𑌅𑌥 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃 ॥

𑌧𑍍𑌯𑌾𑌨𑌂 𑌶𑍍𑌰𑍁𑌣𑍁 𑌮𑌹𑌾𑌦𑍇𑌵𑌿 𑌸𑌰𑍍𑌵𑌾𑌨𑌂𑌦𑌪𑍍𑌰𑌦𑌾𑌯𑌕𑌮𑍍 ।
𑌸𑌰𑍍𑌵𑌸𑍌𑌖𑍍𑌯𑌕𑌰𑌂 𑌚𑍈𑌵 𑌭𑍁𑌕𑍍𑌤𑌿𑌮𑍁𑌕𑍍𑌤𑌿𑌪𑍍𑌰𑌦𑌾𑌯𑌕𑌮𑍍 ॥ 10𑍯 ॥

𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌸𑍍𑌮𑌰𑌾𑌮𑌿
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌭𑌜𑌾𑌮𑌿 ।
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌵𑌦𑌾𑌮𑌿
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌨𑌮𑌾𑌮𑌿 ॥ 110 ॥

𑌬𑍍𑌰𑌹𑍍𑌮𑌾𑌨𑌂𑌦𑌂 𑌪𑌰𑌮𑌸𑍁𑌖𑌦𑌂 𑌕𑍇𑌵𑌲𑌂 𑌜𑍍𑌞𑌾𑌨𑌮𑍂𑌰𑍍𑌤𑌿𑌂
𑌦𑍍𑌵𑌂𑌦𑍍𑌵𑌾𑌤𑍀𑌤𑌂 𑌗𑌗𑌨𑌸𑌦𑍃𑌶𑌂 𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌲𑌕𑍍𑌷𑍍𑌯𑌮𑍍 ।
𑌏𑌕𑌂 𑌨𑌿𑌤𑍍𑌯𑌂 𑌵𑌿𑌮𑌲𑌮𑌚𑌲𑌂 𑌸𑌰𑍍𑌵𑌧𑍀𑌸𑌾𑌕𑍍𑌷𑌿𑌭𑍂𑌤𑌂
𑌭𑌾𑌵𑌾𑌤𑍀𑌤𑌂 𑌤𑍍𑌰𑌿𑌗𑍁𑌣𑌰𑌹𑌿𑌤𑌂 𑌸𑌦𑍍𑌗𑍁𑌰𑍁𑌂 𑌤𑌂 𑌨𑌮𑌾𑌮𑌿 ॥ 111 ॥

𑌹𑍃𑌦𑌂𑌬𑍁𑌜𑍇 𑌕𑌰𑍍𑌣𑌿𑌕𑌮𑌧𑍍𑌯𑌸𑌂𑌸𑍍𑌥𑍇
𑌸𑌿𑌂𑌹𑌾𑌸𑌨𑍇 𑌸𑌂𑌸𑍍𑌥𑌿𑌤𑌦𑌿𑌵𑍍𑌯𑌮𑍂𑌰𑍍𑌤𑌿𑌮𑍍 ।
𑌧𑍍𑌯𑌾𑌯𑍇𑌦𑍍𑌗𑍁𑌰𑍁𑌂 𑌚𑌂𑌦𑍍𑌰𑌕𑌲𑌾𑌪𑍍𑌰𑌕𑌾𑌶𑌂
𑌸𑌚𑍍𑌚𑌿𑌤𑍍𑌸𑍁𑌖𑌾𑌭𑍀𑌷𑍍𑌟𑌵𑌰𑌂 𑌦𑌧𑌾𑌨𑌮𑍍 ॥ 112 ॥

𑌶𑍍𑌵𑍇𑌤𑌾𑌂𑌬𑌰𑌂 𑌶𑍍𑌵𑍇𑌤𑌵𑌿𑌲𑍇𑌪𑌪𑍁𑌷𑍍𑌪𑌂
𑌮𑍁𑌕𑍍𑌤𑌾𑌵𑌿𑌭𑍂𑌷𑌂 𑌮𑍁𑌦𑌿𑌤𑌂 𑌦𑍍𑌵𑌿𑌨𑍇𑌤𑍍𑌰𑌮𑍍 ।
𑌵𑌾𑌮𑌾𑌂𑌕𑌪𑍀𑌠𑌸𑍍𑌥𑌿𑌤𑌦𑌿𑌵𑍍𑌯𑌶𑌕𑍍𑌤𑌿𑌂
𑌮𑌂𑌦𑌸𑍍𑌮𑌿𑌤𑌂 𑌪𑍂𑌰𑍍𑌣𑌕𑍃𑌪𑌾𑌨𑌿𑌧𑌾𑌨𑌮𑍍 ॥ 113 ॥

𑌆𑌨𑌂𑌦𑌮𑌾𑌨𑌂𑌦𑌕𑌰𑌂 𑌪𑍍𑌰𑌸𑌨𑍍𑌨𑌂
𑌜𑍍𑌞𑌾𑌨𑌸𑍍𑌵𑌰𑍂𑌪𑌂 𑌨𑌿𑌜𑌭𑌾𑌵𑌯𑍁𑌕𑍍𑌤𑌮𑍍 ।
𑌯𑍋𑌗𑍀𑌂𑌦𑍍𑌰𑌮𑍀𑌡𑍍𑌯𑌂 𑌭𑌵𑌰𑍋𑌗𑌵𑍈𑌦𑍍𑌯𑌂
𑌶𑍍𑌰𑍀𑌮𑌦𑍍𑌗𑍁𑌰𑍁𑌂 𑌨𑌿𑌤𑍍𑌯𑌮𑌹𑌂 𑌨𑌮𑌾𑌮𑌿 ॥ 114 ॥

𑌵𑌂𑌦𑍇 𑌗𑍁𑌰𑍂𑌣𑌾𑌂 𑌚𑌰𑌣𑌾𑌰𑌵𑌿𑌂𑌦𑌂
𑌸𑌂𑌦𑌰𑍍𑌶𑌿𑌤𑌸𑍍𑌵𑌾𑌤𑍍𑌮𑌸𑍁𑌖𑌾𑌵𑌬𑍋𑌧𑍇 ।
𑌜𑌨𑌸𑍍𑌯 𑌯𑍇 𑌜𑌾𑌂𑌗𑌲𑌿𑌕𑌾𑌯𑌮𑌾𑌨𑍇
𑌸𑌂𑌸𑌾𑌰𑌹𑌾𑌲𑌾𑌹𑌲𑌮𑍋𑌹𑌶𑌾𑌂𑌤𑍍𑌯𑍈 ॥ 115 ॥

𑌯𑌸𑍍𑌮𑌿𑌨𑍍 𑌸𑍃𑌷𑍍𑌟𑌿𑌸𑍍𑌥𑌿𑌤𑌿𑌧𑍍𑌵𑌂𑌸𑌨𑌿𑌗𑍍𑌰𑌹𑌾𑌨𑍁𑌗𑍍𑌰𑌹𑌾𑌤𑍍𑌮𑌕𑌮𑍍 ।
𑌕𑍃𑌤𑍍𑌯𑌂 𑌪𑌂𑌚𑌵𑌿𑌧𑌂 𑌶𑌶𑍍𑌵𑌤𑍍 𑌭𑌾𑌸𑌤𑍇 𑌤𑌂 𑌗𑍁𑌰𑍁𑌂 𑌭𑌜𑍇𑌤𑍍 ॥ 116 ॥

𑌪𑌾𑌦𑌾𑌬𑍍𑌜𑍇 𑌸𑌰𑍍𑌵𑌸𑌂𑌸𑌾𑌰𑌦𑌾𑌵𑌕𑌾𑌲𑌾𑌨𑌲𑌂 𑌸𑍍𑌵𑌕𑍇 ।
𑌬𑍍𑌰𑌹𑍍𑌮𑌰𑌂𑌧𑍍𑌰𑍇 𑌸𑍍𑌥𑌿𑌤𑌾𑌂𑌭𑍋𑌜𑌮𑌧𑍍𑌯𑌸𑍍𑌥𑌂 𑌚𑌂𑌦𑍍𑌰𑌮𑌂𑌡𑌲𑌮𑍍 ॥ 11𑍭 ॥

𑌅𑌕𑌥𑌾𑌦𑌿𑌤𑍍𑌰𑌿𑌰𑍇𑌖𑌾𑌬𑍍𑌜𑍇 𑌸𑌹𑌸𑍍𑌰𑌦𑌳𑌮𑌂𑌡𑌲𑍇 ।
𑌹𑌂𑌸𑌪𑌾𑌰𑍍𑌶𑍍𑌵𑌤𑍍𑌰𑌿𑌕𑍋𑌣𑍇 𑌚 𑌸𑍍𑌮𑌰𑍇𑌤𑍍𑌤𑌨𑍍𑌮𑌧𑍍𑌯𑌗𑌂 𑌗𑍁𑌰𑍁𑌮𑍍 ॥ 11𑍮 ॥

𑌨𑌿𑌤𑍍𑌯𑌂 𑌶𑍁𑌦𑍍𑌧𑌂 𑌨𑌿𑌰𑌾𑌭𑌾𑌸𑌂 𑌨𑌿𑌰𑌾𑌕𑌾𑌰𑌂 𑌨𑌿𑌰𑌂𑌜𑌨𑌮𑍍 ।
𑌨𑌿𑌤𑍍𑌯𑌬𑍋𑌧𑌂 𑌚𑌿𑌦𑌾𑌨𑌂𑌦𑌂 𑌗𑍁𑌰𑍁𑌂 𑌬𑍍𑌰𑌹𑍍𑌮 𑌨𑌮𑌾𑌮𑍍𑌯𑌹𑌮𑍍 ॥ 11𑍯 ॥

𑌸𑌕𑌲𑌭𑍁𑌵𑌨𑌸𑍃𑌷𑍍𑌟𑌿𑌃 𑌕𑌲𑍍𑌪𑌿𑌤𑌾𑌶𑍇𑌷𑌸𑍃𑌷𑍍𑌟𑌿𑌃
𑌨𑌿𑌖𑌿𑌲𑌨𑌿𑌗𑌮𑌦𑍃𑌷𑍍𑌟𑌿𑌃 𑌸𑌤𑍍𑌪𑌦𑌾𑌰𑍍𑌥𑍈𑌕𑌸𑍃𑌷𑍍𑌟𑌿𑌃 ।
𑌅𑌤𑌦𑍍𑌗𑌣𑌪𑌰𑌮𑍇𑌷𑍍𑌟𑌿𑌃 𑌸𑌤𑍍𑌪𑌦𑌾𑌰𑍍𑌥𑍈𑌕𑌦𑍃𑌷𑍍𑌟𑌿𑌃
𑌭𑌵𑌗𑍁𑌣𑌪𑌰𑌮𑍇𑌷𑍍𑌟𑌿𑌰𑍍𑌮𑍋𑌕𑍍𑌷𑌮𑌾𑌰𑍍𑌗𑍈𑌕𑌦𑍃𑌷𑍍𑌟𑌿𑌃 ॥ 120 ॥

𑌸𑌕𑌲𑌭𑍁𑌵𑌨𑌰𑌂𑌗𑌸𑍍𑌥𑌾𑌪𑌨𑌾𑌸𑍍𑌤𑌂𑌭𑌯𑌷𑍍𑌟𑌿𑌃
𑌸𑌕𑌰𑍁𑌣𑌰𑌸𑌵𑍃𑌷𑍍𑌟𑌿𑌸𑍍𑌤𑌤𑍍𑌤𑍍𑌵𑌮𑌾𑌲𑌾𑌸𑌮𑌷𑍍𑌟𑌿𑌃 ।
𑌸𑌕𑌲𑌸𑌮𑌯𑌸𑍃𑌷𑍍𑌟𑌿𑌸𑍍𑌸𑌚𑍍𑌚𑌿𑌦𑌾𑌨𑌂𑌦𑌦𑍃𑌷𑍍𑌟𑌿𑌃
𑌨𑌿𑌵𑌸𑌤𑍁 𑌮𑌯𑌿 𑌨𑌿𑌤𑍍𑌯𑌂 𑌶𑍍𑌰𑍀𑌗𑍁𑌰𑍋𑌰𑍍𑌦𑌿𑌵𑍍𑌯𑌦𑍃𑌷𑍍𑌟𑌿𑌃 ॥ 121 ॥

