𑌮𑍁𑌰𑌾𑌰𑌿𑌕𑌾𑌯𑌕𑌾𑌲𑌿𑌮𑌾𑌲𑌲𑌾𑌮𑌵𑌾𑌰𑌿𑌧𑌾𑌰𑌿𑌣𑍀
𑌤𑍃𑌣𑍀𑌕𑍃𑌤𑌤𑍍𑌰𑌿𑌵𑌿𑌷𑍍𑌟𑌪𑌾 𑌤𑍍𑌰𑌿𑌲𑍋𑌕𑌶𑍋𑌕𑌹𑌾𑌰𑌿𑌣𑍀 ।
𑌮𑌨𑍋𑌽𑌨𑍁𑌕𑍂𑌲𑌕𑍂𑌲𑌕𑍁𑌂𑌜𑌪𑍁𑌂𑌜𑌧𑍂𑌤𑌦𑍁𑌰𑍍𑌮𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 1 ॥

𑌮𑌲𑌾𑌪𑌹𑌾𑌰𑌿𑌵𑌾𑌰𑌿𑌪𑍂𑌰𑌭𑍂𑌰𑌿𑌮𑌂𑌡𑌿𑌤𑌾𑌮𑍃𑌤𑌾
𑌭𑍃𑌶𑌂 𑌪𑍍𑌰𑌪𑌾𑌤𑌕𑌪𑍍𑌰𑌵𑌂𑌚𑌨𑌾𑌤𑌿𑌪𑌂𑌡𑌿𑌤𑌾𑌨𑌿𑌶𑌮𑍍 ।
𑌸𑍁𑌨𑌂𑌦𑌨𑌂𑌦𑌨𑌾𑌂𑌗𑌸𑌂𑌗𑌰𑌾𑌗𑌰𑌂𑌜𑌿𑌤𑌾 𑌹𑌿𑌤𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 2 ॥

𑌲𑌸𑌤𑍍𑌤𑌰𑌂𑌗𑌸𑌂𑌗𑌧𑍂𑌤𑌭𑍂𑌤𑌜𑌾𑌤𑌪𑌾𑌤𑌕𑌾
𑌨𑌵𑍀𑌨𑌮𑌾𑌧𑍁𑌰𑍀𑌧𑍁𑌰𑍀𑌣𑌭𑌕𑍍𑌤𑌿𑌜𑌾𑌤𑌚𑌾𑌤𑌕𑌾 ।
𑌤𑌟𑌾𑌂𑌤𑌵𑌾𑌸𑌦𑌾𑌸𑌹𑌂𑌸𑌸𑌂𑌸𑍃𑌤𑌾 𑌹𑌿 𑌕𑌾𑌮𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 3 ॥

𑌵𑌿𑌹𑌾𑌰𑌰𑌾𑌸𑌖𑍇𑌦𑌭𑍇𑌦𑌧𑍀𑌰𑌤𑍀𑌰𑌮𑌾𑌰𑍁𑌤𑌾
𑌗𑌤𑌾 𑌗𑌿𑌰𑌾𑌮𑌗𑍋𑌚𑌰𑍇 𑌯𑌦𑍀𑌯𑌨𑍀𑌰𑌚𑌾𑌰𑍁𑌤𑌾 ।
𑌪𑍍𑌰𑌵𑌾𑌹𑌸𑌾𑌹𑌚𑌰𑍍𑌯𑌪𑍂𑌤𑌮𑍇𑌦𑌿𑌨𑍀𑌨𑌦𑍀𑌨𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 4 ॥

𑌤𑌰𑌂𑌗𑌸𑌂𑌗𑌸𑍈𑌕𑌤𑌾𑌂𑌚𑌿𑌤𑌾𑌂𑌤𑌰𑌾 𑌸𑌦𑌾𑌸𑌿𑌤𑌾
𑌶𑌰𑌨𑍍𑌨𑌿𑌶𑌾𑌕𑌰𑌾𑌂𑌶𑍁𑌮𑌂𑌜𑍁𑌮𑌂𑌜𑌰𑍀𑌸𑌭𑌾𑌜𑌿𑌤𑌾 ।
𑌭𑌵𑌾𑌰𑍍𑌚𑌨𑌾𑌯 𑌚𑌾𑌰𑍁𑌣𑌾𑌂𑌬𑍁𑌨𑌾𑌧𑍁𑌨𑌾 𑌵𑌿𑌶𑌾𑌰𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 5 ॥

𑌜𑌲𑌾𑌂𑌤𑌕𑍇𑌲𑌿𑌕𑌾𑌰𑌿𑌚𑌾𑌰𑍁𑌰𑌾𑌧𑌿𑌕𑌾𑌂𑌗𑌰𑌾𑌗𑌿𑌣𑍀
𑌸𑍍𑌵𑌭𑌰𑍍𑌤𑍁𑌰𑌨𑍍𑌯𑌦𑍁𑌰𑍍𑌲𑌭𑌾𑌂𑌗𑌸𑌂𑌗𑌤𑌾𑌂𑌶𑌭𑌾𑌗𑌿𑌨𑍀 ।
𑌸𑍍𑌵𑌦𑌤𑍍𑌤𑌸𑍁𑌪𑍍𑌤𑌸𑌪𑍍𑌤𑌸𑌿𑌂𑌧𑍁𑌭𑍇𑌦𑌨𑌾𑌤𑌿𑌕𑍋𑌵𑌿𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 6 ॥

𑌜𑌲𑌚𑍍𑌯𑍁𑌤𑌾𑌚𑍍𑌯𑍁𑌤𑌾𑌂𑌗𑌰𑌾𑌗𑌲𑌂𑌪𑌟𑌾𑌲𑌿𑌶𑌾𑌲𑌿𑌨𑍀
𑌵𑌿𑌲𑍋𑌲𑌰𑌾𑌧𑌿𑌕𑌾𑌕𑌚𑌾𑌂𑌤𑌚𑌂𑌪𑌕𑌾𑌲𑌿𑌮𑌾𑌲𑌿𑌨𑍀 ।
𑌸𑌦𑌾𑌵𑌗𑌾𑌹𑌨𑌾𑌵𑌤𑍀𑌰𑍍𑌣𑌭𑌰𑍍𑌤𑍃𑌭𑍃𑌤𑍍𑌯𑌨𑌾𑌰𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 𑍭 ॥

𑌸𑌦𑍈𑌵 𑌨𑌂𑌦𑌨𑌂𑌦𑌕𑍇𑌲𑌿𑌶𑌾𑌲𑌿𑌕𑍁𑌂𑌜𑌮𑌂𑌜𑍁𑌲𑌾
𑌤𑌟𑍋𑌤𑍍𑌥𑌫𑍁𑌲𑍍𑌲𑌮𑌲𑍍𑌲𑌿𑌕𑌾𑌕𑌦𑌂𑌬𑌰𑍇𑌣𑍁𑌸𑍂𑌜𑍍𑌜𑍍𑌵𑌲𑌾 ।
𑌜𑌲𑌾𑌵𑌗𑌾𑌹𑌿𑌨𑌾𑌂 𑌨𑍃𑌣𑌾𑌂 𑌭𑌵𑌾𑌬𑍍𑌧𑌿𑌸𑌿𑌂𑌧𑍁𑌪𑌾𑌰𑌦𑌾
𑌧𑍁𑌨𑍋𑌤𑍁 𑌮𑍇 𑌮𑌨𑍋𑌮𑌲𑌂 𑌕𑌲𑌿𑌂𑌦𑌨𑌂𑌦𑌿𑌨𑍀 𑌸𑌦𑌾 ॥ 𑍮 ॥