අථ ද්විතීයෝऽධ්යායඃ ॥
ධ්යානං ශ්රුණු මහාදේවි සර්වානංදප්රදායකම් ।
සර්වසෞඛ්යකරං චෛව භුක්තිමුක්තිප්රදායකම් ॥ 109 ॥
ශ්රීමත්පරං බ්රහ්ම ගුරුං ස්මරාමි
ශ්රීමත්පරං බ්රහ්ම ගුරුං භජාමි ।
ශ්රීමත්පරං බ්රහ්ම ගුරුං වදාමි
ශ්රීමත්පරං බ්රහ්ම ගුරුං නමාමි ॥ 110 ॥
බ්රහ්මානංදං පරමසුඛදං කේවලං ජ්ඤානමූර්තිං
ද්වංද්වාතීතං ගගනසදෘශං තත්ත්වමස්යාදිලක්ෂ්යම් ।
ඒකං නිත්යං විමලමචලං සර්වධීසාක්ෂිභූතං
භාවාතීතං ත්රිගුණරහිතං සද්ගුරුං තං නමාමි ॥ 111 ॥
හෘදංබුජේ කර්ණිකමධ්යසංස්ථේ
සිංහාසනේ සංස්ථිතදිව්යමූර්තිම් ।
ධ්යායේද්ගුරුං චංද්රකලාප්රකාශං
සච්චිත්සුඛාභීෂ්ටවරං දධානම් ॥ 112 ॥
ශ්වේතාංබරං ශ්වේතවිලේපපුෂ්පං
මුක්තාවිභූෂං මුදිතං ද්විනේත්රම් ।
වාමාංකපීඨස්ථිතදිව්යශක්තිං
මංදස්මිතං පූර්ණකෘපානිධානම් ॥ 113 ॥
ආනංදමානංදකරං ප්රසන්නං
ජ්ඤානස්වරූපං නිජභාවයුක්තම් ।
යෝගීංද්රමීඩ්යං භවරෝගවෛද්යං
ශ්රීමද්ගුරුං නිත්යමහං නමාමි ॥ 114 ॥
වංදේ ගුරූණාං චරණාරවිංදං
සංදර්ශිතස්වාත්මසුඛාවබෝධේ ।
ජනස්ය යේ ජාංගලිකායමානේ
සංසාරහාලාහලමෝහශාංත්යෛ ॥ 115 ॥
යස්මින් සෘෂ්ටිස්ථිතිධ්වංසනිග්රහානුග්රහාත්මකම් ।
කෘත්යං පංචවිධං ශශ්වත් භාසතේ තං ගුරුං භජේත් ॥ 116 ॥
පාදාබ්ජේ සර්වසංසාරදාවකාලානලං ස්වකේ ।
බ්රහ්මරංධ්රේ ස්ථිතාංභෝජමධ්යස්ථං චංද්රමංඩලම් ॥ 117 ॥
අකථාදිත්රිරේඛාබ්ජේ සහස්රදළමංඩලේ ।
හංසපාර්ශ්වත්රිකෝණේ ච ස්මරේත්තන්මධ්යගං ගුරුම් ॥ 118 ॥
නිත්යං ශුද්ධං නිරාභාසං නිරාකාරං නිරංජනම් ।
නිත්යබෝධං චිදානංදං ගුරුං බ්රහ්ම නමාම්යහම් ॥ 119 ॥
සකලභුවනසෘෂ්ටිඃ කල්පිතාශේෂසෘෂ්ටිඃ
නිඛිලනිගමදෘෂ්ටිඃ සත්පදාර්ථෛකසෘෂ්ටිඃ ।
අතද්ගණපරමේෂ්ටිඃ සත්පදාර්ථෛකදෘෂ්ටිඃ
භවගුණපරමේෂ්ටිර්මෝක්ෂමාර්ගෛකදෘෂ්ටිඃ ॥ 120 ॥
සකලභුවනරංගස්ථාපනාස්තංභයෂ්ටිඃ
සකරුණරසවෘෂ්ටිස්තත්ත්වමාලාසමෂ්ටිඃ ।
සකලසමයසෘෂ්ටිස්සච්චිදානංදදෘෂ්ටිඃ
නිවසතු මයි නිත්යං ශ්රීගුරෝර්දිව්යදෘෂ්ටිඃ ॥ 121 ॥
