રુચિરુવાચ ।
નમસ્યેઽહં પિતૄન્ ભક્ત્યા યે વસંત્યધિદેવતાઃ ।
દેવૈરપિ હિ તર્પ્યંતે યે શ્રાદ્ધેષુ સ્વધોત્તરૈઃ ॥ 1 ॥

નમસ્યેઽહં પિતૄન્ સ્વર્ગે યે તર્પ્યંતે મહર્ષિભિઃ ।
શ્રાદ્ધૈર્મનોમયૈર્ભક્ત્યા ભુક્તિમુક્તિમભીપ્સુભિઃ ॥ 2 ॥

નમસ્યેઽહં પિતૄન્ સ્વર્ગે સિદ્ધાઃ સંતર્પયંતિ યાન્ ।
શ્રાદ્ધેષુ દિવ્યૈઃ સકલૈરુપહારૈરનુત્તમૈઃ ॥ 3 ॥

નમસ્યેઽહં પિતૄન્ ભક્ત્યા યેઽર્ચ્યંતે ગુહ્યકૈર્દિવિ ।
તન્મયત્વેન વાંછદ્ભિરૃદ્ધિર્યાત્યંતિકીં પરામ્ ॥ 4 ॥

નમસ્યેઽહં પિતૄન્ મર્ત્યૈરર્ચ્યંતે ભુવિ યે સદા ।
શ્રાદ્ધેષુ શ્રદ્ધયાભીષ્ટલોકપુષ્ટિપ્રદાયિનઃ ॥ 5 ॥

નમસ્યેઽહં પિતૄન્ વિપ્રૈરર્ચ્યંતે ભુવિ યે સદા ।
વાંછિતાભીષ્ટલાભાય પ્રાજાપત્યપ્રદાયિનઃ ॥ 6 ॥

નમસ્યેઽહં પિતૄન્ યે વૈ તર્પ્યંતેઽરણ્યવાસિભિઃ ।
વન્યૈઃ શ્રાદ્ધૈર્યતાહારૈસ્તપોનિર્ધૂતકલ્મષૈઃ ॥ 7 ॥

નમસ્યેઽહં પિતૄન્ વિપ્રૈર્નૈષ્ઠિકૈર્ધર્મચારિભિઃ ।
યે સંયતાત્મભિર્નિત્યં સંતર્પ્યંતે સમાધિભિઃ ॥ 8 ॥

નમસ્યેઽહં પિતૄન્ શ્રાદ્ધૈ રાજન્યાસ્તર્પયંતિ યાન્ ।
કવ્યૈરશેષૈર્વિધિવલ્લોકદ્વયફલપ્રદાન્ ॥ 9 ॥

નમસ્યેઽહં પિતૄન્ વૈશ્યૈરર્ચ્યંતે ભુવિ યે સદા ।
સ્વકર્માભિરતૈર્નિત્યં પુષ્પધૂપાન્નવારિભિઃ ॥ 10 ॥

નમસ્યેઽહં પિતૄન્ શ્રાદ્ધે શૂદ્રૈરપિ ચ ભક્તિતઃ ।
સંતર્પ્યંતે જગત્કૃત્સ્નં નામ્ના ખ્યાતાઃ સુકાલિનઃ ॥ 11 ॥

નમસ્યેઽહં પિતૄન્ શ્રાદ્ધે પાતાલે યે મહાસુરૈઃ ।
સંતર્પ્યંતે સુધાહારાસ્ત્યક્તદંભમદૈઃ સદા ॥ 12 ॥

નમસ્યેઽહં પિતૄન્ શ્રાદ્ધૈરર્ચ્યંતે યે રસાતલે ।
ભોગૈરશેષૈર્વિધિવન્નાગૈઃ કામાનભીપ્સુભિઃ ॥ 13 ॥

નમસ્યેઽહં પિતૄન્ શ્રાદ્ધૈઃ સર્પૈઃ સંતર્પિતાન્સદા ।
તત્રૈવ વિધિવન્મંત્રભોગસંપત્સમન્વિતૈઃ ॥ 14 ॥

પિતૄન્નમસ્યે નિવસંતિ સાક્ષા-
-દ્યે દેવલોકેઽથ મહીતલે વા ।
તથાઽંતરિક્ષે ચ સુરારિપૂજ્યા-
-સ્તે મે પ્રતીચ્છંતુ મનોપનીતમ્ ॥ 15 ॥

પિતૄન્નમસ્યે પરમાર્થભૂતા
યે વૈ વિમાને નિવસંત્યમૂર્તાઃ ।
યજંતિ યાનસ્તમલૈર્મનોભિ-
-ર્યોગીશ્વરાઃ ક્લેશવિમુક્તિહેતૂન્ ॥ 16 ॥

પિતૄન્નમસ્યે દિવિ યે ચ મૂર્તાઃ
સ્વધાભુજઃ કામ્યફલાભિસંધૌ ।
પ્રદાનશક્તાઃ સકલેપ્સિતાનાં
વિમુક્તિદા યેઽનભિસંહિતેષુ ॥ 17 ॥

તૃપ્યંતુ તેઽસ્મિન્પિતરઃ સમસ્તા
ઇચ્છાવતાં યે પ્રદિશંતિ કામાન્ ।
સુરત્વમિંદ્રત્વમિતોઽધિકં વા
ગજાશ્વરત્નાનિ મહાગૃહાણિ ॥ 18 ॥

સોમસ્ય યે રશ્મિષુ યેઽર્કબિંબે
શુક્લે વિમાને ચ સદા વસંતિ ।
તૃપ્યંતુ તેઽસ્મિન્પિતરોઽન્નતોયૈ-
-ર્ગંધાદિના પુષ્ટિમિતો વ્રજંતુ ॥ 19 ॥

