ୟାମାମନଂତି ମୁନୟଃ ପ୍ରକୃତିଂ ପୁରାଣୀଂ
ଵିଦ୍ୟେତି ୟାଂ ଶ୍ରୁତିରହସ୍ୟଵିଦୋ ଵଦଂତି ।
ତାମର୍ଧପଲ୍ଲଵିତଶଂକରରୂପମୁଦ୍ରାଂ
ଦେଵୀମନନ୍ୟଶରଣଃ ଶରଣଂ ପ୍ରପଦ୍ୟେ ॥ 1 ॥
ଅଂବ ସ୍ତଵେଷୁ ତଵ ତାଵଦକର୍ତୃକାଣି
କୁଂଠୀଭଵଂତି ଵଚସାମପି ଗୁଂଭନାନି ।
ଡିଂଭସ୍ୟ ମେ ସ୍ତୁତିରସାଵସମଂଜସାପି
ଵାତ୍ସଲ୍ୟନିଘ୍ନହୃଦୟାଂ ଭଵତୀଂ ଧିନୋତୁ ॥ 2 ॥
ଵ୍ୟୋମେତି ବିଂଦୁରିତି ନାଦ ଇତୀଂଦୁଲେଖା-
-ରୂପେତି ଵାଗ୍ଭଵତନୂରିତି ମାତୃକେତି ।
ନିଃସ୍ୟଂଦମାନସୁଖବୋଧସୁଧାସ୍ଵରୂପା
ଵିଦ୍ୟୋତସେ ମନସି ଭାଗ୍ୟଵତାଂ ଜନାନାମ୍ ॥ 3 ॥
ଆଵିର୍ଭଵତ୍ପୁଲକସଂତତିଭିଃ ଶରୀରୈ-
-ର୍ନିଃସ୍ୟଂଦମାନସଲିଲୈର୍ନୟନୈଶ୍ଚ ନିତ୍ୟମ୍ ।
ଵାଗ୍ଭିଶ୍ଚ ଗଦ୍ଗଦପଦାଭିରୁପାସତେ ୟେ
ପାଦୌ ତଵାଂବ ଭୁଵନେଷୁ ତ ଏଵ ଧନ୍ୟାଃ ॥ 4 ॥
ଵକ୍ତ୍ରଂ ୟଦୁଦ୍ୟତମଭିଷ୍ଟୁତୟେ ଭଵତ୍ୟା-
-ସ୍ତୁଭ୍ୟଂ ନମୋ ୟଦପି ଦେଵି ଶିରଃ କରୋତି ।
ଚେତଶ୍ଚ ୟତ୍ତ୍ଵୟି ପରାୟଣମଂବ ତାନି
କସ୍ୟାପି କୈରପି ଭଵଂତି ତପୋଵିଶେଷୈଃ ॥ 5 ॥
ମୂଲାଲଵାଲକୁହରାଦୁଦିତା ଭଵାନି
ନିର୍ଭିଦ୍ୟ ଷଟ୍ସରସିଜାନି ତଟିଲ୍ଲତେଵ ।
ଭୂୟୋଽପି ତତ୍ର ଵିଶସି ଧ୍ରୁଵମଂଡଲେଂଦୁ-
-ନିଃସ୍ୟଂଦମାନପରମାମୃତତୋୟରୂପା ॥ 6 ॥
ଦଗ୍ଧଂ ୟଦା ମଦନମେକମନେକଧା ତେ
ମୁଗ୍ଧଃ କଟାକ୍ଷଵିଧିରଂକୁରୟାଂଚକାର ।
ଧତ୍ତେ ତଦାପ୍ରଭୃତି ଦେଵି ଲଲାଟନେତ୍ରଂ
ସତ୍ୟଂ ହ୍ରିୟୈଵ ମୁକୁଲୀକୃତମିଂଦୁମୌଲେଃ ॥ 7 ॥
ଅଜ୍ଞାତସଂଭଵମନାକଲିତାନ୍ଵଵାୟଂ
ଭିକ୍ଷୁଂ କପାଲିନମଵାସସମଦ୍ଵିତୀୟମ୍ ।
ପୂର୍ଵଂ କରଗ୍ରହଣମଂଗଲତୋ ଭଵତ୍ୟାଃ
ଶଂଭୁଂ କ ଏଵ ବୁବୁଧେ ଗିରିରାଜକନ୍ୟେ ॥ 8 ॥
ଚର୍ମାଂବରଂ ଚ ଶଵଭସ୍ମଵିଲେପନଂ ଚ
