𑌯𑌾𑌮𑌾𑌮𑌨𑌂𑌤𑌿 𑌮𑍁𑌨𑌯𑌃 𑌪𑍍𑌰𑌕𑍃𑌤𑌿𑌂 𑌪𑍁𑌰𑌾𑌣𑍀𑌂
𑌵𑌿𑌦𑍍𑌯𑍇𑌤𑌿 𑌯𑌾𑌂 𑌶𑍍𑌰𑍁𑌤𑌿𑌰𑌹𑌸𑍍𑌯𑌵𑌿𑌦𑍋 𑌵𑌦𑌂𑌤𑌿 ।
𑌤𑌾𑌮𑌰𑍍𑌧𑌪𑌲𑍍𑌲𑌵𑌿𑌤𑌶𑌂𑌕𑌰𑌰𑍂𑌪𑌮𑍁𑌦𑍍𑌰𑌾𑌂
𑌦𑍇𑌵𑍀𑌮𑌨𑌨𑍍𑌯𑌶𑌰𑌣𑌃 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 1 ॥
𑌅𑌂𑌬 𑌸𑍍𑌤𑌵𑍇𑌷𑍁 𑌤𑌵 𑌤𑌾𑌵𑌦𑌕𑌰𑍍𑌤𑍃𑌕𑌾𑌣𑌿
𑌕𑍁𑌂𑌠𑍀𑌭𑌵𑌂𑌤𑌿 𑌵𑌚𑌸𑌾𑌮𑌪𑌿 𑌗𑍁𑌂𑌭𑌨𑌾𑌨𑌿 ।
𑌡𑌿𑌂𑌭𑌸𑍍𑌯 𑌮𑍇 𑌸𑍍𑌤𑍁𑌤𑌿𑌰𑌸𑌾𑌵𑌸𑌮𑌂𑌜𑌸𑌾𑌪𑌿
𑌵𑌾𑌤𑍍𑌸𑌲𑍍𑌯𑌨𑌿𑌘𑍍𑌨𑌹𑍃𑌦𑌯𑌾𑌂 𑌭𑌵𑌤𑍀𑌂 𑌧𑌿𑌨𑍋𑌤𑍁 ॥ 2 ॥
𑌵𑍍𑌯𑍋𑌮𑍇𑌤𑌿 𑌬𑌿𑌂𑌦𑍁𑌰𑌿𑌤𑌿 𑌨𑌾𑌦 𑌇𑌤𑍀𑌂𑌦𑍁𑌲𑍇𑌖𑌾-
-𑌰𑍂𑌪𑍇𑌤𑌿 𑌵𑌾𑌗𑍍𑌭𑌵𑌤𑌨𑍂𑌰𑌿𑌤𑌿 𑌮𑌾𑌤𑍃𑌕𑍇𑌤𑌿 ।
𑌨𑌿𑌃𑌸𑍍𑌯𑌂𑌦𑌮𑌾𑌨𑌸𑍁𑌖𑌬𑍋𑌧𑌸𑍁𑌧𑌾𑌸𑍍𑌵𑌰𑍂𑌪𑌾
𑌵𑌿𑌦𑍍𑌯𑍋𑌤𑌸𑍇 𑌮𑌨𑌸𑌿 𑌭𑌾𑌗𑍍𑌯𑌵𑌤𑌾𑌂 𑌜𑌨𑌾𑌨𑌾𑌮𑍍 ॥ 3 ॥
𑌆𑌵𑌿𑌰𑍍𑌭𑌵𑌤𑍍𑌪𑍁𑌲𑌕𑌸𑌂𑌤𑌤𑌿𑌭𑌿𑌃 𑌶𑌰𑍀𑌰𑍈-
-𑌰𑍍𑌨𑌿𑌃𑌸𑍍𑌯𑌂𑌦𑌮𑌾𑌨𑌸𑌲𑌿𑌲𑍈𑌰𑍍𑌨𑌯𑌨𑍈𑌶𑍍𑌚 𑌨𑌿𑌤𑍍𑌯𑌮𑍍 ।
𑌵𑌾𑌗𑍍𑌭𑌿𑌶𑍍𑌚 𑌗𑌦𑍍𑌗𑌦𑌪𑌦𑌾𑌭𑌿𑌰𑍁𑌪𑌾𑌸𑌤𑍇 𑌯𑍇