યેષાં હુતેઽગ્નૌ હવિષા ચ તૃપ્તિ-
-ર્યે ભુંજતે વિપ્રશરીરસંસ્થાઃ ।
યે પિંડદાનેન મુદં પ્રયાંતિ
તૃપ્યંતુ તેઽસ્મિન્પિતરોઽન્નતોયૈઃ ॥ 20 ॥

યે ખડ્ગમાંસેન સુરૈરભીષ્ટૈઃ
કૃષ્ણૈસ્તિલૈર્દિવ્ય મનોહરૈશ્ચ ।
કાલેન શાકેન મહર્ષિવર્યૈઃ
સંપ્રીણિતાસ્તે મુદમત્ર યાંતુ ॥ 21 ॥

કવ્યાન્યશેષાણિ ચ યાન્યભીષ્ટા-
-ન્યતીવ તેષાં મમ પૂજિતાનામ્ ।
તેષાંચ સાન્નિધ્યમિહાસ્તુ પુષ્પ-
-ગંધાંબુભોજ્યેષુ મયા કૃતેષુ ॥ 22 ॥

દિને દિને યે પ્રતિગૃહ્ણતેઽર્ચાં
માસાંતપૂજ્યા ભુવિ યેઽષ્ટકાસુ ।
યે વત્સરાંતેઽભ્યુદયે ચ પૂજ્યાઃ
પ્રયાંતુ તે મે પિતરોઽત્ર તુષ્ટિમ્ ॥ 23 ॥

પૂજ્યા દ્વિજાનાં કુમુદેંદુભાસો
યે ક્ષત્રિયાણાં જ્વલનાર્કવર્ણાઃ ।
તથા વિશાં યે કનકાવદાતા
નીલીપ્રભાઃ શૂદ્રજનસ્ય યે ચ ॥ 24 ॥

તેઽસ્મિન્સમસ્તા મમ પુષ્પગંધ-
-ધૂપાંબુભોજ્યાદિનિવેદનેન ।
તથાઽગ્નિહોમેન ચ યાંતિ તૃપ્તિં
સદા પિતૃભ્યઃ પ્રણતોઽસ્મિ તેભ્યઃ ॥ 25 ॥

યે દેવપૂર્વાણ્યભિતૃપ્તિહેતો-
-રશ્નંતિ કવ્યાનિ શુભાહૃતાનિ ।
તૃપ્તાશ્ચ યે ભૂતિસૃજો ભવંતિ
તૃપ્યંતુ તેઽસ્મિન્પ્રણતોઽસ્મિ તેભ્યઃ ॥ 26 ॥

રક્ષાંસિ ભૂતાન્યસુરાંસ્તથોગ્રા-
-ન્નિર્નાશયંતુ ત્વશિવં પ્રજાનામ્ ।
આદ્યાઃ સુરાણામમરેશપૂજ્યા-
-સ્તૃપ્યંતુ તેઽસ્મિન્પ્રણતોઽસ્મિતેભ્યઃ ॥ 27 ॥

અગ્નિસ્વાત્તા બર્હિષદ આજ્યપાઃ સોમપાસ્તથા ।
વ્રજંતુ તૃપ્તિં શ્રાદ્ધેઽસ્મિન્પિતરસ્તર્પિતા મયા ॥ 28 ॥

અગ્નિસ્વાત્તાઃ પિતૃગણાઃ પ્રાચીં રક્ષંતુ મે દિશમ્ ।
તથા બર્હિષદઃ પાંતુ યામ્યાં મે પિતરઃ સદા ।
પ્રતીચીમાજ્યપાસ્તદ્વદુદીચીમપિ સોમપાઃ ॥ 29 ॥

રક્ષોભૂતપિશાચેભ્યસ્તથૈવાસુરદોષતઃ ।
સર્વતઃ પિતરો રક્ષાં કુર્વંતુ મમ નિત્યશઃ ॥ 30 ॥

વિશ્વો વિશ્વભુગારાધ્યો ધર્મો ધન્યઃ શુભાનનઃ ।
ભૂતિદો ભૂતિકૃદ્ભૂતિઃ પિતૄણાં યે ગણા નવ ॥ 31 ॥

કલ્યાણઃ કલ્યદઃ કર્તા કલ્યઃ કલ્યતરાશ્રયઃ ।
કલ્યતાહેતુરનઘઃ ષડિમે તે ગણાઃ સ્મૃતાઃ ॥ 32 ॥

વરો વરેણ્યો વરદસ્તુષ્ટિદઃ પુષ્ટિદસ્તથા ।
વિશ્વપાતા તથા ધાતા સપ્તૈતે ચ ગણાઃ સ્મૃતાઃ ॥ 33 ॥

મહાન્મહાત્મા મહિતો મહિમાવાન્મહાબલઃ ।
ગણાઃ પંચ તથૈવૈતે પિતૄણાં પાપનાશનાઃ ॥ 34 ॥

સુખદો ધનદશ્ચાન્યો ધર્મદોઽન્યશ્ચ ભૂતિદઃ ।
પિતૄણાં કથ્યતે ચૈવ તથા ગણચતુષ્ટયમ્ ॥ 35 ॥

એકત્રિંશત્પિતૃગણા યૈર્વ્યાપ્તમખિલં જગત્ ।
ત એવાત્ર પિતૃગણાસ્તુષ્યંતુ ચ મદાહિતમ્ ॥ 36 ॥

ઇતિ શ્રી ગરુડપુરાણે ઊનનવતિતમોઽધ્યાયે રુચિકૃત પિતૃ સ્તોત્રમ્ ।