𑌨 𑌗𑍁𑌰𑍋𑌰𑌧𑌿𑌕𑌂 𑌨 𑌗𑍁𑌰𑍋𑌰𑌧𑌿𑌕𑌂
𑌨 𑌗𑍁𑌰𑍋𑌰𑌧𑌿𑌕𑌂 𑌨 𑌗𑍁𑌰𑍋𑌰𑌧𑌿𑌕𑌮𑍍 ।
𑌶𑌿𑌵𑌶𑌾𑌸𑌨𑌤𑌃 𑌶𑌿𑌵𑌶𑌾𑌸𑌨𑌤𑌃
𑌶𑌿𑌵𑌶𑌾𑌸𑌨𑌤𑌃 𑌶𑌿𑌵𑌶𑌾𑌸𑌨𑌤𑌃 ॥ 122 ॥

𑌇𑌦𑌮𑍇𑌵 𑌶𑌿𑌵𑌂 𑌇𑌦𑌮𑍇𑌵 𑌶𑌿𑌵𑌂
𑌇𑌦𑌮𑍇𑌵 𑌶𑌿𑌵𑌂 𑌇𑌦𑌮𑍇𑌵 𑌶𑌿𑌵𑌮𑍍 ।
𑌹𑌰𑌿𑌶𑌾𑌸𑌨𑌤𑍋 𑌹𑌰𑌿𑌶𑌾𑌸𑌨𑌤𑍋
𑌹𑌰𑌿𑌶𑌾𑌸𑌨𑌤𑍋 𑌹𑌰𑌿𑌶𑌾𑌸𑌨𑌤𑌃 ॥ 123 ॥

𑌵𑌿𑌦𑌿𑌤𑌂 𑌵𑌿𑌦𑌿𑌤𑌂 𑌵𑌿𑌦𑌿𑌤𑌂 𑌵𑌿𑌦𑌿𑌤𑌂
𑌵𑌿𑌜𑌨𑌂 𑌵𑌿𑌜𑌨𑌂 𑌵𑌿𑌜𑌨𑌂 𑌵𑌿𑌜𑌨𑌮𑍍 ।
𑌵𑌿𑌧𑌿𑌶𑌾𑌸𑌨𑌤𑍋 𑌵𑌿𑌧𑌿𑌶𑌾𑌸𑌨𑌤𑍋
𑌵𑌿𑌧𑌿𑌶𑌾𑌸𑌨𑌤𑍋 𑌵𑌿𑌧𑌿𑌶𑌾𑌸𑌨𑌤𑌃 ॥ 124 ॥

𑌏𑌵𑌂𑌵𑌿𑌧𑌂 𑌗𑍁𑌰𑍁𑌂 𑌧𑍍𑌯𑌾𑌤𑍍𑌵𑌾 𑌜𑍍𑌞𑌾𑌨𑌮𑍁𑌤𑍍𑌪𑌦𑍍𑌯𑌤𑍇 𑌸𑍍𑌵𑌯𑌮𑍍 ।
𑌤𑌦𑌾 𑌗𑍁𑌰𑍂𑌪𑌦𑍇𑌶𑍇𑌨 𑌮𑍁𑌕𑍍𑌤𑍋𑌽𑌹𑌮𑌿𑌤𑌿 𑌭𑌾𑌵𑌯𑍇𑌤𑍍 ॥ 125 ॥

𑌗𑍁𑌰𑍂𑌪𑌦𑌿𑌷𑍍𑌟𑌮𑌾𑌰𑍍𑌗𑍇𑌣 𑌮𑌨𑌶𑍍𑌶𑍁𑌦𑍍𑌧𑌿𑌂 𑌤𑍁 𑌕𑌾𑌰𑌯𑍇𑌤𑍍 ।
𑌅𑌨𑌿𑌤𑍍𑌯𑌂 𑌖𑌂𑌡𑌯𑍇𑌤𑍍𑌸𑌰𑍍𑌵𑌂 𑌯𑌤𑍍𑌕𑌿𑌂𑌚𑌿𑌦𑌾𑌤𑍍𑌮𑌗𑍋𑌚𑌰𑌮𑍍 ॥ 126 ॥

𑌜𑍍𑌞𑍇𑌯𑌂 𑌸𑌰𑍍𑌵𑌂 𑌪𑍍𑌰𑌤𑍀𑌤𑌂 𑌚 𑌜𑍍𑌞𑌾𑌨𑌂 𑌚 𑌮𑌨 𑌉𑌚𑍍𑌯𑌤𑍇 ।
𑌜𑍍𑌞𑌾𑌨𑌂 𑌜𑍍𑌞𑍇𑌯𑌂 𑌸𑌮𑌂 𑌕𑍁𑌰𑍍𑌯𑌾𑌨𑍍𑌨𑌾𑌨𑍍𑌯𑌃 𑌪𑌂𑌥𑌾 𑌦𑍍𑌵𑌿𑌤𑍀𑌯𑌕𑌃 ॥ 12𑍭 ॥

𑌕𑌿𑌮𑌤𑍍𑌰 𑌬𑌹𑍁𑌨𑍋𑌕𑍍𑌤𑍇𑌨 𑌶𑌾𑌸𑍍𑌤𑍍𑌰𑌕𑍋𑌟𑌿𑌶𑌤𑍈𑌰𑌪𑌿 ।
𑌦𑍁𑌰𑍍𑌲𑌭𑌾 𑌚𑌿𑌤𑍍𑌤𑌵𑌿𑌶𑍍𑌰𑌾𑌂𑌤𑌿𑌃 𑌵𑌿𑌨𑌾 𑌗𑍁𑌰𑍁𑌕𑍃𑌪𑌾𑌂 𑌪𑌰𑌾𑌮𑍍 ॥ 12𑍮 ॥

𑌕𑌰𑍁𑌣𑌾𑌖𑌡𑍍𑌗𑌪𑌾𑌤𑍇𑌨 𑌛𑌿𑌤𑍍𑌵𑌾 𑌪𑌾𑌶𑌾𑌷𑍍𑌟𑌕𑌂 𑌶𑌿𑌶𑍋𑌃 ।
𑌸𑌮𑍍𑌯𑌗𑌾𑌨𑌂𑌦𑌜𑌨𑌕𑌃 𑌸𑌦𑍍𑌗𑍁𑌰𑍁𑌃 𑌸𑍋𑌽𑌭𑌿𑌧𑍀𑌯𑌤𑍇 ॥ 12𑍯 ॥

𑌏𑌵𑌂 𑌶𑍍𑌰𑍁𑌤𑍍𑌵𑌾 𑌮𑌹𑌾𑌦𑍇𑌵𑌿 𑌗𑍁𑌰𑍁𑌨𑌿𑌂𑌦𑌾𑌂 𑌕𑌰𑍋𑌤𑌿 𑌯𑌃 ।
𑌸 𑌯𑌾𑌤𑌿 𑌨𑌰𑌕𑌾𑌨𑍍 𑌘𑍋𑌰𑌾𑌨𑍍 𑌯𑌾𑌵𑌚𑍍𑌚𑌂𑌦𑍍𑌰𑌦𑌿𑌵𑌾𑌕𑌰𑍌 ॥ 130 ॥

𑌯𑌾𑌵𑌤𑍍𑌕𑌲𑍍𑌪𑌾𑌂𑌤𑌕𑍋 𑌦𑍇𑌹𑌸𑍍𑌤𑌾𑌵𑌦𑍍𑌦𑍇𑌵𑌿 𑌗𑍁𑌰𑍁𑌂 𑌸𑍍𑌮𑌰𑍇𑌤𑍍 ।
𑌗𑍁𑌰𑍁𑌲𑍋𑌪𑍋 𑌨 𑌕𑌰𑍍𑌤𑌵𑍍𑌯𑌃 𑌸𑍍𑌵𑌚𑍍𑌛𑌂𑌦𑍋 𑌯𑌦𑌿 𑌵𑌾 𑌭𑌵𑍇𑌤𑍍 ॥ 131 ॥

𑌹𑍁𑌂𑌕𑌾𑌰𑍇𑌣 𑌨 𑌵𑌕𑍍𑌤𑌵𑍍𑌯𑌂 𑌪𑍍𑌰𑌾𑌜𑍍𑌞𑌶𑌿𑌷𑍍𑌯𑍈𑌃 𑌕𑌦𑌾𑌚𑌨 ।
𑌗𑍁𑌰𑍋𑌰𑌗𑍍𑌰 𑌨 𑌵𑌕𑍍𑌤𑌵𑍍𑌯𑌮𑌸𑌤𑍍𑌯𑌂 𑌤𑍁 𑌕𑌦𑌾𑌚𑌨 ॥ 132 ॥

𑌗𑍁𑌰𑍁𑌂 𑌤𑍍𑌵𑌂𑌕𑍃𑌤𑍍𑌯 𑌹𑍁𑌂𑌕𑍃𑌤𑍍𑌯 𑌗𑍁𑌰𑍁𑌸𑌾𑌨𑍍𑌨𑌿𑌧𑍍𑌯𑌭𑌾𑌷𑌣𑌃 ।
𑌅𑌰𑌣𑍍𑌯𑍇 𑌨𑌿𑌰𑍍𑌜𑌲𑍇 𑌦𑍇𑌶𑍇 𑌸𑌂𑌭𑌵𑍇𑌦𑍍 𑌬𑍍𑌰𑌹𑍍𑌮𑌰𑌾𑌕𑍍𑌷𑌸𑌃 ॥ 133 ॥

𑌅𑌦𑍍𑌵𑍈𑌤𑌂 𑌭𑌾𑌵𑌯𑍇𑌨𑍍𑌨𑌿𑌤𑍍𑌯𑌂 𑌸𑌰𑍍𑌵𑌾𑌵𑌸𑍍𑌥𑌾𑌸𑍁 𑌸𑌰𑍍𑌵𑌦𑌾 ।
𑌕𑌦𑌾𑌚𑌿𑌦𑌪𑌿 𑌨𑍋 𑌕𑍁𑌰𑍍𑌯𑌾𑌦𑌦𑍍𑌵𑍈𑌤𑌂 𑌗𑍁𑌰𑍁𑌸𑌨𑍍𑌨𑌿𑌧𑍌 ॥ 134 ॥

𑌦𑍃𑌶𑍍𑌯𑌵𑌿𑌸𑍍𑌮𑍃𑌤𑌿𑌪𑌰𑍍𑌯𑌂𑌤𑌂 𑌕𑍁𑌰𑍍𑌯𑌾𑌦𑍍 𑌗𑍁𑌰𑍁𑌪𑌦𑌾𑌰𑍍𑌚𑌨𑌮𑍍 ।
𑌤𑌾𑌦𑍃𑌶𑌸𑍍𑌯𑍈𑌵 𑌕𑍈𑌵𑌲𑍍𑌯𑌂 𑌨 𑌚 𑌤𑌦𑍍𑌵𑍍𑌯𑌤𑌿𑌰𑍇𑌕𑌿𑌣𑌃 ॥ 135 ॥

𑌅𑌪𑌿 𑌸𑌂𑌪𑍂𑌰𑍍𑌣𑌤𑌤𑍍𑌤𑍍𑌵𑌜𑍍𑌞𑍋 𑌗𑍁𑌰𑍁𑌤𑍍𑌯𑌾𑌗𑍀 𑌭𑌵𑍇𑌦𑍍𑌯𑌦𑌾 ।
𑌭𑌵𑌤𑍍𑌯𑍇𑌵 𑌹𑌿 𑌤𑌸𑍍𑌯𑌾𑌂𑌤𑌕𑌾𑌲𑍇 𑌵𑌿𑌕𑍍𑌷𑍇𑌪𑌮𑍁𑌤𑍍𑌕𑌟𑌮𑍍 ॥ 136 ॥

𑌗𑍁𑌰𑍁𑌕𑌾𑌰𑍍𑌯𑌂 𑌨 𑌲𑌂𑌘𑍇𑌤 𑌨𑌾𑌪𑍃𑌷𑍍𑌟𑍍𑌵𑌾 𑌕𑌾𑌰𑍍𑌯𑌮𑌾𑌚𑌰𑍇𑌤𑍍 ।
𑌨 𑌹𑍍𑌯𑍁𑌤𑍍𑌤𑌿𑌷𑍍𑌠𑍇𑌦𑍍𑌦𑌿𑌶𑍇𑌽𑌨𑌤𑍍𑌵𑌾 𑌗𑍁𑌰𑍁𑌸𑌦𑍍𑌭𑌾𑌵𑌶𑍋𑌭𑌿𑌤𑌃 ॥ 13𑍭 ॥

