ಪಲ್ಲವಿ (ಕೀರವಾಣಿ)
ಗೀತಾಸಾರಂ ಶೃಣುತ ಸದಾ
ಮನಸಿ ವಿಕಾಸಂ ವಹತಮುದಾ
ಕಾಮಂ ಕ್ರೋಧಂ ತ್ಯಜತ ಹೃದಾ
ಭೂಯಾತ್ ಸಂವಿತ್ ಪರಸುಖದಾ
ಚರಣಂ
ವಿಷಾದ ಯೋಗಾತ್ ಪಾರ್ಥೇನ
ಭಣಿತಂ ಕಿಂಚಿನ್ಮೋಹ ಧಿಯಾ
ತಂ ಸಂದಿಗ್ಧಂ ಮೋಚಯಿತುಂ
ಗೀತಾಶಾಸ್ತ್ರಂ ಗೀತಮಿದಂ ॥ 1 ॥
ಸಾಂಖ್ಯಂ ಜ್ಞಾನಂ ಜಾನೀಹಿ
ಶರಣಾಗತಿ ಪಥ ಮವಾಪ್ನುಹಿ
ಆತ್ಮ ನಿತ್ಯ ಸ್ಸರ್ವಗತೋ
ನೈನಂ ಕಿಂಚಿತ್ ಕ್ಲೇದಯತಿ ॥ 2 ॥
(ಮೋಹನ)
ಫಲೇಷು ಸಕ್ತಿಂ ಮೈವ ಕುರು
ಕಾರ್ಯಂ ಕರ್ಮ ತು ಸಮಾಚರ
ಕರ್ಮಾಬದ್ಧಃ ಪರಮೇತಿ
ಕರ್ಮಣಿ ಸಂಗಃ ಪಾತಯತಿ ॥ 3 ॥
ಕರ್ಮಾಕರ್ಮ ವಿಕರ್ಮತ್ವಂ
ಚಿಂತಯ ಚಾತ್ಮನಿ ಕರ್ಮಗತಿಂ
ನಾಸ್ತಿ ಜ್ಞಾನಸಮಂ ಲೋಕೇ
ತ್ಯಜ ಚಾಹಂಕೃತಿ ಮಿಹ ದೇಹೇ ॥ 4 ॥
(ಕಾಪಿ)
ವಹ ಸಮಬುದ್ಧಿಂ ಸರ್ವತ್ರ
ಭವ ಸಮದರ್ಶೀ ತ್ವಂ ಹಿ ಸಖೇ
ಯೋನನುರಕ್ತೋ ನ ದ್ವೇಷ್ಟಿ
ಯೋಗೀ ಯೋಗಂ ಜಾನಾತಿ ॥ 5 ॥
ಮಿತ್ರಂ ತವ ತೇ ಶತ್ರುರಪಿ
ತ್ವಮೇವ ನಾನ್ಯೋ ಜಂತುರಯಿ!
ಯುಕ್ತಸ್ತ್ವಂ ಭವ ಚೇಷ್ಟಾಸು
ಆಹಾರಾದಿಷು ವಿವಿಧಾಸು ॥ 6 ॥
(ಕಲ್ಯಾಣಿ)
ಅನಾತ್ಮರೂಪಾ ಮಷ್ಟವಿಧಾಂ
ಪ್ರಕೃತಿ ಮವಿದ್ಯಾಂ ಜಾನೀಹಿ
ಜೀವ ಸ್ಸೈವ ಹಿ ಪರಮಾತ್ಮಾ
ಯಸ್ಮಿನ್ ಪ್ರೋತಂ ಸರ್ವಮಿದಂ ॥ 7 ॥
ಅಕ್ಷರ ಪರ ವರ ಪುರುಷಂ ತಂ
ಧ್ಯಾಯನ್ ಪ್ರೇತೋ ಯಾತಿ ಪರಂ
ತತ ಸ್ತಮೇವ ಧ್ಯಾಯನ್ ತ್ವಂ
ಕಾಲಂ ಯಾಪಯ ನಶ್ಯಂತಂ ॥ 8 ॥
(ಹಿಂದೋಳ)
ಸರ್ವಂ ಬ್ರಹ್ಮಾರ್ಪಣ ಬುದ್ಧ್ಯಾ
ಕರ್ಮ ಕ್ರಿಯತಾಂ ಸಮಬುದ್ಧ್ಯಾ
ಭಕ್ತ್ಯಾ ದತ್ತಂ ಪತ್ರಮಪಿ
