ಅಯೋಧ್ಯಾಪುರನೇತಾರಂ ಮಿಥಿಲಾಪುರನಾಯಿಕಾಮ್ ।
ರಾಘವಾಣಾಮಲಙ್ಕಾರಂ ವೈದೇಹಾನಾಮಲಙ್ಕ್ರಿಯಾಮ್ ॥ 1 ॥

ರಘೂಣಾಂ ಕುಲದೀಪಂ ಚ ನಿಮೀನಾಂ ಕುಲದೀಪಿಕಾಮ್ ।
ಸೂರ್ಯವಂಶಸಮುದ್ಭೂತಂ ಸೋಮವಂಶಸಮುದ್ಭವಾಮ್ ॥ 2 ॥

ಪುತ್ರಂ ದಶರಥಸ್ಯಾದ್ಯಂ ಪುತ್ರೀಂ ಜನಕಭೂಪತೇಃ ।
ವಶಿಷ್ಠಾನುಮತಾಚಾರಂ ಶತಾನನ್ದಮತಾನುಗಾಮ್ ॥ 3 ॥

ಕೌಸಲ್ಯಾಗರ್ಭಸಮ್ಭೂತಂ ವೇದಿಗರ್ಭೋದಿತಾಂ ಸ್ವಯಮ್ ।
ಪುಣ್ಡರೀಕವಿಶಾಲಾಕ್ಷಂ ಸ್ಫುರದಿನ್ದೀವರೇಕ್ಷಣಾಮ್ ॥ 4 ॥

ಚನ್ದ್ರಕಾನ್ತಾನನಾಮ್ಭೋಜಂ ಚನ್ದ್ರಬಿಮ್ಬೋಪಮಾನನಾಮ್ ।
ಮತ್ತಮಾತಙ್ಗಗಮನಂ ಮತ್ತಹಂಸವಧೂಗತಾಮ್ ॥ 5 ॥

ಚನ್ದನಾರ್ದ್ರಭುಜಾಮಧ್ಯಂ ಕುಙ್ಕುಮಾರ್ದ್ರಕುಚಸ್ಥಲೀಮ್ ।
ಚಾಪಾಲಙ್ಕೃತಹಸ್ತಾಬ್ಜಂ ಪದ್ಮಾಲಙ್ಕೃತಪಾಣಿಕಾಮ್ ॥ 6 ॥

ಶರಣಾಗತಗೋಪ್ತಾರಂ ಪ್ರಣಿಪಾದಪ್ರಸಾದಿಕಾಮ್ ।
ಕಾಲಮೇಘನಿಭಂ ರಾಮಂ ಕಾರ್ತಸ್ವರಸಮಪ್ರಭಾಮ್ ॥ 7 ॥

ದಿವ್ಯಸಿಂಹಾಸನಾಸೀನಂ ದಿವ್ಯಸ್ರಗ್ವಸ್ತ್ರಭೂಷಣಾಮ್ ।
ಅನುಕ್ಷಣಂ ಕಟಾಕ್ಷಾಭ್ಯಾಂ ಅನ್ಯೋನ್ಯೇಕ್ಷಣಕಾಙ್ಕ್ಷಿಣೌ ॥ 8 ॥

ಅನ್ಯೋನ್ಯಸದೃಶಾಕಾರೌ ತ್ರೈಲೋಕ್ಯಗೃಹದಮ್ಪತೀ।
ಇಮೌ ಯುವಾಂ ಪ್ರಣಮ್ಯಾಹಂ ಭಜಾಮ್ಯದ್ಯ ಕೃತಾರ್ಥತಾಮ್ ॥ 9 ॥

ಅನೇನ ಸ್ತೌತಿ ಯಃ ಸ್ತುತ್ಯಂ ರಾಮಂ ಸೀತಾಂ ಚ ಭಕ್ತಿತಃ ।
ತಸ್ಯ ತೌ ತನುತಾಂ ಪುಣ್ಯಾಃ ಸಮ್ಪದಃ ಸಕಲಾರ್ಥದಾಃ ॥ 10 ॥

ಏವಂ ಶ್ರೀರಾಮಚನ್ದ್ರಸ್ಯ ಜಾನಕ್ಯಾಶ್ಚ ವಿಶೇಷತಃ ।
ಕೃತಂ ಹನೂಮತಾ ಪುಣ್ಯಂ ಸ್ತೋತ್ರಂ ಸದ್ಯೋ ವಿಮುಕ್ತಿದಮ್ ।
ಯಃ ಪಠೇತ್ಪ್ರಾತರುತ್ಥಾಯ ಸರ್ವಾನ್ ಕಾಮಾನವಾಪ್ನುಯಾತ್ ॥ 11 ॥

ಇತಿ ಹನೂಮತ್ಕೃತ-ಸೀತಾರಾಮ ಸ್ತೋತ್ರಂ ಸಮ್ಪೂರ್ಣಮ್ ॥