න ගුරෝරධිකං න ගුරෝරධිකං
න ගුරෝරධිකං න ගුරෝරධිකම් ।
ශිවශාසනතඃ ශිවශාසනතඃ
ශිවශාසනතඃ ශිවශාසනතඃ ॥ 122 ॥
ඉදමේව ශිවං ඉදමේව ශිවං
ඉදමේව ශිවං ඉදමේව ශිවම් ।
හරිශාසනතෝ හරිශාසනතෝ
හරිශාසනතෝ හරිශාසනතඃ ॥ 123 ॥
විදිතං විදිතං විදිතං විදිතං
විජනං විජනං විජනං විජනම් ।
විධිශාසනතෝ විධිශාසනතෝ
විධිශාසනතෝ විධිශාසනතඃ ॥ 124 ॥
ඒවංවිධං ගුරුං ධ්යාත්වා ජ්ඤානමුත්පද්යතේ ස්වයම් ।
තදා ගුරූපදේශේන මුක්තෝऽහමිති භාවයේත් ॥ 125 ॥
ගුරූපදිෂ්ටමාර්ගේණ මනශ්ශුද්ධිං තු කාරයේත් ।
අනිත්යං ඛංඩයේත්සර්වං යත්කිංචිදාත්මගෝචරම් ॥ 126 ॥
ජ්ඤේයං සර්වං ප්රතීතං ච ජ්ඤානං ච මන උච්යතේ ।
ජ්ඤානං ජ්ඤේයං සමං කුර්යාන්නාන්යඃ පංථා ද්විතීයකඃ ॥ 127 ॥
කිමත්ර බහුනෝක්තේන ශාස්ත්රකෝටිශතෛරපි ।
දුර්ලභා චිත්තවිශ්රාංතිඃ විනා ගුරුකෘපාං පරාම් ॥ 128 ॥
කරුණාඛඩ්ගපාතේන ඡිත්වා පාශාෂ්ටකං ශිශෝඃ ।
සම්යගානංදජනකඃ සද්ගුරුඃ සෝऽභිධීයතේ ॥ 129 ॥
ඒවං ශ්රුත්වා මහාදේවි ගුරුනිංදාං කරෝති යඃ ।
ස යාති නරකාන් ඝෝරාන් යාවච්චංද්රදිවාකරෞ ॥ 130 ॥
යාවත්කල්පාංතකෝ දේහස්තාවද්දේවි ගුරුං ස්මරේත් ।
ගුරුලෝපෝ න කර්තව්යඃ ස්වච්ඡංදෝ යදි වා භවේත් ॥ 131 ॥
හුංකාරේණ න වක්තව්යං ප්රාජ්ඤශිෂ්යෛඃ කදාචන ।
ගුරෝරග්ර න වක්තව්යමසත්යං තු කදාචන ॥ 132 ॥
ගුරුං ත්වංකෘත්ය හුංකෘත්ය ගුරුසාන්නිධ්යභාෂණඃ ।
අරණ්යේ නිර්ජලේ දේශේ සංභවේද් බ්රහ්මරාක්ෂසඃ ॥ 133 ॥
අද්වෛතං භාවයේන්නිත්යං සර්වාවස්ථාසු සර්වදා ।
කදාචිදපි නෝ කුර්යාදද්වෛතං ගුරුසන්නිධෞ ॥ 134 ॥
දෘශ්යවිස්මෘතිපර්යංතං කුර්යාද් ගුරුපදාර්චනම් ।
තාදෘශස්යෛව කෛවල්යං න ච තද්ව්යතිරේකිණඃ ॥ 135 ॥
අපි සංපූර්ණතත්ත්වජ්ඤෝ ගුරුත්යාගී භවේද්යදා ।
භවත්යේව හි තස්යාංතකාලේ වික්ෂේපමුත්කටම් ॥ 136 ॥
ගුරුකාර්යං න ලංඝේත නාපෘෂ්ට්වා කාර්යමාචරේත් ।
න හ්යුත්තිෂ්ඨේද්දිශේऽනත්වා ගුරුසද්භාවශෝභිතඃ ॥ 137 ॥
