దేవి త్వాం స్తోతుమిచ్ఛామి సాధ్వీనాం ప్రవరాం పరామ్ ।
పరాత్పరాం చ పరమాం న హి స్తోతుం క్షమోఽధునా ॥ 1 ॥

స్తోత్రాణాం లక్షణం వేదే స్వభావాఖ్యానతః పరమ్ ।
న క్షమః ప్రకృతిం వక్తుం గుణానాం తవ సువ్రతే ॥ 2 ॥

శుద్ధసత్త్వస్వరూపా త్వం కోపహింసావివర్జితా ।
న చ శప్తో మునిస్తేన త్యక్తయా చ త్వయా యతః ॥ 3 ॥

త్వం మయా పూజితా సాధ్వీ జననీ చ యథాఽదితిః ।
దయారూపా చ భగినీ క్షమారూపా యథా ప్రసూః ॥ 4 ॥

త్వయా మే రక్షితాః ప్రాణా పుత్రదారాః సురేశ్వరి ।
అహం కరోమి త్వాం పూజ్యాం మమ ప్రీతిశ్చ వర్ధతే ॥ 5 ॥

నిత్యం యద్యపి పూజ్యా త్వం భవేఽత్ర జగదమ్బికే ।
తథాపి తవ పూజాం వై వర్ధయామి పునః పునః ॥ 6 ॥

యే త్వామాషాఢసఙ్క్రాన్త్యాం పూజయిష్యన్తి భక్తితః ।
పఞ్చమ్యాం మనసాఖ్యాయాం మాసాన్తే వా దినే దినే ॥ 7 ॥

పుత్రపౌత్రాదయస్తేషాం వర్ధన్తే చ ధనాని చ ।
యశస్వినః కీర్తిమన్తో విద్యావన్తో గుణాన్వితాః ॥ 8 ॥

యే త్వాం న పూజయిష్యన్తి నిన్దన్త్యజ్ఞానతో జనాః ।
లక్ష్మీహీనా భవిష్యన్తి తేషాం నాగభయం సదా ॥ 9 ॥

త్వం స్వర్గలక్ష్మీః స్వర్గే చ వైకుణ్ఠే కమలాకలా ।
నారాయణాంశో భగవాన్ జరత్కారుర్మునీశ్వరః ॥ 10 ॥

తపసా తేజసా త్వాం చ మనసా ససృజే పితా ।
అస్మాకం రక్షణాయైవ తేన త్వం మనసాభిధా ॥ 11 ॥

మనసా దేవి తు శక్తా చాత్మనా సిద్ధయోగినీ ।
తేన త్వం మనసాదేవీ పూజితా వన్దితా భవే ॥ 12 ॥

యాం భక్త్యా మనసా దేవాః పూజయన్త్యనిశం భృశమ్ ।
తేన త్వాం మనసాదేవీం ప్రవదన్తి పురావిదః ॥ 13 ॥

సత్త్వరూపా చ దేవీ త్వం శశ్వత్సత్త్వనిషేవయా ।
యో హి యద్భావయేన్నిత్యం శతం ప్రాప్నోతి తత్సమమ్ ॥ 14 ॥

ఇదం స్తోత్రం పుణ్యబీజం తాం సమ్పూజ్య చ యః పఠేత్ ।
తస్య నాగభయం నాస్తి తస్య వంశోద్భవస్య చ ॥ 15 ॥

విషం భవేత్సుధాతుల్యం సిద్ధస్తోత్రం యదా పఠేత్ ।
పఞ్చలక్షజపేనైవ సిద్ధస్తోత్రో భవేన్నరః ।
సర్పశాయీ భవేత్సోఽపి నిశ్చితం సర్పవాహనః ॥ 16 ॥

ఇతి శ్రీబ్రహ్మవైవర్తే మహాపురాణే ప్రకృతిఖణ్డే షట్చత్వారింశోఽధ్యాయే మహేన్ద్ర కృత శ్రీ మనసాదేవీ స్తోత్రమ్ ॥

ఆస్తీకముని మన్త్రః
సర్పాపసర్ప భద్రం తే గచ్ఛ సర్ప మహావిష ।
జనమేజయస్య యజ్ఞాన్తే ఆస్తీకవచనం స్మర ॥