രുചിരുവാച ।
അര്ചിതാനാമമൂര്താനാം പിതൄണാം ദീപ്തതേജസാമ് ।
നമസ്യാമി സദാ തേഷാം ധ്യാനിനാം ദിവ്യചക്ഷുഷാമ് ॥ 1 ॥

ഇംദ്രാദീനാം ച നേതാരോ ദക്ഷമാരീചയോസ്തഥാ ।
സപ്തര്ഷീണാം തഥാന്യേഷാം താന്നമസ്യാമി കാമദാന് ॥ 2 ॥

മന്വാദീനാം ച നേതാരഃ സൂര്യാചംദ്രമസോസ്തഥാ ।
താന്നമസ്യാമ്യഹം സർവാന് പിതൄനപ്യുദധാവപി ॥ 3 ॥

നക്ഷത്രാണാം ഗ്രഹാണാം ച വായ്വഗ്ന്യോര്നഭസസ്തഥാ ।
ദ്യാവാപൃഥിവ്യോശ്ച തഥാ നമസ്യാമി കൃതാംജലിഃ ॥ 4 ॥

ദേവര്ഷീണാം ജനിതൄംശ്ച സർവലോക നമസ്കൃതാന് ।
അക്ഷയ്യസ്യ സദാ ദാതൄന് നമസ്യേഹം കൃതാംജലിഃ ॥ 5 ॥

പ്രജാപതേഃ കശ്യപായ സോമായ വരുണായ ച ।
യോഗേശ്വരേഭ്യശ്ച സദാ നമസ്യാമി കൃതാംജലിഃ ॥ 6 ॥

നമോ ഗണേഭ്യഃ സപ്തഭ്യസ്തഥാ ലോകേഷു സപ്തസു ।
സ്വയംഭുവേ നമസ്യാമി ബ്രഹ്മണേ യോഗചക്ഷുഷേ ॥ 7 ॥

സോമാധാരാന് പിതൃഗണാന് യോഗമൂര്തിധരാംസ്തഥാ ।
നമസ്യാമി തഥാ സോമം പിതരം ജഗതാമഹമ് ॥ 8 ॥

അഗ്നിരൂപാംസ്തഥൈവാന്യാന് നമസ്യാമി പിതൄനഹമ് ।
അഗ്നിസോമമയം വിശ്വം യത ഏതദശേഷതഃ ॥ 9 ॥

യേ ച തേജസി യേ ചൈതേ സോമസൂര്യാഗ്നിമൂര്തയഃ ।
ജഗത്സ്വരൂപിണശ്ചൈവ തഥാ ബ്രഹ്മസ്വരൂപിണഃ ॥ 10 ॥

തേഭ്യോഽഖിലേഭ്യോ യോഗിഭ്യഃ പിതൃഭ്യോ യതമാനസഃ ।
നമോ നമോ നമസ്തേഽസ്തു പ്രസീദംതു സ്വധാഭുജഃ ॥ 11 ॥

ഇതി ശ്രീ ഗരുഡപുരാണേ ഊനനവതിതമോഽധ്യായേ രുചികൃത ദ്വിതീയ പിതൃ സ്തോത്രമ് ।