ব্রহ্মোবাচ ।
নমঃ পিত্রে জন্মদাত্রে সর্বদেবমযায চ ।
সুখদায প্রসন্নায সুপ্রীতায মহাত্মনে ॥ 1 ॥

সর্বযজ্ঞস্বরূপায স্বর্গায পরমেষ্ঠিনে ।
সর্বতীর্থাবলোকায করুণাসাগরায চ ॥ 2 ॥

নমঃ সদাঽঽশুতোষায শিবরূপায তে নমঃ ।
সদাঽপরাধক্ষমিণে সুখায সুখদায চ ॥ 3 ॥

দুর্লভং মানুষমিদং যেন লব্ধং মযা বপুঃ ।
সংভাবনীযং ধর্মার্থে তস্মৈ পিত্রে নমো নমঃ ॥ 4 ॥

তীর্থস্নানতপোহোমজপাদীন্ যস্য দর্শনম্ ।
মহাগুরোশ্চ গুরবে তস্মৈ পিত্রে নমো নমঃ ॥ 5 ॥

যস্য প্রণাম স্তবনাত্ কোটিশঃ পিতৃতর্পণম্ ।
অশ্বমেধশতৈস্তুল্যং তস্মৈ পিত্রে নমো নমঃ ॥ 6 ॥

ইদং স্তোত্রং পিতৃঃ পুণ্যং যঃ পঠেত্ প্রযতো নরঃ ।
প্রত্যহং প্রাতরুত্থায পিতৃশ্রাদ্ধদিনেঽপি চ ॥ 7 ॥

স্বজন্মদিবসে সাক্ষাত্ পিতুরগ্রে স্থিতোঽপি বা ।
ন তস্য দুর্লভং কিংচিত্ সর্বজ্ঞত্বাদি বাংছিতম্ ॥ 8 ॥

নানাপকর্ম কৃত্বাঽপি যঃ স্তৌতি পিতরং সুতঃ ।
স ধৃবং প্রবিধাযৈব প্রাযশ্চিত্তং সুখী ভবেত্ ।
পিতৃপ্রীতিকরৈর্নিত্যং সর্বকর্মাণ্যথার্হতি ॥ 9 ॥

ইতি বৃহদ্ধর্মপুরাণাংতর্গত ব্রহ্মকৃত পিতৃ স্তোত্রম্ ।