ගුරෞ සති ස්වයං දේවි පරේෂාං තු කදාචන ।
උපදේශං න වෛ කුර්යාත් තථා චේද්රාක්ෂසෝ භවේත් ॥ 138 ॥
න ගුරෝරාශ්රමේ කුර්යාත් දුෂ්පානං පරිසර්පණම් ।
දීක්ෂා ව්යාඛ්යා ප්රභුත්වාදි ගුරෝරාජ්ඤාං න කාරයේත් ॥ 139 ॥
නෝපාශ්රයං ච පර්යකං න ච පාදප්රසාරණම් ।
නාංගභෝගාදිකං කුර්යාන්න ලීලාමපරාමපි ॥ 140 ॥
ගුරූණාං සදසද්වාऽපි යදුක්තං තන්න ලංඝයේත් ।
කුර්වන්නාජ්ඤාං දිවා රාත්රෞ දාසවන්නිවසේද්ගුරෝ ॥ 141 ॥
අදත්තං න ගුරෝර්ද්රව්යමුපභුංජීත කර්හිචිත් ।
දත්තේ ච රංකවද්ග්රාහ්යං ප්රාණෝऽප්යේතේන ලභ්යතේ ॥ 142 ॥
පාදුකාසනශය්යාදි ගුරුණා යදභීෂ්ටිතම් ।
නමස්කුර්වීත තත්සර්වං පාදාභ්යාං න ස්පෘශේත් ක්වචිත් ॥ 143 ॥
ගච්ඡතඃ පෘෂ්ඨතෝ ගච්ඡේත් ගුරුච්ඡායාං න ලංඝයේත් ।
නෝල්බණං ධාරයේද්වේෂං නාලංකාරාංස්තතෝල්බණාන් ॥ 144 ॥
ගුරුනිංදාකරං දෘෂ්ට්වා ධාවයේදථ වාසයේත් ।
ස්ථානං වා තත්පරිත්යාජ්යං ජිහ්වාච්ඡේදාක්ෂමෝ යදි ॥ 145 ॥
නෝච්ඡිෂ්ටං කස්යචිද්දේයං ගුරෝරාජ්ඤාං න ච ත්යජේත් ।
කෘත්ස්නමුච්ඡිෂ්ටමාදාය හවිරිව භක්ෂයේත්ස්වයම් ॥ 146 ॥
නාऽනෘතං නාऽප්රියං චෛව න ගර්වං නාऽපි වා බහු ।
න නියෝගපරං බ්රූයාත් ගුරෝරාජ්ඤාං විභාවයේත් ॥ 147 ॥
ප්රභෝ දේවකුලේශානාං ස්වාමින් රාජන් කුලේශ්වර ।
ඉති සංබෝධනෛර්භීතෝ ගුරුභාවේන සර්වදා ॥ 148 ॥
මුනිභිඃ පන්නගෛර්වාපි සුරෛර්වා ශාපිතෝ යදි ।
කාලමෘත්යුභයාද්වාපි ගුරුඃ සංත්රාති පාර්වති ॥ 149 ॥
අශක්තා හි සුරාද්යාශ්ච හ්යශක්තාඃ මුනයස්තථා ।
ගුරුශාපෝපපන්නස්ය රක්ෂණාය ච කුත්රචිත් ॥ 150 ॥
මංත්රරාජමිදං දේවි ගුරුරිත්යක්ෂරද්වයම් ।
ස්මෘතිවේදපුරාණානාං සාරමේව න සංශයඃ ॥ 151 ॥
සත්කාරමානපූජාර්ථං දංඩකාෂයධාරණඃ ।
ස සන්න්යාසී න වක්තව්යඃ සන්න්යාසී ජ්ඤානතත්පරඃ ॥ 152 ॥
විජානංති මහාවාක්යං ගුරෝශ්චරණ සේවයා ।
තේ වෛ සන්න්යාසිනඃ ප්රෝක්තා ඉතරේ වේෂධාරිණඃ ॥ 153 ॥
[පාඨභේදඃ –
නිත්යං බ්රහ්ම නිරාකාරං නිර්ගුණං බෝධයේත්පරම් ।
