𑌦𑍇𑌵𑌿! 𑌸𑍁𑌰𑍇𑌶𑍍𑌵𑌰𑌿! 𑌭𑌗𑌵𑌤𑌿! 𑌗𑌂𑌗𑍇 𑌤𑍍𑌰𑌿𑌭𑍁𑌵𑌨𑌤𑌾𑌰𑌿𑌣𑌿 𑌤𑌰𑌳𑌤𑌰𑌂𑌗𑍇 ।
𑌶𑌂𑌕𑌰𑌮𑍌𑌳𑌿𑌵𑌿𑌹𑌾𑌰𑌿𑌣𑌿 𑌵𑌿𑌮𑌲𑍇 𑌮𑌮 𑌮𑌤𑌿𑌰𑌾𑌸𑍍𑌤𑌾𑌂 𑌤𑌵 𑌪𑌦𑌕𑌮𑌲𑍇 ॥ 1 ॥

𑌭𑌾𑌗𑍀𑌰𑌥𑌿𑌸𑍁𑌖𑌦𑌾𑌯𑌿𑌨𑌿 𑌮𑌾𑌤𑌸𑍍𑌤𑌵 𑌜𑌲𑌮𑌹𑌿𑌮𑌾 𑌨𑌿𑌗𑌮𑍇 𑌖𑍍𑌯𑌾𑌤𑌃 ।
𑌨𑌾𑌹𑌂 𑌜𑌾𑌨𑍇 𑌤𑌵 𑌮𑌹𑌿𑌮𑌾𑌨𑌂 𑌪𑌾𑌹𑌿 𑌕𑍃𑌪𑌾𑌮𑌯𑌿 𑌮𑌾𑌮𑌜𑍍𑌞𑌾𑌨𑌮𑍍 ॥ 2 ॥

𑌹𑌰𑌿𑌪𑌦𑌪𑌾𑌦𑍍𑌯𑌤𑌰𑌂𑌗𑌿𑌣𑌿 𑌗𑌂𑌗𑍇 𑌹𑌿𑌮𑌵𑌿𑌧𑍁𑌮𑍁𑌕𑍍𑌤𑌾𑌧𑌵𑌳𑌤𑌰𑌂𑌗𑍇 ।
𑌦𑍂𑌰𑍀𑌕𑍁𑌰𑍁 𑌮𑌮 𑌦𑍁𑌷𑍍𑌕𑍃𑌤𑌿𑌭𑌾𑌰𑌂 𑌕𑍁𑌰𑍁 𑌕𑍃𑌪𑌯𑌾 𑌭𑌵𑌸𑌾𑌗𑌰𑌪𑌾𑌰𑌮𑍍 ॥ 3 ॥

𑌤𑌵 𑌜𑌲𑌮𑌮𑌲𑌂 𑌯𑍇𑌨 𑌨𑌿𑌪𑍀𑌤𑌂 𑌪𑌰𑌮𑌪𑌦𑌂 𑌖𑌲𑍁 𑌤𑍇𑌨 𑌗𑍃𑌹𑍀𑌤𑌮𑍍 ।
𑌮𑌾𑌤𑌰𑍍𑌗𑌂𑌗𑍇 𑌤𑍍𑌵𑌯𑌿 𑌯𑍋 𑌭𑌕𑍍𑌤𑌃 𑌕𑌿𑌲 𑌤𑌂 𑌦𑍍𑌰𑌷𑍍𑌟𑍁𑌂 𑌨 𑌯𑌮𑌃 𑌶𑌕𑍍𑌤𑌃 ॥ 4 ॥

𑌪𑌤𑌿𑌤𑍋𑌦𑍍𑌧𑌾𑌰𑌿𑌣𑌿 𑌜𑌾𑌹𑍍𑌨𑌵𑌿 𑌗𑌂𑌗𑍇 𑌖𑌂𑌡𑌿𑌤 𑌗𑌿𑌰𑌿𑌵𑌰𑌮𑌂𑌡𑌿𑌤 𑌭𑌂𑌗𑍇 ।
𑌭𑍀𑌷𑍍𑌮𑌜𑌨𑌨𑌿 𑌹𑍇 𑌮𑍁𑌨𑌿𑌵𑌰𑌕𑌨𑍍𑌯𑍇 𑌪𑌤𑌿𑌤𑌨𑌿𑌵𑌾𑌰𑌿𑌣𑌿 𑌤𑍍𑌰𑌿𑌭𑍁𑌵𑌨 𑌧𑌨𑍍𑌯𑍇 ॥ 5 ॥

