අථ තෘතීයෝऽධ්යායඃ ॥

අථ කාම්යජපස්ථානං කථයාමි වරානනේ ।
සාගරාංතේ සරිත්තීරේ තීර්ථේ හරිහරාලයේ ॥ 236 ॥

ශක්තිදේවාලයේ ගෝෂ්ඨේ සර්වදේවාලයේ ශුභේ ।
වටස්ය ධාත්ර්යා මූලේ වා මඨේ බෘංදාවනේ තථා ॥ 237 ॥

පවිත්රේ නිර්මලේ දේශේ නිත්යානුෂ්ඨානතෝऽපි වා ।
නිර්වේදනේන මෞනේන ජපමේතත් සමාරභේත් ॥ 238 ॥

ජාප්යේන ජයමාප්නෝති ජපසිද්ධිං ඵලං තථා ।
හීනං කර්ම ත්යජේත්සර්වං ගර්හිතස්ථානමේව ච ॥ 239 ॥

ශ්මශානේ බිල්වමූලේ වා වටමූලාංතිකේ තථා ।
සිද්ධ්යංති කානකේ මූලේ චූතවෘක්ෂස්ය සන්නිධෞ ॥ 240 ॥

පීතාසනං මෝහනේ තු හ්යසිතං චාභිචාරිකේ ।
ජ්ඤේයං ශුක්ලං ච ශාංත්යර්ථං වශ්යේ රක්තං ප්රකීර්තිතම් ॥ 241 ॥

ජපං හීනාසනං කුර්වන් හීනකර්මඵලප්රදම් ।
ගුරුගීතාං ප්රයාණේ වා සංග්රාමේ රිපුසංකටේ ॥ 242 ॥

ජපන් ජයමවාප්නෝති මරණේ මුක්තිදායිකා ।
සර්වකර්මාණි සිද්ධ්යංති ගුරුපුත්රේ න සංශයඃ ॥ 243 ॥

ගුරුමංත්රෝ මුඛේ යස්ය තස්ය සිද්ධ්යංති නාऽන්යථා ।
දීක්ෂයා සර්වකර්මාණි සිද්ධ්යංති ගුරුපුත්රකේ ॥ 244 ॥

භවමූලවිනාශාය චාෂ්ටපාශනිවෘත්තයේ ।
ගුරුගීතාංභසි ස්නානං තත්ත්වජ්ඤඃ කුරුතේ සදා ॥ 245 ॥

ස ඒවං සද්ගුරුඃ සාක්ෂාත් සදසද්බ්රහ්මවිත්තමඃ ।
තස්ය ස්ථානානි සර්වාණි පවිත්රාණි න සංශයඃ ॥ 246 ॥

සර්වශුද්ධඃ පවිත්රෝऽසෞ ස්වභාවාද්යත්ර තිෂ්ඨති ।
තත්ර දේවගණාඃ සර්වේ ක්ෂේත්රපීඨේ චරංති ච ॥ 247 ॥

ආසනස්ථාඃ ශයානා වා ගච්ඡංතස්තිෂ්ඨතෝऽපි වා ।
අශ්වාරූඪා ගජාරූඪාඃ සුෂුප්තා ජාග්රතෝऽපි වා ॥ 248 ॥

ශුචිර්භූතා ජ්ඤානවංතෝ ගුරුගීතාං ජපංති යේ ।
තේෂාං දර්ශනසංස්පර්ශාත් දිව්යජ්ඤානං ප්රජායතේ ॥ 249 ॥

සමුද්රේ වෛ යථා තෝයං ක්ෂීරේ ක්ෂීරං ජලේ ජලම් ।
භින්නේ කුංභේ යථාऽऽකාශං තථාऽऽත්මා පරමාත්මනි ॥ 250 ॥

තථෛව ජ්ඤානවාන් ජීවඃ පරමාත්මනි සර්වදා ।
ඓක්යේන රමතේ ජ්ඤානී යත්ර කුත්ර දිවානිශම් ॥ 251 ॥

ඒවංවිධෝ මහායුක්තඃ සර්වත්ර වර්තතේ සදා ।
තස්මාත්සර්වප්රකාරේණ ගුරුභක්තිං සමාචරේත් ॥ 252 ॥