𑌗𑍁𑌰𑍌 𑌸𑌤𑌿 𑌸𑍍𑌵𑌯𑌂 𑌦𑍇𑌵𑌿 𑌪𑌰𑍇𑌷𑌾𑌂 𑌤𑍁 𑌕𑌦𑌾𑌚𑌨 ।
𑌉𑌪𑌦𑍇𑌶𑌂 𑌨 𑌵𑍈 𑌕𑍁𑌰𑍍𑌯𑌾𑌤𑍍 𑌤𑌥𑌾 𑌚𑍇𑌦𑍍𑌰𑌾𑌕𑍍𑌷𑌸𑍋 𑌭𑌵𑍇𑌤𑍍 ॥ 13𑍮 ॥

𑌨 𑌗𑍁𑌰𑍋𑌰𑌾𑌶𑍍𑌰𑌮𑍇 𑌕𑍁𑌰𑍍𑌯𑌾𑌤𑍍 𑌦𑍁𑌷𑍍𑌪𑌾𑌨𑌂 𑌪𑌰𑌿𑌸𑌰𑍍𑌪𑌣𑌮𑍍 ।
𑌦𑍀𑌕𑍍𑌷𑌾 𑌵𑍍𑌯𑌾𑌖𑍍𑌯𑌾 𑌪𑍍𑌰𑌭𑍁𑌤𑍍𑌵𑌾𑌦𑌿 𑌗𑍁𑌰𑍋𑌰𑌾𑌜𑍍𑌞𑌾𑌂 𑌨 𑌕𑌾𑌰𑌯𑍇𑌤𑍍 ॥ 13𑍯 ॥

𑌨𑍋𑌪𑌾𑌶𑍍𑌰𑌯𑌂 𑌚 𑌪𑌰𑍍𑌯𑌕𑌂 𑌨 𑌚 𑌪𑌾𑌦𑌪𑍍𑌰𑌸𑌾𑌰𑌣𑌮𑍍 ।
𑌨𑌾𑌂𑌗𑌭𑍋𑌗𑌾𑌦𑌿𑌕𑌂 𑌕𑍁𑌰𑍍𑌯𑌾𑌨𑍍𑌨 𑌲𑍀𑌲𑌾𑌮𑌪𑌰𑌾𑌮𑌪𑌿 ॥ 140 ॥

𑌗𑍁𑌰𑍂𑌣𑌾𑌂 𑌸𑌦𑌸𑌦𑍍𑌵𑌾𑌽𑌪𑌿 𑌯𑌦𑍁𑌕𑍍𑌤𑌂 𑌤𑌨𑍍𑌨 𑌲𑌂𑌘𑌯𑍇𑌤𑍍 ।
𑌕𑍁𑌰𑍍𑌵𑌨𑍍𑌨𑌾𑌜𑍍𑌞𑌾𑌂 𑌦𑌿𑌵𑌾 𑌰𑌾𑌤𑍍𑌰𑍌 𑌦𑌾𑌸𑌵𑌨𑍍𑌨𑌿𑌵𑌸𑍇𑌦𑍍𑌗𑍁𑌰𑍋 ॥ 141 ॥

𑌅𑌦𑌤𑍍𑌤𑌂 𑌨 𑌗𑍁𑌰𑍋𑌰𑍍𑌦𑍍𑌰𑌵𑍍𑌯𑌮𑍁𑌪𑌭𑍁𑌂𑌜𑍀𑌤 𑌕𑌰𑍍𑌹𑌿𑌚𑌿𑌤𑍍 ।
𑌦𑌤𑍍𑌤𑍇 𑌚 𑌰𑌂𑌕𑌵𑌦𑍍𑌗𑍍𑌰𑌾𑌹𑍍𑌯𑌂 𑌪𑍍𑌰𑌾𑌣𑍋𑌽𑌪𑍍𑌯𑍇𑌤𑍇𑌨 𑌲𑌭𑍍𑌯𑌤𑍇 ॥ 142 ॥

𑌪𑌾𑌦𑍁𑌕𑌾𑌸𑌨𑌶𑌯𑍍𑌯𑌾𑌦𑌿 𑌗𑍁𑌰𑍁𑌣𑌾 𑌯𑌦𑌭𑍀𑌷𑍍𑌟𑌿𑌤𑌮𑍍 ।
𑌨𑌮𑌸𑍍𑌕𑍁𑌰𑍍𑌵𑍀𑌤 𑌤𑌤𑍍𑌸𑌰𑍍𑌵𑌂 𑌪𑌾𑌦𑌾𑌭𑍍𑌯𑌾𑌂 𑌨 𑌸𑍍𑌪𑍃𑌶𑍇𑌤𑍍 𑌕𑍍𑌵𑌚𑌿𑌤𑍍 ॥ 143 ॥

𑌗𑌚𑍍𑌛𑌤𑌃 𑌪𑍃𑌷𑍍𑌠𑌤𑍋 𑌗𑌚𑍍𑌛𑍇𑌤𑍍 𑌗𑍁𑌰𑍁𑌚𑍍𑌛𑌾𑌯𑌾𑌂 𑌨 𑌲𑌂𑌘𑌯𑍇𑌤𑍍 ।
𑌨𑍋𑌲𑍍𑌬𑌣𑌂 𑌧𑌾𑌰𑌯𑍇𑌦𑍍𑌵𑍇𑌷𑌂 𑌨𑌾𑌲𑌂𑌕𑌾𑌰𑌾𑌂𑌸𑍍𑌤𑌤𑍋𑌲𑍍𑌬𑌣𑌾𑌨𑍍 ॥ 144 ॥

𑌗𑍁𑌰𑍁𑌨𑌿𑌂𑌦𑌾𑌕𑌰𑌂 𑌦𑍃𑌷𑍍𑌟𑍍𑌵𑌾 𑌧𑌾𑌵𑌯𑍇𑌦𑌥 𑌵𑌾𑌸𑌯𑍇𑌤𑍍 ।
𑌸𑍍𑌥𑌾𑌨𑌂 𑌵𑌾 𑌤𑌤𑍍𑌪𑌰𑌿𑌤𑍍𑌯𑌾𑌜𑍍𑌯𑌂 𑌜𑌿𑌹𑍍𑌵𑌾𑌚𑍍𑌛𑍇𑌦𑌾𑌕𑍍𑌷𑌮𑍋 𑌯𑌦𑌿 ॥ 145 ॥

𑌨𑍋𑌚𑍍𑌛𑌿𑌷𑍍𑌟𑌂 𑌕𑌸𑍍𑌯𑌚𑌿𑌦𑍍𑌦𑍇𑌯𑌂 𑌗𑍁𑌰𑍋𑌰𑌾𑌜𑍍𑌞𑌾𑌂 𑌨 𑌚 𑌤𑍍𑌯𑌜𑍇𑌤𑍍 ।
𑌕𑍃𑌤𑍍𑌸𑍍𑌨𑌮𑍁𑌚𑍍𑌛𑌿𑌷𑍍𑌟𑌮𑌾𑌦𑌾𑌯 𑌹𑌵𑌿𑌰𑌿𑌵 𑌭𑌕𑍍𑌷𑌯𑍇𑌤𑍍𑌸𑍍𑌵𑌯𑌮𑍍 ॥ 146 ॥

𑌨𑌾𑌽𑌨𑍃𑌤𑌂 𑌨𑌾𑌽𑌪𑍍𑌰𑌿𑌯𑌂 𑌚𑍈𑌵 𑌨 𑌗𑌰𑍍𑌵𑌂 𑌨𑌾𑌽𑌪𑌿 𑌵𑌾 𑌬𑌹𑍁 ।
𑌨 𑌨𑌿𑌯𑍋𑌗𑌪𑌰𑌂 𑌬𑍍𑌰𑍂𑌯𑌾𑌤𑍍 𑌗𑍁𑌰𑍋𑌰𑌾𑌜𑍍𑌞𑌾𑌂 𑌵𑌿𑌭𑌾𑌵𑌯𑍇𑌤𑍍 ॥ 14𑍭 ॥

𑌪𑍍𑌰𑌭𑍋 𑌦𑍇𑌵𑌕𑍁𑌲𑍇𑌶𑌾𑌨𑌾𑌂 𑌸𑍍𑌵𑌾𑌮𑌿𑌨𑍍 𑌰𑌾𑌜𑌨𑍍 𑌕𑍁𑌲𑍇𑌶𑍍𑌵𑌰 ।
𑌇𑌤𑌿 𑌸𑌂𑌬𑍋𑌧𑌨𑍈𑌰𑍍𑌭𑍀𑌤𑍋 𑌗𑍁𑌰𑍁𑌭𑌾𑌵𑍇𑌨 𑌸𑌰𑍍𑌵𑌦𑌾 ॥ 14𑍮 ॥

𑌮𑍁𑌨𑌿𑌭𑌿𑌃 𑌪𑌨𑍍𑌨𑌗𑍈𑌰𑍍𑌵𑌾𑌪𑌿 𑌸𑍁𑌰𑍈𑌰𑍍𑌵𑌾 𑌶𑌾𑌪𑌿𑌤𑍋 𑌯𑌦𑌿 ।
𑌕𑌾𑌲𑌮𑍃𑌤𑍍𑌯𑍁𑌭𑌯𑌾𑌦𑍍𑌵𑌾𑌪𑌿 𑌗𑍁𑌰𑍁𑌃 𑌸𑌂𑌤𑍍𑌰𑌾𑌤𑌿 𑌪𑌾𑌰𑍍𑌵𑌤𑌿 ॥ 14𑍯 ॥

𑌅𑌶𑌕𑍍𑌤𑌾 𑌹𑌿 𑌸𑍁𑌰𑌾𑌦𑍍𑌯𑌾𑌶𑍍𑌚 𑌹𑍍𑌯𑌶𑌕𑍍𑌤𑌾𑌃 𑌮𑍁𑌨𑌯𑌸𑍍𑌤𑌥𑌾 ।
𑌗𑍁𑌰𑍁𑌶𑌾𑌪𑍋𑌪𑌪𑌨𑍍𑌨𑌸𑍍𑌯 𑌰𑌕𑍍𑌷𑌣𑌾𑌯 𑌚 𑌕𑍁𑌤𑍍𑌰𑌚𑌿𑌤𑍍 ॥ 150 ॥

𑌮𑌂𑌤𑍍𑌰𑌰𑌾𑌜𑌮𑌿𑌦𑌂 𑌦𑍇𑌵𑌿 𑌗𑍁𑌰𑍁𑌰𑌿𑌤𑍍𑌯𑌕𑍍𑌷𑌰𑌦𑍍𑌵𑌯𑌮𑍍 ।
𑌸𑍍𑌮𑍃𑌤𑌿𑌵𑍇𑌦𑌪𑍁𑌰𑌾𑌣𑌾𑌨𑌾𑌂 𑌸𑌾𑌰𑌮𑍇𑌵 𑌨 𑌸𑌂𑌶𑌯𑌃 ॥ 151 ॥

𑌸𑌤𑍍𑌕𑌾𑌰𑌮𑌾𑌨𑌪𑍂𑌜𑌾𑌰𑍍𑌥𑌂 𑌦𑌂𑌡𑌕𑌾𑌷𑌯𑌧𑌾𑌰𑌣𑌃 ।
𑌸 𑌸𑌨𑍍𑌨𑍍𑌯𑌾𑌸𑍀 𑌨 𑌵𑌕𑍍𑌤𑌵𑍍𑌯𑌃 𑌸𑌨𑍍𑌨𑍍𑌯𑌾𑌸𑍀 𑌜𑍍𑌞𑌾𑌨𑌤𑌤𑍍𑌪𑌰𑌃 ॥ 152 ॥

𑌵𑌿𑌜𑌾𑌨𑌂𑌤𑌿 𑌮𑌹𑌾𑌵𑌾𑌕𑍍𑌯𑌂 𑌗𑍁𑌰𑍋𑌶𑍍𑌚𑌰𑌣 𑌸𑍇𑌵𑌯𑌾 ।
𑌤𑍇 𑌵𑍈 𑌸𑌨𑍍𑌨𑍍𑌯𑌾𑌸𑌿𑌨𑌃 𑌪𑍍𑌰𑍋𑌕𑍍𑌤𑌾 𑌇𑌤𑌰𑍇 𑌵𑍇𑌷𑌧𑌾𑌰𑌿𑌣𑌃 ॥ 153 ॥