𑌪𑌾𑌦𑍌 𑌤𑌵𑌾𑌂𑌬 𑌭𑍁𑌵𑌨𑍇𑌷𑍁 𑌤 𑌏𑌵 𑌧𑌨𑍍𑌯𑌾𑌃 ॥ 4 ॥
𑌵𑌕𑍍𑌤𑍍𑌰𑌂 𑌯𑌦𑍁𑌦𑍍𑌯𑌤𑌮𑌭𑌿𑌷𑍍𑌟𑍁𑌤𑌯𑍇 𑌭𑌵𑌤𑍍𑌯𑌾-
-𑌸𑍍𑌤𑍁𑌭𑍍𑌯𑌂 𑌨𑌮𑍋 𑌯𑌦𑌪𑌿 𑌦𑍇𑌵𑌿 𑌶𑌿𑌰𑌃 𑌕𑌰𑍋𑌤𑌿 ।
𑌚𑍇𑌤𑌶𑍍𑌚 𑌯𑌤𑍍𑌤𑍍𑌵𑌯𑌿 𑌪𑌰𑌾𑌯𑌣𑌮𑌂𑌬 𑌤𑌾𑌨𑌿
𑌕𑌸𑍍𑌯𑌾𑌪𑌿 𑌕𑍈𑌰𑌪𑌿 𑌭𑌵𑌂𑌤𑌿 𑌤𑌪𑍋𑌵𑌿𑌶𑍇𑌷𑍈𑌃 ॥ 5 ॥
𑌮𑍂𑌲𑌾𑌲𑌵𑌾𑌲𑌕𑍁𑌹𑌰𑌾𑌦𑍁𑌦𑌿𑌤𑌾 𑌭𑌵𑌾𑌨𑌿
𑌨𑌿𑌰𑍍𑌭𑌿𑌦𑍍𑌯 𑌷𑌟𑍍𑌸𑌰𑌸𑌿𑌜𑌾𑌨𑌿 𑌤𑌟𑌿𑌲𑍍𑌲𑌤𑍇𑌵 ।
𑌭𑍂𑌯𑍋𑌽𑌪𑌿 𑌤𑌤𑍍𑌰 𑌵𑌿𑌶𑌸𑌿 𑌧𑍍𑌰𑍁𑌵𑌮𑌂𑌡𑌲𑍇𑌂𑌦𑍁-
-𑌨𑌿𑌃𑌸𑍍𑌯𑌂𑌦𑌮𑌾𑌨𑌪𑌰𑌮𑌾𑌮𑍃𑌤𑌤𑍋𑌯𑌰𑍂𑌪𑌾 ॥ 6 ॥
𑌦𑌗𑍍𑌧𑌂 𑌯𑌦𑌾 𑌮𑌦𑌨𑌮𑍇𑌕𑌮𑌨𑍇𑌕𑌧𑌾 𑌤𑍇
𑌮𑍁𑌗𑍍𑌧𑌃 𑌕𑌟𑌾𑌕𑍍𑌷𑌵𑌿𑌧𑌿𑌰𑌂𑌕𑍁𑌰𑌯𑌾𑌂𑌚𑌕𑌾𑌰 ।
𑌧𑌤𑍍𑌤𑍇 𑌤𑌦𑌾𑌪𑍍𑌰𑌭𑍃𑌤𑌿 𑌦𑍇𑌵𑌿 𑌲𑌲𑌾𑌟𑌨𑍇𑌤𑍍𑌰𑌂
𑌸𑌤𑍍𑌯𑌂 𑌹𑍍𑌰𑌿𑌯𑍈𑌵 𑌮𑍁𑌕𑍁𑌲𑍀𑌕𑍃𑌤𑌮𑌿𑌂𑌦𑍁𑌮𑍌𑌲𑍇𑌃 ॥ ॥
𑌅𑌜𑍍𑌞𑌾𑌤𑌸𑌂𑌭𑌵𑌮𑌨𑌾𑌕𑌲𑌿𑌤𑌾𑌨𑍍𑌵𑌵𑌾𑌯𑌂
𑌭𑌿𑌕𑍍𑌷𑍁𑌂 𑌕𑌪𑌾𑌲𑌿𑌨𑌮𑌵𑌾𑌸𑌸𑌮𑌦𑍍𑌵𑌿𑌤𑍀𑌯𑌮𑍍 ।
𑌪𑍂𑌰𑍍𑌵𑌂 𑌕𑌰𑌗𑍍𑌰𑌹𑌣𑌮𑌂𑌗𑌲𑌤𑍋 𑌭𑌵𑌤𑍍𑌯𑌾𑌃
𑌶𑌂𑌭𑍁𑌂 𑌕 𑌏𑌵 𑌬𑍁𑌬𑍁𑌧𑍇 𑌗𑌿𑌰𑌿𑌰𑌾𑌜𑌕𑌨𑍍𑌯𑍇 ॥ ॥
