𑍍 ॥ 12 ॥

𑌹𑌨𑍂𑌮𑌦𑍍𑌭𑍁𑌜𑌂𑌗𑌪𑍍𑌰𑌯𑌾𑌤𑌂 𑌪𑍍𑌰𑌭𑌾𑌤𑍇
𑌪𑍍𑌰𑌦𑍋𑌷𑍇𑌽𑌪𑌿 𑌵𑌾 𑌚𑌾𑌰𑍍𑌧𑌰𑌾𑌤𑍍𑌰𑍇𑌽𑌪𑌿 𑌮𑌰𑍍𑌤𑍍𑌯𑌃 ।
𑌪𑌠𑌨𑍍𑌨𑌶𑍍𑌨𑌤𑍋𑌽𑌪𑌿 𑌪𑍍𑌰𑌮𑍁𑌕𑍍𑌤𑍋𑌘𑌜𑌾𑌲𑍋
𑌸𑌦𑌾 𑌸𑌰𑍍𑌵𑌦𑌾 𑌰𑌾𑌮𑌭𑌕𑍍𑌤𑌿𑌂 𑌪𑍍𑌰𑌯𑌾𑌤𑌿 ॥ 13 ॥

𑌇𑌤𑌿 𑌶𑍍𑌰𑍀𑌮𑌦𑌾𑌂𑌜𑌨𑍇𑌯 𑌭𑍁𑌜𑌂𑌗𑌪𑍍𑌰𑌯𑌾𑌤 𑌸𑍍𑌤𑍋𑌤𑍍𑌰𑌮𑍍 ।