භාසයන් බ්රහ්මභාවං ච දීපෝ දීපාංතරං යථා ॥
]
නිත්යං බ්රහ්ම නිරාකාරං නිර්ගුණං සත්යචිද්ධනම් ।
යඃ සාක්ෂාත්කුරුතේ ලෝකේ ගුරුත්වං තස්ය ශෝභතේ ॥ 154 ॥
ගුරුප්රසාදතඃ ස්වාත්මන්යාත්මාරාමනිරීක්ෂණාත් ।
සමතා මුක්තිමාර්ගේණ ස්වාත්මජ්ඤානං ප්රවර්තතේ ॥ 155 ॥
ආබ්රහ්මස්තංබපර්යංතං පරමාත්මස්වරූපකම් ।
ස්ථාවරං ජංගමං චෛව ප්රණමාමි ජගන්මයම් ॥ 156 ॥
වංදේऽහං සච්චිදානංදං භාවාතීතං ජගද්ගුරුම් ।
නිත්යං පූර්ණං නිරාකාරං නිර්ගුණං ස්වාත්මසංස්ථිතම් ॥ 157 ॥
පරාත්පරතරං ධ්යායේන්නිත්යමානංදකාරකම් ।
හෘදයාකාශමධ්යස්ථං ශුද්ධස්ඵටිකසන්නිභම් ॥ 158 ॥
ස්ඵාටිකේ ස්ඵාටිකං රූපං දර්පණේ දර්පණෝ යථා ।
තථාऽऽත්මනි චිදාකාරමානංදං සෝऽහමිත්යුත ॥ 159 ॥
අංගුෂ්ඨමාත්රං පුරුෂං ධ්යායේච්ච චින්මයං හෘදි ।
තත්ර ස්ඵුරති යෝ භාවඃ ශෘණු තත්කථයාමි තේ ॥ 160 ॥
අජෝऽහමමරෝऽහං ච අනාදිනිධනෝ හ්යහම් ।
අවිකාරශ්චිදානංදෝ හ්යණීයාන්මහතෝ මහාන් ॥ 161 ॥
අපූර්වමපරං නිත්යං ස්වයංජ්යෝතිර්නිරාමයම් ।
විරජං පරමාකාශං ධ්රුවමානංදමව්යයම් ॥ 162 ॥
අගෝචරං තථාऽගම්යං නාමරූපවිවර්ජිතම් ।
නිශ්ශබ්දං තු විජානීයාත්ස්වභාවාද්බ්රහ්ම පාර්වති ॥ 163 ॥
යථා ගංධස්වභාවත්වං කර්පූරකුසුමාදිෂු ।
ශීතෝෂ්ණත්වස්වභාවත්වං තථා බ්රහ්මණි ශාශ්වතම් ॥ 164 ॥
යථා නිජස්වභාවේන කුංඩලේ කටකාදයඃ ।
සුවර්ණත්වේන තිෂ්ඨංති තථාऽහං බ්රහ්ම ශාශ්වතම් ॥ 165 ॥
ස්වයං තථාවිධෝ භූත්වා ස්ථාතව්යං යත්ර කුත්ර චිත් ।
කීටෝ භෘංග ඉව ධ්යානාද්යථා භවති තාදෘශඃ ॥ 166 ॥
ගුරුධ්යානං තථා කෘත්වා ස්වයං බ්රහ්මමයෝ භවේත් ।
පිංඩේ පදේ තථා රූපේ මුක්තාස්තේ නාත්ර සංශයඃ ॥ 167 ॥
ශ්රීපාර්වතී උවාච ।
පිංඩං කිං තු මහාදේව පදං කිං සමුදාහෘතම් ।
රූපාතීතං ච රූපං කිං ඒතදාඛ්යාහි ශංකර ॥ 168 ॥
ශ්රීමහාදේව උවාච ।
පිංඩං කුංඩලිනී ශක්තිඃ පදං හංසමුදාහෘතම් ।
රූපං බිංදුරිති ජ්ඤේයං රූපාතීතං නිරංජනම් ॥ 169 ॥