ගුරුසංතෝෂණාදේව මුක්තෝ භවති පාර්වති ।
අණිමාදිෂු භෝක්තෘත්වං කෘපයා දේවි ජායතේ ॥ 253 ॥

සාම්යේන රමතේ ජ්ඤානී දිවා වා යදි වා නිශි ।
ඒවංවිධෝ මහාමෞනී ත්රෛලෝක්යසමතාං ව්රජේත් ॥ 254 ॥

අථ සංසාරිණඃ සර්වේ ගුරුගීතා ජපේන තු ।
සර්වාන් කාමාංස්තු භුංජංති ත්රිසත්යං මම භාෂිතම් ॥ 255 ॥

සත්යං සත්යං පුනඃ සත්යං ධර්මසාරං මයෝදිතම් ।
ගුරුගීතාසමං ස්තෝත්රං නාස්ති තත්ත්වං ගුරෝඃ පරම් ॥ 256 ॥

ගුරුර්දේවෝ ගුරුර්ධර්මෝ ගුරෞ නිෂ්ඨා පරං තපඃ ।
ගුරෝඃ පරතරං නාස්ති ත්රිවාරං කථයාමි තේ ॥ 257 ॥

ධන්යා මාතා පිතා ධන්යෝ ගෝත්රං ධන්යං කුලෝද්භවඃ ।
ධන්යා ච වසුධා දේවි යත්ර ස්යාද්ගුරුභක්තතා ॥ 258 ॥

ආකල්පජන්ම කෝටීනාං යජ්ඤව්රතතපඃ ක්රියාඃ ।
තාඃ සර්වාඃ සඵලා දේවි ගුරූසංතෝෂමාත්රතඃ ॥ 259 ॥

ශරීරමිංද්රියං ප්රාණමර්ථං ස්වජනබංධුතා ।
මාතෘකුලං පිතෘකුලං ගුරුරේව න සංශයඃ ॥ 260 ॥

මංදභාග්යා හ්යශක්තාශ්ච යේ ජනා නානුමන්වතේ ।
ගුරුසේවාසු විමුඛාඃ පච්යංතේ නරකේऽශුචෞ ॥ 261 ॥

විද්යා ධනං බලං චෛව තේෂාං භාග්යං නිරර්ථකම් ।
යේෂාං ගුරූකෘපා නාස්ති අධෝ ගච්ඡංති පාර්වති ॥ 262 ॥

බ්රහ්මා විෂ්ණුශ්ච රුද්රශ්ච දේවාශ්ච පිතෘකින්නරාඃ ।
සිද්ධචාරණයක්ෂාශ්ච අන්යේ ච මුනයෝ ජනාඃ ॥ 263 ॥

ගුරුභාවඃ පරං තීර්ථමන්යතීර්ථං නිරර්ථකම් ।
සර්වතීර්ථමයං දේවි ශ්රීගුරෝශ්චරණාංබුජම් ॥ 264 ॥

කන්යාභෝගරතා මංදාඃ ස්වකාංතායාඃ පරාඞ්මුඛාඃ ।
අතඃ පරං මයා දේවි කථිතං න මම ප්රියේ ॥ 265 ॥

ඉදං රහස්යමස්පෂ්ටං වක්තව්යං ච වරානනේ ।
සුගෝප්යං ච තවාග්රේ තු මමාත්මප්රීතයේ සති ॥ 266 ॥

ස්වාමිමුඛ්යගණේශාද්යාන් වෛෂ්ණවාදීංශ්ච පාර්වති ।
න වක්තව්යං මහාමායේ පාදස්පර්ශං කුරුෂ්ව මේ ॥ 267 ॥

අභක්තේ වංචකේ ධූර්තේ පාෂංඩේ නාස්තිකාදිෂු ।
මනසාऽපි න වක්තව්යා ගුරුගීතා කදාචන ॥ 268 ॥

ගුරවෝ බහවඃ සංති ශිෂ්යවිත්තාපහාරකාඃ ।
තමේකං දුර්ලභං මන්යේ ශිෂ්යහෘත්තාපහාරකම් ॥ 269 ॥

