𑌅𑌯𑍋𑌧𑍍𑌯𑌾𑌪𑍁𑌰𑌨𑍇𑌤𑌾𑌰𑌂 𑌮𑌿𑌥𑌿𑌲𑌾𑌪𑍁𑌰𑌨𑌾𑌯𑌿𑌕𑌾𑌮𑍍 ।
𑌰𑌾𑌘𑌵𑌾𑌣𑌾𑌮𑌲𑌂𑌕𑌾𑌰𑌂 𑌵𑍈𑌦𑍇𑌹𑌾𑌨𑌾𑌮𑌲𑌂𑌕𑍍𑌰𑌿𑌯𑌾𑌮𑍍 ॥ 1 ॥

𑌰𑌘𑍂𑌣𑌾𑌂 𑌕𑍁𑌲𑌦𑍀𑌪𑌂 𑌚 𑌨𑌿𑌮𑍀𑌨𑌾𑌂 𑌕𑍁𑌲𑌦𑍀𑌪𑌿𑌕𑌾𑌮𑍍 ।
𑌸𑍂𑌰𑍍𑌯𑌵𑌂𑌶𑌸𑌮𑍁𑌦𑍍𑌭𑍂𑌤𑌂 𑌸𑍋𑌮𑌵𑌂𑌶𑌸𑌮𑍁𑌦𑍍𑌭𑌵𑌾𑌮𑍍 ॥ 2 ॥

𑌪𑍁𑌤𑍍𑌰𑌂 𑌦𑌶𑌰𑌥𑌸𑍍𑌯𑌾𑌦𑍍𑌯𑌂 𑌪𑍁𑌤𑍍𑌰𑍀𑌂 𑌜𑌨𑌕𑌭𑍂𑌪𑌤𑍇𑌃 ।
𑌵𑌶𑌿𑌷𑍍𑌠𑌾𑌨𑍁𑌮𑌤𑌾𑌚𑌾𑌰𑌂 𑌶𑌤𑌾𑌨𑌂𑌦𑌮𑌤𑌾𑌨𑍁𑌗𑌾𑌮𑍍 ॥ 3 ॥

𑌕𑍌𑌸𑌲𑍍𑌯𑌾𑌗𑌰𑍍𑌭𑌸𑌂𑌭𑍂𑌤𑌂 𑌵𑍇𑌦𑌿𑌗𑌰𑍍𑌭𑍋𑌦𑌿𑌤𑌾𑌂 𑌸𑍍𑌵𑌯𑌮𑍍 ।
𑌪𑍁𑌂𑌡𑌰𑍀𑌕𑌵𑌿𑌶𑌾𑌲𑌾𑌕𑍍𑌷𑌂 𑌸𑍍𑌫𑍁𑌰𑌦𑌿𑌂𑌦𑍀𑌵𑌰𑍇𑌕𑍍𑌷𑌣𑌾𑌮𑍍 ॥ 4 ॥

𑌚𑌂𑌦𑍍𑌰𑌕𑌾𑌂𑌤𑌾𑌨𑌨𑌾𑌂𑌭𑍋𑌜𑌂 𑌚𑌂𑌦𑍍𑌰𑌬𑌿𑌂𑌬𑍋𑌪𑌮𑌾𑌨𑌨𑌾𑌮𑍍 ।
𑌮𑌤𑍍𑌤𑌮𑌾𑌤𑌂𑌗𑌗𑌮𑌨𑌂 𑌮𑌤𑍍𑌤𑌹𑌂𑌸𑌵𑌧𑍂𑌗𑌤𑌾𑌮𑍍 ॥ 5 ॥

𑌚𑌂𑌦𑌨𑌾𑌰𑍍𑌦𑍍𑌰𑌭𑍁𑌜𑌾𑌮𑌧𑍍𑌯𑌂 𑌕𑍁𑌂𑌕𑍁𑌮𑌾𑌰𑍍𑌦𑍍𑌰𑌕𑍁𑌚𑌸𑍍𑌥𑌲𑍀𑌮𑍍 ।
𑌚𑌾𑌪𑌾𑌲𑌂𑌕𑍃𑌤𑌹𑌸𑍍𑌤𑌾𑌬𑍍𑌜𑌂 𑌪𑌦𑍍𑌮𑌾𑌲𑌂𑌕𑍃𑌤𑌪𑌾𑌣𑌿𑌕𑌾𑌮𑍍 ॥ 6 ॥

