ಆ ತೂ ನ॑ ಇಂದ್ರ ಕ್ಷು॒ಮಂತಂ᳚ ಚಿ॒ತ್ರಂ ಗ್ರಾ॒ಭಂ ಸಂ ಗೃ॑ಭಾಯ ।
ಮ॒ಹಾ॒ಹ॒ಸ್ತೀ ದಕ್ಷಿ॑ಣೇನ ॥ 1 ॥
ವಿ॒ದ್ಮಾ ಹಿ ತ್ವಾ᳚ ತುವಿಕೂ॒ರ್ಮಿಂತು॒ವಿದೇ᳚ಷ್ಣಂ ತು॒ವೀಮ॑ಘಮ್ ।
ತು॒ವಿ॒ಮಾ॒ತ್ರಮವೋ᳚ಭಿಃ ॥ 2 ॥
ನ॒ ಹಿ ತ್ವಾ᳚ ಶೂರ ದೇ॒ವಾ ನ ಮರ್ತಾ᳚ಸೋ॒ ದಿತ್ಸಂ᳚ತಮ್ ।
ಭೀ॒ಮಂ ನ ಗಾಂ-ವಾಁ॒ರಯಂ᳚ತೇ ॥ 3 ॥
ಏತೋ॒ನ್ವಿಂದ್ರಂ॒ ಸ್ತವಾ॒ಮೇಶಾ᳚ನಂ॒-ವಁಸ್ವಃ॑ ಸ್ವ॒ರಾಜಂ᳚ ।
ನ ರಾಧ॑ಸಾ ಮರ್ಧಿಷನ್ನಃ ॥ 4 ॥
ಪ್ರ ಸ್ತೋ᳚ಷ॒ದುಪ॑ ಗಾಸಿಷ॒ಚ್ಛ್ರವ॒ತ್ಸಾಮ॑ ಗೀ॒ಯಮಾ᳚ನಮ್ ।
ಅ॒ಭಿರಾಧ॑ಸಾಜುಗುರತ್ ॥ 5 ॥
ಆ ನೋ᳚ ಭರ॒ ದಕ್ಷಿ॑ಣೇನಾ॒ಭಿ ಸ॒ವ್ಯೇನ॒ ಪ್ರ ಮೃ॑ಶ ।
ಇಂದ್ರ॒ ಮಾನೋ॒ ವಸೋ॒ರ್ನಿರ್ಭಾ᳚ಕ್ ॥ 6 ॥
ಉಪ॑ಕ್ರಮ॒ಸ್ವಾ ಭ॑ರ ಧೃಷ॒ತಾ ಧೃ॑ಷ್ಣೋ॒ ಜನಾ᳚ನಾಮ್ ।
ಅದಾ᳚ಶೂಷ್ಟರಸ್ಯ॒ ವೇದಃ॑ ॥ 7 ॥
ಇಂದ್ರ॒ ಯ ಉ॒ ನು ತೇ॒ ಅಸ್ತಿ॒ ವಾಜೋ॒ ವಿಪ್ರೇ᳚ಭಿಃ॒ ಸನಿ॑ತ್ವಃ ।
ಅ॒ಸ್ಮಾಭಿಃ॒ ಸುತಂ ಸ॑ನುಹಿ ॥ 8 ॥
ಸ॒ದ್ಯೋ॒ಜುವ॑ಸ್ತೇ॒ ವಾಜಾ᳚ ಅ॒ಸ್ಮಭ್ಯಂ᳚-ವಿಁ॒ಶ್ವಶ್ಚಂ᳚ದ್ರಾಃ ।
ವಶೈ᳚ಶ್ಚ ಮ॒ಕ್ಷೂ ಜ॑ರಂತೇ ॥ 9 ॥
ಗ॒ಣಾನಾಂ᳚ ತ್ವಾ ಗ॒ಣಪ॑ತಿಂ ಹವಾಮಹೇ
ಕ॒ವಿಂ ಕ॑ವೀ॒ನಾಮು॑ಪ॒ಮಶ್ರ॑ವಸ್ತಮಮ್ ।
ಜ್ಯೇ॒ಷ್ಠ॒ರಾಜಂ॒ ಬ್ರಹ್ಮ॑ಣಾಂ ಬ್ರಹ್ಮಣಸ್ಪತ॒
ಆ ನಃ॑ ಶೃ॒ಣ್ವನ್ನೂ॒ತಿಭಿ॑ಸ್ಸೀದ॒ ಸಾದ॑ನಮ್ ॥ 10 ॥
ನಿ ಷು ಸೀ᳚ದ ಗಣಪತೇ ಗ॒ಣೇಷು॒ ತ್ವಾಮಾ᳚ಹು॒ರ್ವಿಪ್ರ॑ತಮಂ ಕವೀ॒ನಾಮ್ ।
ನ ಋ॒ತೇ ತ್ವತ್ಕ್ರಿ॑ಯತೇ॒ ಕಿಂ ಚ॒ನಾರೇ ಮ॒ಹಾಮ॒ರ್ಕಂ ಮ॑ಘವಂಚಿ॒ತ್ರಮ॑ರ್ಚ ॥ 11 ॥
ಅ॒ಭಿ॒ಖ್ಯಾನೋ᳚ ಮಘವ॒ನ್ನಾಧ॑ಮಾನಾಂ॒ತ್ಸಖೇ᳚ ಬೋ॒ಧಿ ವ॑ಸುಪತೇ॒ ಸಖೀ᳚ನಾಮ್ ।
ರಣಂ᳚ ಕೃಧಿ ರಣಕೃತ್ಸತ್ಯಶು॒ಷ್ಮಾಭ॑ಕ್ತೇ ಚಿ॒ದಾ ಭ॑ಜಾ ರಾ॒ಯೇ ಅ॒ಸ್ಮಾನ್ ॥ 12 ॥
