ରୁଚିରୁଵାଚ ।
ଅର୍ଚିତାନାମମୂର୍ତାନାଂ ପିତୄଣାଂ ଦୀପ୍ତତେଜସାମ୍ ।
ନମସ୍ୟାମି ସଦା ତେଷାଂ ଧ୍ୟାନିନାଂ ଦିଵ୍ୟଚକ୍ଷୁଷାମ୍ ॥ 1 ॥

ଇଂଦ୍ରାଦୀନାଂ ଚ ନେତାରୋ ଦକ୍ଷମାରୀଚୟୋସ୍ତଥା ।
ସପ୍ତର୍ଷୀଣାଂ ତଥାନ୍ୟେଷାଂ ତାନ୍ନମସ୍ୟାମି କାମଦାନ୍ ॥ 2 ॥

ମନ୍ଵାଦୀନାଂ ଚ ନେତାରଃ ସୂର୍ୟାଚଂଦ୍ରମସୋସ୍ତଥା ।
ତାନ୍ନମସ୍ୟାମ୍ୟହଂ ସର୍ଵାନ୍ ପିତୄନପ୍ୟୁଦଧାଵପି ॥ 3 ॥

ନକ୍ଷତ୍ରାଣାଂ ଗ୍ରହାଣାଂ ଚ ଵାୟ୍ଵଗ୍ନ୍ୟୋର୍ନଭସସ୍ତଥା ।
ଦ୍ୟାଵାପୃଥିଵ୍ୟୋଶ୍ଚ ତଥା ନମସ୍ୟାମି କୃତାଂଜଲିଃ ॥ 4 ॥

ଦେଵର୍ଷୀଣାଂ ଜନିତୄଂଶ୍ଚ ସର୍ଵଲୋକ ନମସ୍କୃତାନ୍ ।
ଅକ୍ଷୟ୍ୟସ୍ୟ ସଦା ଦାତୄନ୍ ନମସ୍ୟେହଂ କୃତାଂଜଲିଃ ॥ 5 ॥

ପ୍ରଜାପତେଃ କଶ୍ୟପାୟ ସୋମାୟ ଵରୁଣାୟ ଚ ।
ୟୋଗେଶ୍ଵରେଭ୍ୟଶ୍ଚ ସଦା ନମସ୍ୟାମି କୃତାଂଜଲିଃ ॥ 6 ॥

ନମୋ ଗଣେଭ୍ୟଃ ସପ୍ତଭ୍ୟସ୍ତଥା ଲୋକେଷୁ ସପ୍ତସୁ ।
ସ୍ଵୟଂଭୁଵେ ନମସ୍ୟାମି ବ୍ରହ୍ମଣେ ୟୋଗଚକ୍ଷୁଷେ ॥ 7 ॥

ସୋମାଧାରାନ୍ ପିତୃଗଣାନ୍ ୟୋଗମୂର୍ତିଧରାଂସ୍ତଥା ।
ନମସ୍ୟାମି ତଥା ସୋମଂ ପିତରଂ ଜଗତାମହମ୍ ॥ 8 ॥

ଅଗ୍ନିରୂପାଂସ୍ତଥୈଵାନ୍ୟାନ୍ ନମସ୍ୟାମି ପିତୄନହମ୍ ।
ଅଗ୍ନିସୋମମୟଂ ଵିଶ୍ଵଂ ୟତ ଏତଦଶେଷତଃ ॥ 9 ॥

ୟେ ଚ ତେଜସି ୟେ ଚୈତେ ସୋମସୂର୍ୟାଗ୍ନିମୂର୍ତୟଃ ।
ଜଗତ୍ସ୍ଵରୂପିଣଶ୍ଚୈଵ ତଥା ବ୍ରହ୍ମସ୍ଵରୂପିଣଃ ॥ 10 ॥

ତେଭ୍ୟୋଽଖିଲେଭ୍ୟୋ ୟୋଗିଭ୍ୟଃ ପିତୃଭ୍ୟୋ ୟତମାନସଃ ।
ନମୋ ନମୋ ନମସ୍ତେଽସ୍ତୁ ପ୍ରସୀଦଂତୁ ସ୍ଵଧାଭୁଜଃ ॥ 11 ॥

ଇତି ଶ୍ରୀ ଗରୁଡପୁରାଣେ ଊନନଵତିତମୋଽଧ୍ୟାୟେ ରୁଚିକୃତ ଦ୍ଵିତୀୟ ପିତୃ ସ୍ତୋତ୍ରମ୍ ।