𑌶𑌰𑌣𑌾𑌗𑌤𑌗𑍋𑌪𑍍𑌤𑌾𑌰𑌂 𑌪𑍍𑌰𑌣𑌿𑌪𑌾𑌦𑌪𑍍𑌰𑌸𑌾𑌦𑌿𑌕𑌾𑌮𑍍 ।
𑌕𑌾𑌲𑌮𑍇𑌘𑌨𑌿𑌭𑌂 𑌰𑌾𑌮𑌂 𑌕𑌾𑌰𑍍𑌤𑌸𑍍𑌵𑌰𑌸𑌮𑌪𑍍𑌰𑌭𑌾𑌮𑍍 ॥ 𑍭 ॥

𑌦𑌿𑌵𑍍𑌯𑌸𑌿𑌂𑌹𑌾𑌸𑌨𑌾𑌸𑍀𑌨𑌂 𑌦𑌿𑌵𑍍𑌯𑌸𑍍𑌰𑌗𑍍𑌵𑌸𑍍𑌤𑍍𑌰𑌭𑍂𑌷𑌣𑌾𑌮𑍍 ।
𑌅𑌨𑍁𑌕𑍍𑌷𑌣𑌂 𑌕𑌟𑌾𑌕𑍍𑌷𑌾𑌭𑍍𑌯𑌾𑌂 𑌅𑌨𑍍𑌯𑍋𑌨𑍍𑌯𑍇𑌕𑍍𑌷𑌣𑌕𑌾𑌂𑌕𑍍𑌷𑌿𑌣𑍌 ॥ 𑍮 ॥

𑌅𑌨𑍍𑌯𑍋𑌨𑍍𑌯𑌸𑌦𑍃𑌶𑌾𑌕𑌾𑌰𑍌 𑌤𑍍𑌰𑍈𑌲𑍋𑌕𑍍𑌯𑌗𑍃𑌹𑌦𑌂𑌪𑌤𑍀।
𑌇𑌮𑍌 𑌯𑍁𑌵𑌾𑌂 𑌪𑍍𑌰𑌣𑌮𑍍𑌯𑌾𑌹𑌂 𑌭𑌜𑌾𑌮𑍍𑌯𑌦𑍍𑌯 𑌕𑍃𑌤𑌾𑌰𑍍𑌥𑌤𑌾𑌮𑍍 ॥ 𑍯 ॥

𑌅𑌨𑍇𑌨 𑌸𑍍𑌤𑍌𑌤𑌿 𑌯𑌃 𑌸𑍍𑌤𑍁𑌤𑍍𑌯𑌂 𑌰𑌾𑌮𑌂 𑌸𑍀𑌤𑌾𑌂 𑌚 𑌭𑌕𑍍𑌤𑌿𑌤𑌃 ।
𑌤𑌸𑍍𑌯 𑌤𑍌 𑌤𑌨𑍁𑌤𑌾𑌂 𑌪𑍁𑌣𑍍𑌯𑌾𑌃 𑌸𑌂𑌪𑌦𑌃 𑌸𑌕𑌲𑌾𑌰𑍍𑌥𑌦𑌾𑌃 ॥ 10 ॥

𑌏𑌵𑌂 𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌸𑍍𑌯 𑌜𑌾𑌨𑌕𑍍𑌯𑌾𑌶𑍍𑌚 𑌵𑌿𑌶𑍇𑌷𑌤𑌃 ।
𑌕𑍃𑌤𑌂 𑌹𑌨𑍂𑌮𑌤𑌾 𑌪𑍁𑌣𑍍𑌯𑌂 𑌸𑍍𑌤𑍋𑌤𑍍𑌰𑌂 𑌸𑌦𑍍𑌯𑍋 𑌵𑌿𑌮𑍁𑌕𑍍𑌤𑌿𑌦𑌮𑍍 ।
𑌯𑌃 𑌪𑌠𑍇𑌤𑍍𑌪𑍍𑌰𑌾𑌤𑌰𑍁𑌤𑍍𑌥𑌾𑌯 𑌸𑌰𑍍𑌵𑌾𑌨𑍍 𑌕𑌾𑌮𑌾𑌨𑌵𑌾𑌪𑍍𑌨𑍁𑌯𑌾𑌤𑍍 ॥ 11 ॥

𑌇𑌤𑌿 𑌹𑌨𑍂𑌮𑌤𑍍𑌕𑍃𑌤-𑌸𑍀𑌤𑌾𑌰𑌾𑌮 𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ॥