𑌚𑌰𑍍𑌮𑌾𑌂𑌬𑌰𑌂 𑌚 𑌶𑌵𑌭𑌸𑍍𑌮𑌵𑌿𑌲𑍇𑌪𑌨𑌂 𑌚
𑌭𑌿𑌕𑍍𑌷𑌾𑌟𑌨𑌂 𑌚 𑌨𑌟𑌨𑌂 𑌚 𑌪𑌰𑍇𑌤𑌭𑍂𑌮𑍌 ।
𑌵𑍇𑌤𑌾𑌲𑌸𑌂𑌹𑌤𑌿𑌪𑌰𑌿𑌗𑍍𑌰𑌹𑌤𑌾 𑌚 𑌶𑌂𑌭𑍋𑌃
𑌶𑍋𑌭𑌾𑌂 𑌬𑌿𑌭𑌰𑍍𑌤𑌿 𑌗𑌿𑌰𑌿𑌜𑍇 𑌤𑌵 𑌸𑌾𑌹𑌚𑌰𑍍𑌯𑌾𑌤𑍍 ॥ ॥
𑌕𑌲𑍍𑌪𑍋𑌪𑌸𑌂𑌹𑌰𑌣𑌕𑍇𑌲𑌿𑌷𑍁 𑌪𑌂𑌡𑌿𑌤𑌾𑌨𑌿
𑌚𑌂𑌡𑌾𑌨𑌿 𑌖𑌂𑌡𑌪𑌰𑌶𑍋𑌰𑌪𑌿 𑌤𑌾𑌂𑌡𑌵𑌾𑌨𑌿 ।
𑌆𑌲𑍋𑌕𑌨𑍇𑌨 𑌤𑌵 𑌕𑍋𑌮𑌲𑌿𑌤𑌾𑌨𑌿 𑌮𑌾𑌤-
-𑌰𑍍𑌲𑌾𑌸𑍍𑌯𑌾𑌤𑍍𑌮𑌨𑌾 𑌪𑌰𑌿𑌣𑌮𑌂𑌤𑌿 𑌜𑌗𑌦𑍍𑌵𑌿𑌭𑍂𑌤𑍍𑌯𑍈 ॥ 10 ॥
𑌜𑌂𑌤𑍋𑌰𑌪𑌶𑍍𑌚𑌿𑌮𑌤𑌨𑍋𑌃 𑌸𑌤𑌿 𑌕𑌰𑍍𑌮𑌸𑌾𑌮𑍍𑌯𑍇
𑌨𑌿𑌃𑌶𑍇𑌷𑌪𑌾𑌶𑌪𑌟𑌲𑌚𑍍𑌛𑌿𑌦𑍁𑌰𑌾 𑌨𑌿𑌮𑍇𑌷𑌾𑌤𑍍 ।
𑌕𑌲𑍍𑌯𑌾𑌣𑌿 𑌦𑍇𑌶𑌿𑌕𑌕𑌟𑌾𑌕𑍍𑌷𑌸𑌮𑌾𑌶𑍍𑌰𑌯𑍇𑌣
𑌕𑌾𑌰𑍁𑌣𑍍𑌯𑌤𑍋 𑌭𑌵𑌤𑌿 𑌶𑌾𑌂𑌭𑌵𑌵𑍇𑌦𑌦𑍀𑌕𑍍𑌷𑌾 ॥ 11 ॥
𑌮𑍁𑌕𑍍𑌤𑌾𑌵𑌿𑌭𑍂𑌷𑌣𑌵𑌤𑍀 𑌨𑌵𑌵𑌿𑌦𑍍𑌰𑍁𑌮𑌾𑌭𑌾
𑌯𑌚𑍍𑌚𑍇𑌤𑌸𑌿 𑌸𑍍𑌫𑍁𑌰𑌸𑌿 𑌤𑌾𑌰𑌕𑌿𑌤𑍇𑌵 𑌸𑌂𑌧𑍍𑌯𑌾 ।
𑌏𑌕𑌃 𑌸 𑌏𑌵 𑌭𑍁𑌵𑌨𑌤𑍍𑌰𑌯𑌸𑍁𑌂𑌦𑌰𑍀𑌣𑌾𑌂
𑌕𑌂𑌦𑌰𑍍𑌪𑌤𑌾𑌂 𑌵𑍍𑌰𑌜𑌤𑌿 𑌪𑌂𑌚𑌶𑌰𑍀𑌂 𑌵𑌿𑌨𑌾𑌪𑌿 ॥ 12 ॥
𑌯𑍇 𑌭𑌾𑌵𑌯𑌂𑌤𑍍𑌯𑌮𑍃𑌤𑌵𑌾𑌹𑌿𑌭𑌿𑌰𑌂𑌶𑍁𑌜𑌾𑌲𑍈-