චාතුර්යවාන් විවේකී ච අධ්යාත්මජ්ඤානවාන් ශුචිඃ ।
මානසං නිර්මලං යස්ය ගුරුත්වං තස්ය ශෝභතේ ॥ 270 ॥

ගුරවෝ නිර්මලාඃ ශාංතාඃ සාධවෝ මිතභාෂිණඃ ।
කාමක්රෝධවිනිර්මුක්තාඃ සදාචාරාඃ ජිතේංද්රියාඃ ॥ 271 ॥

සූචකාදිප්රභේදේන ගුරවෝ බහුධා ස්මෘතාඃ ।
ස්වයං සම්යක් පරීක්ෂ්යාථ තත්ත්වනිෂ්ඨං භජේත්සුධීඃ ॥ 272 ॥

වර්ණජාලමිදං තද්වද්බාහ්යශාස්ත්රං තු ලෞකිකම් ।
යස්මින් දේවි සමභ්යස්තං ස ගුරුඃ සුචකඃ ස්මෘතඃ ॥ 273 ॥

වර්ණාශ්රමෝචිතාං විද්යාං ධර්මාධර්මවිධායිනීම් ।
ප්රවක්තාරං ගුරුං විද්ධි වාචකං ත්විති පාර්වති ॥ 274 ॥

පංචාක්ෂර්යාදිමංත්රාණාමුපදේෂ්ටා තු පාර්වති ।
ස ගුරුර්බෝධකෝ භූයාදුභයෝරයමුත්තමඃ ॥ 275 ॥

මෝහමාරණවශ්යාදිතුච්ඡමංත්රෝපදේශිනම් ।
නිෂිද්ධගුරුරිත්යාහුඃ පංඩිතාස්තත්ත්වදර්ශිනඃ ॥ 276 ॥

අනිත්යමිති නිර්දිශ්ය සංසාරං සංකටාලයම් ।
වෛරාග්යපථදර්ශී යඃ ස ගුරුර්විහිතඃ ප්රියේ ॥ 277 ॥

තත්ත්වමස්යාදිවාක්යානාමුපදේෂ්ටා තු පාර්වති ।
කාරණාඛ්යෝ ගුරුඃ ප්රෝක්තෝ භවරෝගනිවාරකඃ ॥ 278 ॥

සර්වසංදේහසංදෝහනිර්මූලනවිචක්ෂණඃ ।
ජන්මමෘත්යුභයඝ්නෝ යඃ ස ගුරුඃ පරමෝ මතඃ ॥ 279 ॥

බහුජන්මකෘතාත් පුණ්යාල්ලභ්යතේऽසෞ මහාගුරුඃ ।
ලබ්ධ්වාऽමුං න පුනර්යාති ශිෂ්යඃ සංසාරබංධනම් ॥ 280 ॥

ඒවං බහුවිධා ලෝකේ ගුරවඃ සංති පාර්වති ।
තේෂු සර්වප්රයත්නේන සේව්යෝ හි පරමෝ ගුරුඃ ॥ 281 ॥

නිෂිද්ධගුරුශිෂ්යස්තු දුෂ්ටසංකල්පදූෂිතඃ ।
බ්රහ්මප්රළයපර්යංතං න පුනර්යාති මර්ත්යතාම් ॥ 282 ॥

ඒවං ශ්රුත්වා මහාදේවී මහාදේවවචස්තථා ।
අත්යංතවිහ්වලමනාඃ ශංකරං පරිපෘච්ඡති ॥ 283 ॥

පාර්වත්යුවාච ।
නමස්තේ දේවදේවාත්ර ශ්රෝතව්යං කිංචිදස්ති මේ ।
ශ්රුත්වා ත්වද්වාක්යමධුනා භෘශං ස්යාද්විහ්වලං මනඃ ॥ 284 ॥

ස්වයං මූඪා මෘත්යුභීතාඃ සුකෘතාද්විරතිං ගතාඃ ।
දෛවාන්නිෂිද්ධගුරුගා යදි තේෂාං තු කා ගතිඃ ॥ 285 ॥

ශ්රී මහාදේව උවාච ।
ශෘණු තත්ත්වමිදං දේවි යදා ස්යාද්විරතෝ නරඃ ।
තදාऽසාවධිකාරීති ප්රෝච්යතේ ශ්රුතිමස්තකෛඃ ॥ 286 ॥

