శ్రీమద్రామపాదారవిన్దమధుపః శ్రీమధ్వవంశాధిపః
సచ్చిష్యోడుగణోడుపః శ్రితజగద్గీర్వాణసత్పాదపః ।
అత్యర్థం మనసా కృతాచ్యుతజపః పాపాన్ధకారాతపః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 1 ॥

కర్మన్దీన్ద్రసుధీన్ద్రసద్గురుకరామ్భోజోద్భవః సన్తతం
ప్రాజ్యధ్యానవశీకృతాఖిలజగద్వాస్తవ్యలక్ష్మీధవః ।
సచ్ఛాస్త్రాది విదూషకాఖిలమృషావాదీభకణ్ఠీరవః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 2 ॥

సాలఙ్కారకకావ్యనాటకకలాకాణాదపాతఞ్జల-
త్రయ్యర్థస్మృతిజైమినీయకవితాసఙ్కీతపారఙ్గతః ।
విప్రక్షత్రవిడఙ్ఘ్రిజాతముఖరానేకప్రజాసేవితః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 3 ॥

రఙ్గోత్తుఙ్గతరఙ్గమఙ్గలకర శ్రీతుఙ్గభద్రాతట-
ప్రత్యక్స్థద్విజపుఙ్గవాలయ లసన్మన్త్రాలయాఖ్యే పురే ।
నవ్యేన్ద్రోపలనీలభవ్యకరసద్వృన్దావనాన్తర్గతః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 4 ॥

విద్వద్రాజశిరఃకిరీటఖచితానర్ఘ్యోరురత్నప్రభా
రాగాఘౌఘహపాదుకాద్వయచరః పద్మాక్షమాలాధరః ।
భాస్వద్దణ్టకమణ్డలూజ్జ్వలకరో రక్తామ్బరాడమ్బరః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 5 ॥

యద్వృన్దావనసత్ప్రదక్షిణనమస్కారాభిషేకస్తుతి-
ధ్యానారాధనమృద్విలేపనముఖానేకోపచారాన్ సదా ।
కారం కారమభిప్రయాన్తి చతురో లోకాః పుమర్థాన్ సదా
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 6 ॥

వేదవ్యాసమునీశమధ్వయతిరాట్ టీకార్యవాక్యామృతం
జ్ఞాత్వాఽద్వైతమతం హలాహలసమం త్యక్త్వా సమాఖ్యాప్తయే ।
సఙ్ఖ్యావత్సుఖదాం దశోపనిషదాం వ్యాఖ్యాం సమాఖ్యన్ముదా
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 7 ॥

శ్రీమద్వైష్ణవలోకజాలకగురుః శ్రీమత్పరివ్రాడ్గురుః
శాస్త్రే దేవగురుః శ్రితామరతరుః ప్రత్యూహగోత్రస్వరుః ।
చేతోఽతీతశిరుస్తథా జితవరుస్సత్సౌఖ్యసమ్పత్కరుః
శ్రీమత్సద్గురురాఘవేన్ద్రయతిరాట్ కుర్యాద్ధ్రువం మఙ్గళమ్ ॥ 8 ॥

యస్సన్ధ్యాస్వనిశం గురోర్యతిపతేః సన్మఙ్గలస్యాష్టకం
సద్యః పాపహరం స్వసేవి విదుషాం భక్త్యైతదాభాషితమ్ ।
భక్త్యా వక్తి సుసమ్పదం శుభపదం దీర్ఘాయురారోగ్యకం
కీర్తిం పుత్రకలత్రబాన్ధవసుహృన్మూర్తిః ప్రయాతి ధ్రువమ్ ॥

ఇతి శ్రీమదప్పణాచార్యకృతం రాఘవేన్ద్రమఙ్గళాష్టకం సమ్పూర్ణమ్ ।