ଭିକ୍ଷାଟନଂ ଚ ନଟନଂ ଚ ପରେତଭୂମୌ ।
ଵେତାଲସଂହତିପରିଗ୍ରହତା ଚ ଶଂଭୋଃ
ଶୋଭାଂ ବିଭର୍ତି ଗିରିଜେ ତଵ ସାହଚର୍ୟାତ୍ ॥ 9 ॥
କଲ୍ପୋପସଂହରଣକେଲିଷୁ ପଂଡିତାନି
ଚଂଡାନି ଖଂଡପରଶୋରପି ତାଂଡଵାନି ।
ଆଲୋକନେନ ତଵ କୋମଲିତାନି ମାତ-
-ର୍ଲାସ୍ୟାତ୍ମନା ପରିଣମଂତି ଜଗଦ୍ଵିଭୂତ୍ୟୈ ॥ 10 ॥
ଜଂତୋରପଶ୍ଚିମତନୋଃ ସତି କର୍ମସାମ୍ୟେ
ନିଃଶେଷପାଶପଟଲଚ୍ଛିଦୁରା ନିମେଷାତ୍ ।
କଲ୍ୟାଣି ଦେଶିକକଟାକ୍ଷସମାଶ୍ରୟେଣ
କାରୁଣ୍ୟତୋ ଭଵତି ଶାଂଭଵଵେଦଦୀକ୍ଷା ॥ 11 ॥
ମୁକ୍ତାଵିଭୂଷଣଵତୀ ନଵଵିଦ୍ରୁମାଭା
ୟଚ୍ଚେତସି ସ୍ଫୁରସି ତାରକିତେଵ ସଂଧ୍ୟା ।
ଏକଃ ସ ଏଵ ଭୁଵନତ୍ରୟସୁଂଦରୀଣାଂ
କଂଦର୍ପତାଂ ଵ୍ରଜତି ପଂଚଶରୀଂ ଵିନାପି ॥ 12 ॥
ୟେ ଭାଵୟଂତ୍ୟମୃତଵାହିଭିରଂଶୁଜାଲୈ-
-ରାପ୍ୟାୟମାନଭୁଵନାମମୃତେଶ୍ଵରୀଂ ତ୍ଵାମ୍ ।
ତେ ଲଂଘୟଂତି ନନୁ ମାତରଲଂଘନୀୟାଂ
ବ୍ରହ୍ମାଦିଭିଃ ସୁରଵରୈରପି କାଲକକ୍ଷାମ୍ ॥ 13 ॥
ୟଃ ସ୍ଫାଟିକାକ୍ଷଗୁଣପୁସ୍ତକକୁଂଡିକାଢ୍ୟାଂ
ଵ୍ୟାଖ୍ୟାସମୁଦ୍ୟତକରାଂ ଶରଦିଂଦୁଶୁଭ୍ରାମ୍ ।
ପଦ୍ମାସନାଂ ଚ ହୃଦୟେ ଭଵତୀମୁପାସ୍ତେ
ମାତଃ ସ ଵିଶ୍ଵକଵିତାର୍କିକଚକ୍ରଵର୍ତୀ ॥ 14 ॥
ବର୍ହାଵତଂସୟୁତବର୍ବରକେଶପାଶାଂ
ଗୁଂଜାଵଲୀକୃତଘନସ୍ତନହାରଶୋଭାମ୍ ।
ଶ୍ୟାମାଂ ପ୍ରଵାଲଵଦନାଂ ସୁକୁମାରହସ୍ତାଂ
ତ୍ଵାମେଵ ନୌମି ଶବରୀଂ ଶବରସ୍ୟ ଜାୟାମ୍ ॥ 15 ॥
ଅର୍ଧେନ କିଂ ନଵଲତାଲଲିତେନ ମୁଗ୍ଧେ
କ୍ରୀତଂ ଵିଭୋଃ ପରୁଷମର୍ଧମିଦଂ ତ୍ଵୟେତି ।
ଆଲୀଜନସ୍ୟ ପରିହାସଵଚାଂସି ମନ୍ୟେ
ମଂଦସ୍ମିତେନ ତଵ ଦେଵି ଜଡୀ ଭଵଂତି ॥ 16 ॥
ବ୍ରହ୍ମାଂଡ ବୁଦ୍ବୁଦକଦଂବକସଂକୁଲୋଽୟଂ
ମାୟୋଦଧିର୍ଵିଵିଧଦୁଃଖତରଂଗମାଲଃ ।