𑌕𑌲𑍍𑌪𑌲𑌤𑌾𑌮𑌿𑌵 𑌫𑌲𑌦𑌾𑌂 𑌲𑍋𑌕𑍇 𑌪𑍍𑌰𑌣𑌮𑌤𑌿 𑌯𑌸𑍍𑌤𑍍𑌵𑌾𑌂 𑌨 𑌪𑌤𑌤𑌿 𑌶𑍋𑌕𑍇 ।
𑌪𑌾𑌰𑌾𑌵𑌾𑌰𑌵𑌿𑌹𑌾𑌰𑌿𑌣𑌿 𑌗𑌂𑌗𑍇 𑌵𑌿𑌮𑍁𑌖𑌯𑍁𑌵𑌤𑌿 𑌕𑍃𑌤𑌤𑌰𑌲𑌾𑌪𑌾𑌂𑌗𑍇 ॥ 6 ॥

𑌤𑌵 𑌚𑍇𑌨𑍍𑌮𑌾𑌤𑌃 𑌸𑍍𑌰𑍋𑌤𑌃 𑌸𑍍𑌨𑌾𑌤𑌃 𑌪𑍁𑌨𑌰𑌪𑌿 𑌜𑌠𑌰𑍇 𑌸𑍋𑌪𑌿 𑌨 𑌜𑌾𑌤𑌃 ।
𑌨𑌰𑌕𑌨𑌿𑌵𑌾𑌰𑌿𑌣𑌿 𑌜𑌾𑌹𑍍𑌨𑌵𑌿 𑌗𑌂𑌗𑍇 𑌕𑌲𑍁𑌷𑌵𑌿𑌨𑌾𑌶𑌿𑌨𑌿 𑌮𑌹𑌿𑌮𑍋𑌤𑍍𑌤𑍁𑌂𑌗𑍇 ॥ 𑍭 ॥

𑌪𑍁𑌨𑌰𑌸𑌦𑌂𑌗𑍇 𑌪𑍁𑌣𑍍𑌯𑌤𑌰𑌂𑌗𑍇 𑌜𑌯 𑌜𑌯 𑌜𑌾𑌹𑍍𑌨𑌵𑌿 𑌕𑌰𑍁𑌣𑌾𑌪𑌾𑌂𑌗𑍇 ।
𑌇𑌂𑌦𑍍𑌰𑌮𑍁𑌕𑍁𑌟𑌮𑌣𑌿𑌰𑌾𑌜𑌿𑌤𑌚𑌰𑌣𑍇 𑌸𑍁𑌖𑌦𑍇 𑌶𑍁𑌭𑌦𑍇 𑌭𑍃𑌤𑍍𑌯𑌶𑌰𑌣𑍍𑌯𑍇 ॥ 𑍮 ॥

𑌰𑍋𑌗𑌂 𑌶𑍋𑌕𑌂 𑌤𑌾𑌪𑌂 𑌪𑌾𑌪𑌂 𑌹𑌰 𑌮𑍇 𑌭𑌗𑌵𑌤𑌿 𑌕𑍁𑌮𑌤𑌿𑌕𑌲𑌾𑌪𑌮𑍍 ।
𑌤𑍍𑌰𑌿𑌭𑍁𑌵𑌨𑌸𑌾𑌰𑍇 𑌵𑌸𑍁𑌧𑌾𑌹𑌾𑌰𑍇 𑌤𑍍𑌵𑌮𑌸𑌿 𑌗𑌤𑌿𑌰𑍍𑌮𑌮 𑌖𑌲𑍁 𑌸𑌂𑌸𑌾𑌰𑍇 ॥ 𑍯 ॥