පිංඩේ මුක්තාඃ පදේ මුක්තා රූපේ මුක්තා වරානනේ ।
රූපාතීතේ තු යේ මුක්තාස්තේ මුක්තා නාऽත්ර සංශයඃ ॥ 170 ॥
ගුරුර්ධ්යානේනෛව නිත්යං දේහී බ්රහ්මමයෝ භවේත් ।
ස්ථිතශ්ච යත්ර කුත්රාऽපි මුක්තෝऽසෞ නාऽත්ර සංශයඃ ॥ 171 ॥
ජ්ඤානං වෛරාග්යමෛශ්වර්යං යශශ්රීඃ ස්වමුදාහෘතම් ।
ෂඩ්ගුණෛශ්වර්යයුක්තෝ හි භගවාන් ශ්රීගුරුඃ ප්රියේ ॥ 172 ॥
ගුරුශ්ශිවෝ ගුරුර්දේවෝ ගුරුර්බංධුඃ ශරීරිණාම් ।
ගුරුරාත්මා ගුරුර්ජීවෝ ගුරෝරන්යන්න විද්යතේ ॥ 173 ॥
ඒකාකී නිස්ස්පෘහඃ ශාංතශ්චිංතාऽසූයාදිවර්ජිතඃ ।
බාල්යභාවේන යෝ භාති බ්රහ්මජ්ඤානී ස උච්යතේ ॥ 174 ॥
න සුඛං වේදශාස්ත්රේෂු න සුඛං මංත්රයංත්රකේ ।
ගුරෝඃ ප්රසාදාදන්යත්ර සුඛං නාස්ති මහීතලේ ॥ 175 ॥
චාර්වාකවෛෂ්ණවමතේ සුඛං ප්රාභාකරේ න හි ।
ගුරෝඃ පාදාංතිකේ යද්වත්සුඛං වේදාංතසම්මතම් ॥ 176 ॥
න තත්සුඛං සුරේංද්රස්ය න සුඛං චක්රවර්තිනාම් ।
යත්සුඛං වීතරාගස්ය මුනේරේකාංතවාසිනඃ ॥ 177 ॥
නිත්යං බ්රහ්මරසං පීත්වා තෘප්තෝ යඃ පරමාත්මනි ।
ඉංද්රං ච මන්යතේ තුච්ඡං නෘපාණාං තත්ර කා කථා ॥ 178 ॥
යතඃ පරමකෛවල්යං ගුරුමාර්ගේණ වෛ භවේත් ।
ගුරුභක්තිරතඃ කාර්යා සර්වදා මෝක්ෂකාංක්ෂිභිඃ ॥ 179 ॥
ඒක ඒවාऽද්විතීයෝऽහං ගුරුවාක්යේන නිශ්චිතඃ ।
ඒවමභ්යස්යතා නිත්යං න සේව්යං වෛ වනාංතරම් ॥ 180 ॥
අභ්යාසාන්නිමිෂේණෛව සමාධිමධිගච්ඡති ।
ආජන්මජනිතං පාපං තත්ක්ෂණාදේව නශ්යති ॥ 181 ॥
කිමාවාහනමව්යක්තේ ව්යාපකේ කිං විසර්ජනම් ।
අමූර්තේ ච කථං පූජා කථං ධ්යානං නිරාමයේ ॥ 182 ॥
ගුරුර්විෂ්ණුඃ සත්ත්වමයෝ රාජසශ්චතුරානනඃ ।
තාමසෝ රුද්රරූපේණ සෘජත්යවති හංති ච ॥ 183 ॥
ස්වයං බ්රහ්මමයෝ භූත්වා තත්පරං චාවලෝකයේත් ।
පරාත්පරතරං නාන්යත් සර්වගං තන්නිරාමයම් ॥ 184 ॥
තස්යාවලෝකනං ප්රාප්ය සර්වසංගවිවර්ජිතඃ ।
ඒකාකී නිස්ස්පෘහඃ ශාංතඃ ස්ථාතව්යං තත්ප්රසාදතඃ ॥ 185 ॥
ලබ්ධං වාऽථ න ලබ්ධං වා ස්වල්පං වා බහුළං තථා ।
