ରୁଚିରୁଵାଚ ।
ନମସ୍ୟେଽହଂ ପିତୄନ୍ ଭକ୍ତ୍ୟା ୟେ ଵସଂତ୍ୟଧିଦେଵତାଃ ।
ଦେଵୈରପି ହି ତର୍ପ୍ୟଂତେ ୟେ ଶ୍ରାଦ୍ଧେଷୁ ସ୍ଵଧୋତ୍ତରୈଃ ॥ 1 ॥

ନମସ୍ୟେଽହଂ ପିତୄନ୍ ସ୍ଵର୍ଗେ ୟେ ତର୍ପ୍ୟଂତେ ମହର୍ଷିଭିଃ ।
ଶ୍ରାଦ୍ଧୈର୍ମନୋମୟୈର୍ଭକ୍ତ୍ୟା ଭୁକ୍ତିମୁକ୍ତିମଭୀପ୍ସୁଭିଃ ॥ 2 ॥

ନମସ୍ୟେଽହଂ ପିତୄନ୍ ସ୍ଵର୍ଗେ ସିଦ୍ଧାଃ ସଂତର୍ପୟଂତି ୟାନ୍ ।
ଶ୍ରାଦ୍ଧେଷୁ ଦିଵ୍ୟୈଃ ସକଲୈରୁପହାରୈରନୁତ୍ତମୈଃ ॥ 3 ॥

ନମସ୍ୟେଽହଂ ପିତୄନ୍ ଭକ୍ତ୍ୟା ୟେଽର୍ଚ୍ୟଂତେ ଗୁହ୍ୟକୈର୍ଦିଵି ।
ତନ୍ମୟତ୍ଵେନ ଵାଂଛଦ୍ଭିରୃଦ୍ଧିର୍ୟାତ୍ୟଂତିକୀଂ ପରାମ୍ ॥ 4 ॥

ନମସ୍ୟେଽହଂ ପିତୄନ୍ ମର୍ତ୍ୟୈରର୍ଚ୍ୟଂତେ ଭୁଵି ୟେ ସଦା ।
ଶ୍ରାଦ୍ଧେଷୁ ଶ୍ରଦ୍ଧୟାଭୀଷ୍ଟଲୋକପୁଷ୍ଟିପ୍ରଦାୟିନଃ ॥ 5 ॥

ନମସ୍ୟେଽହଂ ପିତୄନ୍ ଵିପ୍ରୈରର୍ଚ୍ୟଂତେ ଭୁଵି ୟେ ସଦା ।
ଵାଂଛିତାଭୀଷ୍ଟଲାଭାୟ ପ୍ରାଜାପତ୍ୟପ୍ରଦାୟିନଃ ॥ 6 ॥

ନମସ୍ୟେଽହଂ ପିତୄନ୍ ୟେ ଵୈ ତର୍ପ୍ୟଂତେଽରଣ୍ୟଵାସିଭିଃ ।
ଵନ୍ୟୈଃ ଶ୍ରାଦ୍ଧୈର୍ୟତାହାରୈସ୍ତପୋନିର୍ଧୂତକଲ୍ମଷୈଃ ॥ 7 ॥

ନମସ୍ୟେଽହଂ ପିତୄନ୍ ଵିପ୍ରୈର୍ନୈଷ୍ଠିକୈର୍ଧର୍ମଚାରିଭିଃ ।
ୟେ ସଂୟତାତ୍ମଭିର୍ନିତ୍ୟଂ ସଂତର୍ପ୍ୟଂତେ ସମାଧିଭିଃ ॥ 8 ॥

ନମସ୍ୟେଽହଂ ପିତୄନ୍ ଶ୍ରାଦ୍ଧୈ ରାଜନ୍ୟାସ୍ତର୍ପୟଂତି ୟାନ୍ ।
କଵ୍ୟୈରଶେଷୈର୍ଵିଧିଵଲ୍ଲୋକଦ୍ଵୟଫଲପ୍ରଦାନ୍ ॥ 9 ॥

ନମସ୍ୟେଽହଂ ପିତୄନ୍ ଵୈଶ୍ୟୈରର୍ଚ୍ୟଂତେ ଭୁଵି ୟେ ସଦା ।
ସ୍ଵକର୍ମାଭିରତୈର୍ନିତ୍ୟଂ ପୁଷ୍ପଧୂପାନ୍ନଵାରିଭିଃ ॥ 10 ॥

