ପଠତ ସଂସ୍କୃତମ୍, ଵଦତ ସଂସ୍କୃତଂ
ଲସତୁ ସଂସ୍କୃତଂ ଚିରଂ ଗୃହେ ଗୃହେ ଚ ପୁନରପି ॥ ପଠତ ॥

ଜ୍ଞାନଵୈଭଵଂ ଵେଦଵାଙ୍ମୟଂ
ଲସତି ୟତ୍ର ଭଵଭୟାପହାରି ମୁନିଭିରାର୍ଜିତମ୍ ।
କୀର୍ତିରାର୍ଜିତା ୟସ୍ୟ ପ୍ରଣୟନାତ୍
ଵ୍ୟାସ-ଭାସ-କାଲିଦାସ-ବାଣ-ମୁଖ୍ୟକଵିଭିଃ ॥ 1॥

ସ୍ଥାନମୂର୍ଜିତଂ ୟସ୍ୟ ମନ୍ଵତେ
ଵାଗ୍ଵିଚିଂତକା ହି ଵାକ୍ଷୁ ୟସ୍ୟ ଵୀକ୍ଷ୍ୟ ମଧୁରତାମ୍ ।
ୟଦ୍ଵିନା ଜନା ନୈଵ ଜାନତେ
ଭାରତୀୟସଂସ୍କୃତିଂ ସନାତନାଭିଧାଂ ଵରାମ୍ ॥ 2॥

ଜୟତୁ ସଂସ୍କୃତମ୍, ସଂସ୍କୃତିସ୍ତଥା
ସଂସ୍କୃତସ୍ୟ ସଂସ୍କୃତେଶ୍ଚ ପ୍ରଣୟନାଚ୍ଚ ମନୁକୁଲମ୍ ।
ଜୟତୁ ସଂସ୍କୃତମ୍, ଜୟତୁ ମନୁକୁଲଂ
ଜୟତୁ ଜୟତୁ ସଂସ୍କୃତମ୍, ଜୟତୁ ଜୟତୁ ମନୁକୁଲମ୍ ॥ 3॥

ରଚନ: ମଂଜୁନାଥଶର୍ମା