శివయోస్తనుజాయాస్తు శ్రితమన్దారశాఖినే ।
శిఖివర్యతురఙ్గాయ సుబ్రహ్మణ్యాయ మఙ్గళమ్ ॥ 1 ॥

భక్తాభీష్టప్రదాయాస్తు భవరోగవినాశినే ।
రాజరాజాదివన్ద్యాయ రణధీరాయ మఙ్గళమ్ ॥ 2 ॥

శూరపద్మాదిదైతేయతమిస్రకులభానవే ।
తారకాసురకాలాయ బాలకాయాస్తు మఙ్గళమ్ ॥ 3 ॥

వల్లీవదనరాజీవ మధుపాయ మహాత్మనే ।
ఉల్లసన్మణికోటీరభాసురాయాస్తు మఙ్గళమ్ ॥ 4 ॥

కన్దర్పకోటిలావణ్యనిధయే కామదాయినే ।
కులిశాయుధహస్తాయ కుమారాయాస్తు మఙ్గళమ్ ॥ 5 ॥

ముక్తాహారలసత్కణ్ఠరాజయే ముక్తిదాయినే ।
దేవసేనాసమేతాయ దైవతాయాస్తు మఙ్గళమ్ ॥ 6 ॥

కనకామ్బరసంశోభికటయే కలిహారిణే ।
కమలాపతివన్ద్యాయ కార్తికేయాయ మఙ్గళమ్ ॥ 7 ॥

శరకాననజాతాయ శూరాయ శుభదాయినే ।
శీతభానుసమాస్యాయ శరణ్యాయాస్తు మఙ్గళమ్ ॥ 8 ॥

మఙ్గళాష్టకమేతద్యే మహాసేనస్య మానవాః ।
పఠన్తీ ప్రత్యహం భక్త్యా ప్రాప్నుయుస్తే పరాం శ్రియమ్ ॥ 9 ॥

ఇతి శ్రీ సుబ్రహ్మణ్య మఙ్గళాష్టకమ్ ।