නිෂ්කාමේනෛව භෝක්තව්යං සදා සංතුෂ්ටමානසඃ ॥ 186 ॥
සර්වජ්ඤපදමිත්යාහුර්දේහී සර්වමයෝ භුවි ।
සදාऽऽනංදඃ සදා ශාංතෝ රමතේ යත්ර කුත්ර චිත් ॥ 187 ॥
යත්රෛව තිෂ්ඨතේ සෝऽපි ස දේශඃ පුණ්යභාජනඃ ।
මුක්තස්ය ලක්ෂණං දේවි තවාऽග්රේ කථිතං මයා ॥ 188 ॥
උපදේශස්ත්වයං දේවි ගුරුමාර්ගේණ මුක්තිදඃ ।
ගුරුභක්තිඃ තථාऽත්යංතා කර්තව්යා වෛ මනීෂිභිඃ ॥ 189 ॥
නිත්යයුක්තාශ්රයඃ සර්වවේදකෘත්සර්වවේදකෘත් ।
ස්වපරජ්ඤානදාතා ච තං වංදේ ගුරුමීශ්වරම් ॥ 190 ॥
යද්යප්යධීතා නිගමාඃ ෂඩංගා ආගමාඃ ප්රියේ ।
අධ්යාත්මාදීනි ශාස්ත්රාණි ජ්ඤානං නාස්ති ගුරුං විනා ॥ 191 ॥
ශිවපූජාරතෝ වාऽපි විෂ්ණුපූජාරතෝऽථවා ।
ගුරුතත්ත්වවිහීනශ්චේත්තත්සර්වං ව්යර්ථමේව හි ॥ 192 ॥
ශිවස්වරූපමජ්ඤාත්වා ශිවපූජා කෘතා යදි ।
සා පූජා නාමමාත්රං ස්යාච්චිත්රදීප ඉව ප්රියේ ॥ 193 ॥
සර්වං ස්යාත්සඵලං කර්ම ගුරුදීක්ෂාප්රභාවතඃ ।
ගුරුලාභාත්සර්වලාභෝ ගුරුහීනස්තු බාලිශඃ ॥ 194 ॥
ගුරුහීනඃ පශුඃ කීටඃ පතංගෝ වක්තුමර්හති ।
ශිවරූපං ස්වරූපං ච න ජානාති යතස්ස්වයම් ॥ 195 ॥
තස්මාත්සර්වප්රයත්නේන සර්වසංගවිවර්ජිතඃ ।
විහාය ශාස්ත්රජාලානි ගුරුමේව සමාශ්රයේත් ॥ 196 ॥
නිරස්තසර්වසංදේහෝ ඒකීකෘත්ය සුදර්ශනම් ।
රහස්යං යෝ දර්ශයති භජාමි ගුරුමීශ්වරම් ॥ 197 ॥
ජ්ඤානහීනෝ ගුරුස්ත්යාජ්යෝ මිථ්යාවාදී විඩංබකඃ ।
ස්වවිශ්රාංතිං න ජානාති පරශාංතිං කරෝති කිම් ॥ 198 ॥
ශිලායාඃ කිං පරං ජ්ඤානං ශිලාසංඝප්රතාරණේ ।
ස්වයං තර්තුං න ජානාති පරං නිස්තාරයේත් කථම් ॥ 199 ॥
න වංදනීයාස්තේ කෂ්ටං දර්ශනාද්භ්රාංතිකාරකාඃ ।
වර්ජයේත්තාන් ගුරූන් දූරේ ධීරස්ය තු සමාශ්රයේත් ॥ 200 ॥
පාෂංඩිනඃ පාපරතාඃ නාස්තිකා භේදබුද්ධයඃ ।
ස්ත්රීලංපටා දුරාචාරාඃ කෘතඝ්නා බකවෘත්තයඃ ॥ 201 ॥
කර්මභ්රෂ්ටාඃ ක්ෂමානෂ්ටා නිංද්යතර්කෛශ්ච වාදිනඃ ।
කාමිනඃ ක්රෝධිනශ්චෛව හිංස්රාශ්චංඩාඃ ශඨාස්තථා ॥ 202 ॥
