ମୃଦପି ଚ ଚଂଦନମସ୍ମିନ୍ ଦେଶେ ଗ୍ରାମୋ ଗ୍ରାମଃ ସିଦ୍ଧଵନମ୍ ।
ୟତ୍ର ଚ ବାଲା ଦେଵୀସ୍ଵରୂପା ବାଲାଃ ସର୍ଵେ ଶ୍ରୀରାମାଃ ॥

ହରିମଂଦିରମିଦମଖିଲଶରୀରଂ
ଧନଶକ୍ତୀ ଜନସେଵାୟୈ
ୟତ୍ର ଚ କ୍ରୀଡାୟୈ ଵନରାଜଃ
ଧେନୁର୍ମାତା ପରମଶିଵା
ନିତ୍ୟଂ ପ୍ରାତଃ ଶିଵଗୁଣଗାନଂ
ଦୀପନୁତିଃ ଖଲୁ ଶତ୍ରୁପରା ॥ 1 ॥

ଭାଗ୍ୟଵିଧାୟି ନିଜାର୍ଜିତକର୍ମ
ୟତ୍ର ଶ୍ରମଃ ଶ୍ରିୟମର୍ଜୟତି
ତ୍ୟାଗଧନାନାଂ ତପୋନିଧୀନାଂ
ଗାଥାଂ ଗାୟତି କଵିଵାଣୀ
ଗଂଗାଜଲମିଵ ନିତ୍ୟନିର୍ମଲଂ
ଜ୍ଞାନଂ ଶଂସତି ୟତିଵାଣୀ ॥ 2 ॥

ୟତ୍ର ହି ନୈଵ ସ୍ଵଦେହଵିମୋହଃ
ୟୁଦ୍ଧରତାନାଂ ଵୀରାଣାଂ
ୟତ୍ର ହି କୃଷକଃ କାର୍ୟରତଃ ସନ୍
ପଶ୍ୟତି ଜୀଵନସାଫଲ୍ୟଂ
ଜୀଵନଲକ୍ଷ୍ୟଂ ନ ହି ଧନପଦଵୀ
ୟତ୍ର ଚ ପରଶିଵପଦସେଵା ॥ 3 ॥

ରଚନ: ଶ୍ରୀ ଜନାର୍ଦନ ହେଗ୍ଡେ