ಫಲಮಪಿ ತೇನ ಸ್ವೀಕ್ರಿಯತೇ ॥ 9 ॥
ಯತ್ರ ವಿಭೂತಿ ಶ್ಶ್ರೀ ಯುಕ್ತಾ
ಯತ್ರ ವಿಭೂತಿ ಸ್ಸತ್ತ್ವಯುತಾ
ತತ್ರ ತಮೀಶಂ ಪಶ್ಯಂತಂ
ನೇರ್ಷ್ಯಾ ದ್ವೇಷೌ ಸಜ್ಜೇತೇ ॥ 10 ॥
(ಅಮೃತವರ್ಷಿಣಿ)
ಕಾಲಸ್ತಸ್ಯ ಮಹಾನ್ ರೂಪೋ
ಲೋಕಾನ್ ಸರ್ವಾನ್ ಸಂಗ್ರಸತಿ
ಭಕ್ತ್ಯಾ ಭಗವದ್ರೂಪಂ ತಂ
ಪ್ರಭವತಿ ಲೋಕ ಸ್ಸಂದ್ರಷ್ಟುಂ ॥ 11 ॥
ಭಕ್ತಿ ಸ್ತಸ್ಮಿನ್ ರತಿರೂಪಾ
ಸೈವ ಹಿ ಭಕ್ತೋದ್ಧರಣಚಣಾ
ಭಾವಂ ತಸ್ಯಾ ಮಾಧಾಯ
ಬುದ್ಧಿಂ ತಸ್ಮಿ ನ್ನಿವೇಶಯ ॥ 12 ॥
(ಚಾರುಕೇಶಿ)
ಕ್ಷೇತ್ರಂ ತದ್‍ಜ್ಞಂ ಜಾನೀಹಿ
ಕ್ಷೇತ್ರೇ ಮಮತಾಂ ಮಾ ಕುರು ಚ
ಆತ್ಮಾನಂ ಯೋ ಜಾನಾತಿ
ಆತ್ಮನಿ ಸೋಯಂ ನನು ರಮತೇ ॥ 13 ॥
ಸಾತ್ತ್ವಿಕ ರಾಜಸ ತಾಮಸಿಕಾ
ಬಂಧನ ಹೇತವ ಅಥವರ್ಜ್ಯಃ
ತ್ರಯಂ ಗುಣಾನಾಂ ಯೋತೀತ-
ಸ್ಸೈವ ಬ್ರಾಹ್ಮಂ ಸುಖಮೇತಿ ॥ 14 ॥
(ಹಂಸಾನಂದಿ)
ಛಿತ್ವಾ ಸಾಂಸಾರಿಕವೃಕ್ಷಂ
ಪದಂ ಗವೇಷಯ ಮುನಿಲಕ್ಷ್ಯಂ
ತತ್ಕಿಲ ಸರ್ವಂ ತೇಜೋ ಯತ್
ವೇದೈ ಸ್ಸರ್ವೈ ಸ್ಸಂವೇದ್ಯಂ ॥ 15 ॥
ಸೃಷ್ಟಿ ರ್ದೈವೀ ಚಾಸುರಿಕಾ
ದ್ವಿವಿಧಾ ಪ್ರೋಕ್ತಾ ಲೋಕೇಸ್ಮಿನ್
ದೈವೇ ಸಕ್ತಾ ಯಾಂತಿ ಪರಂ
ಆಸುರಸಕ್ತಾ ಅಸುರಗತಿಂ ॥ 16 ॥
(ಶ್ರೀ)
ನಿಷ್ಠಾ ಯಜ್ಞೇ ದಾನೇ ಚ
ತಪಸಿ ಪ್ರೋಕ್ತಾ ಸದಿತಿ ಪರಾ
ಸತ್ಕಿಲ ಸಫಲಂ ಸಶ್ರದ್ಧಂ
ತತ್ಕಿಲ ನಿಷ್ಫಲ ಮಶ್ರದ್ಧಂ ॥ 17 ॥
ಧರ್ಮಾನ್ ಸರ್ವಾನ್ ತ್ಯಕ್ತ್ವಾ ತ್ವಂ
ಶರಣಂ ವ್ರಜ ಪರ-ಮಾತ್ಮಾನಂ
ಮೋಕ್ಷಂ ಪ್ರಾಪ್ಸ್ಯಸಿ ಸತ್ಯಂ ತ್ವಂ
ಸಂತತ ಸಚ್ಚಿದಾನಂದ ಘನಂ ॥ 18 ॥