අඛංඩෛකරසං බ්රහ්ම නිත්යමුක්තං නිරාමයම් ।
ස්වස්මින් සංදර්ශිතං යේන ස භවේදස්යං දේශිකඃ ॥ 287 ॥

ජලානාං සාගරෝ රාජා යථා භවති පාර්වති ।
ගුරූණාං තත්ර සර්වේෂාං රාජාऽයං පරමෝ ගුරුඃ ॥ 288 ॥

මෝහාදිරහිතඃ ශාංතෝ නිත්යතෘප්තෝ නිරාශ්රයඃ ।
තෘණීකෘතබ්රහ්මවිෂ්ණුවෛභවඃ පරමෝ ගුරුඃ ॥ 289 ॥

සර්වකාලවිදේශේෂු ස්වතංත්රෝ නිශ්චලස්සුඛී ।
අඛංඩෛකරසාස්වාදතෘප්තෝ හි පරමෝ ගුරුඃ ॥ 290 ॥

ද්වෛතාද්වෛතවිනිර්මුක්තඃ ස්වානුභූතිප්රකාශවාන් ।
අජ්ඤානාංධතමශ්ඡේත්තා සර්වජ්ඤඃ පරමෝ ගුරුඃ ॥ 291 ॥

යස්ය දර්ශනමාත්රේණ මනසඃ ස්යාත් ප්රසන්නතා ।
ස්වයං භූයාත් ධෘතිශ්ශාංතිඃ ස භවේත් පරමෝ ගුරුඃ ॥ 292 ॥

සිද්ධිජාලං සමාලෝක්ය යෝගිනාං මංත්රවාදිනාම් ।
තුච්ඡාකාරමනෝවෘත්තිඃ යස්යාසෞ පරමෝ ගුරුඃ ॥ 293 ॥

ස්වශරීරං ශවං පශ්යන් තථා ස්වාත්මානමද්වයම් ।
යඃ ස්ත්රීකනකමෝහඝ්නඃ ස භවේත් පරමෝ ගුරුඃ ॥ 294 ॥

මෞනී වාග්මීති තත්ත්වජ්ඤෝ ද්විධාऽභූච්ඡෘණු පාර්වති ।
න කශ්චින්මෞනිනාං ලෝභෝ ලෝකේऽස්මින්භවති ප්රියේ ॥ 295 ॥

වාග්මී තූත්කටසංසාරසාගරෝත්තාරණක්ෂමඃ ।
යතෝऽසෞ සංශයච්ඡේත්තා ශාස්ත්රයුක්ත්යනුභූතිභිඃ ॥ 296 ॥

ගුරුනාමජපාද්දේවි බහුජන්මාර්ජිතාන්යපි ।
පාපානි විලයං යාංති නාස්ති සංදේහමණ්වපි ॥ 297 ॥

ශ්රීගුරෝස්සදෘශං දෛවං ශ්රීගුරෝසදෘශඃ පිතා ।
ගුරුධ්යානසමං කර්ම නාස්ති නාස්ති මහීතලේ ॥ 298 ॥

කුලං ධනං බලං ශාස්ත්රං බාංධවාස්සෝදරා ඉමේ ।
මරණේ නෝපයුජ්යංතේ ගුරුරේකෝ හි තාරකඃ ॥ 299 ॥

කුලමේව පවිත්රං ස්යාත් සත්යං ස්වගුරුසේවයා ।
තෘප්තාඃ ස්යුස්සකලා දේවා බ්රහ්මාද්යා ගුරුතර්පණාත් ॥ 300 ॥

ගුරුරේකෝ හි ජානාති ස්වරූපං දේවමව්යයම් ।
තද්​ජ්ඤානං යත්ප්රසාදේන නාන්යථා ශාස්ත්රකෝටිභිඃ ॥ 301 ॥

ස්වරූපජ්ඤානශූන්යේන කෘතමප්යකෘතං භවේත් ।
තපෝජපාදිකං දේවි සකලං බාලජල්පවත් ॥ 302 ॥

ශිවං කේචිද්ධරිං කේචිද්විධිං කේචිත්තු කේචන ।
ශක්තිං දෛවමිති ජ්ඤාත්වා විවදංති වෘථා නරාඃ ॥ 303 ॥