ନମସ୍ୟେଽହଂ ପିତୄନ୍ ଶ୍ରାଦ୍ଧେ ଶୂଦ୍ରୈରପି ଚ ଭକ୍ତିତଃ ।
ସଂତର୍ପ୍ୟଂତେ ଜଗତ୍କୃତ୍ସ୍ନଂ ନାମ୍ନା ଖ୍ୟାତାଃ ସୁକାଲିନଃ ॥ 11 ॥

ନମସ୍ୟେଽହଂ ପିତୄନ୍ ଶ୍ରାଦ୍ଧେ ପାତାଲେ ୟେ ମହାସୁରୈଃ ।
ସଂତର୍ପ୍ୟଂତେ ସୁଧାହାରାସ୍ତ୍ୟକ୍ତଦଂଭମଦୈଃ ସଦା ॥ 12 ॥

ନମସ୍ୟେଽହଂ ପିତୄନ୍ ଶ୍ରାଦ୍ଧୈରର୍ଚ୍ୟଂତେ ୟେ ରସାତଲେ ।
ଭୋଗୈରଶେଷୈର୍ଵିଧିଵନ୍ନାଗୈଃ କାମାନଭୀପ୍ସୁଭିଃ ॥ 13 ॥

ନମସ୍ୟେଽହଂ ପିତୄନ୍ ଶ୍ରାଦ୍ଧୈଃ ସର୍ପୈଃ ସଂତର୍ପିତାନ୍ସଦା ।
ତତ୍ରୈଵ ଵିଧିଵନ୍ମଂତ୍ରଭୋଗସଂପତ୍ସମନ୍ଵିତୈଃ ॥ 14 ॥

ପିତୄନ୍ନମସ୍ୟେ ନିଵସଂତି ସାକ୍ଷା-
-ଦ୍ୟେ ଦେଵଲୋକେଽଥ ମହୀତଲେ ଵା ।
ତଥାଽଂତରିକ୍ଷେ ଚ ସୁରାରିପୂଜ୍ୟା-
-ସ୍ତେ ମେ ପ୍ରତୀଚ୍ଛଂତୁ ମନୋପନୀତମ୍ ॥ 15 ॥

ପିତୄନ୍ନମସ୍ୟେ ପରମାର୍ଥଭୂତା
ୟେ ଵୈ ଵିମାନେ ନିଵସଂତ୍ୟମୂର୍ତାଃ ।
ୟଜଂତି ୟାନସ୍ତମଲୈର୍ମନୋଭି-
-ର୍ୟୋଗୀଶ୍ଵରାଃ କ୍ଲେଶଵିମୁକ୍ତିହେତୂନ୍ ॥ 16 ॥

ପିତୄନ୍ନମସ୍ୟେ ଦିଵି ୟେ ଚ ମୂର୍ତାଃ
ସ୍ଵଧାଭୁଜଃ କାମ୍ୟଫଲାଭିସଂଧୌ ।
ପ୍ରଦାନଶକ୍ତାଃ ସକଲେପ୍ସିତାନାଂ
ଵିମୁକ୍ତିଦା ୟେଽନଭିସଂହିତେଷୁ ॥ 17 ॥

ତୃପ୍ୟଂତୁ ତେଽସ୍ମିନ୍ପିତରଃ ସମସ୍ତା
ଇଚ୍ଛାଵତାଂ ୟେ ପ୍ରଦିଶଂତି କାମାନ୍ ।
ସୁରତ୍ଵମିଂଦ୍ରତ୍ଵମିତୋଽଧିକଂ ଵା
ଗଜାଶ୍ଵରତ୍ନାନି ମହାଗୃହାଣି ॥ 18 ॥

ସୋମସ୍ୟ ୟେ ରଶ୍ମିଷୁ ୟେଽର୍କବିଂବେ
ଶୁକ୍ଲେ ଵିମାନେ ଚ ସଦା ଵସଂତି ।
ତୃପ୍ୟଂତୁ ତେଽସ୍ମିନ୍ପିତରୋଽନ୍ନତୋୟୈ-
-ର୍ଗଂଧାଦିନା ପୁଷ୍ଟିମିତୋ ଵ୍ରଜଂତୁ ॥ 19 ॥

