ಧ್ಯೇಯಪಥಿಕಸಾಧಕ
ಕಾರ್ಯಪಥೇ ಸಾಧಯ
ಮೃದು ಹಸನ್ ಮಧುಕಿರನ್ ಮಾತರಂ ಸದಾ ಸ್ಮರನ್ ॥

ಜೀವನಂ ನ ಶಾಶ್ವತಂ, ವೈಭವಂ ನ ಹಿ ಸ್ಥಿರಂ
ಸ್ವಾರ್ಥಲೇಪನಂ ವಿನಾ, ಯತ್ಕೃತಂ ಹಿ ತಚ್ಚಿರಂ
ಸರಲತಾ ಸ್ವಜೀವನೇ
ಚಿನ್ತನೇ ಸದೋಚ್ಚತಾ
ಸಮಾಜಪೋಷಿತಾ ವಯಂ ಸಮಾಜಪೋಷಕಾಶ್ಚಿರಮ್ ॥ 1 ॥

ಯಚ್ಚ ಮನಸಿ ಚಿನ್ತ್ಯತೇ, ಯಚ್ಚ ಕೀರ್ತ್ಯತೇ ಗಿರಾ
ತಚ್ಚ ಮೂರ್ತರೂಪತಾಮ್, ಏತಿ ನಿತ್ಯಜೀವನೇ
ಜನನ್ಯನನ್ಯಚರಣಯೋಃ
ಸಮರ್ಪಿತಸ್ವಜೀವನಾಃ
ಧ್ಯೇಯಸಾಧನವ್ರತಾ ವಯಂ ಭವೇಮ ಸಙ್ಗತಾಃ ॥ 2 ॥

ಸ್ಮರತ್ವಿಹಾಗ್ರಜನ್ಮನಾಂ, ತ್ಯಾಗಬಲಿಸಮರ್ಪಣಂ
ಸಿಂಹಕುಲಸಮುದ್ಭವಾಃ ಸಿಂಹವಿಕ್ರಮಾ ವಯಂ
ಸನ್ತು ಕಷ್ಟಕೋಟಯೋ
ಭವತು ವಿಘ್ನವರ್ಷಣಂ
ಸಕೃತ್ಪ್ರತಿಜ್ಞಕಾ ವಯಂ ಭಜೇಮ ನೋ ಪಲಾಯನಮ್ ॥ 3 ॥

ರಚನ: ಶ್ರೀ ಜನಾರ್ದನ ಹೇಗ್ಡೇ