രുചിരുവാച ।
നമസ്യേഽഹം പിതൄന് ഭക്ത്യാ യേ വസംത്യധിദേവതാഃ ।
ദേവൈരപി ഹി തര്പ്യംതേ യേ ശ്രാദ്ധേഷു സ്വധോത്തരൈഃ ॥ 1 ॥

നമസ്യേഽഹം പിതൄന് സ്വര്ഗേ യേ തര്പ്യംതേ മഹര്ഷിഭിഃ ।
ശ്രാദ്ധൈര്മനോമയൈര്ഭക്ത്യാ ഭുക്തിമുക്തിമഭീപ്സുഭിഃ ॥ 2 ॥

നമസ്യേഽഹം പിതൄന് സ്വര്ഗേ സിദ്ധാഃ സംതര്പയംതി യാന് ।
ശ്രാദ്ധേഷു ദിവ്യൈഃ സകലൈരുപഹാരൈരനുത്തമൈഃ ॥ 3 ॥

നമസ്യേഽഹം പിതൄന് ഭക്ത്യാ യേഽര്ച്യംതേ ഗുഹ്യകൈര്ദിവി ।
തന്മയത്വേന വാംഛദ്ഭിരൃദ്ധിര്യാത്യംതികീം പരാമ് ॥ 4 ॥

നമസ്യേഽഹം പിതൄന് മര്ത്യൈരര്ച്യംതേ ഭുവി യേ സദാ ।
ശ്രാദ്ധേഷു ശ്രദ്ധയാഭീഷ്ടലോകപുഷ്ടിപ്രദായിനഃ ॥ 5 ॥

നമസ്യേഽഹം പിതൄന് വിപ്രൈരര്ച്യംതേ ഭുവി യേ സദാ ।
വാംഛിതാഭീഷ്ടലാഭായ പ്രാജാപത്യപ്രദായിനഃ ॥ 6 ॥

നമസ്യേഽഹം പിതൄന് യേ വൈ തര്പ്യംതേഽരണ്യവാസിഭിഃ ।
വന്യൈഃ ശ്രാദ്ധൈര്യതാഹാരൈസ്തപോനിര്ധൂതകല്മഷൈഃ ॥ 7 ॥

നമസ്യേഽഹം പിതൄന് വിപ്രൈര്നൈഷ്ഠികൈര്ധര്മചാരിഭിഃ ।
യേ സംയതാത്മഭിര്നിത്യം സംതര്പ്യംതേ സമാധിഭിഃ ॥ 8 ॥

നമസ്യേഽഹം പിതൄന് ശ്രാദ്ധൈ രാജന്യാസ്തര്പയംതി യാന് ।
കവ്യൈരശേഷൈർവിധിവല്ലോകദ്വയഫലപ്രദാന് ॥ 9 ॥

നമസ്യേഽഹം പിതൄന് വൈശ്യൈരര്ച്യംതേ ഭുവി യേ സദാ ।
സ്വകര്മാഭിരതൈര്നിത്യം പുഷ്പധൂപാന്നവാരിഭിഃ ॥ 10 ॥

നമസ്യേഽഹം പിതൄന് ശ്രാദ്ധേ ശൂദ്രൈരപി ച ഭക്തിതഃ ।
സംതര്പ്യംതേ ജഗത്കൃത്സ്നം നാമ്നാ ഖ്യാതാഃ സുകാലിനഃ ॥ 11 ॥

നമസ്യേഽഹം പിതൄന് ശ്രാദ്ധേ പാതാലേ യേ മഹാസുരൈഃ ।
സംതര്പ്യംതേ സുധാഹാരാസ്ത്യക്തദംഭമദൈഃ സദാ ॥ 12 ॥

നമസ്യേഽഹം പിതൄന് ശ്രാദ്ധൈരര്ച്യംതേ യേ രസാതലേ ।
ഭോഗൈരശേഷൈർവിധിവന്നാഗൈഃ കാമാനഭീപ്സുഭിഃ ॥ 13 ॥

