શ્રીદેવ્યુવાચ-
ભગવન્ દેવદેવેશ સર્વજ્ઞ ત્રિપુરાંતક ।
પ્રાપ્તે કલિયુગે ઘોરે મહાભૂતૈઃ સમાવૃતે ॥ 1

મહાવ્યાધિ મહાવ્યાળ ઘોરરાજૈઃ સમાવૃતે ।
દુઃસ્વપ્નશોકસંતાપૈઃ દુર્વિનીતૈઃ સમાવૃતે ॥ 2

સ્વધર્મવિરતેમાર્ગે પ્રવૃત્તે હૃદિ સર્વદા ।
તેષાં સિદ્ધિં ચ મુક્તિં ચ ત્વં મે બ્રૂહિ વૃષદ્વજ ॥ 3

ઈશ્વર ઉવાચ-
શૃણુ દેવિ મહાભાગે સર્વકળ્યાણકારણે ।
મહાશાસ્તુશ્ચ દેવેશિ કવચં પુણ્યવર્ધનમ્ ॥ 4

અગ્નિસ્તંભ જલસ્તંભ સેનાસ્તંભ વિધાયકમ્ ।
મહાભૂતપ્રશમનં મહાવ્યાધિનિવારણમ્ ॥ 5

મહાજ્ઞાનપ્રદં પુણ્યં વિશેષાત્ કલિતાપહમ્ ।
સર્વરક્ષોત્તમં પુંસાં આયુરારોગ્યવર્ધનમ્ ॥ 6

કિમતો બહુનોક્તેન યં યં કામયતે દ્વિજઃ ।
તં તમાપ્નોત્યસંદેહો મહાશાસ્તુઃ પ્રસાદનાત્ ॥ 7

કવચસ્ય ઋષિર્બ્રહ્મા ગાયત્રીઃ છંદ ઉચ્યતે ।
દેવતા શ્રીમહાશાસ્તા દેવો હરિહરાત્મજઃ ॥ 8

ષડંગમાચરેદ્ભક્ત્યા માત્રયા જાતિયુક્તયા ।
ધ્યાનમસ્ય પ્રવક્ષ્યામિ શૃણુષ્વાવહિતા પ્રિયે ॥ 9

અસ્ય શ્રી મહાશાસ્તુઃ કવચમંત્રસ્ય । બ્રહ્મા ઋષિઃ । ગાયત્રીઃ છંદઃ । મહાશાસ્તા દેવતા । હ્રાં બીજમ્ । હ્રીં શક્તિઃ । હ્રૂં કીલકમ્ । શ્રી મહાશાસ્તુઃ પ્રસાદ સિદ્ધ્યર્થે જપે વિનિયોગઃ ॥

હ્રાં ઇત્યાદિ ષડંગન્યાસઃ ॥

ધ્યાનમ્-
તેજોમંડલમધ્યગં ત્રિનયનં દિવ્યાંબરાલંકૃતં
દેવં પુષ્પશરેક્ષુકાર્મુક લસન્માણિક્યપાત્રાઽભયમ્ ।
બિભ્રાણં કરપંકજૈઃ મદગજ સ્કંધાધિરૂઢં વિભું
શાસ્તારં શરણં ભજામિ સતતં ત્રૈલોક્ય સંમોહનમ્ ॥

મહાશાસ્તા શિરઃ પાતુ ફાલં હરિહરાત્મજઃ ।
કામરૂપી દૃશં પાતુ સર્વજ્ઞો મે શ્રુતિં સદા ॥ 1

ઘ્રાણં પાતુ કૃપાધ્યક્ષઃ મુખં ગૌરીપ્રિયઃ સદા ।
વેદાધ્યાયી ચ મે જિહ્વાં પાતુ મે ચિબુકં ગુરુઃ ॥ 2

કંઠં પાતુ વિશુદ્ધાત્મા સ્કંધૌ પાતુ સુરાર્ચિતઃ ।
બાહૂ પાતુ વિરૂપાક્ષઃ કરૌ તુ કમલાપ્રિયઃ ॥ 3

ભૂતાધિપો મે હૃદયં મધ્યં પાતુ મહાબલઃ ।
નાભિં પાતુ મહાવીરઃ કમલાક્ષોઽવતુ કટિમ્ ॥ 4

સનીપં પાતુ વિશ્વેશઃ ગુહ્યં ગુહ્યાર્થવિત્સદા ।
ઊરૂ પાતુ ગજારૂઢઃ વજ્રધારી ચ જાનુની ॥ 5

જંઘે પાત્વંકુશધરઃ પાદૌ પાતુ મહામતિઃ ।
સર્વાંગં પાતુ મે નિત્યં મહામાયાવિશારદઃ ॥ 6

ઇતીદં કવચં પુણ્યં સર્વાઘૌઘનિકૃંતનમ્ ।
મહાવ્યાધિપ્રશમનં મહાપાતકનાશનમ્ ॥ 7

જ્ઞાનવૈરાગ્યદં દિવ્યમણિમાદિવિભૂષિતમ્ ।
આયુરારોગ્યજનનં મહાવશ્યકરં પરમ્ ॥ 8

યં યં કામયતે કામં તં તમાપ્નોત્યસંશયઃ ।
ત્રિસંધ્યં યઃ પઠેદ્વિદ્વાન્ સ યાતિ પરમાં ગતિમ્ ॥

ઇતિ શ્રી મહાશાસ્તા અનુગ્રહ કવચમ્ ।