න ජානංති පරං තත්ත්වං ගුරුදීක්ෂාපරාඞ්මුඛාඃ ।
භ්රාංතාඃ පශුසමා හ්යේතේ ස්වපරිජ්ඤානවර්ජිතාඃ ॥ 304 ॥

තස්මාත්කෛවල්යසිද්ධ්යර්ථං ගුරුමේව භජේත්ප්රියේ ।
ගුරුං විනා න ජානංති මූඪාස්තත්පරමං පදම් ॥ 305 ॥

භිද්යතේ හෘදයග්රංථිශ්ඡිද්යංතේ සර්වසංශයාඃ ।
ක්ෂීයංතේ සර්වකර්මාණි ගුරෝඃ කරුණයා ශිවේ ॥ 306 ॥

කෘතායා ගුරුභක්තේස්තු වේදශාස්ත්රානුසාරතඃ ।
මුච්යතේ පාතකාද්ඝෝරාත් ගුරුභක්තෝ විශේෂතඃ ॥ 307 ॥

දුස්සංගං ච පරිත්යජ්ය පාපකර්ම පරිත්යජේත් ।
චිත්තචිහ්නමිදං යස්ය තස්ය දීක්ෂා විධීයතේ ॥ 308 ॥

චිත්තත්යාගනියුක්තශ්ච ක්රෝධගර්වවිවර්ජිතඃ ।
ද්වෛතභාවපරිත්යාගී තස්ය දීක්ෂා විධීයතේ ॥ 309 ॥

ඒතල්ලක්ෂණයුක්තත්වං සර්වභූතහිතේ රතම් ।
නිර්මලං ජීවිතං යස්ය තස්ය දීක්ෂා විධීයතේ ॥ 310 ॥

ක්රියයා චාන්විතං පූර්වං දීක්ෂාජාලං නිරූපිතම් ।
මංත්රදීක්ෂාභිධං සාංගෝපාංගං සර්වං ශිවෝදිතම් ॥ 311 ॥

ක්රියයා ස්යාද්විරහිතාං ගුරුසායුජ්යදායිනීම් ।
ගුරුදීක්ෂාං විනා කෝ වා ගුරුත්වාචාරපාලකඃ ॥ 312 ॥

ශක්තෝ න චාපි ශක්තෝ වා දෛශිකාංඝ්රි සමාශ්රයේත් ।
තස්ය ජන්මාස්ති සඵලං භෝගමෝක්ෂඵලප්රදම් ॥ 313 ॥

අත්යංතචිත්තපක්වස්ය ශ්රද්ධාභක්තියුතස්ය ච ।
ප්රවක්තව්යමිදං දේවි මමාත්මප්රීතයේ සදා ॥ 314 ॥

රහස්යං සර්වශාස්ත්රේෂු ගීතාශාස්ත්රමිදං ශිවේ ।
සම්යක්පරීක්ෂ්ය වක්තව්යං සාධකස්ය මහාත්මනඃ ॥ 315 ॥

සත්කර්මපරිපාකාච්ච චිත්තශුද්ධිශ්ච ධීමතඃ ।
සාධකස්යෛව වක්තව්යා ගුරුගීතා ප්රයත්නතඃ ॥ 316 ॥

නාස්තිකාය කෘතඝ්නාය දාංභිකාය ශඨාය ච ।
අභක්තාය විභක්තාය න වාච්යේයං කදාචන ॥ 317 ॥

ස්ත්රීලෝලුපාය මූර්ඛාය කාමෝපහතචේතසේ ।
නිංදකාය න වක්තව්යා ගුරුගීතා ස්වභාවතඃ ॥ 318 ॥

සර්වපාපප්රශමනං සර්වෝපද්රවවාරකම් ।
ජන්මමෘත්යුහරං දේවි ගීතාශාස්ත්රමිදං ශිවේ ॥ 319 ॥

ශ්රුතිසාරමිදං දේවි සර්වමුක්තං සමාසතඃ ।
නාන්යථා සද්ගතිඃ පුංසාං විනා ගුරුපදං ශිවේ ॥ 320 ॥