[𑌪𑌾𑌠𑌭𑍇𑌦𑌃 –
𑌨𑌿𑌤𑍍𑌯𑌂 𑌬𑍍𑌰𑌹𑍍𑌮 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌬𑍋𑌧𑌯𑍇𑌤𑍍𑌪𑌰𑌮𑍍 ।
𑌭𑌾𑌸𑌯𑌨𑍍 𑌬𑍍𑌰𑌹𑍍𑌮𑌭𑌾𑌵𑌂 𑌚 𑌦𑍀𑌪𑍋 𑌦𑍀𑌪𑌾𑌂𑌤𑌰𑌂 𑌯𑌥𑌾 ॥
]
𑌨𑌿𑌤𑍍𑌯𑌂 𑌬𑍍𑌰𑌹𑍍𑌮 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌸𑌤𑍍𑌯𑌚𑌿𑌦𑍍𑌧𑌨𑌮𑍍 ।
𑌯𑌃 𑌸𑌾𑌕𑍍𑌷𑌾𑌤𑍍𑌕𑍁𑌰𑍁𑌤𑍇 𑌲𑍋𑌕𑍇 𑌗𑍁𑌰𑍁𑌤𑍍𑌵𑌂 𑌤𑌸𑍍𑌯 𑌶𑍋𑌭𑌤𑍇 ॥ 154 ॥

𑌗𑍁𑌰𑍁𑌪𑍍𑌰𑌸𑌾𑌦𑌤𑌃 𑌸𑍍𑌵𑌾𑌤𑍍𑌮𑌨𑍍𑌯𑌾𑌤𑍍𑌮𑌾𑌰𑌾𑌮𑌨𑌿𑌰𑍀𑌕𑍍𑌷𑌣𑌾𑌤𑍍 ।
𑌸𑌮𑌤𑌾 𑌮𑍁𑌕𑍍𑌤𑌿𑌮𑌾𑌰𑍍𑌗𑍇𑌣 𑌸𑍍𑌵𑌾𑌤𑍍𑌮𑌜𑍍𑌞𑌾𑌨𑌂 𑌪𑍍𑌰𑌵𑌰𑍍𑌤𑌤𑍇 ॥ 155 ॥

𑌆𑌬𑍍𑌰𑌹𑍍𑌮𑌸𑍍𑌤𑌂𑌬𑌪𑌰𑍍𑌯𑌂𑌤𑌂 𑌪𑌰𑌮𑌾𑌤𑍍𑌮𑌸𑍍𑌵𑌰𑍂𑌪𑌕𑌮𑍍 ।
𑌸𑍍𑌥𑌾𑌵𑌰𑌂 𑌜𑌂𑌗𑌮𑌂 𑌚𑍈𑌵 𑌪𑍍𑌰𑌣𑌮𑌾𑌮𑌿 𑌜𑌗𑌨𑍍𑌮𑌯𑌮𑍍 ॥ 156 ॥

𑌵𑌂𑌦𑍇𑌽𑌹𑌂 𑌸𑌚𑍍𑌚𑌿𑌦𑌾𑌨𑌂𑌦𑌂 𑌭𑌾𑌵𑌾𑌤𑍀𑌤𑌂 𑌜𑌗𑌦𑍍𑌗𑍁𑌰𑍁𑌮𑍍 ।
𑌨𑌿𑌤𑍍𑌯𑌂 𑌪𑍂𑌰𑍍𑌣𑌂 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌸𑍍𑌵𑌾𑌤𑍍𑌮𑌸𑌂𑌸𑍍𑌥𑌿𑌤𑌮𑍍 ॥ 15𑍭 ॥

𑌪𑌰𑌾𑌤𑍍𑌪𑌰𑌤𑌰𑌂 𑌧𑍍𑌯𑌾𑌯𑍇𑌨𑍍𑌨𑌿𑌤𑍍𑌯𑌮𑌾𑌨𑌂𑌦𑌕𑌾𑌰𑌕𑌮𑍍 ।
𑌹𑍃𑌦𑌯𑌾𑌕𑌾𑌶𑌮𑌧𑍍𑌯𑌸𑍍𑌥𑌂 𑌶𑍁𑌦𑍍𑌧𑌸𑍍𑌫𑌟𑌿𑌕𑌸𑌨𑍍𑌨𑌿𑌭𑌮𑍍 ॥ 15𑍮 ॥

𑌸𑍍𑌫𑌾𑌟𑌿𑌕𑍇 𑌸𑍍𑌫𑌾𑌟𑌿𑌕𑌂 𑌰𑍂𑌪𑌂 𑌦𑌰𑍍𑌪𑌣𑍇 𑌦𑌰𑍍𑌪𑌣𑍋 𑌯𑌥𑌾 ।
𑌤𑌥𑌾𑌽𑌽𑌤𑍍𑌮𑌨𑌿 𑌚𑌿𑌦𑌾𑌕𑌾𑌰𑌮𑌾𑌨𑌂𑌦𑌂 𑌸𑍋𑌽𑌹𑌮𑌿𑌤𑍍𑌯𑍁𑌤 ॥ 15𑍯 ॥

𑌅𑌂𑌗𑍁𑌷𑍍𑌠𑌮𑌾𑌤𑍍𑌰𑌂 𑌪𑍁𑌰𑍁𑌷𑌂 𑌧𑍍𑌯𑌾𑌯𑍇𑌚𑍍𑌚 𑌚𑌿𑌨𑍍𑌮𑌯𑌂 𑌹𑍃𑌦𑌿 ।
𑌤𑌤𑍍𑌰 𑌸𑍍𑌫𑍁𑌰𑌤𑌿 𑌯𑍋 𑌭𑌾𑌵𑌃 𑌶𑍃𑌣𑍁 𑌤𑌤𑍍𑌕𑌥𑌯𑌾𑌮𑌿 𑌤𑍇 ॥ 160 ॥

𑌅𑌜𑍋𑌽𑌹𑌮𑌮𑌰𑍋𑌽𑌹𑌂 𑌚 𑌅𑌨𑌾𑌦𑌿𑌨𑌿𑌧𑌨𑍋 𑌹𑍍𑌯𑌹𑌮𑍍 ।
𑌅𑌵𑌿𑌕𑌾𑌰𑌶𑍍𑌚𑌿𑌦𑌾𑌨𑌂𑌦𑍋 𑌹𑍍𑌯𑌣𑍀𑌯𑌾𑌨𑍍𑌮𑌹𑌤𑍋 𑌮𑌹𑌾𑌨𑍍 ॥ 161 ॥

𑌅𑌪𑍂𑌰𑍍𑌵𑌮𑌪𑌰𑌂 𑌨𑌿𑌤𑍍𑌯𑌂 𑌸𑍍𑌵𑌯𑌂𑌜𑍍𑌯𑍋𑌤𑌿𑌰𑍍𑌨𑌿𑌰𑌾𑌮𑌯𑌮𑍍 ।
𑌵𑌿𑌰𑌜𑌂 𑌪𑌰𑌮𑌾𑌕𑌾𑌶𑌂 𑌧𑍍𑌰𑍁𑌵𑌮𑌾𑌨𑌂𑌦𑌮𑌵𑍍𑌯𑌯𑌮𑍍 ॥ 162 ॥

𑌅𑌗𑍋𑌚𑌰𑌂 𑌤𑌥𑌾𑌽𑌗𑌮𑍍𑌯𑌂 𑌨𑌾𑌮𑌰𑍂𑌪𑌵𑌿𑌵𑌰𑍍𑌜𑌿𑌤𑌮𑍍 ।
𑌨𑌿𑌶𑍍𑌶𑌬𑍍𑌦𑌂 𑌤𑍁 𑌵𑌿𑌜𑌾𑌨𑍀𑌯𑌾𑌤𑍍𑌸𑍍𑌵𑌭𑌾𑌵𑌾𑌦𑍍𑌬𑍍𑌰𑌹𑍍𑌮 𑌪𑌾𑌰𑍍𑌵𑌤𑌿 ॥ 163 ॥

𑌯𑌥𑌾 𑌗𑌂𑌧𑌸𑍍𑌵𑌭𑌾𑌵𑌤𑍍𑌵𑌂 𑌕𑌰𑍍𑌪𑍂𑌰𑌕𑍁𑌸𑍁𑌮𑌾𑌦𑌿𑌷𑍁 ।
𑌶𑍀𑌤𑍋𑌷𑍍𑌣𑌤𑍍𑌵𑌸𑍍𑌵𑌭𑌾𑌵𑌤𑍍𑌵𑌂 𑌤𑌥𑌾 𑌬𑍍𑌰𑌹𑍍𑌮𑌣𑌿 𑌶𑌾𑌶𑍍𑌵𑌤𑌮𑍍 ॥ 164 ॥

𑌯𑌥𑌾 𑌨𑌿𑌜𑌸𑍍𑌵𑌭𑌾𑌵𑍇𑌨 𑌕𑍁𑌂𑌡𑌲𑍇 𑌕𑌟𑌕𑌾𑌦𑌯𑌃 ।
𑌸𑍁𑌵𑌰𑍍𑌣𑌤𑍍𑌵𑍇𑌨 𑌤𑌿𑌷𑍍𑌠𑌂𑌤𑌿 𑌤𑌥𑌾𑌽𑌹𑌂 𑌬𑍍𑌰𑌹𑍍𑌮 𑌶𑌾𑌶𑍍𑌵𑌤𑌮𑍍 ॥ 165 ॥

𑌸𑍍𑌵𑌯𑌂 𑌤𑌥𑌾𑌵𑌿𑌧𑍋 𑌭𑍂𑌤𑍍𑌵𑌾 𑌸𑍍𑌥𑌾𑌤𑌵𑍍𑌯𑌂 𑌯𑌤𑍍𑌰 𑌕𑍁𑌤𑍍𑌰 𑌚𑌿𑌤𑍍 ।
𑌕𑍀𑌟𑍋 𑌭𑍃𑌂𑌗 𑌇𑌵 𑌧𑍍𑌯𑌾𑌨𑌾𑌦𑍍𑌯𑌥𑌾 𑌭𑌵𑌤𑌿 𑌤𑌾𑌦𑍃𑌶𑌃 ॥ 166 ॥

𑌗𑍁𑌰𑍁𑌧𑍍𑌯𑌾𑌨𑌂 𑌤𑌥𑌾 𑌕𑍃𑌤𑍍𑌵𑌾 𑌸𑍍𑌵𑌯𑌂 𑌬𑍍𑌰𑌹𑍍𑌮𑌮𑌯𑍋 𑌭𑌵𑍇𑌤𑍍 ।
𑌪𑌿𑌂𑌡𑍇 𑌪𑌦𑍇 𑌤𑌥𑌾 𑌰𑍂𑌪𑍇 𑌮𑍁𑌕𑍍𑌤𑌾𑌸𑍍𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ॥ 16𑍭 ॥

𑌶𑍍𑌰𑍀𑌪𑌾𑌰𑍍𑌵𑌤𑍀 𑌉𑌵𑌾𑌚 ।
𑌪𑌿𑌂𑌡𑌂 𑌕𑌿𑌂 𑌤𑍁 𑌮𑌹𑌾𑌦𑍇𑌵 𑌪𑌦𑌂 𑌕𑌿𑌂 𑌸𑌮𑍁𑌦𑌾𑌹𑍃𑌤𑌮𑍍 ।
𑌰𑍂𑌪𑌾𑌤𑍀𑌤𑌂 𑌚 𑌰𑍂𑌪𑌂 𑌕𑌿𑌂 𑌏𑌤𑌦𑌾𑌖𑍍𑌯𑌾𑌹𑌿 𑌶𑌂𑌕𑌰 ॥ 16𑍮 ॥

𑌶𑍍𑌰𑍀𑌮𑌹𑌾𑌦𑍇𑌵 𑌉𑌵𑌾𑌚 ।
𑌪𑌿𑌂𑌡𑌂 𑌕𑍁𑌂𑌡𑌲𑌿𑌨𑍀 𑌶𑌕𑍍𑌤𑌿𑌃 𑌪𑌦𑌂 𑌹𑌂𑌸𑌮𑍁𑌦𑌾𑌹𑍃𑌤𑌮𑍍 ।
𑌰𑍂𑌪𑌂 𑌬𑌿𑌂𑌦𑍁𑌰𑌿𑌤𑌿 𑌜𑍍𑌞𑍇𑌯𑌂 𑌰𑍂𑌪𑌾𑌤𑍀𑌤𑌂 𑌨𑌿𑌰𑌂𑌜𑌨𑌮𑍍 ॥ 16𑍯 ॥