-𑌰𑌾𑌪𑍍𑌯𑌾𑌯𑌮𑌾𑌨𑌭𑍁𑌵𑌨𑌾𑌮𑌮𑍃𑌤𑍇𑌶𑍍𑌵𑌰𑍀𑌂 𑌤𑍍𑌵𑌾𑌮𑍍 ।
𑌤𑍇 𑌲𑌂𑌘𑌯𑌂𑌤𑌿 𑌨𑌨𑍁 𑌮𑌾𑌤𑌰𑌲𑌂𑌘𑌨𑍀𑌯𑌾𑌂
𑌬𑍍𑌰𑌹𑍍𑌮𑌾𑌦𑌿𑌭𑌿𑌃 𑌸𑍁𑌰𑌵𑌰𑍈𑌰𑌪𑌿 𑌕𑌾𑌲𑌕𑌕𑍍𑌷𑌾𑌮𑍍 ॥ 13 ॥
𑌯𑌃 𑌸𑍍𑌫𑌾𑌟𑌿𑌕𑌾𑌕𑍍𑌷𑌗𑍁𑌣𑌪𑍁𑌸𑍍𑌤𑌕𑌕𑍁𑌂𑌡𑌿𑌕𑌾𑌢𑍍𑌯𑌾𑌂
𑌵𑍍𑌯𑌾𑌖𑍍𑌯𑌾𑌸𑌮𑍁𑌦𑍍𑌯𑌤𑌕𑌰𑌾𑌂 𑌶𑌰𑌦𑌿𑌂𑌦𑍁𑌶𑍁𑌭𑍍𑌰𑌾𑌮𑍍 ।
𑌪𑌦𑍍𑌮𑌾𑌸𑌨𑌾𑌂 𑌚 𑌹𑍃𑌦𑌯𑍇 𑌭𑌵𑌤𑍀𑌮𑍁𑌪𑌾𑌸𑍍𑌤𑍇
𑌮𑌾𑌤𑌃 𑌸 𑌵𑌿𑌶𑍍𑌵𑌕𑌵𑌿𑌤𑌾𑌰𑍍𑌕𑌿𑌕𑌚𑌕𑍍𑌰𑌵𑌰𑍍𑌤𑍀 ॥ 14 ॥
𑌬𑌰𑍍𑌹𑌾𑌵𑌤𑌂𑌸𑌯𑍁𑌤𑌬𑌰𑍍𑌬𑌰𑌕𑍇𑌶𑌪𑌾𑌶𑌾𑌂
𑌗𑍁𑌂𑌜𑌾𑌵𑌲𑍀𑌕𑍃𑌤𑌘𑌨𑌸𑍍𑌤𑌨𑌹𑌾𑌰𑌶𑍋𑌭𑌾𑌮𑍍 ।
𑌶𑍍𑌯𑌾𑌮𑌾𑌂 𑌪𑍍𑌰𑌵𑌾𑌲𑌵𑌦𑌨𑌾𑌂 𑌸𑍁𑌕𑍁𑌮𑌾𑌰𑌹𑌸𑍍𑌤𑌾𑌂
𑌤𑍍𑌵𑌾𑌮𑍇𑌵 𑌨𑍌𑌮𑌿 𑌶𑌬𑌰𑍀𑌂 𑌶𑌬𑌰𑌸𑍍𑌯 𑌜𑌾𑌯𑌾𑌮𑍍 ॥ 15 ॥
𑌅𑌰𑍍𑌧𑍇𑌨 𑌕𑌿𑌂 𑌨𑌵𑌲𑌤𑌾𑌲𑌲𑌿𑌤𑍇𑌨 𑌮𑍁𑌗𑍍𑌧𑍇
𑌕𑍍𑌰𑍀𑌤𑌂 𑌵𑌿𑌭𑍋𑌃 𑌪𑌰𑍁𑌷𑌮𑌰𑍍𑌧𑌮𑌿𑌦𑌂 𑌤𑍍𑌵𑌯𑍇𑌤𑌿 ।
𑌆𑌲𑍀𑌜𑌨𑌸𑍍𑌯 𑌪𑌰𑌿𑌹𑌾𑌸𑌵𑌚𑌾𑌂𑌸𑌿 𑌮𑌨𑍍𑌯𑍇
𑌮𑌂𑌦𑌸𑍍𑌮𑌿𑌤𑍇𑌨 𑌤𑌵 𑌦𑍇𑌵𑌿 𑌜𑌡𑍀 𑌭𑌵𑌂𑌤𑌿 ॥ 16 ॥
𑌬𑍍𑌰𑌹𑍍𑌮𑌾𑌂𑌡 𑌬𑍁𑌦𑍍𑌬𑍁𑌦𑌕𑌦𑌂𑌬𑌕𑌸𑌂𑌕𑍁𑌲𑍋𑌽𑌯𑌂