බහුජන්මකෘතාත්පාපාදයමර්ථෝ න රෝචතේ ।
ජන්මබංධනිවෘත්ත්යර්ථං ගුරුමේව භජේත්සදා ॥ 321 ॥

අහමේව ජගත්සර්වමහමේව පරං පදම් ।
ඒතද්​ජ්ඤානං යතෝ භූයාත්තං ගුරුං ප්රණමාම්යහම් ॥ 322 ॥

අලං විකල්පෛරහමේව කේවලං
මයි ස්ථිතං විශ්වමිදං චරාචරම් ।
ඉදං රහස්යං මම යේන දර්ශිතං
ස වංදනීයෝ ගුරුරේව කේවලම් ॥ 323 ॥

යස්යාංතං නාදිමධ්යං න හි කරචරණං නාමගෝත්රං න සූත්රම් ।
නෝ ජාතිර්නෛව වර්ණෝ න භවති පුරුෂෝ නෝ නපුංසෝ න ච ස්ත්රී ॥ 324 ॥

නාකාරං නෝ විකාරං න හි ජනිමරණං නාස්ති පුණ්යං න පාපම් ।
නෝऽතත්ත්වං තත්ත්වමේකං සහජසමරසං සද්ගුරුං තං නමාමි ॥ 325 ॥

නිත්යාය සත්යාය චිදාත්මකාය
නව්යාය භව්යාය පරාත්පරාය ।
ශුද්ධාය බුද්ධාය නිරංජනාය
නමෝऽස්තු නිත්යං ගුරුශේඛරාය ॥ 326 ॥

සච්චිදානංදරූපාය ව්යාපිනේ පරමාත්මනේ ।
නමඃ ශ්රීගුරුනාථාය ප්රකාශානංදමූර්තයේ ॥ 327 ॥

සත්යානංදස්වරූපාය බෝධෛකසුඛකාරිණේ ।
නමෝ වේදාංතවේද්යාය ගුරවේ බුද්ධිසාක්ෂිණේ ॥ 328 ॥

නමස්තේ නාථ භගවන් ශිවාය ගුරුරූපිණේ ।
විද්යාවතාරසංසිද්ධ්යෛ ස්වීකෘතානේකවිග්රහ ॥ 329 ॥

නවාය නවරූපාය පරමාර්ථෛකරූපිණේ ।
සර්වාජ්ඤානතමෝභේදභානවේ චිද්ඝනාය තේ ॥ 330 ॥

ස්වතංත්රාය දයාක්ලුප්තවිග්රහාය ශිවාත්මනේ ।
පරතංත්රාය භක්තානාං භව්යානාං භව්යරූපිණේ ॥ 331 ॥

විවේකිනාං විවේකාය විමර්ශාය විමර්ශිනාම් ।
ප්රකාශිනාං ප්රකාශාය ජ්ඤානිනාං ජ්ඤානරූපිණේ ॥ 332 ॥

පුරස්තාත්පාර්ශ්වයෝඃ පෘෂ්ඨේ නමස්කුර්යාදුපර්යධඃ ।
සදා මච්චිත්තරූපේණ විධේහි භවදාසනම් ॥ 333 ॥

ශ්රීගුරුං පරමානංදං වංදේ හ්යානංදවිග්රහම් ।
යස්ය සන්නිධිමාත්රේණ චිදානංදාය තේ මනඃ ॥ 334 ॥

නමෝऽස්තු ගුරවේ තුභ්යං සහජානංදරූපිණේ ।
යස්ය වාගමෘතං හංති විෂං සංසාරසංජ්ඤකම් ॥ 335 ॥

නානායුක්තෝපදේශේන තාරිතා ශිෂ්යසංතතිඃ ।
තත්කෘපාසාරවේදේන ගුරුචිත්පදමච්යුතම් ॥ 336 ॥

[පාඨභේදඃ -
අච්යුතාය නමස්තුභ්යං ගුරවේ පරමාත්මනේ ।
ස්වාරාමෝක්තපදේච්ඡූනාං දත්තං යේනාච්යුතං පදම් ॥
]
අච්යුතාය නමස්තුභ්යං ගුරවේ පරමාත්මනේ ।
සර්වතංත්රස්වතංත්රාය චිද්ඝනානංදමූර්තයේ ॥ 337 ॥

