ಶ್ರೀಮದ್ರಾಮಪಾದಾರವಿನ್ದಮಧುಪಃ ಶ್ರೀಮಧ್ವವಂಶಾಧಿಪಃ
ಸಚ್ಚಿಷ್ಯೋಡುಗಣೋಡುಪಃ ಶ್ರಿತಜಗದ್ಗೀರ್ವಾಣಸತ್ಪಾದಪಃ ।
ಅತ್ಯರ್ಥಂ ಮನಸಾ ಕೃತಾಚ್ಯುತಜಪಃ ಪಾಪಾನ್ಧಕಾರಾತಪಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 1 ॥

ಕರ್ಮನ್ದೀನ್ದ್ರಸುಧೀನ್ದ್ರಸದ್ಗುರುಕರಾಮ್ಭೋಜೋದ್ಭವಃ ಸನ್ತತಂ
ಪ್ರಾಜ್ಯಧ್ಯಾನವಶೀಕೃತಾಖಿಲಜಗದ್ವಾಸ್ತವ್ಯಲಕ್ಷ್ಮೀಧವಃ ।
ಸಚ್ಛಾಸ್ತ್ರಾದಿ ವಿದೂಷಕಾಖಿಲಮೃಷಾವಾದೀಭಕಣ್ಠೀರವಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 2 ॥

ಸಾಲಙ್ಕಾರಕಕಾವ್ಯನಾಟಕಕಲಾಕಾಣಾದಪಾತಞ್ಜಲ-
ತ್ರಯ್ಯರ್ಥಸ್ಮೃತಿಜೈಮಿನೀಯಕವಿತಾಸಙ್ಕೀತಪಾರಙ್ಗತಃ ।
ವಿಪ್ರಕ್ಷತ್ರವಿಡಙ್ಘ್ರಿಜಾತಮುಖರಾನೇಕಪ್ರಜಾಸೇವಿತಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 3 ॥

ರಙ್ಗೋತ್ತುಙ್ಗತರಙ್ಗಮಙ್ಗಲಕರ ಶ್ರೀತುಙ್ಗಭದ್ರಾತಟ-
ಪ್ರತ್ಯಕ್ಸ್ಥದ್ವಿಜಪುಙ್ಗವಾಲಯ ಲಸನ್ಮನ್ತ್ರಾಲಯಾಖ್ಯೇ ಪುರೇ ।
ನವ್ಯೇನ್ದ್ರೋಪಲನೀಲಭವ್ಯಕರಸದ್ವೃನ್ದಾವನಾನ್ತರ್ಗತಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 4 ॥

ವಿದ್ವದ್ರಾಜಶಿರಃಕಿರೀಟಖಚಿತಾನರ್ಘ್ಯೋರುರತ್ನಪ್ರಭಾ
ರಾಗಾಘೌಘಹಪಾದುಕಾದ್ವಯಚರಃ ಪದ್ಮಾಕ್ಷಮಾಲಾಧರಃ ।
ಭಾಸ್ವದ್ದಣ್ಟಕಮಣ್ಡಲೂಜ್ಜ್ವಲಕರೋ ರಕ್ತಾಮ್ಬರಾಡಮ್ಬರಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 5 ॥

ಯದ್ವೃನ್ದಾವನಸತ್ಪ್ರದಕ್ಷಿಣನಮಸ್ಕಾರಾಭಿಷೇಕಸ್ತುತಿ-
ಧ್ಯಾನಾರಾಧನಮೃದ್ವಿಲೇಪನಮುಖಾನೇಕೋಪಚಾರಾನ್ ಸದಾ ।
ಕಾರಂ ಕಾರಮಭಿಪ್ರಯಾನ್ತಿ ಚತುರೋ ಲೋಕಾಃ ಪುಮರ್ಥಾನ್ ಸದಾ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 6 ॥

ವೇದವ್ಯಾಸಮುನೀಶಮಧ್ವಯತಿರಾಟ್ ಟೀಕಾರ್ಯವಾಕ್ಯಾಮೃತಂ
ಜ್ಞಾತ್ವಾಽದ್ವೈತಮತಂ ಹಲಾಹಲಸಮಂ ತ್ಯಕ್ತ್ವಾ ಸಮಾಖ್ಯಾಪ್ತಯೇ ।
ಸಙ್ಖ್ಯಾವತ್ಸುಖದಾಂ ದಶೋಪನಿಷದಾಂ ವ್ಯಾಖ್ಯಾಂ ಸಮಾಖ್ಯನ್ಮುದಾ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 7 ॥

ಶ್ರೀಮದ್ವೈಷ್ಣವಲೋಕಜಾಲಕಗುರುಃ ಶ್ರೀಮತ್ಪರಿವ್ರಾಡ್ಗುರುಃ
ಶಾಸ್ತ್ರೇ ದೇವಗುರುಃ ಶ್ರಿತಾಮರತರುಃ ಪ್ರತ್ಯೂಹಗೋತ್ರಸ್ವರುಃ ।
ಚೇತೋಽತೀತಶಿರುಸ್ತಥಾ ಜಿತವರುಸ್ಸತ್ಸೌಖ್ಯಸಮ್ಪತ್ಕರುಃ
ಶ್ರೀಮತ್ಸದ್ಗುರುರಾಘವೇನ್ದ್ರಯತಿರಾಟ್ ಕುರ್ಯಾದ್ಧ್ರುವಂ ಮಙ್ಗಳಮ್ ॥ 8 ॥

ಯಸ್ಸನ್ಧ್ಯಾಸ್ವನಿಶಂ ಗುರೋರ್ಯತಿಪತೇಃ ಸನ್ಮಙ್ಗಲಸ್ಯಾಷ್ಟಕಂ
ಸದ್ಯಃ ಪಾಪಹರಂ ಸ್ವಸೇವಿ ವಿದುಷಾಂ ಭಕ್ತ್ಯೈತದಾಭಾಷಿತಮ್ ।
ಭಕ್ತ್ಯಾ ವಕ್ತಿ ಸುಸಮ್ಪದಂ ಶುಭಪದಂ ದೀರ್ಘಾಯುರಾರೋಗ್ಯಕಂ
ಕೀರ್ತಿಂ ಪುತ್ರಕಲತ್ರಬಾನ್ಧವಸುಹೃನ್ಮೂರ್ತಿಃ ಪ್ರಯಾತಿ ಧ್ರುವಮ್ ॥

ಇತಿ ಶ್ರೀಮದಪ್ಪಣಾಚಾರ್ಯಕೃತಂ ರಾಘವೇನ್ದ್ರಮಙ್ಗಳಾಷ್ಟಕಂ ಸಮ್ಪೂರ್ಣಮ್ ।