ୟେଷାଂ ହୁତେଽଗ୍ନୌ ହଵିଷା ଚ ତୃପ୍ତି-
-ର୍ୟେ ଭୁଂଜତେ ଵିପ୍ରଶରୀରସଂସ୍ଥାଃ ।
ୟେ ପିଂଡଦାନେନ ମୁଦଂ ପ୍ରୟାଂତି
ତୃପ୍ୟଂତୁ ତେଽସ୍ମିନ୍ପିତରୋଽନ୍ନତୋୟୈଃ ॥ 20 ॥

ୟେ ଖଡ୍ଗମାଂସେନ ସୁରୈରଭୀଷ୍ଟୈଃ
କୃଷ୍ଣୈସ୍ତିଲୈର୍ଦିଵ୍ୟ ମନୋହରୈଶ୍ଚ ।
କାଲେନ ଶାକେନ ମହର୍ଷିଵର୍ୟୈଃ
ସଂପ୍ରୀଣିତାସ୍ତେ ମୁଦମତ୍ର ୟାଂତୁ ॥ 21 ॥

କଵ୍ୟାନ୍ୟଶେଷାଣି ଚ ୟାନ୍ୟଭୀଷ୍ଟା-
-ନ୍ୟତୀଵ ତେଷାଂ ମମ ପୂଜିତାନାମ୍ ।
ତେଷାଂଚ ସାନ୍ନିଧ୍ୟମିହାସ୍ତୁ ପୁଷ୍ପ-
-ଗଂଧାଂବୁଭୋଜ୍ୟେଷୁ ମୟା କୃତେଷୁ ॥ 22 ॥

ଦିନେ ଦିନେ ୟେ ପ୍ରତିଗୃହ୍ଣତେଽର୍ଚାଂ
ମାସାଂତପୂଜ୍ୟା ଭୁଵି ୟେଽଷ୍ଟକାସୁ ।
ୟେ ଵତ୍ସରାଂତେଽଭ୍ୟୁଦୟେ ଚ ପୂଜ୍ୟାଃ
ପ୍ରୟାଂତୁ ତେ ମେ ପିତରୋଽତ୍ର ତୁଷ୍ଟିମ୍ ॥ 23 ॥

ପୂଜ୍ୟା ଦ୍ଵିଜାନାଂ କୁମୁଦେଂଦୁଭାସୋ
ୟେ କ୍ଷତ୍ରିୟାଣାଂ ଜ୍ଵଲନାର୍କଵର୍ଣାଃ ।
ତଥା ଵିଶାଂ ୟେ କନକାଵଦାତା
ନୀଲୀପ୍ରଭାଃ ଶୂଦ୍ରଜନସ୍ୟ ୟେ ଚ ॥ 24 ॥

ତେଽସ୍ମିନ୍ସମସ୍ତା ମମ ପୁଷ୍ପଗଂଧ-
-ଧୂପାଂବୁଭୋଜ୍ୟାଦିନିଵେଦନେନ ।
ତଥାଽଗ୍ନିହୋମେନ ଚ ୟାଂତି ତୃପ୍ତିଂ
ସଦା ପିତୃଭ୍ୟଃ ପ୍ରଣତୋଽସ୍ମି ତେଭ୍ୟଃ ॥ 25 ॥

ୟେ ଦେଵପୂର୍ଵାଣ୍ୟଭିତୃପ୍ତିହେତୋ-
-ରଶ୍ନଂତି କଵ୍ୟାନି ଶୁଭାହୃତାନି ।
ତୃପ୍ତାଶ୍ଚ ୟେ ଭୂତିସୃଜୋ ଭଵଂତି
ତୃପ୍ୟଂତୁ ତେଽସ୍ମିନ୍ପ୍ରଣତୋଽସ୍ମି ତେଭ୍ୟଃ ॥ 26 ॥