ජ්ඤානලුප්තා න කර්තව්යා මහාපාපාස්තථා ප්රියේ ।
ඒභ්යෝ භින්නෝ ගුරුඃ සේව්යඃ ඒකභක්ත්යා විචාර්ය ච ॥ 203 ॥
ශිෂ්යාදන්යත්ර දේවේශි න වදේද්යස්ය කස්යචිත් ।
නරාණාං ච ඵලප්රාප්තෞ භක්තිරේව හි කාරණම් ॥ 204 ॥
ගූඪෝ දෘඪශ්ච ප්රීතශ්ච මෞනේන සුසමාහිතඃ ।
සකෘත්කාමගතෝ වාऽපි පංචධා ගුරුරීරිතඃ ॥ 205 ॥
සර්වං ගුරුමුඛාල්ලබ්ධං සඵලං පාපනාශනම් ।
යද්යදාත්මහිතං වස්තු තත්තද්ද්රව්යං න වංචයේත් ॥ 206 ॥
ගුරුදේවාර්පණං වස්තු තේන තුෂ්ටෝऽස්මි සුව්රතේ ।
ශ්රීගුරෝඃ පාදුකාං මුද්රාං මූලමංත්රං ච ගෝපයේත් ॥ 207 ॥
නතාऽස්මි තේ නාථ පදාරවිංදං
බුද්ධීංද්රියප්රාණමනෝවචෝභිඃ ।
යච්චිංත්යතේ භාවිත ආත්මයුක්තෞ
මුමුක්ෂිභිඃ කර්මමයෝපශාංතයේ ॥ 208 ॥
අනේන යද්භවේත්කාර්යං තද්වදාමි තව ප්රියේ ।
ලෝකෝපකාරකං දේවි ලෞකිකං තු විවර්ජයේත් ॥ 209 ॥
ලෞකිකාද්ධර්මතෝ යාති ජ්ඤානහීනෝ භවාර්ණවේ ।
ජ්ඤානභාවේ ච යත්සර්වං කර්ම නිෂ්කර්ම ශාම්යති ॥ 210 ॥
ඉමාං තු භක්තිභාවේන පඨේද්වෛ ශෘණුයාදපි ।
ලිඛිත්වා යත්ප්රදානේන තත්සර්වං ඵලමශ්නුතේ ॥ 211 ॥
ගුරුගීතාමිමාං දේවි හෘදි නිත්යං විභාවය ।
මහාව්යාධිගතෛර්දුඃඛෛඃ සර්වදා ප්රජපේන්මුදා ॥ 212 ॥
ගුරුගීතාක්ෂරෛකෛකං මංත්රරාජමිදං ප්රියේ ।
අන්යේ ච විවිධාඃ මංත්රාඃ කලාං නාර්හංති ෂෝඩශීම් ॥ 213 ॥
අනංත ඵලමාප්නෝති ගුරුගීතා ජපේන තු ।
සර්වපාපහරා දේවි සර්වදාරිද්ර්යනාශිනී ॥ 214 ॥
අකාලමෘත්යුහරා චෛව සර්වසංකටනාශිනී ।
යක්ෂරාක්ෂසභූතාදිචෝරව්යාඝ්රවිඝාතිනී ॥ 215 ॥
සර්වෝපද්රවකුෂ්ඨාදිදුෂ්ටදෝෂනිවාරිණී ।
යත්ඵලං ගුරුසාන්නිධ්යාත්තත්ඵලං පඨනාද්භවේත් ॥ 216 ॥
මහාව්යාධිහරා සර්වවිභූතේඃ සිද්ධිදා භවේත් ।
අථවා මෝහනේ වශ්යේ ස්වයමේව ජපේත්සදා ॥ 217 ॥
කුශදූර්වාසනේ දේවි හ්යාසනේ ශුභ්රකංබලේ ।
උපවිශ්ය තතෝ දේවි ජපේදේකාග්රමානසඃ ॥ 218 ॥
ශුක්ලං සර්වත්ර වෛ ප්රෝක්තං වශ්යේ රක්තාසනං ප්රියේ ।
පද්මාසනේ ජපේන්නිත්යං ශාංතිවශ්යකරං පරම් ॥ 219 ॥
