બ્રહ્મોવાચ ।
નમઃ પિત્રે જન્મદાત્રે સર્વદેવમયાય ચ ।
સુખદાય પ્રસન્નાય સુપ્રીતાય મહાત્મને ॥ 1 ॥

સર્વયજ્ઞસ્વરૂપાય સ્વર્ગાય પરમેષ્ઠિને ।
સર્વતીર્થાવલોકાય કરુણાસાગરાય ચ ॥ 2 ॥

નમઃ સદાઽઽશુતોષાય શિવરૂપાય તે નમઃ ।
સદાઽપરાધક્ષમિણે સુખાય સુખદાય ચ ॥ 3 ॥

દુર્લભં માનુષમિદં યેન લબ્ધં મયા વપુઃ ।
સંભાવનીયં ધર્માર્થે તસ્મૈ પિત્રે નમો નમઃ ॥ 4 ॥

તીર્થસ્નાનતપોહોમજપાદીન્ યસ્ય દર્શનમ્ ।
મહાગુરોશ્ચ ગુરવે તસ્મૈ પિત્રે નમો નમઃ ॥ 5 ॥

યસ્ય પ્રણામ સ્તવનાત્ કોટિશઃ પિતૃતર્પણમ્ ।
અશ્વમેધશતૈસ્તુલ્યં તસ્મૈ પિત્રે નમો નમઃ ॥ 6 ॥

ઇદં સ્તોત્રં પિતૃઃ પુણ્યં યઃ પઠેત્ પ્રયતો નરઃ ।
પ્રત્યહં પ્રાતરુત્થાય પિતૃશ્રાદ્ધદિનેઽપિ ચ ॥ 7 ॥

સ્વજન્મદિવસે સાક્ષાત્ પિતુરગ્રે સ્થિતોઽપિ વા ।
ન તસ્ય દુર્લભં કિંચિત્ સર્વજ્ઞત્વાદિ વાંછિતમ્ ॥ 8 ॥

નાનાપકર્મ કૃત્વાઽપિ યઃ સ્તૌતિ પિતરં સુતઃ ।
સ ધૃવં પ્રવિધાયૈવ પ્રાયશ્ચિત્તં સુખી ભવેત્ ।
પિતૃપ્રીતિકરૈર્નિત્યં સર્વકર્માણ્યથાર્હતિ ॥ 9 ॥

ઇતિ બૃહદ્ધર્મપુરાણાંતર્ગત બ્રહ્મકૃત પિતૃ સ્તોત્રમ્ ।