గిరితనయాసుత గాఙ్గపయోదిత గన్ధసువాసిత బాలతనో
గుణగణభూషణ కోమలభాషణ క్రౌఞ్చవిదారణ కున్దతనో ।
గజముఖసోదర దుర్జయదానవసఙ్ఘవినాశక దివ్యతనో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 1 ॥

ప్రతిగిరిసంస్థిత భక్తహృదిస్థిత పుత్రధనప్రద రమ్యతనో
భవభయమోచక భాగ్యవిధాయక భూసుతవార సుపూజ్యతనో ।
బహుభుజశోభిత బన్ధవిమోచక బోధఫలప్రద బోధతనో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 2 ॥

శమధనమానిత మౌనిహృదాలయ మోక్షకృదాలయ ముగ్ధతనో
శతమఖపాలక శఙ్కరతోషక శఙ్ఖసువాదక శక్తితనో ।
దశశతమన్మథ సన్నిభసున్దర కుణ్డలమణ్డిత కర్ణవిభో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 3 ॥

గుహ తరుణారుణచేలపరిష్కృత తారకమారక మారతనో
జలనిధితీరసుశోభివరాలయ శఙ్కరసన్నుత దేవగురో ।
విహితమహాధ్వరసామనిమన్త్రిత సౌమ్యహృదన్తర సోమతనో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 4 ॥

లవలికయా సహ కేలికలాపర దేవసుతార్పిత మాల్యతనో
గురుపదసంస్థిత శఙ్కరదర్శిత తత్త్వమయప్రణవార్థవిభో ।
విధిహరిపూజిత బ్రహ్మసుతార్పిత భాగ్యసుపూరక యోగితనో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 5 ॥

కలిజనపాలన కఞ్జసులోచన కుక్కుటకేతన కేలితనో
కృతబలిపాలన బర్హిణవాహన ఫాలవిలోచనశమ్భుతనో ।
శరవణసమ్భవ శత్రునిబర్హణ చన్ద్రసమానన శర్మతనో
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 6 ॥

సుఖదమనన్తపదాన్విత రామసుదీక్షిత సత్కవిపద్యమిదం
శరవణ సమ్భవ తోషదమిష్టదమష్టసుసిద్ధిదమార్తిహరమ్ ।
పఠతి శృణోతి చ భక్తియుతో యది భాగ్యసమృద్ధిమథో లభతే
జయ జయ హే గుహ షణ్ముఖ సున్దర దేహి రతిం తవ పాదయుగే ॥ 7 ॥

ఇతి శ్రీఅనన్తరామదీక్షిత కృతం షణ్ముఖ షట్కమ్ ॥