హే స్వామినాథార్తబన్ధో ।
భస్మలిప్తాఙ్గ గాఙ్గేయ కారుణ్యసిన్ధో ॥

రుద్రాక్షధారిన్నమస్తే
రౌద్రరోగం హర త్వం పురారేర్గురోర్మే ।
రాకేన్దువక్త్రం భవన్తం
మారరూపం కుమారం భజే కామపూరమ్ ॥ 1 ॥

మాం పాహి రోగాదఘోరాత్
మఙ్గళాపాఙ్గపాతేన భఙ్గాత్స్వరాణామ్ ।
కాలాచ్చ దుష్పాకకూలాత్
కాలకాలస్యసూనుం భజే క్రాన్తసానుమ్ ॥ 2 ॥

బ్రహ్మాదయో యస్య శిష్యాః
బ్రహ్మపుత్రా గిరౌ యస్య సోపానభూతాః ।
సైన్యం సురాశ్చాపి సర్వే
సామవేదాదిగేయం భజే కార్తికేయమ్ ॥ 3 ॥

కాషాయ సంవీత గాత్రం
కామరోగాది సంహారి భిక్షాన్న పాత్రమ్ ।
కారుణ్య సమ్పూర్ణ నేత్రం
శక్తిహస్తం పవిత్రం భజే శమ్భుపుత్రమ్ ॥ 4 ॥

శ్రీస్వామి శైలే వసన్తం
సాధుసఙ్ఘస్య రోగాన్ సదా సంహరన్తమ్ ।
ఓఙ్కారతత్త్వం వదన్తం
శమ్భుకర్ణే హసన్తం భజేఽహం శిశుం తమ్ ॥ 5 ॥

స్తోత్రం కృతం చిత్రచిత్రం
దీక్షితానన్తరామేణ సర్వార్థసిద్ధ్యై ।
భక్త్యా పఠేద్యః ప్రభాతే
దేవదేవప్రసాదాత్ లభేతాష్టసిద్ధిమ్ ॥ 6 ॥

ఇతి శ్రీఅనన్తరామదీక్షితర్ కృతం శ్రీ స్వామినాథ పఞ్చకమ్ ।