જગત્પ્રતિષ્ઠાહેતુર્યઃ ધર્મઃ શ્રુત્યંતકીર્તિતઃ ।
તસ્યાપિ શાસ્તા યો દેવસ્તં સદા સમુપાશ્રયે ॥ 1 ॥

શ્રીશંકરાચાર્યૈઃ શિવાવતારૈઃ
ધર્મપ્રચારાય સમસ્તકાલે ।
સુસ્થાપિતં શૃંગમહીધ્રવર્યે
પીઠં યતીંદ્રાઃ પરિભૂષયંતિ ॥ 2 ॥

તેષ્વેવ કર્મંદિવરેષુ વિદ્યા-
-તપોધનેષુ પ્રથિતાનુભાવઃ ।
વિદ્યાસુતીર્થોઽભિનવોઽદ્ય યોગી
શાસ્તારમાલોકયિતું પ્રતસ્થે ॥ 3 ॥

ધર્મસ્ય ગોપ્તા યતિપુંગવોઽયં
ધર્મસ્ય શાસ્તારમવૈક્ષતેતિ ।
યુક્તં તદેતદ્યુભયોસ્તયોર્હિ
સમ્મેલનં લોકહિતાય નૂનમ્ ॥ 4 ॥

કાલેઽસ્મિન્ કલિમલદૂષિતેઽપિ ધર્મઃ
શ્રૌતોઽયં ન ખલુ વિલોપમાપ તત્ર ।
હેતુઃ ખલ્વયમિહ નૂનમેવ નાન્યઃ
શાસ્તાઽસ્તે સકલજનૈકવંદ્યપાદઃ ॥ 5 ॥

જ્ઞાનં ષડાસ્યવરતાતકૃપૈકલભ્યં
મોક્ષસ્તુ તાર્ક્ષ્યવરવાહદયૈકલભ્યઃ ।
જ્ઞાનં ચ મોક્ષ ઉભયં તુ વિના શ્રમેણ
પ્રાપ્યં જનૈઃ હરિહરાત્મજસત્પ્રસાદાત્ ॥ 6 ॥

યમનિયમાદિસમેતૈઃ યતચિત્તૈર્યોગિભિઃ સદા ધ્યેયમ્ ।
શાસ્તારં હૃદિ કલયે ધાતારં સર્વલોકસ્ય ॥ 7 ॥

શબરગિરિનિવાસઃ સર્વલોકૈકપૂજ્યઃ
નતજનસુખકારી નમ્રહૃત્તાપહારી ।
ત્રિદશદિતિજસેવ્યઃ સ્વર્ગમોક્ષપ્રદાતા
હરિહરસુતદેવઃ સંતતં શં તનોતુ ॥ 8 ॥

ઇતિ શૃંગેરિ જગદ્ગુરુ શ્રી શ્રી ભારતીતીર્થ મહાસ્વામિભિઃ વિરચિતં ધર્મશાસ્તા સ્તોત્રમ્ ।