ବ୍ରହ୍ମୋଵାଚ ।
ନମଃ ପିତ୍ରେ ଜନ୍ମଦାତ୍ରେ ସର୍ଵଦେଵମୟାୟ ଚ ।
ସୁଖଦାୟ ପ୍ରସନ୍ନାୟ ସୁପ୍ରୀତାୟ ମହାତ୍ମନେ ॥ 1 ॥

ସର୍ଵୟଜ୍ଞସ୍ଵରୂପାୟ ସ୍ଵର୍ଗାୟ ପରମେଷ୍ଠିନେ ।
ସର୍ଵତୀର୍ଥାଵଲୋକାୟ କରୁଣାସାଗରାୟ ଚ ॥ 2 ॥

ନମଃ ସଦାଽଽଶୁତୋଷାୟ ଶିଵରୂପାୟ ତେ ନମଃ ।
ସଦାଽପରାଧକ୍ଷମିଣେ ସୁଖାୟ ସୁଖଦାୟ ଚ ॥ 3 ॥

ଦୁର୍ଲଭଂ ମାନୁଷମିଦଂ ୟେନ ଲବ୍ଧଂ ମୟା ଵପୁଃ ।
ସଂଭାଵନୀୟଂ ଧର୍ମାର୍ଥେ ତସ୍ମୈ ପିତ୍ରେ ନମୋ ନମଃ ॥ 4 ॥

ତୀର୍ଥସ୍ନାନତପୋହୋମଜପାଦୀନ୍ ୟସ୍ୟ ଦର୍ଶନମ୍ ।
ମହାଗୁରୋଶ୍ଚ ଗୁରଵେ ତସ୍ମୈ ପିତ୍ରେ ନମୋ ନମଃ ॥ 5 ॥

ୟସ୍ୟ ପ୍ରଣାମ ସ୍ତଵନାତ୍ କୋଟିଶଃ ପିତୃତର୍ପଣମ୍ ।
ଅଶ୍ଵମେଧଶତୈସ୍ତୁଲ୍ୟଂ ତସ୍ମୈ ପିତ୍ରେ ନମୋ ନମଃ ॥ 6 ॥

ଇଦଂ ସ୍ତୋତ୍ରଂ ପିତୃଃ ପୁଣ୍ୟଂ ୟଃ ପଠେତ୍ ପ୍ରୟତୋ ନରଃ ।
ପ୍ରତ୍ୟହଂ ପ୍ରାତରୁତ୍ଥାୟ ପିତୃଶ୍ରାଦ୍ଧଦିନେଽପି ଚ ॥ 7 ॥

ସ୍ଵଜନ୍ମଦିଵସେ ସାକ୍ଷାତ୍ ପିତୁରଗ୍ରେ ସ୍ଥିତୋଽପି ଵା ।
ନ ତସ୍ୟ ଦୁର୍ଲଭଂ କିଂଚିତ୍ ସର୍ଵଜ୍ଞତ୍ଵାଦି ଵାଂଛିତମ୍ ॥ 8 ॥

ନାନାପକର୍ମ କୃତ୍ଵାଽପି ୟଃ ସ୍ତୌତି ପିତରଂ ସୁତଃ ।
ସ ଧୃଵଂ ପ୍ରଵିଧାୟୈଵ ପ୍ରାୟଶ୍ଚିତ୍ତଂ ସୁଖୀ ଭଵେତ୍ ।
ପିତୃପ୍ରୀତିକରୈର୍ନିତ୍ୟଂ ସର୍ଵକର୍ମାଣ୍ୟଥାର୍ହତି ॥ 9 ॥

ଇତି ବୃହଦ୍ଧର୍ମପୁରାଣାଂତର୍ଗତ ବ୍ରହ୍ମକୃତ ପିତୃ ସ୍ତୋତ୍ରମ୍ ।