නමෝऽච්යුතාය ගුරවේऽජ්ඤානධ්වාංතෛකභානවේ ।
ශිෂ්යසන්මාර්ගපටවේ කෘපාපීයූෂසිංධවේ ॥ 338 ॥

ඕමච්යුතාය ගුරවේ ශිෂ්යසංසාරසේතවේ ।
භක්තකාර්යෛකසිංහාය නමස්තේ චිත්සුඛාත්මනේ ॥ 339 ॥

ගුරුනාමසමං දෛවං න පිතා න ච බාංධවාඃ ।
ගුරුනාමසමඃ ස්වාමී නේදෘශං පරමං පදම් ॥ 340 ॥

ඒකාක්ෂරප්රදාතාරං යෝ ගුරුං නෛව මන්යතේ ।
ශ්වානයෝනිශතං ගත්වා චාංඩාලේෂ්වපි ජායතේ ॥ 341 ॥

ගුරුත්යාගාද්භවේන්මෘත්යුඃ මංත්රත්යාගාද්දරිද්රතා ।
ගුරුමංත්රපරිත්යාගී රෞරවං නරකං ව්රජේත් ॥ 342 ॥

ශිවක්රෝධාද්ගුරුස්ත්රාතා ගුරුක්රෝධාච්ඡිවෝ න හි ।
තස්මාත්සර්වප්රයත්නේන ගුරෝරාජ්ඤාං න ලංඝයේත් ॥ 343 ॥

සංසාරසාගරසමුද්ධරණෛකමංත්රං
බ්රහ්මාදිදේවමුනිපූජිතසිද්ධමංත්රම් ।
දාරිද්ර්යදුඃඛභවරෝගවිනාශමංත්රං
වංදේ මහාභයහරං ගුරුරාජමංත්රම් ॥ 344 ॥

සප්තකෝටිමහාමංත්රාශ්චිත්තවිභ්රමකාරකාඃ ।
ඒක ඒව මහාමංත්රෝ ගුරුරිත්යක්ෂරද්වයම් ॥ 345 ॥

ඒවමුක්ත්වා මහාදේවඃ පාර්වතීං පුනරබ්රවීත් ।
ඉදමේව පරං තත්ත්වං ශෘණු දේවි සුඛාවහම් ॥ 346 ॥

ගුරුතත්ත්වමිදං දේවි සර්වමුක්තං සමාසතඃ ।
රහස්යමිදමව්යක්තං න වදේද්යස්ය කස්යචිත් ॥ 347 ॥

න මෘෂා ස්යාදියං දේවි මදුක්තිඃ සත්යරූපිණී ।
ගුරුගීතාසමං ස්තෝත්රං නාස්ති නාස්ති මහීතලේ ॥ 348 ॥

ගුරුගීතාමිමාං දේවි භවදුඃඛවිනාශිනීම් ।
ගුරුදීක්ෂාවිහීනස්ය පුරතෝ න පඨේත් ක්වචිත් ॥ 349 ॥

රහස්යමත්යංතරහස්යමේතන්න පාපිනා ලභ්යමිදං මහේශ්වරි ।
අනේකජන්මාර්ජිතපුණ්යපාකාද්ගුරෝස්තු තත්ත්වං ලභතේ මනුෂ්යඃ ॥ 350 ॥

යස්ය ප්රසාදාදහමේව සර්වං
මය්යේව සර්වං පරිකල්පිතං ච ।
ඉත්ථං විජානාමි සදාත්මරූපං
තස්යාංඝ්රිපද්මං ප්රණතෝऽස්මි නිත්යම් ॥ 351 ॥

අජ්ඤානතිමිරාංධස්ය විෂයාක්රාංතචේතසඃ ।
ජ්ඤානප්රභාප්රදානේන ප්රසාදං කුරු මේ ප්රභෝ ॥ 352 ॥

ඉති ශ්රීස්කංදපුරාණේ උත්තරඛංඩේ උමාමහේශ්වර සංවාදේ ශ්රී ගුරුගීතා සමාප්ත ॥

මංගළං
මංගළං ගුරුදේවාය මහනීයගුණාත්මනේ ।
සර්වලෝකශරණ්යාය සාධුරූපාය මංගළම් ॥