పాణ్డ్యభూపతీన్ద్రపూర్వపుణ్యమోహనాకృతే
పణ్డితార్చితాఙ్ఘ్రిపుణ్డరీక పావనాకృతే ।
పూర్ణచన్ద్రతుణ్డవేత్రదణ్డవీర్యవారిధే
పూర్ణపుష్కలాసమేత భూతనాథ పాహి మామ్ ॥ 1 ॥

ఆదిశఙ్కరాచ్యుతప్రియాత్మసమ్భవ ప్రభో
ఆదిభూతనాథ సాధుభక్తచిన్తితప్రద ।
భూతిభూష వేదఘోషపారితోష శాశ్వత
పూర్ణపుష్కలాసమేత భూతనాథ పాహి మామ్ ॥ 2 ॥

పఞ్చబాణకోటికోమలాకృతే కృపానిధే
పఞ్చగవ్యపాయసాన్నపానకాదిమోదక ।
పఞ్చభూతసఞ్చయ ప్రపఞ్చభూతపాలక
పూర్ణపుష్కలాసమేత భూతనాథ పాహి మామ్ ॥ 3 ॥

చన్ద్రసూర్యవీతిహోత్రనేత్ర నేత్రమోహన
సాన్ద్రసున్దరస్మితార్ద్ర కేసరీన్ద్రవాహన ।
ఇన్ద్రవన్దనీయపాద సాధువృన్దజీవన
పూర్ణపుష్కలాసమేత భూతనాథ పాహి మామ్ ॥ 4 ॥

వీరబాహువర్ణనీయవీర్యశౌర్యవారిధే
వారిజాసనాదిదేవవన్ద్య సున్దరాకృతే ।
వారణేన్ద్రవాజిసింహవాహ భక్తశేవధే
పూర్ణపుష్కలాసమేత భూతనాథ పాహి మామ్ ॥ 5 ॥

అత్యుదారభక్తచిత్తరఙ్గనర్తనప్రభో
నిత్యశుద్ధనిర్మలాద్వితీయ ధర్మపాలక ।
సత్యరూప ముక్తిరూప సర్వదేవతాత్మక
పూర్ణపుష్కలాసమేత భూతనాథ పాహి మామ్ ॥ 6 ॥

సామగానలోల శాన్తశీల ధర్మపాలక
సోమసున్దరాస్య సాధుపూజనీయపాదుక ।
సామదానభేదదణ్డశాస్త్రనీతిబోధక
పూర్ణపుష్కలసమేత భూతనాథ పాహి మామ్ ॥ 7 ॥

సుప్రసన్నదేవదేవ సద్గతిప్రదాయక
చిత్ప్రకాశ ధర్మపాల సర్వభూతనాయక ।
సుప్రసిద్ధ పఞ్చశైలసన్నికేతనర్తక
పూర్ణపుష్కలాసమేత భూతనాథ పాహి మామ్ ॥ 8 ॥

శూలచాపబాణఖడ్గవజ్రశక్తిశోభిత
బాలసూర్యకోటిభాసురాఙ్గ భూతసేవిత ।
కాలచక్ర సమ్ప్రవృత్తి కల్పనా సమన్విత
పూర్ణపుష్కలాసమేత భూతనాథ పాహి మామ్ ॥ 9 ॥

అద్భుతాత్మబోధసత్సనాతనోపదేశక
బుద్బుదోపమప్రపఞ్చవిభ్రమప్రకాశక ।
సప్రథప్రగల్భచిత్ప్రకాశ దివ్యదేశిక
పూర్ణపుష్కలాసమేత భూతనాథ పాహి మామ్ ॥ 10 ॥

ఇతి శ్రీ భూతనాథ దశకమ్ ।