වස්ත්රාසනේ ච දාරිද්ර්යං පාෂාණේ රෝගසංභවඃ ।
මේදින්යාං දුඃඛමාප්නෝති කාෂ්ඨේ භවති නිෂ්ඵලම් ॥ 220 ॥
කෘෂ්ණාජිනේ ජ්ඤානසිද්ධිඃ මෝක්ෂශ්රීර්ව්යාඝ්රචර්මණි ।
කුශාසනේ ජ්ඤානසිද්ධිඃ සර්වසිද්ධිස්තු කංබලේ ॥ 221 ॥
ආග්නේය්යාං කර්ෂණං චෛව වායව්යාං ශත්රුනාශනම් ।
නෛරෘත්යාං දර්ශනං චෛව ඊශාන්යාං ජ්ඤානමේව ච ॥ 222 ॥
උදඞ්මුඛඃ ශාංතිජාප්යේ වශ්යේ පූර්වමුඛස්තථා ।
යාම්යේ තු මාරණං ප්රෝක්තං පශ්චිමේ ච ධනාගමඃ ॥ 223 ॥
මෝහනං සර්වභූතානාං බංධමෝක්ෂකරං පරම් ।
දේවරාජප්රියකරං රාජානං වශමානයේත් ॥ 224 ॥
මුඛස්තංභකරං චෛව ගුණානාං ච විවර්ධනම් ।
දුෂ්කර්මනාශනං චෛව තථා සත්කර්මසිද්ධිදම් ॥ 225 ॥
අසිද්ධං සාධයේත්කාර්යං නවග්රහභයාපහම් ।
දුඃස්වප්නනාශනං චෛව සුස්වප්නඵලදායකම් ॥ 226 ॥
මෝහශාංතිකරං චෛව බංධමෝක්ෂකරං පරම් ।
ස්වරූපජ්ඤානනිලයං ගීතාශාස්ත්රමිදං ශිවේ ॥ 227 ॥
යං යං චිංතයතේ කාමං තං තං ප්රාප්නෝති නිශ්චයම් ।
නිත්යං සෞභාග්යදං පුණ්යං තාපත්රයකුලාපහම් ॥ 228 ॥
සර්වශාංතිකරං නිත්යං තථා වංධ්යා සුපුත්රදම් ।
අවෛධව්යකරං ස්ත්රීණාං සෞභාග්යස්ය විවර්ධනම් ॥ 229 ॥
ආයුරාරෝග්යමෛශ්වර්යං පුත්රපෞත්රවිවර්ධනම් ।
නිෂ්කාමජාපී විධවා පඨේන්මෝක්ෂමවාප්නුයාත් ॥ 230 ॥
අවෛධව්යං සකාමා තු ලභතේ චාන්යජන්මනි ।
සර්වදුඃඛමයං විඝ්නං නාශයේත්තාපහාරකම් ॥ 231 ॥
සර්වපාපප්රශමනං ධර්මකාමාර්ථමෝක්ෂදම් ।
යං යං චිංතයතේ කාමං තං තං ප්රාප්නෝති නිශ්චිතම් ॥ 232 ॥
කාම්යානාං කාමධේනුර්වෛ කල්පතේ කල්පපාදපඃ ।
චිංතාමණිශ්චිංතිතස්ය සර්වමංගළකාරකම් ॥ 233 ॥
ලිඛිත්වා පූජයේද්යස්තු මෝක්ෂශ්රියමවාප්නුයාත් ।
ගුරූභක්තිර්විශේෂේණ ජායතේ හෘදි සර්වදා ॥ 234 ॥
ජපංති ශාක්තාඃ සෞරාශ්ච ගාණපත්යාශ්ච වෛෂ්ණවාඃ ।
ශෛවාඃ පාශුපතාඃ සර්වේ සත්යං සත්යං න සංශයඃ ॥ 235 ॥
ඉති ශ්රීස්කංදපුරාණේ උත්තරඛංඩේ උමාමහේශ්වර සංවාදේ
ශ්රී ගුරුගීතායාං ද්විතීයෝऽධ්යායඃ ॥
