ධරෝවාච
භගවන් පරමේශාන භක්තිරව්යභිචාරිණී ।
ප්රාරබ්ධං භුජ්යමානස්ය කථං භවති හේ ප්රභෝ ॥ 1 ॥
ශ්රීවිෂ්ණුරුවාච
ප්රාරබ්ධං භුජ්යමානෝ හි ගීතාභ්යාසරතඃ සදා ।
ස මුක්තඃ ස සුඛී ලෝකේ කර්මණා නෝපලිප්යතේ ॥ 2 ॥
මහාපාපාදිපාපානි ගීතාධ්යානං කරෝති චේත් ।
ක්වචිත්ස්පර්ශං න කුර්වංති නලිනීදලමංබුවත් ॥ 3 ॥
ගීතායාඃ පුස්තකං යත්ර යත්ර පාඨඃ ප්රවර්තතේ ।
තත්ර සර්වාණි තීර්ථානි ප්රයාගාදීනි තත්ර වෛ ॥ 4 ॥
සර්වේ දේවාශ්ච ඍෂයඃ යෝගිනඃ පන්නගාශ්ච යේ ।
ගෝපාලා ගෝපිකා වාऽපි නාරදෝද්ධවපාර්ෂදෛඃ ॥ 5 ॥
සහායෝ ජායතේ ශීඝ්රං යත්ර ගීතා ප්රවර්තතේ ।
යත්ර ගීතාවිචාරශ්ච පඨනං පාඨනං ශ්රුතම් ।
තත්රාහං නිශ්චිතං පෘථ්වි නිවසාමි සදෛව හි ॥ 6 ॥
ගීතාශ්රයේऽහං තිෂ්ඨාමි ගීතා මේ චෝත්තමං ගෘහම් ।
ගීතාජ්ඤානමුපාශ්රිත්ය ත්රීँල්ලෝකාන්-පාලයාම්යහම් ॥ 7 ॥
ගීතා මේ පරමා විද්යා බ්රහ්මරූපා න සංශයඃ ।
අර්ධමාත්රාක්ෂරා නිත්යා ස්වානිර්වාච්යපදාත්මිකා ॥ 8 ॥
චිදානංදේන කෘෂ්ණේන ප්රෝක්තා ස්වමුඛතෝऽර්ජුනම් ।
වේදත්රයී පරානංදා තත්ත්වාර්ථජ්ඤානසංයුතා ॥ 9 ॥
යෝऽෂ්ටාදශං ජපේන්නිත්යං නරෝ නිශ්චලමානසඃ ।
ජ්ඤානසිද්ධිං ස ලභතේ තතෝ යාති පරං පදම් ॥ 10 ॥
පාඨේऽසමර්ථඃ සංපූර්ණේ තතෝऽර්ධං පාඨමාචරේත් ।
තදා ගෝදානජං පුණ්යං ලභතේ නාත්ර සංශයඃ ॥ 11 ॥
ත්රිභාගං පඨමානස්තු ගංගාස්නානඵලං ලභේත් ।
ෂඩංශං ජපමානස්තු සෝමයාගඵලං ලභේත් ॥ 12 ॥
එකාධ්යායං තුයෝ නිත්යං පඨතේ භක්තිසංයුතඃ ।
රුද්රලෝකමවාප්නෝති ගණෝ භූත්වා වසේච්චිරම් ॥ 13 ॥
අධ්යායං ශ්ලෝකපාදං වා නිත්යං යඃ පඨතේ නරඃ ।
ස යාති නරතාං යාවත් මන්වංතරං වසුංධරේ ॥ 14 ॥
ගීතායාඃ ශ්ලෝකදශකං සප්ත පංච චතුෂ්ටයම් ।
ද්වෞත්රීනේකං තදර්ධං වා ශ්ලෝකානාං යඃ පඨේන්නරඃ ॥ 15 ॥
චංද්රලෝකමවාප්නෝති වර්ෂාණාමයුතං ධෘවම් ।
ගීතාපාඨසමායුක්තඃ මෘතෝ මානුෂතාං ව්රජේත් ॥ 16 ॥
ගීතාභ්යාසං පුනඃ කෘත්වා ලභතේ මුක්තිමුත්තමම් ।
ගීතේත්යුච්චාරසංයුක්තඃ ම්රියමාණෝ ගතිං ලභේත් ॥ 17 ॥
ගීතාර්ථශ්රවණාසක්තඃ මහාපාපයුතෝऽපි වා ।
වෛකුංඨං සමවාප්නෝති විෂ්ණුනා සහමෝදතේ ॥ 18 ॥
ගීතාර්ථං ධ්යායතේ නිත්යං කෘත්වා කර්මාණි භූරිශඃ ।
ජීවන්මුක්තඃ ස විජ්ඤේයඃ දේහාංතේ පරමං පදම් ॥ 19 ॥
මලනිර්මෝචනං පුංසාං ජලස්නානං දිනේ දිනේ ।
සකෘද්ගීතාංභසි ස්නානං සංසාරමලනාශනම් ॥ 20 ॥
ගීතාමාශ්රිත්ය බහවඃ භූභුජෝ ජනකාදයඃ ।
නිර්ධූතකල්මෂා ලෝකේ ගීතා යාතාඃ පරං පදම් ॥ 21 ॥
තේ ශෘණ්වංති පඨංත්යේව ගීතාශාස්ත්රමහර්නිශම් ।
න තේ වෛ මානුෂා ජ්ඤේයා දේවා ඒව න සංශයඃ ॥ 22 ॥
ජ්ඤානාජ්ඤානකෘතං නිත්යං ඉංද්රියෛර්ජනිතං ච යත් ।
තත්සර්වං නාශමායාති ගීතාපාඨේන තක්ෂණම් ॥ 23 ॥
ධික් තස්ය ජ්ඤානමාචාරං ව්රතං චේෂ්ටාං තපෝ යශඃ ।
ගීතාර්ථපඨනං නාऽස්ති නාධමස්තත්පරෝ ජනඃ ॥ 24 ॥
සංසාරසාගරං ඝෝරං තර්තුමිච්ඡති යෝ ජනඃ ।
ගීතානාවං සමාරුහ්ය පාරං යාති සුඛේන සඃ ॥ 25 ॥
ගීතායාඃ පඨනං කෘත්වා මාහාත්ම්යං නෛව යඃ පඨේත් ।
වෘථා පාඨෝ භවේත්තස්ය ශ්රම ඒව හ්යුදාහෘතඃ ॥ 26 ॥
එතන්මාහාත්ම්යසංයුක්තං ගීතාභ්යාසං කරෝති යඃ ।
ස තත්ඵලමවාප්නෝති දුර්ලභාං ගතිමාප්නුයාත් ॥ 27 ॥
සූත උවාච
ංආහාත්ම්යමේතද්ගීතායාඃ මයා ප්රෝක්තං සනාතනම් ।
ගීතාංතේ ච පඨේද්යස්තු යදුක්තං තත්ඵලං භවේත් ॥ 28 ॥
ඉති ශ්රී වරාහපුරාණේ ශ්රී ගීතාමාහාත්ම්යං සංපූර්ණම් ॥
ඕං ශාංතිඃ ශාංතිඃ ශාංතිඃ ॥