𑌅𑌲𑌕𑌾𑌨𑌂𑌦𑍇 𑌪𑌰𑌮𑌾𑌨𑌂𑌦𑍇 𑌕𑍁𑌰𑍁 𑌕𑌰𑍁𑌣𑌾𑌮𑌯𑌿 𑌕𑌾𑌤𑌰𑌵𑌂𑌦𑍍𑌯𑍇 ।
𑌤𑌵 𑌤𑌟𑌨𑌿𑌕𑌟𑍇 𑌯𑌸𑍍𑌯 𑌨𑌿𑌵𑌾𑌸𑌃 𑌖𑌲𑍁 𑌵𑍈𑌕𑍁𑌂𑌠𑍇 𑌤𑌸𑍍𑌯 𑌨𑌿𑌵𑌾𑌸𑌃 ॥ 10 ॥

𑌵𑌰𑌮𑌿𑌹 𑌨𑍀𑌰𑍇 𑌕𑌮𑌠𑍋 𑌮𑍀𑌨𑌃 𑌕𑌿𑌂 𑌵𑌾 𑌤𑍀𑌰𑍇 𑌶𑌰𑌟𑌃 𑌕𑍍𑌷𑍀𑌣𑌃 ।
𑌅𑌥𑌵𑌾𑌶𑍍𑌵𑌪𑌚𑍋 𑌮𑌲𑌿𑌨𑍋 𑌦𑍀𑌨𑌸𑍍𑌤𑌵 𑌨 𑌹𑌿 𑌦𑍂𑌰𑍇 𑌨𑍃𑌪𑌤𑌿𑌕𑍁𑌲𑍀𑌨𑌃 ॥ 11 ॥

𑌭𑍋 𑌭𑍁𑌵𑌨𑍇𑌶𑍍𑌵𑌰𑌿 𑌪𑍁𑌣𑍍𑌯𑍇 𑌧𑌨𑍍𑌯𑍇 𑌦𑍇𑌵𑌿 𑌦𑍍𑌰𑌵𑌮𑌯𑌿 𑌮𑍁𑌨𑌿𑌵𑌰𑌕𑌨𑍍𑌯𑍇 ।
𑌗𑌂𑌗𑌾𑌸𑍍𑌤𑌵𑌮𑌿𑌮𑌮𑌮𑌲𑌂 𑌨𑌿𑌤𑍍𑌯𑌂 𑌪𑌠𑌤𑌿 𑌨𑌰𑍋 𑌯𑌃 𑌸 𑌜𑌯𑌤𑌿 𑌸𑌤𑍍𑌯𑌮𑍍 ॥ 12 ॥

𑌯𑍇𑌷𑌾𑌂 𑌹𑍃𑌦𑌯𑍇 𑌗𑌂𑌗𑌾 𑌭𑌕𑍍𑌤𑌿𑌸𑍍𑌤𑍇𑌷𑌾𑌂 𑌭𑌵𑌤𑌿 𑌸𑌦𑌾 𑌸𑍁𑌖𑌮𑍁𑌕𑍍𑌤𑌿𑌃 ।
𑌮𑌧𑍁𑌰𑌾𑌕𑌂𑌤𑌾 𑌪𑌂𑌝𑌟𑌿𑌕𑌾𑌭𑌿𑌃 𑌪𑌰𑌮𑌾𑌨𑌂𑌦𑌕𑌲𑌿𑌤𑌲𑌲𑌿𑌤𑌾𑌭𑌿𑌃 ॥ 13 ॥

𑌗𑌂𑌗𑌾𑌸𑍍𑌤𑍋𑌤𑍍𑌰𑌮𑌿𑌦𑌂 𑌭𑌵𑌸𑌾𑌰𑌂 𑌵𑌾𑌂𑌛𑌿𑌤𑌫𑌲𑌦𑌂 𑌵𑌿𑌮𑌲𑌂 𑌸𑌾𑌰𑌮𑍍 ।
𑌶𑌂𑌕𑌰𑌸𑍇𑌵𑌕 𑌶𑌂𑌕𑌰 𑌰𑌚𑌿𑌤𑌂 𑌪𑌠𑌤𑌿 𑌸𑍁𑌖𑍀𑌃 𑌤𑌵 𑌇𑌤𑌿 𑌚 𑌸𑌮𑌾𑌪𑍍𑌤𑌃 ॥ 14 ॥