𑌪𑌿𑌂𑌡𑍇 𑌮𑍁𑌕𑍍𑌤𑌾𑌃 𑌪𑌦𑍇 𑌮𑍁𑌕𑍍𑌤𑌾 𑌰𑍂𑌪𑍇 𑌮𑍁𑌕𑍍𑌤𑌾 𑌵𑌰𑌾𑌨𑌨𑍇 ।
𑌰𑍂𑌪𑌾𑌤𑍀𑌤𑍇 𑌤𑍁 𑌯𑍇 𑌮𑍁𑌕𑍍𑌤𑌾𑌸𑍍𑌤𑍇 𑌮𑍁𑌕𑍍𑌤𑌾 𑌨𑌾𑌽𑌤𑍍𑌰 𑌸𑌂𑌶𑌯𑌃 ॥ 1𑍭0 ॥

𑌗𑍁𑌰𑍁𑌰𑍍𑌧𑍍𑌯𑌾𑌨𑍇𑌨𑍈𑌵 𑌨𑌿𑌤𑍍𑌯𑌂 𑌦𑍇𑌹𑍀 𑌬𑍍𑌰𑌹𑍍𑌮𑌮𑌯𑍋 𑌭𑌵𑍇𑌤𑍍 ।
𑌸𑍍𑌥𑌿𑌤𑌶𑍍𑌚 𑌯𑌤𑍍𑌰 𑌕𑍁𑌤𑍍𑌰𑌾𑌽𑌪𑌿 𑌮𑍁𑌕𑍍𑌤𑍋𑌽𑌸𑍌 𑌨𑌾𑌽𑌤𑍍𑌰 𑌸𑌂𑌶𑌯𑌃 ॥ 1𑍭1 ॥

𑌜𑍍𑌞𑌾𑌨𑌂 𑌵𑍈𑌰𑌾𑌗𑍍𑌯𑌮𑍈𑌶𑍍𑌵𑌰𑍍𑌯𑌂 𑌯𑌶𑌶𑍍𑌰𑍀𑌃 𑌸𑍍𑌵𑌮𑍁𑌦𑌾𑌹𑍃𑌤𑌮𑍍 ।
𑌷𑌡𑍍𑌗𑍁𑌣𑍈𑌶𑍍𑌵𑌰𑍍𑌯𑌯𑍁𑌕𑍍𑌤𑍋 𑌹𑌿 𑌭𑌗𑌵𑌾𑌨𑍍 𑌶𑍍𑌰𑍀𑌗𑍁𑌰𑍁𑌃 𑌪𑍍𑌰𑌿𑌯𑍇 ॥ 1𑍭2 ॥

𑌗𑍁𑌰𑍁𑌶𑍍𑌶𑌿𑌵𑍋 𑌗𑍁𑌰𑍁𑌰𑍍𑌦𑍇𑌵𑍋 𑌗𑍁𑌰𑍁𑌰𑍍𑌬𑌂𑌧𑍁𑌃 𑌶𑌰𑍀𑌰𑌿𑌣𑌾𑌮𑍍 ।
𑌗𑍁𑌰𑍁𑌰𑌾𑌤𑍍𑌮𑌾 𑌗𑍁𑌰𑍁𑌰𑍍𑌜𑍀𑌵𑍋 𑌗𑍁𑌰𑍋𑌰𑌨𑍍𑌯𑌨𑍍𑌨 𑌵𑌿𑌦𑍍𑌯𑌤𑍇 ॥ 1𑍭3 ॥

𑌏𑌕𑌾𑌕𑍀 𑌨𑌿𑌸𑍍𑌸𑍍𑌪𑍃𑌹𑌃 𑌶𑌾𑌂𑌤𑌶𑍍𑌚𑌿𑌂𑌤𑌾𑌽𑌸𑍂𑌯𑌾𑌦𑌿𑌵𑌰𑍍𑌜𑌿𑌤𑌃 ।
𑌬𑌾𑌲𑍍𑌯𑌭𑌾𑌵𑍇𑌨 𑌯𑍋 𑌭𑌾𑌤𑌿 𑌬𑍍𑌰𑌹𑍍𑌮𑌜𑍍𑌞𑌾𑌨𑍀 𑌸 𑌉𑌚𑍍𑌯𑌤𑍇 ॥ 1𑍭4 ॥

𑌨 𑌸𑍁𑌖𑌂 𑌵𑍇𑌦𑌶𑌾𑌸𑍍𑌤𑍍𑌰𑍇𑌷𑍁 𑌨 𑌸𑍁𑌖𑌂 𑌮𑌂𑌤𑍍𑌰𑌯𑌂𑌤𑍍𑌰𑌕𑍇 ।
𑌗𑍁𑌰𑍋𑌃 𑌪𑍍𑌰𑌸𑌾𑌦𑌾𑌦𑌨𑍍𑌯𑌤𑍍𑌰 𑌸𑍁𑌖𑌂 𑌨𑌾𑌸𑍍𑌤𑌿 𑌮𑌹𑍀𑌤𑌲𑍇 ॥ 1𑍭5 ॥

𑌚𑌾𑌰𑍍𑌵𑌾𑌕𑌵𑍈𑌷𑍍𑌣𑌵𑌮𑌤𑍇 𑌸𑍁𑌖𑌂 𑌪𑍍𑌰𑌾𑌭𑌾𑌕𑌰𑍇 𑌨 𑌹𑌿 ।
𑌗𑍁𑌰𑍋𑌃 𑌪𑌾𑌦𑌾𑌂𑌤𑌿𑌕𑍇 𑌯𑌦𑍍𑌵𑌤𑍍𑌸𑍁𑌖𑌂 𑌵𑍇𑌦𑌾𑌂𑌤𑌸𑌮𑍍𑌮𑌤𑌮𑍍 ॥ 1𑍭6 ॥

𑌨 𑌤𑌤𑍍𑌸𑍁𑌖𑌂 𑌸𑍁𑌰𑍇𑌂𑌦𑍍𑌰𑌸𑍍𑌯 𑌨 𑌸𑍁𑌖𑌂 𑌚𑌕𑍍𑌰𑌵𑌰𑍍𑌤𑌿𑌨𑌾𑌮𑍍 ।
𑌯𑌤𑍍𑌸𑍁𑌖𑌂 𑌵𑍀𑌤𑌰𑌾𑌗𑌸𑍍𑌯 𑌮𑍁𑌨𑍇𑌰𑍇𑌕𑌾𑌂𑌤𑌵𑌾𑌸𑌿𑌨𑌃 ॥ 1𑍭𑍭 ॥

𑌨𑌿𑌤𑍍𑌯𑌂 𑌬𑍍𑌰𑌹𑍍𑌮𑌰𑌸𑌂 𑌪𑍀𑌤𑍍𑌵𑌾 𑌤𑍃𑌪𑍍𑌤𑍋 𑌯𑌃 𑌪𑌰𑌮𑌾𑌤𑍍𑌮𑌨𑌿 ।
𑌇𑌂𑌦𑍍𑌰𑌂 𑌚 𑌮𑌨𑍍𑌯𑌤𑍇 𑌤𑍁𑌚𑍍𑌛𑌂 𑌨𑍃𑌪𑌾𑌣𑌾𑌂 𑌤𑌤𑍍𑌰 𑌕𑌾 𑌕𑌥𑌾 ॥ 1𑍭𑍮 ॥

𑌯𑌤𑌃 𑌪𑌰𑌮𑌕𑍈𑌵𑌲𑍍𑌯𑌂 𑌗𑍁𑌰𑍁𑌮𑌾𑌰𑍍𑌗𑍇𑌣 𑌵𑍈 𑌭𑌵𑍇𑌤𑍍 ।
𑌗𑍁𑌰𑍁𑌭𑌕𑍍𑌤𑌿𑌰𑌤𑌃 𑌕𑌾𑌰𑍍𑌯𑌾 𑌸𑌰𑍍𑌵𑌦𑌾 𑌮𑍋𑌕𑍍𑌷𑌕𑌾𑌂𑌕𑍍𑌷𑌿𑌭𑌿𑌃 ॥ 1𑍭𑍯 ॥

𑌏𑌕 𑌏𑌵𑌾𑌽𑌦𑍍𑌵𑌿𑌤𑍀𑌯𑍋𑌽𑌹𑌂 𑌗𑍁𑌰𑍁𑌵𑌾𑌕𑍍𑌯𑍇𑌨 𑌨𑌿𑌶𑍍𑌚𑌿𑌤𑌃 ।
𑌏𑌵𑌮𑌭𑍍𑌯𑌸𑍍𑌯𑌤𑌾 𑌨𑌿𑌤𑍍𑌯𑌂 𑌨 𑌸𑍇𑌵𑍍𑌯𑌂 𑌵𑍈 𑌵𑌨𑌾𑌂𑌤𑌰𑌮𑍍 ॥ 1𑍮0 ॥

𑌅𑌭𑍍𑌯𑌾𑌸𑌾𑌨𑍍𑌨𑌿𑌮𑌿𑌷𑍇𑌣𑍈𑌵 𑌸𑌮𑌾𑌧𑌿𑌮𑌧𑌿𑌗𑌚𑍍𑌛𑌤𑌿 ।
𑌆𑌜𑌨𑍍𑌮𑌜𑌨𑌿𑌤𑌂 𑌪𑌾𑌪𑌂 𑌤𑌤𑍍​𑌕𑍍𑌷𑌣𑌾𑌦𑍇𑌵 𑌨𑌶𑍍𑌯𑌤𑌿 ॥ 1𑍮1 ॥

𑌕𑌿𑌮𑌾𑌵𑌾𑌹𑌨𑌮𑌵𑍍𑌯𑌕𑍍𑌤𑍇 𑌵𑍍𑌯𑌾𑌪𑌕𑍇 𑌕𑌿𑌂 𑌵𑌿𑌸𑌰𑍍𑌜𑌨𑌮𑍍 ।
𑌅𑌮𑍂𑌰𑍍𑌤𑍇 𑌚 𑌕𑌥𑌂 𑌪𑍂𑌜𑌾 𑌕𑌥𑌂 𑌧𑍍𑌯𑌾𑌨𑌂 𑌨𑌿𑌰𑌾𑌮𑌯𑍇 ॥ 1𑍮2 ॥

𑌗𑍁𑌰𑍁𑌰𑍍𑌵𑌿𑌷𑍍𑌣𑍁𑌃 𑌸𑌤𑍍𑌤𑍍𑌵𑌮𑌯𑍋 𑌰𑌾𑌜𑌸𑌶𑍍𑌚𑌤𑍁𑌰𑌾𑌨𑌨𑌃 ।
𑌤𑌾𑌮𑌸𑍋 𑌰𑍁𑌦𑍍𑌰𑌰𑍂𑌪𑍇𑌣 𑌸𑍃𑌜𑌤𑍍𑌯𑌵𑌤𑌿 𑌹𑌂𑌤𑌿 𑌚 ॥ 1𑍮3 ॥

𑌸𑍍𑌵𑌯𑌂 𑌬𑍍𑌰𑌹𑍍𑌮𑌮𑌯𑍋 𑌭𑍂𑌤𑍍𑌵𑌾 𑌤𑌤𑍍𑌪𑌰𑌂 𑌚𑌾𑌵𑌲𑍋𑌕𑌯𑍇𑌤𑍍 ।
𑌪𑌰𑌾𑌤𑍍𑌪𑌰𑌤𑌰𑌂 𑌨𑌾𑌨𑍍𑌯𑌤𑍍 𑌸𑌰𑍍𑌵𑌗𑌂 𑌤𑌨𑍍𑌨𑌿𑌰𑌾𑌮𑌯𑌮𑍍 ॥ 1𑍮4 ॥

𑌤𑌸𑍍𑌯𑌾𑌵𑌲𑍋𑌕𑌨𑌂 𑌪𑍍𑌰𑌾𑌪𑍍𑌯 𑌸𑌰𑍍𑌵𑌸𑌂𑌗𑌵𑌿𑌵𑌰𑍍𑌜𑌿𑌤𑌃 ।
𑌏𑌕𑌾𑌕𑍀 𑌨𑌿𑌸𑍍𑌸𑍍𑌪𑍃𑌹𑌃 𑌶𑌾𑌂𑌤𑌃 𑌸𑍍𑌥𑌾𑌤𑌵𑍍𑌯𑌂 𑌤𑌤𑍍𑌪𑍍𑌰𑌸𑌾𑌦𑌤𑌃 ॥ 1𑍮5 ॥