𑌮𑌾𑌯𑍋𑌦𑌧𑌿𑌰𑍍𑌵𑌿𑌵𑌿𑌧𑌦𑍁𑌃𑌖𑌤𑌰𑌂𑌗𑌮𑌾𑌲𑌃 ।
𑌆𑌶𑍍𑌚𑌰𑍍𑌯𑌮𑌂𑌬 𑌝𑌟𑌿𑌤𑌿 𑌪𑍍𑌰𑌲𑌯𑌂 𑌪𑍍𑌰𑌯𑌾𑌤𑌿
𑌤𑍍𑌵𑌦𑍍𑌧𑍍𑌯𑌾𑌨𑌸𑌂𑌤𑌤𑌿𑌮𑌹𑌾𑌬𑌡𑌬𑌾𑌮𑍁𑌖𑌾𑌗𑍍𑌨𑍌 ॥ 1 ॥
𑌦𑌾𑌕𑍍𑌷𑌾𑌯𑌣𑍀𑌤𑌿 𑌕𑍁𑌟𑌿𑌲𑍇𑌤𑌿 𑌕𑍁𑌹𑌾𑌰𑌿𑌣𑍀𑌤𑌿
𑌕𑌾𑌤𑍍𑌯𑌾𑌯𑌨𑍀𑌤𑌿 𑌕𑌮𑌲𑍇𑌤𑌿 𑌕𑌲𑌾𑌵𑌤𑍀𑌤𑌿 ।
𑌏𑌕𑌾 𑌸𑌤𑍀 𑌭𑌗𑌵𑌤𑍀 𑌪𑌰𑌮𑌾𑌰𑍍𑌥𑌤𑍋𑌽𑌪𑌿
𑌸𑌂𑌦𑍃𑌶𑍍𑌯𑌸𑍇 𑌬𑌹𑍁𑌵𑌿𑌧𑌾 𑌨𑌨𑍁 𑌨𑌰𑍍𑌤𑌕𑍀𑌵 ॥ 1 ॥
𑌆𑌨𑌂𑌦𑌲𑌕𑍍𑌷𑌣𑌮𑌨𑌾𑌹𑌤𑌨𑌾𑌮𑍍𑌨𑌿 𑌦𑍇𑌶𑍇
𑌨𑌾𑌦𑌾𑌤𑍍𑌮𑌨𑌾 𑌪𑌰𑌿𑌣𑌤𑌂 𑌤𑌵 𑌰𑍂𑌪𑌮𑍀𑌶𑍇 ।
𑌪𑍍𑌰𑌤𑍍𑌯𑌙𑍍𑌮𑍁𑌖𑍇𑌨 𑌮𑌨𑌸𑌾 𑌪𑌰𑌿𑌚𑍀𑌯𑌮𑌾𑌨𑌂
𑌶𑌂𑌸𑌂𑌤𑌿 𑌨𑍇𑌤𑍍𑌰𑌸𑌲𑌿𑌲𑍈𑌃 𑌪𑍁𑌲𑌕𑍈𑌶𑍍𑌚 𑌧𑌨𑍍𑌯𑌾𑌃 ॥ 1 ॥
𑌤𑍍𑌵𑌂 𑌚𑌂𑌦𑍍𑌰𑌿𑌕𑌾 𑌶𑌶𑌿𑌨𑌿 𑌤𑌿𑌗𑍍𑌮𑌰𑍁𑌚𑍌 𑌰𑍁𑌚𑌿𑌸𑍍𑌤𑍍𑌵𑌂
𑌤𑍍𑌵𑌂 𑌚𑍇𑌤𑌨𑌾𑌸𑌿 𑌪𑍁𑌰𑍁𑌷𑍇 𑌪𑌵𑌨𑍇 𑌬𑌲𑌂 𑌤𑍍𑌵𑌮𑍍 ।
𑌤𑍍𑌵𑌂 𑌸𑍍𑌵𑌾𑌦𑍁𑌤𑌾𑌸𑌿 𑌸𑌲𑌿𑌲𑍇 𑌶𑌿𑌖𑌿𑌨𑌿 𑌤𑍍𑌵𑌮𑍂𑌷𑍍𑌮𑌾
𑌨𑌿𑌃𑌸𑌾𑌰𑌮𑍇𑌵 𑌨𑌿𑌖𑌿𑌲𑌂 𑌤𑍍𑌵𑌦𑍃𑌤𑍇 𑌯𑌦𑌿 𑌸𑍍𑌯𑌾𑌤𑍍 ॥ 20 ॥
𑌜𑍍𑌯𑍋𑌤𑍀𑌂𑌷𑌿 𑌯𑌦𑍍𑌦𑌿𑌵𑌿 𑌚𑌰𑌂𑌤𑌿 𑌯𑌦𑌂𑌤𑌰𑌿𑌕𑍍𑌷𑌂
𑌸𑍂𑌤𑍇 𑌪𑌯𑌾𑌂𑌸𑌿 𑌯𑌦𑌹𑌿𑌰𑍍𑌧𑌰𑌣𑍀𑌂 𑌚 𑌧𑌤𑍍𑌤𑍇 ।
𑌯𑌦𑍍𑌵𑌾𑌤𑌿 𑌵𑌾𑌯𑍁𑌰𑌨𑌲𑍋 𑌯𑌦𑍁𑌦𑌰𑍍𑌚𑌿𑌰𑌾𑌸𑍍𑌤𑍇
𑌤𑌤𑍍𑌸𑌰𑍍𑌵𑌮𑌂𑌬 𑌤𑌵 𑌕𑍇𑌵𑌲𑌮𑌾𑌜𑍍𑌞𑌯𑍈𑌵 ॥ 21 ॥
𑌸𑌂𑌕𑍋𑌚𑌮𑌿𑌚𑍍𑌛𑌸𑌿 𑌯𑌦𑌾 𑌗𑌿𑌰𑌿𑌜𑍇 𑌤𑌦𑌾𑌨𑍀𑌂
𑌵𑌾𑌕𑍍𑌤𑌰𑍍𑌕𑌯𑍋𑌸𑍍𑌤𑍍𑌵𑌮𑌸𑌿 𑌭𑍂𑌮𑌿𑌰𑌨𑌾𑌮𑌰𑍂𑌪𑌾 ।
𑌯𑌦𑍍𑌵𑌾 𑌵𑌿𑌕𑌾𑌸𑌮𑍁𑌪𑌯𑌾𑌸𑌿 𑌯𑌦𑌾 𑌤𑌦𑌾𑌨𑍀𑌂
𑌤𑍍𑌵𑌨𑍍𑌨𑌾𑌮𑌰𑍂𑌪𑌗𑌣𑌨𑌾𑌃 𑌸𑍁𑌕𑌰𑌾 𑌭𑌵𑌂𑌤𑌿 ॥ 22 ॥
𑌭𑍋𑌗𑌾𑌯 𑌦𑍇𑌵𑌿 𑌭𑌵𑌤𑍀𑌂 𑌕𑍃𑌤𑌿𑌨𑌃 𑌪𑍍𑌰𑌣𑌮𑍍𑌯
𑌭𑍍𑌰𑍂𑌕𑌿𑌂𑌕𑌰𑍀𑌕𑍃𑌤𑌸𑌰𑍋𑌜𑌗𑍃𑌹𑌾𑌃 𑌸𑌹𑌸𑍍𑌰𑌮𑍍 ।
𑌚𑌿𑌂𑌤𑌾𑌮𑌣𑌿𑌪𑍍𑌰𑌚𑌯𑌕𑌲𑍍𑌪𑌿𑌤𑌕𑍇𑌲𑌿𑌶𑍈𑌲𑍇
𑌕𑌲𑍍𑌪𑌦𑍍𑌰𑍁𑌮𑍋𑌪𑌵𑌨 𑌏𑌵 𑌚𑌿𑌰𑌂 𑌰𑌮𑌂𑌤𑍇 ॥ 23 ॥
𑌹𑌰𑍍𑌤𑍁𑌂 𑌤𑍍𑌵𑌮𑍇𑌵 𑌭𑌵𑌸𑌿 𑌤𑍍𑌵𑌦𑌧𑍀𑌨𑌮𑍀𑌶𑍇
𑌸𑌂𑌸𑌾𑌰𑌤𑌾𑌪𑌮𑌖𑌿𑌲𑌂 𑌦𑌯𑌯𑌾 𑌪𑌶𑍂𑌨𑌾𑌮𑍍 ।
𑌵𑍈𑌕𑌰𑍍𑌤𑌨𑍀 𑌕𑌿𑌰𑌣𑌸𑌂𑌹𑌤𑌿𑌰𑍇𑌵 𑌶𑌕𑍍𑌤𑌾
𑌧𑌰𑍍𑌮𑌂 𑌨𑌿𑌜𑌂 𑌶𑌮𑌯𑌿𑌤𑍁𑌂 𑌨𑌿𑌜𑌯𑍈𑌵 𑌵𑍃𑌷𑍍𑌟𑍍𑌯𑌾 ॥ 24 ॥
𑌶𑌕𑍍𑌤𑌿𑌃 𑌶𑌰𑍀𑌰𑌮𑌧𑌿𑌦𑍈𑌵𑌤𑌮𑌂𑌤𑌰𑌾𑌤𑍍𑌮𑌾
𑌜𑍍𑌞𑌾𑌨𑌂 𑌕𑍍𑌰𑌿𑌯𑌾 𑌕𑌰𑌣𑌮𑌾𑌸𑌨𑌜𑌾𑌲𑌮𑌿𑌚𑍍𑌛𑌾 ।
𑌐𑌶𑍍𑌵𑌰𑍍𑌯𑌮𑌾𑌯𑌤𑌨𑌮𑌾𑌵𑌰𑌣𑌾𑌨𑌿 𑌚 𑌤𑍍𑌵𑌂
𑌕𑌿𑌂 𑌤𑌨𑍍𑌨 𑌯𑌦𑍍𑌭𑌵𑌸𑌿 𑌦𑍇𑌵𑌿 𑌶𑌶𑌾𑌂𑌕𑌮𑍌𑌲𑍇𑌃 ॥ 25 ॥
𑌭𑍂𑌮𑍌 𑌨𑌿𑌵𑍃𑌤𑍍𑌤𑌿𑌰𑍁𑌦𑌿𑌤𑌾 𑌪𑌯𑌸𑌿 𑌪𑍍𑌰𑌤𑌿𑌷𑍍𑌠𑌾
𑌵𑌿𑌦𑍍𑌯𑌾𑌽𑌨𑌲𑍇 𑌮𑌰𑍁𑌤𑌿 𑌶𑌾𑌂𑌤𑌿𑌰𑌤𑍀𑌵𑌕𑌾𑌂𑌤𑌿𑌃 ।
𑌵𑍍𑌯𑍋𑌮𑍍𑌨𑍀𑌤𑌿 𑌯𑌾𑌃 𑌕𑌿𑌲 𑌕𑌲𑌾𑌃 𑌕𑌲𑌯𑌂𑌤𑌿 𑌵𑌿𑌶𑍍𑌵𑌂
𑌤𑌾𑌸𑌾𑌂 𑌹𑌿 𑌦𑍂𑌰𑌤𑌰𑌮𑌂𑌬 𑌪𑌦𑌂 𑌤𑍍𑌵𑌦𑍀𑌯𑌮𑍍 ॥ 26 ॥
𑌯𑌾𑌵𑌤𑍍𑌪𑌦𑌂 𑌪𑌦𑌸𑌰𑍋𑌜𑌯𑍁𑌗𑌂 𑌤𑍍𑌵𑌦𑍀𑌯𑌂
𑌨𑌾𑌂𑌗𑍀𑌕𑌰𑍋𑌤𑌿 𑌹𑍃𑌦𑌯𑍇𑌷𑍁 𑌜𑌗𑌚𑍍𑌛𑌰𑌣𑍍𑌯𑍇 ।
𑌤𑌾𑌵𑌦𑍍𑌵𑌿𑌕𑌲𑍍𑌪𑌜𑌟𑌿𑌲𑌾𑌃 𑌕𑍁𑌟𑌿𑌲𑌪𑍍𑌰𑌕𑌾𑌰𑌾-
-𑌸𑍍𑌤𑌰𑍍𑌕𑌗𑍍𑌰𑌹𑌾𑌃 𑌸𑌮𑌯𑌿𑌨𑌾𑌂 𑌪𑍍𑌰𑌲𑌯𑌂 𑌨 𑌯𑌾𑌂𑌤𑌿 ॥ 2 ॥
𑌨𑌿𑌰𑍍𑌦𑍇𑌵𑌯𑌾𑌨𑌪𑌿𑌤𑍃𑌯𑌾𑌨𑌵𑌿𑌹𑌾𑌰𑌮𑍇𑌕𑍇
𑌕𑍃𑌤𑍍𑌵𑌾 𑌮𑌨𑌃 𑌕𑌰𑌣𑌮𑌂𑌡𑌲𑌸𑌾𑌰𑍍𑌵𑌭𑍌𑌮𑌮𑍍 ।
𑌧𑍍𑌯𑌾𑌨𑍇 𑌨𑌿𑌵𑍇𑌶𑍍𑌯 𑌤𑌵 𑌕𑌾𑌰𑌣𑌪𑌂𑌚𑌕𑌸𑍍𑌯
𑌪𑌰𑍍𑌵𑌾𑌣𑌿 𑌪𑌾𑌰𑍍𑌵𑌤𑌿 𑌨𑌯𑌂𑌤𑌿 𑌨𑌿𑌜𑌾𑌸𑌨𑌤𑍍𑌵𑌮𑍍 ॥ 2 ॥
𑌸𑍍𑌥𑍂𑌲𑌾𑌸𑍁 𑌮𑍂𑌰𑍍𑌤𑌿𑌷𑍁 𑌮𑌹𑍀𑌪𑍍𑌰𑌮𑍁𑌖𑌾𑌸𑍁 𑌮𑍂𑌰𑍍𑌤𑍇𑌃
𑌕𑌸𑍍𑌯𑌾𑌶𑍍𑌚𑌨𑌾𑌪𑌿 𑌤𑌵 𑌵𑍈𑌭𑌵𑌮𑌂𑌬 𑌯𑌸𑍍𑌯𑌾𑌃 ।