നമസ്യേഽഹം പിതൄന് ശ്രാദ്ധൈഃ സര്പൈഃ സംതര്പിതാന്സദാ ।
തത്രൈവ വിധിവന്മംത്രഭോഗസംപത്സമന്വിതൈഃ ॥ 14 ॥

പിതൄന്നമസ്യേ നിവസംതി സാക്ഷാ-
-ദ്യേ ദേവലോകേഽഥ മഹീതലേ വാ ।
തഥാഽംതരിക്ഷേ ച സുരാരിപൂജ്യാ-
-സ്തേ മേ പ്രതീച്ഛംതു മനോപനീതമ് ॥ 15 ॥

പിതൄന്നമസ്യേ പരമാര്ഥഭൂതാ
യേ വൈ വിമാനേ നിവസംത്യമൂര്താഃ ।
യജംതി യാനസ്തമലൈര്മനോഭി-
-ര്യോഗീശ്വരാഃ ക്ലേശവിമുക്തിഹേതൂന് ॥ 16 ॥

പിതൄന്നമസ്യേ ദിവി യേ ച മൂര്താഃ
സ്വധാഭുജഃ കാമ്യഫലാഭിസംധൌ ।
പ്രദാനശക്താഃ സകലേപ്സിതാനാം
വിമുക്തിദാ യേഽനഭിസംഹിതേഷു ॥ 17 ॥

തൃപ്യംതു തേഽസ്മിന്പിതരഃ സമസ്താ
ഇച്ഛാവതാം യേ പ്രദിശംതി കാമാന് ।
സുരത്വമിംദ്രത്വമിതോഽധികം വാ
ഗജാശ്വരത്നാനി മഹാഗൃഹാണി ॥ 18 ॥

സോമസ്യ യേ രശ്മിഷു യേഽര്കബിംബേ
ശുക്ലേ വിമാനേ ച സദാ വസംതി ।
തൃപ്യംതു തേഽസ്മിന്പിതരോഽന്നതോയൈ-
-ര്ഗംധാദിനാ പുഷ്ടിമിതോ വ്രജംതു ॥ 19 ॥

യേഷാം ഹുതേഽഗ്നൌ ഹവിഷാ ച തൃപ്തി-
-ര്യേ ഭുംജതേ വിപ്രശരീരസംസ്ഥാഃ ।
യേ പിംഡദാനേന മുദം പ്രയാംതി
തൃപ്യംതു തേഽസ്മിന്പിതരോഽന്നതോയൈഃ ॥ 20 ॥

യേ ഖഡ്ഗമാംസേന സുരൈരഭീഷ്ടൈഃ
കൃഷ്ണൈസ്തിലൈര്ദിവ്യ മനോഹരൈശ്ച ।
കാലേന ശാകേന മഹര്ഷിവര്യൈഃ
സംപ്രീണിതാസ്തേ മുദമത്ര യാംതു ॥ 21 ॥

കവ്യാന്യശേഷാണി ച യാന്യഭീഷ്ടാ-
-ന്യതീവ തേഷാം മമ പൂജിതാനാമ് ।
തേഷാംച സാന്നിധ്യമിഹാസ്തു പുഷ്പ-
-ഗംധാംബുഭോജ്യേഷു മയാ കൃതേഷു ॥ 22 ॥

ദിനേ ദിനേ യേ പ്രതിഗൃഹ്ണതേഽര്ചാം
മാസാംതപൂജ്യാ ഭുവി യേഽഷ്ടകാസു ।
യേ വത്സരാംതേഽഭ്യുദയേ ച പൂജ്യാഃ
പ്രയാംതു തേ മേ പിതരോഽത്ര തുഷ്ടിമ് ॥ 23 ॥

പൂജ്യാ ദ്വിജാനാം കുമുദേംദുഭാസോ
യേ ക്ഷത്രിയാണാം ജ്വലനാര്കവര്ണാഃ ।
തഥാ വിശാം യേ കനകാവദാതാ
നീലീപ്രഭാഃ ശൂദ്രജനസ്യ യേ ച ॥ 24 ॥