𑌲𑌬𑍍𑌧𑌂 𑌵𑌾𑌽𑌥 𑌨 𑌲𑌬𑍍𑌧𑌂 𑌵𑌾 𑌸𑍍𑌵𑌲𑍍𑌪𑌂 𑌵𑌾 𑌬𑌹𑍁𑌳𑌂 𑌤𑌥𑌾 ।
𑌨𑌿𑌷𑍍𑌕𑌾𑌮𑍇𑌨𑍈𑌵 𑌭𑍋𑌕𑍍𑌤𑌵𑍍𑌯𑌂 𑌸𑌦𑌾 𑌸𑌂𑌤𑍁𑌷𑍍𑌟𑌮𑌾𑌨𑌸𑌃 ॥ 1𑍮6 ॥

𑌸𑌰𑍍𑌵𑌜𑍍𑌞𑌪𑌦𑌮𑌿𑌤𑍍𑌯𑌾𑌹𑍁𑌰𑍍𑌦𑍇𑌹𑍀 𑌸𑌰𑍍𑌵𑌮𑌯𑍋 𑌭𑍁𑌵𑌿 ।
𑌸𑌦𑌾𑌽𑌽𑌨𑌂𑌦𑌃 𑌸𑌦𑌾 𑌶𑌾𑌂𑌤𑍋 𑌰𑌮𑌤𑍇 𑌯𑌤𑍍𑌰 𑌕𑍁𑌤𑍍𑌰 𑌚𑌿𑌤𑍍 ॥ 1𑍮𑍭 ॥

𑌯𑌤𑍍𑌰𑍈𑌵 𑌤𑌿𑌷𑍍𑌠𑌤𑍇 𑌸𑍋𑌽𑌪𑌿 𑌸 𑌦𑍇𑌶𑌃 𑌪𑍁𑌣𑍍𑌯𑌭𑌾𑌜𑌨𑌃 ।
𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌂 𑌦𑍇𑌵𑌿 𑌤𑌵𑌾𑌽𑌗𑍍𑌰𑍇 𑌕𑌥𑌿𑌤𑌂 𑌮𑌯𑌾 ॥ 1𑍮𑍮 ॥

𑌉𑌪𑌦𑍇𑌶𑌸𑍍𑌤𑍍𑌵𑌯𑌂 𑌦𑍇𑌵𑌿 𑌗𑍁𑌰𑍁𑌮𑌾𑌰𑍍𑌗𑍇𑌣 𑌮𑍁𑌕𑍍𑌤𑌿𑌦𑌃 ।
𑌗𑍁𑌰𑍁𑌭𑌕𑍍𑌤𑌿𑌃 𑌤𑌥𑌾𑌽𑌤𑍍𑌯𑌂𑌤𑌾 𑌕𑌰𑍍𑌤𑌵𑍍𑌯𑌾 𑌵𑍈 𑌮𑌨𑍀𑌷𑌿𑌭𑌿𑌃 ॥ 1𑍮𑍯 ॥

𑌨𑌿𑌤𑍍𑌯𑌯𑍁𑌕𑍍𑌤𑌾𑌶𑍍𑌰𑌯𑌃 𑌸𑌰𑍍𑌵𑌵𑍇𑌦𑌕𑍃𑌤𑍍𑌸𑌰𑍍𑌵𑌵𑍇𑌦𑌕𑍃𑌤𑍍 ।
𑌸𑍍𑌵𑌪𑌰𑌜𑍍𑌞𑌾𑌨𑌦𑌾𑌤𑌾 𑌚 𑌤𑌂 𑌵𑌂𑌦𑍇 𑌗𑍁𑌰𑍁𑌮𑍀𑌶𑍍𑌵𑌰𑌮𑍍 ॥ 1𑍯0 ॥

𑌯𑌦𑍍𑌯𑌪𑍍𑌯𑌧𑍀𑌤𑌾 𑌨𑌿𑌗𑌮𑌾𑌃 𑌷𑌡𑌂𑌗𑌾 𑌆𑌗𑌮𑌾𑌃 𑌪𑍍𑌰𑌿𑌯𑍇 ।
𑌅𑌧𑍍𑌯𑌾𑌤𑍍𑌮𑌾𑌦𑍀𑌨𑌿 𑌶𑌾𑌸𑍍𑌤𑍍𑌰𑌾𑌣𑌿 𑌜𑍍𑌞𑌾𑌨𑌂 𑌨𑌾𑌸𑍍𑌤𑌿 𑌗𑍁𑌰𑍁𑌂 𑌵𑌿𑌨𑌾 ॥ 1𑍯1 ॥

𑌶𑌿𑌵𑌪𑍂𑌜𑌾𑌰𑌤𑍋 𑌵𑌾𑌽𑌪𑌿 𑌵𑌿𑌷𑍍𑌣𑍁𑌪𑍂𑌜𑌾𑌰𑌤𑍋𑌽𑌥𑌵𑌾 ।
𑌗𑍁𑌰𑍁𑌤𑌤𑍍𑌤𑍍𑌵𑌵𑌿𑌹𑍀𑌨𑌶𑍍𑌚𑍇𑌤𑍍𑌤𑌤𑍍𑌸𑌰𑍍𑌵𑌂 𑌵𑍍𑌯𑌰𑍍𑌥𑌮𑍇𑌵 𑌹𑌿 ॥ 1𑍯2 ॥

𑌶𑌿𑌵𑌸𑍍𑌵𑌰𑍂𑌪𑌮𑌜𑍍𑌞𑌾𑌤𑍍𑌵𑌾 𑌶𑌿𑌵𑌪𑍂𑌜𑌾 𑌕𑍃𑌤𑌾 𑌯𑌦𑌿 ।
𑌸𑌾 𑌪𑍂𑌜𑌾 𑌨𑌾𑌮𑌮𑌾𑌤𑍍𑌰𑌂 𑌸𑍍𑌯𑌾𑌚𑍍𑌚𑌿𑌤𑍍𑌰𑌦𑍀𑌪 𑌇𑌵 𑌪𑍍𑌰𑌿𑌯𑍇 ॥ 1𑍯3 ॥

𑌸𑌰𑍍𑌵𑌂 𑌸𑍍𑌯𑌾𑌤𑍍𑌸𑌫𑌲𑌂 𑌕𑌰𑍍𑌮 𑌗𑍁𑌰𑍁𑌦𑍀𑌕𑍍𑌷𑌾𑌪𑍍𑌰𑌭𑌾𑌵𑌤𑌃 ।
𑌗𑍁𑌰𑍁𑌲𑌾𑌭𑌾𑌤𑍍𑌸𑌰𑍍𑌵𑌲𑌾𑌭𑍋 𑌗𑍁𑌰𑍁𑌹𑍀𑌨𑌸𑍍𑌤𑍁 𑌬𑌾𑌲𑌿𑌶𑌃 ॥ 1𑍯4 ॥

𑌗𑍁𑌰𑍁𑌹𑍀𑌨𑌃 𑌪𑌶𑍁𑌃 𑌕𑍀𑌟𑌃 𑌪𑌤𑌂𑌗𑍋 𑌵𑌕𑍍𑌤𑍁𑌮𑌰𑍍𑌹𑌤𑌿 ।
𑌶𑌿𑌵𑌰𑍂𑌪𑌂 𑌸𑍍𑌵𑌰𑍂𑌪𑌂 𑌚 𑌨 𑌜𑌾𑌨𑌾𑌤𑌿 𑌯𑌤𑌸𑍍𑌸𑍍𑌵𑌯𑌮𑍍 ॥ 1𑍯5 ॥

𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌸𑌰𑍍𑌵𑌸𑌂𑌗𑌵𑌿𑌵𑌰𑍍𑌜𑌿𑌤𑌃 ।
𑌵𑌿𑌹𑌾𑌯 𑌶𑌾𑌸𑍍𑌤𑍍𑌰𑌜𑌾𑌲𑌾𑌨𑌿 𑌗𑍁𑌰𑍁𑌮𑍇𑌵 𑌸𑌮𑌾𑌶𑍍𑌰𑌯𑍇𑌤𑍍 ॥ 1𑍯6 ॥

𑌨𑌿𑌰𑌸𑍍𑌤𑌸𑌰𑍍𑌵𑌸𑌂𑌦𑍇𑌹𑍋 𑌏𑌕𑍀𑌕𑍃𑌤𑍍𑌯 𑌸𑍁𑌦𑌰𑍍𑌶𑌨𑌮𑍍 ।
𑌰𑌹𑌸𑍍𑌯𑌂 𑌯𑍋 𑌦𑌰𑍍𑌶𑌯𑌤𑌿 𑌭𑌜𑌾𑌮𑌿 𑌗𑍁𑌰𑍁𑌮𑍀𑌶𑍍𑌵𑌰𑌮𑍍 ॥ 1𑍯𑍭 ॥

𑌜𑍍𑌞𑌾𑌨𑌹𑍀𑌨𑍋 𑌗𑍁𑌰𑍁𑌸𑍍𑌤𑍍𑌯𑌾𑌜𑍍𑌯𑍋 𑌮𑌿𑌥𑍍𑌯𑌾𑌵𑌾𑌦𑍀 𑌵𑌿𑌡𑌂𑌬𑌕𑌃 ।
𑌸𑍍𑌵𑌵𑌿𑌶𑍍𑌰𑌾𑌂𑌤𑌿𑌂 𑌨 𑌜𑌾𑌨𑌾𑌤𑌿 𑌪𑌰𑌶𑌾𑌂𑌤𑌿𑌂 𑌕𑌰𑍋𑌤𑌿 𑌕𑌿𑌮𑍍 ॥ 1𑍯𑍮 ॥

𑌶𑌿𑌲𑌾𑌯𑌾𑌃 𑌕𑌿𑌂 𑌪𑌰𑌂 𑌜𑍍𑌞𑌾𑌨𑌂 𑌶𑌿𑌲𑌾𑌸𑌂𑌘𑌪𑍍𑌰𑌤𑌾𑌰𑌣𑍇 ।
𑌸𑍍𑌵𑌯𑌂 𑌤𑌰𑍍𑌤𑍁𑌂 𑌨 𑌜𑌾𑌨𑌾𑌤𑌿 𑌪𑌰𑌂 𑌨𑌿𑌸𑍍𑌤𑌾𑌰𑌯𑍇𑌤𑍍 𑌕𑌥𑌮𑍍 ॥ 1𑍯𑍯 ॥

𑌨 𑌵𑌂𑌦𑌨𑍀𑌯𑌾𑌸𑍍𑌤𑍇 𑌕𑌷𑍍𑌟𑌂 𑌦𑌰𑍍𑌶𑌨𑌾𑌦𑍍𑌭𑍍𑌰𑌾𑌂𑌤𑌿𑌕𑌾𑌰𑌕𑌾𑌃 ।
𑌵𑌰𑍍𑌜𑌯𑍇𑌤𑍍𑌤𑌾𑌨𑍍 𑌗𑍁𑌰𑍂𑌨𑍍 𑌦𑍂𑌰𑍇 𑌧𑍀𑌰𑌸𑍍𑌯 𑌤𑍁 𑌸𑌮𑌾𑌶𑍍𑌰𑌯𑍇𑌤𑍍 ॥ 200 ॥

𑌪𑌾𑌷𑌂𑌡𑌿𑌨𑌃 𑌪𑌾𑌪𑌰𑌤𑌾𑌃 𑌨𑌾𑌸𑍍𑌤𑌿𑌕𑌾 𑌭𑍇𑌦𑌬𑍁𑌦𑍍𑌧𑌯𑌃 ।
𑌸𑍍𑌤𑍍𑌰𑍀𑌲𑌂𑌪𑌟𑌾 𑌦𑍁𑌰𑌾𑌚𑌾𑌰𑌾𑌃 𑌕𑍃𑌤𑌘𑍍𑌨𑌾 𑌬𑌕𑌵𑍃𑌤𑍍𑌤𑌯𑌃 ॥ 201 ॥

𑌕𑌰𑍍𑌮𑌭𑍍𑌰𑌷𑍍𑌟𑌾𑌃 𑌕𑍍𑌷𑌮𑌾𑌨𑌷𑍍𑌟𑌾 𑌨𑌿𑌂𑌦𑍍𑌯𑌤𑌰𑍍𑌕𑍈𑌶𑍍𑌚 𑌵𑌾𑌦𑌿𑌨𑌃 ।
𑌕𑌾𑌮𑌿𑌨𑌃 𑌕𑍍𑌰𑍋𑌧𑌿𑌨𑌶𑍍𑌚𑍈𑌵 𑌹𑌿𑌂𑌸𑍍𑌰𑌾𑌶𑍍𑌚𑌂𑌡𑌾𑌃 𑌶𑌠𑌾𑌸𑍍𑌤𑌥𑌾 ॥ 202 ॥