ଆଶ୍ଚର୍ୟମଂବ ଝଟିତି ପ୍ରଲୟଂ ପ୍ରୟାତି
ତ୍ଵଦ୍ଧ୍ୟାନସଂତତିମହାବଡବାମୁଖାଗ୍ନୌ ॥ 17 ॥
ଦାକ୍ଷାୟଣୀତି କୁଟିଲେତି କୁହାରିଣୀତି
କାତ୍ୟାୟନୀତି କମଲେତି କଲାଵତୀତି ।
ଏକା ସତୀ ଭଗଵତୀ ପରମାର୍ଥତୋଽପି
ସଂଦୃଶ୍ୟସେ ବହୁଵିଧା ନନୁ ନର୍ତକୀଵ ॥ 18 ॥
ଆନଂଦଲକ୍ଷଣମନାହତନାମ୍ନି ଦେଶେ
ନାଦାତ୍ମନା ପରିଣତଂ ତଵ ରୂପମୀଶେ ।
ପ୍ରତ୍ୟଙ୍ମୁଖେନ ମନସା ପରିଚୀୟମାନଂ
ଶଂସଂତି ନେତ୍ରସଲିଲୈଃ ପୁଲକୈଶ୍ଚ ଧନ୍ୟାଃ ॥ 19 ॥
ତ୍ଵଂ ଚଂଦ୍ରିକା ଶଶିନି ତିଗ୍ମରୁଚୌ ରୁଚିସ୍ତ୍ଵଂ
ତ୍ଵଂ ଚେତନାସି ପୁରୁଷେ ପଵନେ ବଲଂ ତ୍ଵମ୍ ।
ତ୍ଵଂ ସ୍ଵାଦୁତାସି ସଲିଲେ ଶିଖିନି ତ୍ଵମୂଷ୍ମା
ନିଃସାରମେଵ ନିଖିଲଂ ତ୍ଵଦୃତେ ୟଦି ସ୍ୟାତ୍ ॥ 20 ॥
ଜ୍ୟୋତୀଂଷି ୟଦ୍ଦିଵି ଚରଂତି ୟଦଂତରିକ୍ଷଂ
ସୂତେ ପୟାଂସି ୟଦହିର୍ଧରଣୀଂ ଚ ଧତ୍ତେ ।
ୟଦ୍ଵାତି ଵାୟୁରନଲୋ ୟଦୁଦର୍ଚିରାସ୍ତେ
ତତ୍ସର୍ଵମଂବ ତଵ କେଵଲମାଜ୍ଞୟୈଵ ॥ 21 ॥
ସଂକୋଚମିଚ୍ଛସି ୟଦା ଗିରିଜେ ତଦାନୀଂ
ଵାକ୍ତର୍କୟୋସ୍ତ୍ଵମସି ଭୂମିରନାମରୂପା ।
ୟଦ୍ଵା ଵିକାସମୁପୟାସି ୟଦା ତଦାନୀଂ
ତ୍ଵନ୍ନାମରୂପଗଣନାଃ ସୁକରା ଭଵଂତି ॥ 22 ॥
ଭୋଗାୟ ଦେଵି ଭଵତୀଂ କୃତିନଃ ପ୍ରଣମ୍ୟ
ଭ୍ରୂକିଂକରୀକୃତସରୋଜଗୃହାଃ ସହସ୍ରମ୍ ।
ଚିଂତାମଣିପ୍ରଚୟକଲ୍ପିତକେଲିଶୈଲେ
କଲ୍ପଦ୍ରୁମୋପଵନ ଏଵ ଚିରଂ ରମଂତେ ॥ 23 ॥
ହର୍ତୁଂ ତ୍ଵମେଵ ଭଵସି ତ୍ଵଦଧୀନମୀଶେ
ସଂସାରତାପମଖିଲଂ ଦୟୟା ପଶୂନାମ୍ ।
ଵୈକର୍ତନୀ କିରଣସଂହତିରେଵ ଶକ୍ତା
ଧର୍ମଂ ନିଜଂ ଶମୟିତୁଂ ନିଜୟୈଵ ଵୃଷ୍ଟ୍ୟା ॥ 24 ॥
ଶକ୍ତିଃ ଶରୀରମଧିଦୈଵତମଂତରାତ୍ମା
ଜ୍ଞାନଂ କ୍ରିୟା କରଣମାସନଜାଲମିଚ୍ଛା ।
ଐଶ୍ଵର୍ୟମାୟତନମାଵରଣାନି ଚ ତ୍ଵଂ
କିଂ ତନ୍ନ ୟଦ୍ଭଵସି ଦେଵି ଶଶାଂକମୌଲେଃ ॥ 25 ॥
ଭୂମୌ ନିଵୃତ୍ତିରୁଦିତା ପୟସି ପ୍ରତିଷ୍ଠା
ଵିଦ୍ୟାଽନଲେ ମରୁତି ଶାଂତିରତୀଵକାଂତିଃ ।
ଵ୍ୟୋମ୍ନୀତି ୟାଃ କିଲ କଲାଃ କଲୟଂତି ଵିଶ୍ଵଂ
ତାସାଂ ହି ଦୂରତରମଂବ ପଦଂ ତ୍ଵଦୀୟମ୍ ॥ 26 ॥
ୟାଵତ୍ପଦଂ ପଦସରୋଜୟୁଗଂ ତ୍ଵଦୀୟଂ
ନାଂଗୀକରୋତି ହୃଦୟେଷୁ ଜଗଚ୍ଛରଣ୍ୟେ ।
ତାଵଦ୍ଵିକଲ୍ପଜଟିଲାଃ କୁଟିଲପ୍ରକାରା-
-ସ୍ତର୍କଗ୍ରହାଃ ସମୟିନାଂ ପ୍ରଲୟଂ ନ ୟାଂତି ॥ 27 ॥
ନିର୍ଦେଵୟାନପିତୃୟାନଵିହାରମେକେ
କୃତ୍ଵା ମନଃ କରଣମଂଡଲସାର୍ଵଭୌମମ୍ ।
ଧ୍ୟାନେ ନିଵେଶ୍ୟ ତଵ କାରଣପଂଚକସ୍ୟ
ପର୍ଵାଣି ପାର୍ଵତି ନୟଂତି ନିଜାସନତ୍ଵମ୍ ॥ 28 ॥
ସ୍ଥୂଲାସୁ ମୂର୍ତିଷୁ ମହୀପ୍ରମୁଖାସୁ ମୂର୍ତେଃ
କସ୍ୟାଶ୍ଚନାପି ତଵ ଵୈଭଵମଂବ ୟସ୍ୟାଃ ।
ପତ୍ୟା ଗିରାମପି ନ ଶକ୍ୟତ ଏଵ ଵକ୍ତୁଂ
ସାପି ସ୍ତୁତା କିଲ ମୟେତି ତିତିକ୍ଷିତଵ୍ୟମ୍ ॥ 29 ॥
କାଲାଗ୍ନିକୋଟିରୁଚିମଂବ ଷଡଧ୍ଵଶୁଦ୍ଧୌ
ଆପ୍ଲାଵନେଷୁ ଭଵତୀମମୃତୌଘଵୃଷ୍ଟିମ୍ ।
ଶ୍ୟାମାଂ ଘନସ୍ତନତଟାଂ ଶକଲୀକୃତାଘାଂ
ଧ୍ୟାୟଂତ ଏଵ ଜଗତାଂ ଗୁରଵୋ ଭଵଂତି ॥ 30 ॥
ଵିଦ୍ୟାଂ ପରାଂ କତିଚିଦଂବରମଂବ କେଚି-
-ଦାନଂଦମେଵ କତିଚିତ୍କତିଚିଚ୍ଚ ମାୟାମ୍ ।
ତ୍ଵାଂ ଵିଶ୍ଵମାହୁରପରେ ଵୟମାମନାମଃ
ସାକ୍ଷାଦପାରକରୁଣାଂ ଗୁରୁମୂର୍ତିମେଵ ॥ 31 ॥
କୁଵଲୟଦଲନୀଲଂ ବର୍ବରସ୍ନିଗ୍ଧକେଶଂ
ପୃଥୁତରକୁଚଭାରାକ୍ରାଂତକାଂତାଵଲଗ୍ନମ୍ ।
କିମିହ ବହୁଭିରୁକ୍ତୈସ୍ତ୍ଵତ୍ସ୍ଵରୂପଂ ପରଂ ନଃ
ସକଲଜନନି ମାତଃ ସଂତତଂ ସନ୍ନିଧତ୍ତାମ୍ ॥ 32 ॥
ଇତି ଶ୍ରୀକାଳିଦାସ ଵିରଚିତ ପଂଚସ୍ତଵ୍ୟାଂ ଚତୁର୍ଥଃ ଅଂବାସ୍ତଵଃ ।