ରକ୍ଷାଂସି ଭୂତାନ୍ୟସୁରାଂସ୍ତଥୋଗ୍ରା-
-ନ୍ନିର୍ନାଶୟଂତୁ ତ୍ଵଶିଵଂ ପ୍ରଜାନାମ୍ ।
ଆଦ୍ୟାଃ ସୁରାଣାମମରେଶପୂଜ୍ୟା-
-ସ୍ତୃପ୍ୟଂତୁ ତେଽସ୍ମିନ୍ପ୍ରଣତୋଽସ୍ମିତେଭ୍ୟଃ ॥ 27 ॥

ଅଗ୍ନିସ୍ଵାତ୍ତା ବର୍ହିଷଦ ଆଜ୍ୟପାଃ ସୋମପାସ୍ତଥା ।
ଵ୍ରଜଂତୁ ତୃପ୍ତିଂ ଶ୍ରାଦ୍ଧେଽସ୍ମିନ୍ପିତରସ୍ତର୍ପିତା ମୟା ॥ 28 ॥

ଅଗ୍ନିସ୍ଵାତ୍ତାଃ ପିତୃଗଣାଃ ପ୍ରାଚୀଂ ରକ୍ଷଂତୁ ମେ ଦିଶମ୍ ।
ତଥା ବର୍ହିଷଦଃ ପାଂତୁ ୟାମ୍ୟାଂ ମେ ପିତରଃ ସଦା ।
ପ୍ରତୀଚୀମାଜ୍ୟପାସ୍ତଦ୍ଵଦୁଦୀଚୀମପି ସୋମପାଃ ॥ 29 ॥

ରକ୍ଷୋଭୂତପିଶାଚେଭ୍ୟସ୍ତଥୈଵାସୁରଦୋଷତଃ ।
ସର୍ଵତଃ ପିତରୋ ରକ୍ଷାଂ କୁର୍ଵଂତୁ ମମ ନିତ୍ୟଶଃ ॥ 30 ॥

ଵିଶ୍ଵୋ ଵିଶ୍ଵଭୁଗାରାଧ୍ୟୋ ଧର୍ମୋ ଧନ୍ୟଃ ଶୁଭାନନଃ ।
ଭୂତିଦୋ ଭୂତିକୃଦ୍ଭୂତିଃ ପିତୄଣାଂ ୟେ ଗଣା ନଵ ॥ 31 ॥

କଲ୍ୟାଣଃ କଲ୍ୟଦଃ କର୍ତା କଲ୍ୟଃ କଲ୍ୟତରାଶ୍ରୟଃ ।
କଲ୍ୟତାହେତୁରନଘଃ ଷଡିମେ ତେ ଗଣାଃ ସ୍ମୃତାଃ ॥ 32 ॥

ଵରୋ ଵରେଣ୍ୟୋ ଵରଦସ୍ତୁଷ୍ଟିଦଃ ପୁଷ୍ଟିଦସ୍ତଥା ।
ଵିଶ୍ଵପାତା ତଥା ଧାତା ସପ୍ତୈତେ ଚ ଗଣାଃ ସ୍ମୃତାଃ ॥ 33 ॥

ମହାନ୍ମହାତ୍ମା ମହିତୋ ମହିମାଵାନ୍ମହାବଲଃ ।
ଗଣାଃ ପଂଚ ତଥୈଵୈତେ ପିତୄଣାଂ ପାପନାଶନାଃ ॥ 34 ॥

ସୁଖଦୋ ଧନଦଶ୍ଚାନ୍ୟୋ ଧର୍ମଦୋଽନ୍ୟଶ୍ଚ ଭୂତିଦଃ ।
ପିତୄଣାଂ କଥ୍ୟତେ ଚୈଵ ତଥା ଗଣଚତୁଷ୍ଟୟମ୍ ॥ 35 ॥

ଏକତ୍ରିଂଶତ୍ପିତୃଗଣା ୟୈର୍ଵ୍ୟାପ୍ତମଖିଲଂ ଜଗତ୍ ।
ତ ଏଵାତ୍ର ପିତୃଗଣାସ୍ତୁଷ୍ୟଂତୁ ଚ ମଦାହିତମ୍ ॥ 36 ॥

ଇତି ଶ୍ରୀ ଗରୁଡପୁରାଣେ ଊନନଵତିତମୋଽଧ୍ୟାୟେ ରୁଚିକୃତ ପିତୃ ସ୍ତୋତ୍ରମ୍ ।