𑌜𑍍𑌞𑌾𑌨𑌲𑍁𑌪𑍍𑌤𑌾 𑌨 𑌕𑌰𑍍𑌤𑌵𑍍𑌯𑌾 𑌮𑌹𑌾𑌪𑌾𑌪𑌾𑌸𑍍𑌤𑌥𑌾 𑌪𑍍𑌰𑌿𑌯𑍇 ।
𑌏𑌭𑍍𑌯𑍋 𑌭𑌿𑌨𑍍𑌨𑍋 𑌗𑍁𑌰𑍁𑌃 𑌸𑍇𑌵𑍍𑌯𑌃 𑌏𑌕𑌭𑌕𑍍𑌤𑍍𑌯𑌾 𑌵𑌿𑌚𑌾𑌰𑍍𑌯 𑌚 ॥ 203 ॥

𑌶𑌿𑌷𑍍𑌯𑌾𑌦𑌨𑍍𑌯𑌤𑍍𑌰 𑌦𑍇𑌵𑍇𑌶𑌿 𑌨 𑌵𑌦𑍇𑌦𑍍𑌯𑌸𑍍𑌯 𑌕𑌸𑍍𑌯𑌚𑌿𑌤𑍍 ।
𑌨𑌰𑌾𑌣𑌾𑌂 𑌚 𑌫𑌲𑌪𑍍𑌰𑌾𑌪𑍍𑌤𑍌 𑌭𑌕𑍍𑌤𑌿𑌰𑍇𑌵 𑌹𑌿 𑌕𑌾𑌰𑌣𑌮𑍍 ॥ 204 ॥

𑌗𑍂𑌢𑍋 𑌦𑍃𑌢𑌶𑍍𑌚 𑌪𑍍𑌰𑍀𑌤𑌶𑍍𑌚 𑌮𑍌𑌨𑍇𑌨 𑌸𑍁𑌸𑌮𑌾𑌹𑌿𑌤𑌃 ।
𑌸𑌕𑍃𑌤𑍍𑌕𑌾𑌮𑌗𑌤𑍋 𑌵𑌾𑌽𑌪𑌿 𑌪𑌂𑌚𑌧𑌾 𑌗𑍁𑌰𑍁𑌰𑍀𑌰𑌿𑌤𑌃 ॥ 205 ॥

𑌸𑌰𑍍𑌵𑌂 𑌗𑍁𑌰𑍁𑌮𑍁𑌖𑌾𑌲𑍍𑌲𑌬𑍍𑌧𑌂 𑌸𑌫𑌲𑌂 𑌪𑌾𑌪𑌨𑌾𑌶𑌨𑌮𑍍 ।
𑌯𑌦𑍍𑌯𑌦𑌾𑌤𑍍𑌮𑌹𑌿𑌤𑌂 𑌵𑌸𑍍𑌤𑍁 𑌤𑌤𑍍𑌤𑌦𑍍𑌦𑍍𑌰𑌵𑍍𑌯𑌂 𑌨 𑌵𑌂𑌚𑌯𑍇𑌤𑍍 ॥ 206 ॥

𑌗𑍁𑌰𑍁𑌦𑍇𑌵𑌾𑌰𑍍𑌪𑌣𑌂 𑌵𑌸𑍍𑌤𑍁 𑌤𑍇𑌨 𑌤𑍁𑌷𑍍𑌟𑍋𑌽𑌸𑍍𑌮𑌿 𑌸𑍁𑌵𑍍𑌰𑌤𑍇 ।
𑌶𑍍𑌰𑍀𑌗𑍁𑌰𑍋𑌃 𑌪𑌾𑌦𑍁𑌕𑌾𑌂 𑌮𑍁𑌦𑍍𑌰𑌾𑌂 𑌮𑍂𑌲𑌮𑌂𑌤𑍍𑌰𑌂 𑌚 𑌗𑍋𑌪𑌯𑍇𑌤𑍍 ॥ 20𑍭 ॥

𑌨𑌤𑌾𑌽𑌸𑍍𑌮𑌿 𑌤𑍇 𑌨𑌾𑌥 𑌪𑌦𑌾𑌰𑌵𑌿𑌂𑌦𑌂
𑌬𑍁𑌦𑍍𑌧𑍀𑌂𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌵𑌚𑍋𑌭𑌿𑌃 ।
𑌯𑌚𑍍𑌚𑌿𑌂𑌤𑍍𑌯𑌤𑍇 𑌭𑌾𑌵𑌿𑌤 𑌆𑌤𑍍𑌮𑌯𑍁𑌕𑍍𑌤𑍌
𑌮𑍁𑌮𑍁𑌕𑍍𑌷𑌿𑌭𑌿𑌃 𑌕𑌰𑍍𑌮𑌮𑌯𑍋𑌪𑌶𑌾𑌂𑌤𑌯𑍇 ॥ 20𑍮 ॥

𑌅𑌨𑍇𑌨 𑌯𑌦𑍍𑌭𑌵𑍇𑌤𑍍𑌕𑌾𑌰𑍍𑌯𑌂 𑌤𑌦𑍍𑌵𑌦𑌾𑌮𑌿 𑌤𑌵 𑌪𑍍𑌰𑌿𑌯𑍇 ।
𑌲𑍋𑌕𑍋𑌪𑌕𑌾𑌰𑌕𑌂 𑌦𑍇𑌵𑌿 𑌲𑍌𑌕𑌿𑌕𑌂 𑌤𑍁 𑌵𑌿𑌵𑌰𑍍𑌜𑌯𑍇𑌤𑍍 ॥ 20𑍯 ॥

𑌲𑍌𑌕𑌿𑌕𑌾𑌦𑍍𑌧𑌰𑍍𑌮𑌤𑍋 𑌯𑌾𑌤𑌿 𑌜𑍍𑌞𑌾𑌨𑌹𑍀𑌨𑍋 𑌭𑌵𑌾𑌰𑍍𑌣𑌵𑍇 ।
𑌜𑍍𑌞𑌾𑌨𑌭𑌾𑌵𑍇 𑌚 𑌯𑌤𑍍𑌸𑌰𑍍𑌵𑌂 𑌕𑌰𑍍𑌮 𑌨𑌿𑌷𑍍𑌕𑌰𑍍𑌮 𑌶𑌾𑌮𑍍𑌯𑌤𑌿 ॥ 210 ॥

𑌇𑌮𑌾𑌂 𑌤𑍁 𑌭𑌕𑍍𑌤𑌿𑌭𑌾𑌵𑍇𑌨 𑌪𑌠𑍇𑌦𑍍𑌵𑍈 𑌶𑍃𑌣𑍁𑌯𑌾𑌦𑌪𑌿 ।
𑌲𑌿𑌖𑌿𑌤𑍍𑌵𑌾 𑌯𑌤𑍍𑌪𑍍𑌰𑌦𑌾𑌨𑍇𑌨 𑌤𑌤𑍍𑌸𑌰𑍍𑌵𑌂 𑌫𑌲𑌮𑌶𑍍𑌨𑍁𑌤𑍇 ॥ 211 ॥

𑌗𑍁𑌰𑍁𑌗𑍀𑌤𑌾𑌮𑌿𑌮𑌾𑌂 𑌦𑍇𑌵𑌿 𑌹𑍃𑌦𑌿 𑌨𑌿𑌤𑍍𑌯𑌂 𑌵𑌿𑌭𑌾𑌵𑌯 ।
𑌮𑌹𑌾𑌵𑍍𑌯𑌾𑌧𑌿𑌗𑌤𑍈𑌰𑍍𑌦𑍁𑌃𑌖𑍈𑌃 𑌸𑌰𑍍𑌵𑌦𑌾 𑌪𑍍𑌰𑌜𑌪𑍇𑌨𑍍𑌮𑍁𑌦𑌾 ॥ 212 ॥

𑌗𑍁𑌰𑍁𑌗𑍀𑌤𑌾𑌕𑍍𑌷𑌰𑍈𑌕𑍈𑌕𑌂 𑌮𑌂𑌤𑍍𑌰𑌰𑌾𑌜𑌮𑌿𑌦𑌂 𑌪𑍍𑌰𑌿𑌯𑍇 ।
𑌅𑌨𑍍𑌯𑍇 𑌚 𑌵𑌿𑌵𑌿𑌧𑌾𑌃 𑌮𑌂𑌤𑍍𑌰𑌾𑌃 𑌕𑌲𑌾𑌂 𑌨𑌾𑌰𑍍𑌹𑌂𑌤𑌿 𑌷𑍋𑌡𑌶𑍀𑌮𑍍 ॥ 213 ॥

𑌅𑌨𑌂𑌤 𑌫𑌲𑌮𑌾𑌪𑍍𑌨𑍋𑌤𑌿 𑌗𑍁𑌰𑍁𑌗𑍀𑌤𑌾 𑌜𑌪𑍇𑌨 𑌤𑍁 ।
𑌸𑌰𑍍𑌵𑌪𑌾𑌪𑌹𑌰𑌾 𑌦𑍇𑌵𑌿 𑌸𑌰𑍍𑌵𑌦𑌾𑌰𑌿𑌦𑍍𑌰𑍍𑌯𑌨𑌾𑌶𑌿𑌨𑍀 ॥ 214 ॥

𑌅𑌕𑌾𑌲𑌮𑍃𑌤𑍍𑌯𑍁𑌹𑌰𑌾 𑌚𑍈𑌵 𑌸𑌰𑍍𑌵𑌸𑌂𑌕𑌟𑌨𑌾𑌶𑌿𑌨𑍀 ।
𑌯𑌕𑍍𑌷𑌰𑌾𑌕𑍍𑌷𑌸𑌭𑍂𑌤𑌾𑌦𑌿𑌚𑍋𑌰𑌵𑍍𑌯𑌾𑌘𑍍𑌰𑌵𑌿𑌘𑌾𑌤𑌿𑌨𑍀 ॥ 215 ॥

𑌸𑌰𑍍𑌵𑍋𑌪𑌦𑍍𑌰𑌵𑌕𑍁𑌷𑍍𑌠𑌾𑌦𑌿𑌦𑍁𑌷𑍍𑌟𑌦𑍋𑌷𑌨𑌿𑌵𑌾𑌰𑌿𑌣𑍀 ।
𑌯𑌤𑍍𑌫𑌲𑌂 𑌗𑍁𑌰𑍁𑌸𑌾𑌨𑍍𑌨𑌿𑌧𑍍𑌯𑌾𑌤𑍍𑌤𑌤𑍍𑌫𑌲𑌂 𑌪𑌠𑌨𑌾𑌦𑍍𑌭𑌵𑍇𑌤𑍍 ॥ 216 ॥

𑌮𑌹𑌾𑌵𑍍𑌯𑌾𑌧𑌿𑌹𑌰𑌾 𑌸𑌰𑍍𑌵𑌵𑌿𑌭𑍂𑌤𑍇𑌃 𑌸𑌿𑌦𑍍𑌧𑌿𑌦𑌾 𑌭𑌵𑍇𑌤𑍍 ।
𑌅𑌥𑌵𑌾 𑌮𑍋𑌹𑌨𑍇 𑌵𑌶𑍍𑌯𑍇 𑌸𑍍𑌵𑌯𑌮𑍇𑌵 𑌜𑌪𑍇𑌤𑍍𑌸𑌦𑌾 ॥ 21𑍭 ॥

𑌕𑍁𑌶𑌦𑍂𑌰𑍍𑌵𑌾𑌸𑌨𑍇 𑌦𑍇𑌵𑌿 𑌹𑍍𑌯𑌾𑌸𑌨𑍇 𑌶𑍁𑌭𑍍𑌰𑌕𑌂𑌬𑌲𑍇 ।
𑌉𑌪𑌵𑌿𑌶𑍍𑌯 𑌤𑌤𑍋 𑌦𑍇𑌵𑌿 𑌜𑌪𑍇𑌦𑍇𑌕𑌾𑌗𑍍𑌰𑌮𑌾𑌨𑌸𑌃 ॥ 21𑍮 ॥

𑌶𑍁𑌕𑍍𑌲𑌂 𑌸𑌰𑍍𑌵𑌤𑍍𑌰 𑌵𑍈 𑌪𑍍𑌰𑍋𑌕𑍍𑌤𑌂 𑌵𑌶𑍍𑌯𑍇 𑌰𑌕𑍍𑌤𑌾𑌸𑌨𑌂 𑌪𑍍𑌰𑌿𑌯𑍇 ।
𑌪𑌦𑍍𑌮𑌾𑌸𑌨𑍇 𑌜𑌪𑍇𑌨𑍍𑌨𑌿𑌤𑍍𑌯𑌂 𑌶𑌾𑌂𑌤𑌿𑌵𑌶𑍍𑌯𑌕𑌰𑌂 𑌪𑌰𑌮𑍍 ॥ 21𑍯 ॥

