ಸರಲಭಾಷಾ ಸಂಸ್ಕೃತಂ ಸರಸಭಾಷಾ ಸಂಸ್ಕೃತಮ್ ।
ಸರಸಸರಲಮನೋಜ್ಞಮಙ್ಗಲದೇವಭಾಷಾ ಸಂಸ್ಕೃತಮ್ ॥ 1 ॥

ಮಧುರಭಾಷಾ ಸಂಸ್ಕೃತಂ ಮೃದುಲಭಾಷಾ ಸಂಸ್ಕೃತಮ್ ।
ಮೃದುಲಮಧುರಮನೋಹರಾಮೃತತುಲ್ಯಭಾಷಾ ಸಂಸ್ಕೃತಮ್ ॥ 2 ॥

ದೇವಭಾಷಾ ಸಂಸ್ಕೃತಂ ವೇದಭಾಷಾ ಸಂಸ್ಕೃತಮ್ ।
ಭೇದಭಾವವಿನಾಶಕಂ ಖಲು ದಿವ್ಯಭಾಷಾ ಸಂಸ್ಕೃತಮ್ ॥ 3 ॥

ಅಮೃತಭಾಷಾ ಸಂಸ್ಕೃತಂ ಅತುಲಭಾಷಾ ಸಂಸ್ಕೃತಮ್ ।
ಸುಕೃತಿಜನಹೃದಿ ಪರಿಲಸಿತಶುಭವರದಭಾಷಾ ಸಂಸ್ಕೃತಮ್ ॥ 4 ॥

ಭುವನಭಾಷಾ ಸಂಸ್ಕೃತಂ ಭವನಭಾಷಾ ಸಂಸ್ಕೃತಮ್ ।
ಭರತಭುವಿ ಪರಿಲಸಿತಕಾವ್ಯಮನೋಜ್ಞಭಾಷಾ ಸಂಸ್ಕೃತಮ್ ॥ 5 ॥

ಶಸ್ತ್ರಭಾಷಾ ಸಂಸ್ಕೃತಂ ಶಾಸ್ತ್ರಭಾಷಾ ಸಂಸ್ಕೃತಮ್ ।
ಶಸ್ತ್ರಶಾಸ್ತ್ರಭೃದಾರ್ಷಭಾರತರಾಷ್ಟ್ರಭಾಷಾ ಸಂಸ್ಕೃತಮ್ ॥ 6 ॥

ಧರ್ಮಭಾಷಾ ಸಂಸ್ಕೃತಂ ಕರ್ಮಭಾಷಾ ಸಂಸ್ಕೃತಮ್ ।
ಧರ್ಮಕರ್ಮಪ್ರಚೋದಕಂ ಖಲು ವಿಶ್ವಭಾಷಾ ಸಂಸ್ಕೃತಮ್ ॥ 7 ॥