𑌪𑌤𑍍𑌯𑌾 𑌗𑌿𑌰𑌾𑌮𑌪𑌿 𑌨 𑌶𑌕𑍍𑌯𑌤 𑌏𑌵 𑌵𑌕𑍍𑌤𑍁𑌂
𑌸𑌾𑌪𑌿 𑌸𑍍𑌤𑍁𑌤𑌾 𑌕𑌿𑌲 𑌮𑌯𑍇𑌤𑌿 𑌤𑌿𑌤𑌿𑌕𑍍𑌷𑌿𑌤𑌵𑍍𑌯𑌮𑍍 ॥ 2 ॥
𑌕𑌾𑌲𑌾𑌗𑍍𑌨𑌿𑌕𑍋𑌟𑌿𑌰𑍁𑌚𑌿𑌮𑌂𑌬 𑌷𑌡𑌧𑍍𑌵𑌶𑍁𑌦𑍍𑌧𑍌
𑌆𑌪𑍍𑌲𑌾𑌵𑌨𑍇𑌷𑍁 𑌭𑌵𑌤𑍀𑌮𑌮𑍃𑌤𑍌𑌘𑌵𑍃𑌷𑍍𑌟𑌿𑌮𑍍 ।
𑌶𑍍𑌯𑌾𑌮𑌾𑌂 𑌘𑌨𑌸𑍍𑌤𑌨𑌤𑌟𑌾𑌂 𑌶𑌕𑌲𑍀𑌕𑍃𑌤𑌾𑌘𑌾𑌂
𑌧𑍍𑌯𑌾𑌯𑌂𑌤 𑌏𑌵 𑌜𑌗𑌤𑌾𑌂 𑌗𑍁𑌰𑌵𑍋 𑌭𑌵𑌂𑌤𑌿 ॥ 30 ॥
𑌵𑌿𑌦𑍍𑌯𑌾𑌂 𑌪𑌰𑌾𑌂 𑌕𑌤𑌿𑌚𑌿𑌦𑌂𑌬𑌰𑌮𑌂𑌬 𑌕𑍇𑌚𑌿-
-𑌦𑌾𑌨𑌂𑌦𑌮𑍇𑌵 𑌕𑌤𑌿𑌚𑌿𑌤𑍍𑌕𑌤𑌿𑌚𑌿𑌚𑍍𑌚 𑌮𑌾𑌯𑌾𑌮𑍍 ।
𑌤𑍍𑌵𑌾𑌂 𑌵𑌿𑌶𑍍𑌵𑌮𑌾𑌹𑍁𑌰𑌪𑌰𑍇 𑌵𑌯𑌮𑌾𑌮𑌨𑌾𑌮𑌃
𑌸𑌾𑌕𑍍𑌷𑌾𑌦𑌪𑌾𑌰𑌕𑌰𑍁𑌣𑌾𑌂 𑌗𑍁𑌰𑍁𑌮𑍂𑌰𑍍𑌤𑌿𑌮𑍇𑌵 ॥ 31 ॥
𑌕𑍁𑌵𑌲𑌯𑌦𑌲𑌨𑍀𑌲𑌂 𑌬𑌰𑍍𑌬𑌰𑌸𑍍𑌨𑌿𑌗𑍍𑌧𑌕𑍇𑌶𑌂
𑌪𑍃𑌥𑍁𑌤𑌰𑌕𑍁𑌚𑌭𑌾𑌰𑌾𑌕𑍍𑌰𑌾𑌂𑌤𑌕𑌾𑌂𑌤𑌾𑌵𑌲𑌗𑍍𑌨𑌮𑍍 ।
𑌕𑌿𑌮𑌿𑌹 𑌬𑌹𑍁𑌭𑌿𑌰𑍁𑌕𑍍𑌤𑍈𑌸𑍍𑌤𑍍𑌵𑌤𑍍𑌸𑍍𑌵𑌰𑍂𑌪𑌂 𑌪𑌰𑌂 𑌨𑌃
𑌸𑌕𑌲𑌜𑌨𑌨𑌿 𑌮𑌾𑌤𑌃 𑌸𑌂𑌤𑌤𑌂 𑌸𑌨𑍍𑌨𑌿𑌧𑌤𑍍𑌤𑌾𑌮𑍍 ॥ 32 ॥
𑌇𑌤𑌿 𑌶𑍍𑌰𑍀𑌕𑌾𑌳𑌿𑌦𑌾𑌸 𑌵𑌿𑌰𑌚𑌿𑌤 𑌪𑌂𑌚𑌸𑍍𑌤𑌵𑍍𑌯𑌾𑌂 𑌚𑌤𑍁𑌰𑍍𑌥𑌃 𑌅𑌂𑌬𑌾𑌸𑍍𑌤𑌵𑌃 ।