𑌵𑌸𑍍𑌤𑍍𑌰𑌾𑌸𑌨𑍇 𑌚 𑌦𑌾𑌰𑌿𑌦𑍍𑌰𑍍𑌯𑌂 𑌪𑌾𑌷𑌾𑌣𑍇 𑌰𑍋𑌗𑌸𑌂𑌭𑌵𑌃 ।
𑌮𑍇𑌦𑌿𑌨𑍍𑌯𑌾𑌂 𑌦𑍁𑌃𑌖𑌮𑌾𑌪𑍍𑌨𑍋𑌤𑌿 𑌕𑌾𑌷𑍍𑌠𑍇 𑌭𑌵𑌤𑌿 𑌨𑌿𑌷𑍍𑌫𑌲𑌮𑍍 ॥ 220 ॥

𑌕𑍃𑌷𑍍𑌣𑌾𑌜𑌿𑌨𑍇 𑌜𑍍𑌞𑌾𑌨𑌸𑌿𑌦𑍍𑌧𑌿𑌃 𑌮𑍋𑌕𑍍𑌷𑌶𑍍𑌰𑍀𑌰𑍍𑌵𑍍𑌯𑌾𑌘𑍍𑌰𑌚𑌰𑍍𑌮𑌣𑌿 ।
𑌕𑍁𑌶𑌾𑌸𑌨𑍇 𑌜𑍍𑌞𑌾𑌨𑌸𑌿𑌦𑍍𑌧𑌿𑌃 𑌸𑌰𑍍𑌵𑌸𑌿𑌦𑍍𑌧𑌿𑌸𑍍𑌤𑍁 𑌕𑌂𑌬𑌲𑍇 ॥ 221 ॥

𑌆𑌗𑍍𑌨𑍇𑌯𑍍𑌯𑌾𑌂 𑌕𑌰𑍍𑌷𑌣𑌂 𑌚𑍈𑌵 𑌵𑌾𑌯𑌵𑍍𑌯𑌾𑌂 𑌶𑌤𑍍𑌰𑍁𑌨𑌾𑌶𑌨𑌮𑍍 ।
𑌨𑍈𑌰𑍃𑌤𑍍𑌯𑌾𑌂 𑌦𑌰𑍍𑌶𑌨𑌂 𑌚𑍈𑌵 𑌈𑌶𑌾𑌨𑍍𑌯𑌾𑌂 𑌜𑍍𑌞𑌾𑌨𑌮𑍇𑌵 𑌚 ॥ 222 ॥

𑌉𑌦𑌙𑍍𑌮𑍁𑌖𑌃 𑌶𑌾𑌂𑌤𑌿𑌜𑌾𑌪𑍍𑌯𑍇 𑌵𑌶𑍍𑌯𑍇 𑌪𑍂𑌰𑍍𑌵𑌮𑍁𑌖𑌸𑍍𑌤𑌥𑌾 ।
𑌯𑌾𑌮𑍍𑌯𑍇 𑌤𑍁 𑌮𑌾𑌰𑌣𑌂 𑌪𑍍𑌰𑍋𑌕𑍍𑌤𑌂 𑌪𑌶𑍍𑌚𑌿𑌮𑍇 𑌚 𑌧𑌨𑌾𑌗𑌮𑌃 ॥ 223 ॥

𑌮𑍋𑌹𑌨𑌂 𑌸𑌰𑍍𑌵𑌭𑍂𑌤𑌾𑌨𑌾𑌂 𑌬𑌂𑌧𑌮𑍋𑌕𑍍𑌷𑌕𑌰𑌂 𑌪𑌰𑌮𑍍 ।
𑌦𑍇𑌵𑌰𑌾𑌜𑌪𑍍𑌰𑌿𑌯𑌕𑌰𑌂 𑌰𑌾𑌜𑌾𑌨𑌂 𑌵𑌶𑌮𑌾𑌨𑌯𑍇𑌤𑍍 ॥ 224 ॥

𑌮𑍁𑌖𑌸𑍍𑌤𑌂𑌭𑌕𑌰𑌂 𑌚𑍈𑌵 𑌗𑍁𑌣𑌾𑌨𑌾𑌂 𑌚 𑌵𑌿𑌵𑌰𑍍𑌧𑌨𑌮𑍍 ।
𑌦𑍁𑌷𑍍𑌕𑌰𑍍𑌮𑌨𑌾𑌶𑌨𑌂 𑌚𑍈𑌵 𑌤𑌥𑌾 𑌸𑌤𑍍𑌕𑌰𑍍𑌮𑌸𑌿𑌦𑍍𑌧𑌿𑌦𑌮𑍍 ॥ 225 ॥

𑌅𑌸𑌿𑌦𑍍𑌧𑌂 𑌸𑌾𑌧𑌯𑍇𑌤𑍍𑌕𑌾𑌰𑍍𑌯𑌂 𑌨𑌵𑌗𑍍𑌰𑌹𑌭𑌯𑌾𑌪𑌹𑌮𑍍 ।
𑌦𑍁𑌃𑌸𑍍𑌵𑌪𑍍𑌨𑌨𑌾𑌶𑌨𑌂 𑌚𑍈𑌵 𑌸𑍁𑌸𑍍𑌵𑌪𑍍𑌨𑌫𑌲𑌦𑌾𑌯𑌕𑌮𑍍 ॥ 226 ॥

𑌮𑍋𑌹𑌶𑌾𑌂𑌤𑌿𑌕𑌰𑌂 𑌚𑍈𑌵 𑌬𑌂𑌧𑌮𑍋𑌕𑍍𑌷𑌕𑌰𑌂 𑌪𑌰𑌮𑍍 ।
𑌸𑍍𑌵𑌰𑍂𑌪𑌜𑍍𑌞𑌾𑌨𑌨𑌿𑌲𑌯𑌂 𑌗𑍀𑌤𑌾𑌶𑌾𑌸𑍍𑌤𑍍𑌰𑌮𑌿𑌦𑌂 𑌶𑌿𑌵𑍇 ॥ 22𑍭 ॥

𑌯𑌂 𑌯𑌂 𑌚𑌿𑌂𑌤𑌯𑌤𑍇 𑌕𑌾𑌮𑌂 𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌶𑍍𑌚𑌯𑌮𑍍 ।
𑌨𑌿𑌤𑍍𑌯𑌂 𑌸𑍌𑌭𑌾𑌗𑍍𑌯𑌦𑌂 𑌪𑍁𑌣𑍍𑌯𑌂 𑌤𑌾𑌪𑌤𑍍𑌰𑌯𑌕𑍁𑌲𑌾𑌪𑌹𑌮𑍍 ॥ 22𑍮 ॥

𑌸𑌰𑍍𑌵𑌶𑌾𑌂𑌤𑌿𑌕𑌰𑌂 𑌨𑌿𑌤𑍍𑌯𑌂 𑌤𑌥𑌾 𑌵𑌂𑌧𑍍𑌯𑌾 𑌸𑍁𑌪𑍁𑌤𑍍𑌰𑌦𑌮𑍍 ।
𑌅𑌵𑍈𑌧𑌵𑍍𑌯𑌕𑌰𑌂 𑌸𑍍𑌤𑍍𑌰𑍀𑌣𑌾𑌂 𑌸𑍌𑌭𑌾𑌗𑍍𑌯𑌸𑍍𑌯 𑌵𑌿𑌵𑌰𑍍𑌧𑌨𑌮𑍍 ॥ 22𑍯 ॥

𑌆𑌯𑍁𑌰𑌾𑌰𑍋𑌗𑍍𑌯𑌮𑍈𑌶𑍍𑌵𑌰𑍍𑌯𑌂 𑌪𑍁𑌤𑍍𑌰𑌪𑍌𑌤𑍍𑌰𑌵𑌿𑌵𑌰𑍍𑌧𑌨𑌮𑍍 ।
𑌨𑌿𑌷𑍍𑌕𑌾𑌮𑌜𑌾𑌪𑍀 𑌵𑌿𑌧𑌵𑌾 𑌪𑌠𑍇𑌨𑍍𑌮𑍋𑌕𑍍𑌷𑌮𑌵𑌾𑌪𑍍𑌨𑍁𑌯𑌾𑌤𑍍 ॥ 230 ॥

𑌅𑌵𑍈𑌧𑌵𑍍𑌯𑌂 𑌸𑌕𑌾𑌮𑌾 𑌤𑍁 𑌲𑌭𑌤𑍇 𑌚𑌾𑌨𑍍𑌯𑌜𑌨𑍍𑌮𑌨𑌿 ।
𑌸𑌰𑍍𑌵𑌦𑍁𑌃𑌖𑌮𑌯𑌂 𑌵𑌿𑌘𑍍𑌨𑌂 𑌨𑌾𑌶𑌯𑍇𑌤𑍍𑌤𑌾𑌪𑌹𑌾𑌰𑌕𑌮𑍍 ॥ 231 ॥

𑌸𑌰𑍍𑌵𑌪𑌾𑌪𑌪𑍍𑌰𑌶𑌮𑌨𑌂 𑌧𑌰𑍍𑌮𑌕𑌾𑌮𑌾𑌰𑍍𑌥𑌮𑍋𑌕𑍍𑌷𑌦𑌮𑍍 ।
𑌯𑌂 𑌯𑌂 𑌚𑌿𑌂𑌤𑌯𑌤𑍇 𑌕𑌾𑌮𑌂 𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌶𑍍𑌚𑌿𑌤𑌮𑍍 ॥ 232 ॥

𑌕𑌾𑌮𑍍𑌯𑌾𑌨𑌾𑌂 𑌕𑌾𑌮𑌧𑍇𑌨𑍁𑌰𑍍𑌵𑍈 𑌕𑌲𑍍𑌪𑌤𑍇 𑌕𑌲𑍍𑌪𑌪𑌾𑌦𑌪𑌃 ।
𑌚𑌿𑌂𑌤𑌾𑌮𑌣𑌿𑌶𑍍𑌚𑌿𑌂𑌤𑌿𑌤𑌸𑍍𑌯 𑌸𑌰𑍍𑌵𑌮𑌂𑌗𑌳𑌕𑌾𑌰𑌕𑌮𑍍 ॥ 233 ॥

𑌲𑌿𑌖𑌿𑌤𑍍𑌵𑌾 𑌪𑍂𑌜𑌯𑍇𑌦𑍍𑌯𑌸𑍍𑌤𑍁 𑌮𑍋𑌕𑍍𑌷𑌶𑍍𑌰𑌿𑌯𑌮𑌵𑌾𑌪𑍍𑌨𑍁𑌯𑌾𑌤𑍍 ।
𑌗𑍁𑌰𑍂𑌭𑌕𑍍𑌤𑌿𑌰𑍍𑌵𑌿𑌶𑍇𑌷𑍇𑌣 𑌜𑌾𑌯𑌤𑍇 𑌹𑍃𑌦𑌿 𑌸𑌰𑍍𑌵𑌦𑌾 ॥ 234 ॥

𑌜𑌪𑌂𑌤𑌿 𑌶𑌾𑌕𑍍𑌤𑌾𑌃 𑌸𑍌𑌰𑌾𑌶𑍍𑌚 𑌗𑌾𑌣𑌪𑌤𑍍𑌯𑌾𑌶𑍍𑌚 𑌵𑍈𑌷𑍍𑌣𑌵𑌾𑌃 ।
𑌶𑍈𑌵𑌾𑌃 𑌪𑌾𑌶𑍁𑌪𑌤𑌾𑌃 𑌸𑌰𑍍𑌵𑍇 𑌸𑌤𑍍𑌯𑌂 𑌸𑌤𑍍𑌯𑌂 𑌨 𑌸𑌂𑌶𑌯𑌃 ॥ 235 ॥

𑌇𑌤𑌿 𑌶𑍍𑌰𑍀𑌸𑍍𑌕𑌂𑌦𑌪𑍁𑌰𑌾𑌣𑍇 𑌉𑌤𑍍𑌤𑌰𑌖𑌂𑌡𑍇 𑌉𑌮𑌾𑌮𑌹𑍇𑌶𑍍𑌵𑌰 𑌸𑌂𑌵𑌾𑌦𑍇
𑌶𑍍𑌰𑍀 𑌗𑍁𑌰𑍁𑌗𑍀𑌤𑌾𑌯𑌾𑌂 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃 ॥