స్ఫురద్విద్యుద్వల్లీవలయితమగోత్సఙ్గవసతిం
భవాప్పిత్తప్లుష్టానమితకరుణాజీవనవశాత్ ।
అవన్తం భక్తానాముదయకరమమ్భోధర ఇతి
ప్రమోదాదావాసం వ్యతనుత మయూరోఽస్య సవిధే ॥ 1 ॥

సుబ్రహ్మణ్యో యో భవేజ్జ్ఞానశక్త్యా
సిద్ధం తస్మిన్దేవసేనాపతిత్వమ్ ।
ఇత్థం శక్తిం దేవసేనాపతిత్వం
సుబ్రహ్మణ్యో బిభ్రదేష వ్యనక్తి ॥ 2 ॥

పక్షోఽనిర్వచనీయో దక్షిణ ఇతి ధియమశేషజనతాయాః ।
జనయతి బర్హీ దక్షిణనిర్వచనాయోగ్యపక్షయుక్తోఽయమ్ ॥ 3 ॥

యః పక్షమనిర్వచనం యాతి సమవలమ్బ్య దృశ్యతే తేన ।
బ్రహ్మ పరాత్పరమమలం సుబ్రహ్మణ్యాభిధం పరం జ్యోతిః ॥ 4 ॥

షణ్ముఖం హసన్ముఖం సుఖామ్బురాశిఖేలనం
సన్మునీన్ద్రసేవ్యమానపాదపఙ్కజం సదా ।
మన్మథాదిశత్రువర్గనాశకం కృపామ్బుధిం
మన్మహే ముదా హృది ప్రపన్నకల్పభూరుహమ్ ॥ 5 ॥

ఇతి జగద్గురు శృఙ్గేరీపీఠాధిప శ్రీచన్ద్రశేఖరభారతీ శ్రీపాదైః విరచితా శ్రీషణ్ముఖపఞ్చరత్నస్తుతిః ।