തേഽസ്മിന്സമസ്താ മമ പുഷ്പഗംധ-
-ധൂപാംബുഭോജ്യാദിനിവേദനേന ।
തഥാഽഗ്നിഹോമേന ച യാംതി തൃപ്തിം
സദാ പിതൃഭ്യഃ പ്രണതോഽസ്മി തേഭ്യഃ ॥ 25 ॥

യേ ദേവപൂർവാണ്യഭിതൃപ്തിഹേതോ-
-രശ്നംതി കവ്യാനി ശുഭാഹൃതാനി ।
തൃപ്താശ്ച യേ ഭൂതിസൃജോ ഭവംതി
തൃപ്യംതു തേഽസ്മിന്പ്രണതോഽസ്മി തേഭ്യഃ ॥ 26 ॥

രക്ഷാംസി ഭൂതാന്യസുരാംസ്തഥോഗ്രാ-
-ന്നിര്നാശയംതു ത്വശിവം പ്രജാനാമ് ।
ആദ്യാഃ സുരാണാമമരേശപൂജ്യാ-
-സ്തൃപ്യംതു തേഽസ്മിന്പ്രണതോഽസ്മിതേഭ്യഃ ॥ 27 ॥

അഗ്നിസ്വാത്താ ബര്ഹിഷദ ആജ്യപാഃ സോമപാസ്തഥാ ।
വ്രജംതു തൃപ്തിം ശ്രാദ്ധേഽസ്മിന്പിതരസ്തര്പിതാ മയാ ॥ 28 ॥

അഗ്നിസ്വാത്താഃ പിതൃഗണാഃ പ്രാചീം രക്ഷംതു മേ ദിശമ് ।
തഥാ ബര്ഹിഷദഃ പാംതു യാമ്യാം മേ പിതരഃ സദാ ।
പ്രതീചീമാജ്യപാസ്തദ്വദുദീചീമപി സോമപാഃ ॥ 29 ॥

രക്ഷോഭൂതപിശാചേഭ്യസ്തഥൈവാസുരദോഷതഃ ।
സർവതഃ പിതരോ രക്ഷാം കുർവംതു മമ നിത്യശഃ ॥ 30 ॥

വിശ്വോ വിശ്വഭുഗാരാധ്യോ ധര്മോ ധന്യഃ ശുഭാനനഃ ।
ഭൂതിദോ ഭൂതികൃദ്ഭൂതിഃ പിതൄണാം യേ ഗണാ നവ ॥ 31 ॥

കല്യാണഃ കല്യദഃ കര്താ കല്യഃ കല്യതരാശ്രയഃ ।
കല്യതാഹേതുരനഘഃ ഷഡിമേ തേ ഗണാഃ സ്മൃതാഃ ॥ 32 ॥

വരോ വരേണ്യോ വരദസ്തുഷ്ടിദഃ പുഷ്ടിദസ്തഥാ ।
വിശ്വപാതാ തഥാ ധാതാ സപ്തൈതേ ച ഗണാഃ സ്മൃതാഃ ॥ 33 ॥

മഹാന്മഹാത്മാ മഹിതോ മഹിമാവാന്മഹാബലഃ ।
ഗണാഃ പംച തഥൈവൈതേ പിതൄണാം പാപനാശനാഃ ॥ 34 ॥

സുഖദോ ധനദശ്ചാന്യോ ധര്മദോഽന്യശ്ച ഭൂതിദഃ ।
പിതൄണാം കഥ്യതേ ചൈവ തഥാ ഗണചതുഷ്ടയമ് ॥ 35 ॥

ഏകത്രിംശത്പിതൃഗണാ യൈർവ്യാപ്തമഖിലം ജഗത് ।
ത ഏവാത്ര പിതൃഗണാസ്തുഷ്യംതു ച മദാഹിതമ് ॥ 36 ॥

ഇതി ശ്രീ ഗരുഡപുരാണേ ഊനനവതിതമോഽധ്യായേ രുചികൃത പിതൃ സ്തോത്രമ് ।